li saaj aj David rik’in xjok’

Laj David ut laj Goliat, xb’aan laj Steve Nethercott

13–19 junio

1 Samuel 8–10; 13; 15–18

Li yalok, a’an re li Qaawa’

Naq nakawresi li tzolok, chijultiko’q aawe naq naru naq eb’ li komon sa’ li tzoleb’aal ak wan k’a’ru xe’xk’ul rik’in rilb’al ru li loq laj hu sa’ ochoch. K’a’ru naru taab’aanu re xkawob’resinkil li k’a’ru ak xe’xk’ul?

Tz’iib’a li nakak’oxla

reetalil li wotzok

Xkanab’ankileb’ chi wotzok

Re xkawob’resinkileb’ xch’ool li komon sa’ li tzoleb’aal re te’xwotz li xe’xtaw ru chiru li xamaan a’in, k’eheb’ xhoonal re te’xk’oxla li reek’ahom chirix 1 Samuel 8–10; 13; 15–18. Chirix a’an, patz’ reheb’ naq te’xwotz jun raqal li kixk’e xna’leb’eb’.

reetalil li k’utuk

Xk’utb’al li tzolʼlebʼ

1 Samuel 9:15–17; 10:1–12; 16:1–13

Li Dios naxb’oqeb’ li kristiaan rik’in profeetil aatin re naq te’k’anjelaq sa’ lix awa’b’ejihom.

• Li seraq’ b’ar wi’ li Dios kixsik’ ru laj Sawlo ut laj David rik’in profeetil aatin ut k’utb’esinb’il na’leb’ naru naxtenq’aheb’ li komon re te’xnaw chan ru naq neke’sik’e’ ru li kristiaan li neke’k’anjelak sa’ li Iglees anajwan. Naru taapatz’ reheb’ li komon naq te’ril 1 Samuel 9:15–17; 10:1–12; ut 16:1–13, ut te’xsik’eb’ li raqal li te’tenq’anq reheb’ chixtawb’al ru li naraj naxye “b’oqb’il xb’aan li Dios” (Eb’ lix Raqalil li Paab’aal 1:5). K’a’ru xjalanil naxk’e choq’ reheb’ li kristiaan li b’oqb’ileb’ ut eb’ li neke’xaqab’ank re, xnawb’al naq li Dios naxsik’eb’ ru re te’k’anjelaq sa’ lix iglees?

  laj Samuel naxyul laj Sawlo

  Xjalam-uuch laj Samuel naq naxyul laj Sawlo, © Lifeway Collection/licensed from goodsalt.com

1 Samuel 13:5–14; 15

“Jwal us paab’ank chiru mayejak”

• Re xtz’ilb’al rix k’a’ut aajel ru paab’ank chiru li Dios, naru taapatz’ reheb’ li komon naq te’ril 1 Samuel 13:5–14 ut te’xsik’ xb’aanuhom li xt’anok re laj Sawlo. K’a’ru naru naqatzol rik’in lix paaltil laj Sawlo?

• Us ta ink’a’ naqanaw chi tz’aqal k’a’ut naq laj Sawlo kitaqlaak chixkamsinkileb’ laj Amalekita ut lix xuleb’, naru taqataw qana’leb’ rik’in lix b’aanuhom chirix li taqlahom a’an. Re xtenqankileb’ li komon chixtzolb’aleb’ li na’leb’ a’an, naru nakatz’iib’a chiru li pizarron Jwal us paab’ank chiru … ut taaye reheb’ naq te’xk’oxla li aatin a’an naq yooqeb’ chirilb’al li xk’ulman sa’ 1 Samuel 15. K’a’ru junaq chaab’il na’leb’ li naqasik’ ru xb’aanunkil sa’ li qayu’am ruuchil xpaab’ankil li Dios? K’a’ut naq li paab’ank chiru li Dios a’an jwal us chiru jalan chik li chaab’il na’leb’?

1 Samuel 16:6–7

“Li Qaawa’ naril li ch’oolej”

• Chirix rilb’al ru 1 Samuel 16:6–7, eb’ li komon naru te’xwotz xna’leb’ chirix li naraj naxye “naril li ch’oolej” (raqal 7). Chan ru naru taqatzol ilok jo’ na’ilok li Qaawa’? Eb’ li komon naru te’xwotz li xe’xk’ul sa’ xyu’am li xk’ut chiruheb’ naq aajel ru rilb’al li ch’oolej chiru rilb’al li nak’utun chirix.

1 Samuel 17

Li Qaawa’ naru nokoxtenq’a chixnumsinkil chixjunil li yalb’a-ix.

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, li komon maare ak xe’k’oxla li raatineb’ li kristiaan sa’ 1 Samuel 17. Naru taapatz’ reheb’ li komon naq te’xwotz li xe’xtaw ru. K’a’ru xe’xtaw ru chirix laj David?

• Maare wan reheb’ li komon li wan xch’a’ajkilal q’axal nim, chanchan laj Goliat choq’ re laj Sawlo ut lix teep aj pleet. Chan ru naru taawoksi li seraq’ chirix laj David ut laj Goliat re xtenq’ankileb’ chixnumsinkil li ch’a’ajkilal rik’in paab’aal chirix li Qaawa’? Naru taak’ut jun xjalam-uuch laj David ut laj Goliat (jo’ li natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Chirix a’an, eb’ li komon naru te’xtz’iib’a chiru li pizarron li k’a’ru chanchan laj Goliat choq’ qe anajwan. Toja’ naq te’xsik’eb’ li raqal sa’ 1 Samuel 17 li neke’xk’ut xpaab’aal laj David, li kixtenq’a numtaak sa’ xb’een laj Goliat (chi’ilmanq ajwi’ li aatin sa’ “Xkomon chik li k’anjeleb’aal”). Maare eb’ li komon naru te’xwotz xnumsihomeb’ naq xe’reek’a naq li Qaawa’ yoo chixpleetinkil lix pleeteb’.

reetalil xkomon chik li k’anjeleb’aal

Xkomon chik li k’anjeleb’aal

Numtaak sa’ xb’eeneb’ laj Goliat re li qayu’am.

Li Awaʼbʼej Gordon B. Hinckley kixye:

“Wankeb’ laj Goliat sa’ qasutam, ninqeb’ rik’in yib’ aj k’a’uxl re qajuk’b’al. Maawa’ winqeb’ aj oxib’ metro xninqal, a’aneb’ b’an li kristiaan ut eb’ li ch’uut li neke’xb’eresi li k’a’aq re ru chanchan naq atawal ru, a’b’an maa’useb’ chi yaal, li naru raj tixq’unob’resi qach’ool ut tooxjuk’. …

“… A’b’anan ink’a’ tooxuwaq wi wan qajok’ re li yaal sa’ quq’. … Wankeb’ li qapek re li saq ruhil na’leb’ ut tiikilal li naru taqoksi re xpleetinkileb’ li xik’ neke’ilok qe ut li neke’raj qasachb’al. Sa’ jaljookil ru aatin, naru naqasacheb’ “sa’ xpeekemeb’.” Naru toonumtaaq sa’ xb’eeneb’ naq naqaq’us qib’ re xtz’eqtaanankileb’. Naru naqaye re chixjunileb’, jo’ laj David kixye re laj Goliat, “Laa’at xatchalk sa’ inb’een chi wan chaq aach’iich’, jutz’ ch’iich’ ut che’, a’ut laa’in ok we chi yalok aawik’in sa’ xk’ab’a’ li Qaawa’, xDios laj Israel, a’ li Nimajwal li xahob’ laa’at” [1 Samuel 17:45]” (“Venzamos a los Goliats de nuestra vida,” Liahona, febrero 2002, 4).

Xkawresinkil qib’ jo’ aj k’utunel

Musiq’anb’il laa b’oqb’al. Jo’ aj k’utunel, b’oqb’ilat xb’aan li Dios re rosob’tesinkileb’ li ralal xk’ajol. Wi tiik aach’ool re xk’ulb’al aatenq’ankil rik’in, a’an tixk’e aawe li k’utb’esinb’il na’leb’ nakasik’. (Chi’ilmanq Li k’utuk jo’ li Kolonel, 5.)