laj Elias xaqxo chixk’atq li artal wan wi’ li xam

Laj Elias naxwech’eb’ laj tij re laj Bahal, xb’aan laj Jerry Harston

27 junio–3 julio

1 Reyes 17–19

“Wi li Qaawa’ a’an li tz’aqal Dios, paab’omaq”

Li rajomeb’ li loq’laj hu—ut laa tzoleb’aal—a’an xkawob’resinkil li paab’aal chirix li qaChoxahil Yuwa’ ut li Jesukristo. K’e li ajom a’in chixb’eresinkil li k’a’ru taak’ut ut li k’a’ru taapatz’.

Tz’iib’a li nakak’oxla

reetalil li wotzok

Xkanab’ankileb’ chi wotzok

Re xtenq’ankileb’ li komon chixwotzb’al xna’leb’eb’ chirix 1 Reyes 17–19, maare taapatz’ reheb’ naq te’xk’oxla junjunqaq xk’ab’a’eb’ li junjunq chi raqal a’in. B’ar wan reheb’ li raqal li xe’xk’oxla wi’ li k’ab’a’ej a’an?

reetalil li k’utuk

Xk’utb’al li tzolʼlebʼ

1 Reyes 17:8–16; 19:19–21

Jun li b’oqom chi mayejak, a’an jun hoonal re xk’anjelankil li qapaab’aal.

• Li k’a’ru kixb’aanu li xmalka’an re Sarepta naru naxwaklesi xch’ooleb’ li komon sa’eb’ li hoonal b’ar wi’ nayale’ rix lix paab’aaleb’. Naru nakatikib’ rik’in xyeeb’al reheb’ naq te’xtz’iib’a k’a’ru li k’a’aq re ru naraj ru li paab’aal chirix li Jesukristo. Chirix a’an naru neke’ril ru li seraq’ sa’ 1 Reyes 17:8–16 ut te’aatinaq chirix li naxk’ut li seraq’ chirix xk’anjelankil li paab’aal. Waklesi xch’ooleb’ li komon chixwotzb’al li neke’reek’a chirix li xmalka’an ut chan ru naq li kixb’aanu naxwaklesi xch’ooleb’ chixk’anjelankil lix paab’aaleb’. Chan ru naq lix paab’aaleb’ juntaq’eet rik’in li paab’aal kixk’ut laj Eliseo sa’ 1 Reyes 19:19–21? Eb’ li komon maare te’raj xwotzb’al k’a’ru li mayej neke’xb’aanu choq’ re li Qaawa’ ut chan ru naq neke’osob’tesiik xb’aan a’an.

• Li seraq’ chirix li xmalka’an re Sarepta nokoraatina ajwi’ chirixeb’ li osob’tesiik neke’chal xb’aan li mayejak. Naru taapatz’ reheb’ li komon naq te’xtz’il rix chan raj ru te’xsume junaq na’leb’ jo’ a’in: “Ink’a’ ninru chixtojb’al li lajetqil” malaj “Ink’a’ naru nink’ulub’a junaq k’anjel xb’aan naq jwal laatz’ wu.” K’a’ru naxk’ut chiqu 1 Reyes 17:8–16 li naru nak’anjelak re xsumenkileb’ li na’leb’ a’an? Chan ru naq li qanawom chirix li Kolonel nokoxtenq’a naq napatz’e’ qe junaq mayej? Li raatin li Elder Lynn G. Robbins sa’ “Xkomon chik li k’anjeleb’aal” naru ajwi’ texxtenq’a.

1 Reyes 18:17–39

“Wi li Qaawa’ a’an li tz’aqal Dios, paab’omaq.”

• Jun aatinak chirix 1 Reyes 18:17–39 naru naxtenq’aheb’ li komon chixteneb’ankil rib’ chixtaaqenkil chi us li Jesukristo ut chixkanab’ankil rib’ sa’ ruq’ a’an. Chirix naq teeril li seraq’, naru taatz’iib’a chiru li pizarron li patz’om kiroksi laj Elias rik’in lix tenamit laj Israel: “Toj jo’q’e texwanq chi wiib’ ru lee na’leb’?” (raqal 21). Kanab’eb’ li komon chixwotzb’al k’a’ru neke’xk’oxla naq naraj naxye li patz’om a’an. B’ar wan junjunq reheb’ lix yaalal naq li kristiaan ke’ru raj “chixyalinkil” xtaaqenkil li Qaawa’ malaj laj Bahal? K’a’ut naq wan naq ch’a’aj chiqu xtaaqenkil li Jesukristo? Eb’ li komon naru neke’xwotz xnumsihomeb’ li natenq’ank reheb’ chixtaaqenkil li Kolonel.

laj Elias xaqxo sa’ xb’een jun li pek

Jun reetalil 1 Reyes 19:11–12. Li profeet, © Robert Booth Charles/Bridgeman Images

1 Reyes 19:1–12

Wan naq li Qaawa’ na’aatinak chi ch’anch’o ut chi ink’a’ ch’a’aj ru.

• Naab’aleb’ li kristiaan neke’xyal xq’e chixk’eeb’al reetal jo’q’e yookeb’ chi aatinaak xb’aan li Qaawa’. Re xtenq’ankileb’ li komon chixk’eeb’al reetal lix yaab’ xkux li Qaawa’, naru nakapatz’ reheb’ naq te’ril 1 Reyes 19:1–12 ut te’xwotz k’a’ru kixtzol laj Elias. Eb’ li komon maare te’raj xwotzb’al xnumsihomeb’ li nak’utuk chiruheb’ chan ru naq neke’aatinaak xb’aan li Qaawa’.

• Re xtenq’ankileb’ chi aatinak chirix li ch’ol aatin “timil timil ki’eek’ank,” naru nakak’uteb’ k’a’aq re ru (jalam-uuch malaj k’a’aq re ru) li maare tixtenq’aheb’ li komon chixtz’ilb’al rix li ch’ol aatin a’an. Eb’ li komon naru neke’xye k’a’ raj chik ru naru nak’anjelak. K’a’ut naq li aatin “timil timil” chaab’il re xch’olob’ankil lix yaab’ xkux li Musiq’ej? Re xkomon chik xch’olob’ankil, eb’ li komon naru neke’rileb’ li raqal jo’ Helaman 5:30; 3 Nefi 11:3–7; Tzol’leb’ ut Sumwank 6:22–23; 8:2–3; 9:8–9; 11:12–14; 36:2. Maare naru te’xwotz xkomoneb’ chik li raqal chirix xk’eeb’al reetal li Musiq’ej. K’a’ru neke’xye li raqal a’in chirix k’a’ru tento taqab’aanu re rab’inkil lix yaab’ xkux li Qaawa’?

reetalil xkomon chik li k’anjeleb’aal

Xkomon chik li k’anjeleb’aal

Li xmalka’an re Sarepta.

Li Elder Lynn G. Robbins kixye: “Laj Elias kixtaw ru naq li osob’tesiik neke’chal chirix lix yalb’al rix li qapaab’aal [chi’ilmanq Eter 12:6; Tzol’leb’ ut Sumwank 132:5]. Moko q’etq’et ta kiwan. Jo’ xmoos li Qaawa’, laj Elias kiwan aran re k’ehok, ut ink’a’ re k’uluk [chi’ilmanq 1 Reyes 17:13–16]. … Jun reheb’ lix yaalal naq li Qaawa’ naxk’ut lix tzol’leb’ sa’eb’ li ninqi ch’a’ajkilal, a’an re xk’eeb’al reetal k’a’ru li jitleb’ taqaye. Wi li Qaawa’ naroyb’eni naq li xmalka’an tixk’e lix tumin, k’a’ru naxye a’an chirix chixjunileb’ chik li neke’xye naq ch’a’aj li mayejak?” (“El diezmo: Un mandamiento incluso para los más pobres,” Liahona, mayo 2005, 35).

Xkawresinkil qib’ jo’ aj k’utunel

Wank jo’ jun k’anjeleb’aal tuulan xch’ool re li Musiq’ej. “Laa k’anjel jo’ aj k’utunel maawa’ xk’utb’al jun tzolok q’axal chaab’il, a’an b’an xtenq’ankil jalaneb’ chixk’ulb’al xwankil li Santil Musiq’ej, a’ li tz’aqal aj k’utunel” (Li K’utuk jo’ li Kolonel, 10).