Li xEster, xb’aan laj James Johnson

25–31 julio

Ester

“Xatwulak … re qatenq’ankil sa’ li rahilal a’in”

Ma nakanaweb’ ru li komon sa’ laa tzoleb’aal? K’e aach’ool chixnawb’al ru jun komon sa’ laa tzoleb’aal b’ayaq chik rajlal xamaan. A’in tatxtenq’a chixk’oxlankil li neke’raj ru naq nakakawresi li tzolok (chi’ilmanq Li k’utuk jo’ li Kolonel, 7).

Tz’iib’a li nakak’oxla

Xkanab’ankileb’ chi wotzok

Eb’ li komon naru te’xwotz rik’in junaq chik jun na’leb’ kixk’e li Musiq’ej reheb’, jun na’leb’ xe’xtzol chi us, malaj jun na’leb’ xe’xjuntaq’eeta rik’in xyu’ameb’ naq xe’ril ru lix hu li xEster. Kanab’eb’ junjunq reheb’ chixwotzb’al li na’leb’ a’an sa’ li tzoleb’aal.

Xk’utb’al li tzolʼlebʼ

xEster

Li Qaawa’ nokoxb’eresi b’ar wi’ tooruuq chirosob’tesinkileb’ li qas qiitz’in.

• Eb’ li komon maare ak xe’xsik’ chan ru naq li Qaawa’ kixtenq’a xEster chixkolb’aleb’ laj Judio, jo’ patz’b’il sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Patz’ reheb’ naq te’xwotz li k’a’ru xe’xtaw. Malaj naru teesik’ li na’leb’ a’an sa’ komonil (chi’ilmanq Ester 2:21–23; 3:10–14; 4:14–16). K’a’ru naru taqab’aanu re xk’eeb’al reetal li ruq’ li Dios sa’ li qayu’am? Li raatin li Elder Neil L. Andersen sa’ “Xkomon chik li k’anjeleb’aal” naxsume li patz’om a’in.

• Re xtenq’ankileb’ li komon chixk’oxlankileb’ lix kawresinkil xb’aan li Qaawa’ choq’ re li kutan a’in (chi’ilmanq Ester 4:14), ye reheb’ naq te’ril Ester 4:10–17. Chan ru naq li aatin kixye laj Mardokeo re xEster kixtenq’a chixsik’b’al ru xkolb’al rix lix tenamit? Jo’ naq li Dios kixb’eresi xEster b’ar wi’ kiru chixkolb’aleb’ laj Judio, b’ar nokoxb’eresi re naq truuq taqosob’tesiheb’ li qas qiitz’in? Chan ru toowanq jo’ chaab’il k’anjeleb’aal sa’ ruq’? Rilb’al ru li raatin li Hermana Virginia U. Jensen sa’ “Xkomon chik li k’anjeleb’aal” maare tixmusiq’aheb’ li komon chixk’oxlankil jo’q’e xe’reek’a naq k’anjeleb’aaleb’ sa’ ruq’ li Qaawa’. Patz’ reheb’ naq te’xwotz lix numsihomeb’, jo’ b’eresinb’ileb’ xb’aan li Musiq’ej.

Ester 4

Li kuyuk sa’ naxk’ut naq aajel ru li Qaawa’ sa’ li qayu’am.

• Naru taawoksi Ester 4 re aatinak chirixeb’ li osob’tesink neke’chal rik’in li kuyuk sa’. Naru taaye reheb’ li komon naq te’xk’oxla li kik’ulman rik’in xEster ut eb’ laj Judio li kireek’asiheb’ chixkuyb’aleb’ xsa’. K’a’ut naq ke’xkuy xsa’? K’a’ut naq laa’o naqakuy qasa’? Naru teeril junqaqeb’ chik li raqal chirix li kuyuk sa’, maare Isaias 58:6–12 ut Mateo 4:1–4; 17:14–21 (chi’ilmanq ajwi’ li K’utul Raqal reheb’ li Loq’laj Hu, “Kuyuk sa’ ”). Naru teewotz k’a’ru xenumsi li naxk’ut naq li kuyuk sa’ naxk’e lix wankilal li Qaawa’ sa’ li qayu’am.

Ester 3:1–11; 4:10–17; 5:1–4

Re xb’aanunkil li us, na’ajman naq kawaq li qach’ool.

• Li seraq’ chirix laj Mardokeo ut xEster naq ke’xb’aanu li us chi kaweb’ xch’ool naru tixmusiq’aheb’ li komon chixb’aanunkil li us chi kaweb’ xch’ool. Naru taapatz’ re xyijacheb’ li komon naq te’ril resil laj Mardokeo (chi’ilmanq Ester 3:1–11) ut li xkomoneb’ chik naq te’ril resil li xEster (chi’ilmanq Ester 4:10–17; 5:1–4). Wi ta wankeb’ qik’in anajwan, k’a’ raj ru te’xye laj Mardokeo ut xEster re xwaklesinkil qach’ool naq ch’a’aj xb’aanunkil li us? Eb’ li komon naru ajwi’ te’wotzoq chirix xyalb’aleb’ xq’e chixb’aanunkil li us rik’in kawilal. Naru taak’ut li video “Valor” (ChurchofJesusChrist.org) malaj taapatz’ reheb’ li komon naq te’xb’icha malaj te’ril raatinul jun li b’ich chirix xxaqab’ankil li yaal, maare “Us taab’aanu” (Eb’ li B’ich, 149). Toja’ naq tex’aatinaq chirix li naxk’ut li video malaj li b’ich chirix xkawilal li ch’oolej.

  

  Li xEster chiru li rey, xb’aan li xMinerva K. Teichert

Xkomon chik li k’anjeleb’aal

Li ruq’ li Dios.

Li Elder Neil L. Andersen kixye:

“Wan naq naqil li ruq’ li Dios sa’ xyu’ameb’ jalan, a’ut naqapatz’, “Chan ru tinwil li ruq’ chi saqenk wi’chik sa’ lin yu’am laa’in?” …

“Naq nakapaab’eb’ li chaq’rab’ ut nakatz’aama rik’in paab’aal naq taawil ruq’ li Dios sa’ laa yu’am, ninyeechi’i aawe naq tixte xsa’ laa wu sa’ musiq’ejil, ut jwal saqenk wi’chik taawil naq moko wankat ta aajunes” (“Chichalq ta laa nimajwal awa’b’ejihom,” Jolomil ch’utub’aj-ib’ re abril 2015).

Choq’ re li kutan a’in.

Li Hermana Virginia U. Jensen kixye: “Ink’a’ ninpaab’ naq yal chi jo’kan naq laa’ex ut laa’in wanko arin sa’ li kutankil a’in. Ninpaab’ naq, jo’ xEster re najter kutan, xoochal sa’ li awa’b’ejihom choq’ re li kutan a’in [chi’ilmanq Ester 4:14], re naq li qawankil, li qab’aanuhom, li qametz’ew, ut li qapaab’aal taawanq chi xaqxo chiru li nimla maa’usilal li naxsik’ xsachb’aleb’ li qochoch, li qajunkab’al, ut li qaraarookil komon” (“Edifiquemos plazas fuertes,” Liahona, noviembre 1997, 107).

Xkawresinkil qib’ jo’ aj k’utunel

Ayu rik’ineb’ li loq’laj hu xb’een wa. Eb’ li loq’laj hu tento te’wanq choq’ xnimal ru k’anjeleb’aal naq yookat chi tzolok ut chixkawresinkil aawib’. Misachk sa’ aach’ool naq li raatineb’ li profeet sa’ roso’jikeb’ li kutan neke’wan rochb’eeneb’ li jolomil hu re li Iglees ut a’aneb’ ajwi’ loq’. (Chi’ilmanq Li k’utuk jo’ li Kolonel, 17–18.)