li kristiaan neke’el chaq jun tenamit sachenaq

Li reelelikeb’ laj preex, xb’aan laj James Tissot ut xkomoneb’ chik

11–17 julio

2 Reyes 17–25

“Kikawu xch’ool rik’in li Qaawa’, lix Dios laj Israel”

Numsiheb’ laa musiq’anb’il na’leb’ xatz’iib’a naq xattzolok sa’ 2 Reyes 17–25 chiru li xamaan a’in. K’a’ruheb’ li raqal sa’eb’ li ch’ol a’in li nakaweek’a naq te’xtenq’aheb’ li komon sa’ laa tzoleb’aal?

Tz’iib’a li nakak’oxla

reetalil li wotzok

Xkanab’ankileb’ chi wotzok

Naq eb’ li komon neke’xwotz k’a’ru xe’xtzol sa’ rochoch rik’in li loq’laj hu, li jun siir chik maare te’musiq’aaq chixtzolb’aleb’ li loq’laj hu chiru li xamaan. Re xtikib’ankil li tzolok, naru taapatz’ reheb’ naq te’xsume li patz’om a’in: “K’a’ru xk’ut li Santil Musiq’ej chawu naq xawileb’ ru li raqal choq’ re li xamaan a’in?”

reetalil li k’utuk

Xk’utb’al li tzolʼlebʼ

2 Reyes 18:28–36; 19:1–7, 14–19

Naru toowanq chi tiik qach’ool rik’in li Qaawa’ naq yalb’il rix qapaab’al.

• Li na’leb’ natawman sa’ 2 Reyes 18–19 naru nokoxtenq’a chixnawb’al k’a’ru taqab’aanu naq yalb’il rix qapaab’aal. Chan ru taatenqʼahebʼ li komon chixtawbʼal li na’leb’ a’an? Naru taapatz’ reheb’ naq te’xwotz k’a’ut naq neke’xpaab’ li Dios ut lix k’uub’anb’il na’leb’. Chirix a’an naru te’ril 2 Reyes 18:28–35 re xtawb’al k’a’ru ke’xye laj Asiria re li tenamit Jerusalen re naq ink’a chik taawanq xch’ooleb’ rik’in li Qaawa’. Chan ru naq laj Satanas naxq’unob’resi qach’ool sa’ li kutan a’in re naq taawiib’anq qach’ool chirix li qapaab’aal? Li komon naru te’ril 2 Reyes 19:1–7, 14–19 re xk’eeb’al reetal li naru naqatzol rik’in laj Esekias chirix li taqab’aanu naq li qapaab’aal yalb’il rix. Chan ru nokoxtenq’a li Qaawa’ chi’elk chi uub’ej naq yalb’il rix qapaab’aal? K’a’ chik ru lix na’leb’eb’ li komon chirix rak’ob’resinkil lix paab’aaleb’ chirix li Qaawa’?

• Naru taapatz’ re junaq komon naq taawulaq chi kawresinb’il re tixwotz b’ayaq li raatineb’ laj Asiria ut eb’ lix taql laj Esekias chixk’atq lix xaqxookil tz’ak Jerusalen (chi’ilmanq 2 Reyes 18:17–36). Naq toj maji’ naxwotz’ li seraq’, patz’ reheb’ li komon naq te’xk’oxla naq a’aneb’ aj Jerusalen ut naq neke’rab’i li aatinak a’in. K’a’ru neke’xk’oxla malaj k’a’ru neke’reek’a? K’a’ru te’raj xb’aanunkil? Naru nakajek’i sa’ xyanqeb’ li komon li aatin kixye li Elder David A. Bednar “Jo’kan naq ke’xch’anab’ lix xiweb’ ” (Jolomil ch’utub’aj-ib’ re abril 2015) ut nakapatz’ reheb’ naq te’xsik’ li na’leb’ li truuq tixtenq’aheb’ sa’ li xuwak malaj li kab’ rix ch’oolej. Chan ru naq li qapaab’aal nokoxb’eresi rik’in li Jesukristo sa’ xyi li ch’a’ajkilal?

2 Reyes 22:8–20; 23

Eb’ li loq’laj hu naru neke’xsutq’isi li qaam rik’in li Qaawa’.

• Li aatinak chirix lix wankil li raatin li Dios sa’ xyu’am li rey aj Josias ut lix tenamit naru naxwaklesi xch’ooleb’ li komon re te’xsik’ ajwi’ li wankilal a’an sa’ xyu’ameb’. Naru taatikib’ li tzolok rik’in xpatz’b’al reheb’ li komon naq te’xk’oxla lix jalanil xyu’ameb’ wi maak’a’ raj li loq’laj hu. Chirix a’an naru te’ril 2 Reyes 22:8–11; 23:1–6, 21, 24 re xtawb’al ru li jalaak ke’xk’ul laj Josias ut lix tenamit naq ke’rab’i raatin li Dios li wan sa’ li loq’laj hu li toje’ kitawman sa’ li santil ochoch. Chan ru nokoxtenq’a li loq’laj hu chi nach’ok rik’in li qaChoxahil Yuwa’ ut li Jesukristo?

• Li nimla jalaak kixk’ul laj Josias ut naab’aleb’ chik li kristiaan sa’ li rawa’b’ejihom b’antiox re li raatin li Dios naru naxwaklesi xch’ooleb’ li komon re te’xsik’ li jalaak jo’ a’in sa’ xyu’ameb’. Chirix rilb’aleb’ li jalaak a’an (chi’ilmanq 2 Reyes 23:1–6, 21, 24), eb’ li komon naru te’xwotz chan ru naq jun li raqal re li loq’laj hu kixjal xyu’ameb’. Maare naru te’xwotz k’a’ut naq teeto xch’ooleb’ chixk’ulb’al li na’leb’ re li raqal a’an sa’ li hoonal a’an. Li aatin sa’ “Xkomon chik li k’anjeleb’aal” maare naru natenq’an sa’ li aatinak.

  jun junkab’al narileb’ li loq’laj hu

  Eb’ li loq’laj hu naru neke’tenq’an chixsutq’isinkil li qaam rik’in li Qaawa’.

reetalil xkomon chik li k’anjeleb’aal

Xkomon chik li k’anjeleb’aal

Ilomaqeb’ ru li loq’laj hu wi’chik.

Li Awa’b’ej Spencer W. Kimball kixye:

“Ninnaw chi tz’aqal naq sa’ junaq xhoonalil li qayu’am, chiqajunilo tento taqasik’ rilb’al ru li loq’laj hu—ut ink’a’ yal jun sut ajwi’, a’b’an chi kok’ aj xsa’. …

“Naweek’a naq chiqajunilo tento taqileb’ rajal li loq’laj hu, jo’ kixb’aanu li rey aj Josias, ut taqakanab’eb’ chi k’anjelak choq’ qe, chixkawob’resinkil qach’ool chi k’anjelak chiru li Qaawa’ chi anchal qach’ool. …

“Naq nalaj lin junajil rik’in li choxahil ut naq chanchan naq maajun choxahil xik yoo chi ab’ink chi moko jun choxahil xyaab’ kuxej yoo chi aatinak, najt wankin. Wi tin’ok chixtz’ilb’al rix li loq’laj hu, li najtil a’in nak’os ut li musiq’ejil na’leb’ nasutq’i. Nink’e reetal naq q’axal chik yookin chixraab’aleb’ li tento tinra chi anchal inch’ool ut ink’a’uxl ut inmetz’ew, ut rik’in xraab’aleb’ q’axal wi’chik, nink’e reetal naq moko ch’a’aj ta chik xpaab’ankil lix b’eresinkil” (Enseñanzas de los presidentes de la Iglesia: Spencer W. Kimball [2006], 70–72, 75).

Xkawresinkil qib’ jo’ aj k’utunel

Oksiheb’ li k’anjeleb’aal sa’eb’ li loq’laj hu. Re xtenq’ankileb’ li komon re te’xtaw ru li loq’laj hu, naru taaye reheb’ naq te’roksi li K’utul Raqal reheb’ li Loq’laj Hu ut Temas del Evangelio (ChurchofJesusChrist.org). Naru ajwi’ neke’xtaw xkomon chik li na’leb’ sa’ li raqal “Na’leb’ re xk’oxlankil” sa’ Kim, Taaqehin—Choq’ reheb’ li komon ut li junkab’al.