Xjalam-uuch laj Eliseo naq naxk’uteb’ li kawaay re xam chiru xmoos, © Review & Herald Publishing/licensed from goodsalt.com

4–10 julio

2 Reyes 2–7

“Wan jun profeet arin Israel”

Naq nakawresi li tzolok, il 2 Reyes 2–7 re xtawb’al li k’utb’esinb’il na’leb’ choq’ re laa yu’am. Chirix a’an, ab’i li na’leb’ tixk’e li Musiq’ej aawe li taatenq’anq reheb’ li komon nakatzol.

Tz’iib’a li nakak’oxla

Xkanab’ankileb’ chi wotzok

Wan naq eb’ li komon neke’raj ru xhoonal re xnumsinkileb’ sa’ junpaat li ch’ol li xe’ril ru, re naq te’ruuq chixwotzb’al k’a’ru xe’xtzol sa’ junesal. K’e wiib’ oxib’ k’asal reheb’ sa’ xtiklajik li tzolok; toja’ naq taapatz’ reheb’ naq te’xwotz k’a’ru xe’xtzol.

Xk’utb’al li tzolʼlebʼ

2 Reyes 2–6

Li Dios naru tixb’aanu li sachb’a-ch’oolej sa’ li qayu’am.

• Naq nekex’aatinak chirixeb’ li sachb’a-ch’oolej sa’ 2 Reyes 2–6, maare us naq taaye reheb’ li komon naq te’xye k’a’ru naraj naxye li aatin sachb’a-ch’oolej. Naru taawotz li raatin li Awa’b’ej Howard W. Hunter: “Li sachb’a-ch’oolej, a’an lix k’utb’esinkil lix wankilal li Dios, li ink’a’ naru naqach’olob’ chi moko naqataw ru. … Eb’ li eetalil ut sachb’a-ch’oolej a’in ke’k’utb’esiman chi yaal sa’ xyu’am ut xk’anjel li Jesukristo, li Ralal li Dios. A’b’anan, us ta sachol ch’oolej ut ninqeb’ ru, lix k’iila sachb’a-ch’oolej li Kristo, a’aneb’ ka’ajwi’ jun raqal reheb’ li xninqal ru sachb’a-ch’oolej kixb’aanu lix Yuwa’ chi junxilaj ut li toj naxb’aanu chiqasutam sa’ li kutan a’in. … Junelik wankeb’ k’iila sachb’a-ch’oolej, wi wan xsa’ qu re too’iloq ut qaxik re too’ab’inq” (“El Dios que hace maravillas,” Liahona, julio 1989, 19–20). Chan ru nokoxtenq’a li na’leb’ a’in chirilb’al li ruq’ li Dios sa’ li qayu’am?

• Naru taapatz’ reheb’ li komon naq te’xye k’a’ruheb’ li sachb’a-ch’oolej wankeb’ sa’ 2 Reyes 2–6. K’a’ru naqatzol chirix li Dios rik’ineb’ li sachb’a-ch’oolej a’in? Eb’ li komon maare te’raj aatinak chirixeb’ li sachb’a-ch’oolej—eb’ li ninq jo’ ajwi’ li kok’—li xe’xk’ul sa’ xjunkab’aleb’. Chan ru taqak’e reetaleb’ li sachb’a-ch’oolej naxb’aanu li Dios sa’ li qayu’am—jo’eb’ ajwi’ li jalaneb’ chiru li xqayo’oni?

• Maare te’musiq’aaq li komon naq te’xjuntaq’eeta li sachb’a-ch’oolej kixb’aanu laj Eliseo rik’ineb’ li kixb’aanu li Jesukristo (chi’ilmanq 2 Reyes 4:8–37 ut Lukas 7:11–16; 2 Reyes 4:42–44 ut Jwan 6:1–13; 2 Reyes 5:1–15 ut Lukas 17:11–19). K’a’ru neke’xk’ut li sachb’a-ch’oolej a’in chirix li Kolonel ut eb’ lix profeet?

2 Reyes 5:1–19

Wi tuulano ut tiik qach’ool chi paab’ank, li Jesukristo naru tooxk’irtesi.

• Sa’ li seraq’ chirix lix k’irtesinkil laj Nahaman chiru xyajel, naqatzol naq aajel ru li tuulanil. Re xtikib’ankil li aatinak chirix a’in, naru taatz’iib’a chiru pizarron xq’etq’etil laj Nahaman ut xtuulanil laj Nahaman. Eb’ li komon naru te’ril 2 Reyes 5:1–19 ut te’xtz’iib’a chiru li pizarron li aatin li naxk’ut lix q’etq’etil malaj lix tuulanil laj Nahaman. Chan ru naq wan naq chanchano laj Nahaman? Chan ru naq wan naq chanchano lix moos? Chan ru xqatzol li na’leb’ li kixtzol laj Nahaman?

• Jun chik na’leb’ naru naqatzol sa’ li seraq’ a’in, a’an naq aajel ru xpaab’ankil li Dios, rik’in ajwi’ li k’a’ru ka’ch’in. Naru taawil 2 Reyes 5:9–12 ut taapatz’ reheb’ li komon k’a’ut naq “k’a’jo’ xjosq’il” naq xko’o laj Nahaman (raqal 12). K’a’ut naq wan naq naqaj xb’aanunkil “li q’axal ch’a’aj” naxpatz’ li Dios qe, ruuchil li moko ch’a’aj ta? (raqal 13). K’a’ru aj-e xb’aanunkil li k’a’ru ka’ch’in?

2 Reyes 6:8–23

“Jwal naab’aleb’ li wankeb’ qik’in laa’o chiruheb’ a’an.”

• Chiqajunilo naru naqeek’a li junaatalil ut li xiw. Chan ru naq li aatinak chirix li seraq’ sa’ 2 Reyes 6:8–23 maare tixtenq’aheb’ li komon li neke’reek’a a’an anajwan? Re xtikib’ankil, naru taapatz’ reheb’ li komon k’a’ru nawulak chiruheb’ chirixeb’ li raqal a’in. Naru te’xwotz ajwi’ jo’q’e “li Qaawa’ kixte xsa’ ru” (raqal 17) ut kixtenq’aheb’ chixk’eeb’al reetal naq moko xjuneseb’ ta wankeb’ (chi’ilmanq ajwi’ “Xkomon chik li k’anjeleb’aal”). Chan ru taqatenq’a qib’ chiqib’ qib’ re naq “ink’a’ tooxuwaq”? (raqal 16).

Xkomon chik li k’anjeleb’aal

“Xteeb’al li qamusiq’ejil u.”

Chirix li seraq’ sa’ 2 Reyes 6:8–23, li Elder Ronald A. Rasband kixye:

Maare maak’eb’ li kaarxam taqlanb’ileb’ re xsachb’al li qaxiw ut li narahob’tesink qe, a’b’an saqen ru li tzol’leb’. Li Qaawa’ wan qik’in, yoo chiqak’oxlankil ut chiqosob’tesinkil jo’ ka’ajwi’ naru xb’aanunkil a’an. Li tijok naru tixb’oq chaq li metz’ew ut li k’utb’esinb’il na’leb’ naqaj ru re xk’oxlankil xb’een wa li Jesukristo ut lix tojb’al rix li maak li kixb’aanu. Li Qaawa’ ak kixnaw naq chi jo’q’ehaq tooxuwaq. Laa’in week’ahom ut laa’ex ajwi’. … Maare moko naab’alo ta sa’ li Iglees jo’ b’isb’il wankilal xb’aan li ruchich’och’, a’b’an naq naqate li qamusiq’ejil u, “jwal naab’aleb’ li wankeb’ qik’in laa’o chiruheb’ a’an” [2 Reyes 6:16]” (“Minumta eek’a’uxl,” Jolomil ch’utub’aj-ib’ re octubre 2018).

Xkawresinkil qib’ jo’ aj k’utunel

Ye reheb’ naq te’roksiheb’ li loq’laj hu. Naq naru, ye reheb’ li komon naq te’roksiheb’ li loq’laj hu ut li raatineb’ li yo’yookil profeet re te’xtaw xb’eresinkileb’, xsumenkileb’ lix patz’om, ut xtenq’ankileb’. Li raatin li Dios, a’an lix tz’aqal yo’leb’aal li yaal. (Chi’ilmanq Li k’utuk jo’ li Kolonel, 21.)