oxib’ li winq neke’aatinak rik’in jun chik li winq chunchu

Lix yalb’al rix laj Job, xb’aan laj Joseph Brickey

1–7 agosto

Job 1–3; 12–14; 19; 21–24; 38–40; 42

Toj tinkanab’ wib’ chiru

K’a’ru li na’leb’ xatxtenq’a li Santil Musiq’ej chixtzolb’al sa’ lix hu laj Job? K’a’ru nakawaj xwotzb’al rik’ineb’ li komon?

Tz’iib’a li nakak’oxla

reetalil li wotzok

Xkanab’ankileb’ chi wotzok

Eb’ li komon li xe’xtzol lix hu laj Job chiru li xamaan a’in maare xe’xtaw junjunq na’leb’ wankeb’ xyaalal choq’ reheb’. Re xwaklesinkil xch’ooleb’ chixwotzb’aleb’, naru nakatz’iib’a chiru li pizarron Xintzol rik’in laj Job … ut patz’ reheb’ li komon chan raj ru te’xchoy li ch’ol aatin a’an.

reetalil li k’utuk

Xk’utb’al li tzolʼlebʼ

Job 1–2; 12–13; 19:23–27

Xkanab’ankil qib’ sa’ ruq’ li qaChoxahil Yuwa’ naru nokoxtenq’a chi wank chi tiik chi junelik.

• Li wiib’ chi ch’ol sa’ xtiklajik lix hu laj Job, li naxch’olob’ naq laj Satanas naxtz’il rix k’a’ut naq tiik chi paab’ank laj Job, naru naxtenq’aheb’ li komon chixtz’ilb’al rix k’a’ut naq tiikeb’ chi paab’ank chiru li qaChoxahil Yuwa’ ut li Jesukristo. Eb’ li komon naru neke’xtz’iib’a k’a’ut naq jun li kristiaan naxsik’ ru xpaab’ankileb’ lix taqlahom li Dios. Toja’ naq te’ril Job 1:6–12; 2:1–6 re xsik’b’al k’a’ru kixye laj Satanas chirix lix tiikilal laj Job. K’a’ut naq xiwxiw xpaab’ankil li Qaawa’ ka’ajwi’ xb’aan li na’leb’ kixye laj Satanas? K’a’ru naqatzol chirix laj Job rik’in lix sumehom sa’ Job 1:20–22; 2:9–10? Eb’ li komon naru neke’xye k’a’ut naq neke’xsik’ ru xpaab’ankil li Dios chi tiik.

  jun winq na’ilok taqe’q

  Job, xb’aan laj Gary L. Kapp

• Us ta laj Job kixyal xq’e rik’in li xkab’ rix xch’ool ut lix lub’ik, sa’ xraqik, kitenq’aak sa’ lix rahilal xb’aan naq kixkanab’ rib’ sa’ ruq’ li Qaawa’. Re te’tzoloq chirix li kixb’aanu laj Job, li komon naru neke’xsik’ junjunq reheb’ li raqal a’in re te’xsik’ li chaab’il na’leb’ kisumen wi’ laj Job sa’eb’ lix ch’a’ajkilal: Job 1:21; 2:10; 12:9–10, 16; 13:15–16; 19:23–27. K’a’ru naqatzol sa’eb’ li sumehom a’in re naq kawaqo sa’ musiq’ej sa’eb’ li qach’a’ajkilal? K’a’ut naq xiwxiw xk’oxlankil naq lix yalb’al qix, a’aneb’ tojb’a-maak xb’aaneb’ li qamaak?

• Li raatin laj Job sa’ Job 19:23–27 naru naxwaklesi xch’ooleb’ li komon chixtz’ilb’al rix ut chixwotzb’al lix nawomeb’ xch’ool naq laj Tojol qix, li Jesukristo, yo’yo. Naru nakapatz’ reheb’ li komon naq te’xtz’il rix li raatin laj Job sa’eb’ li raqal a’in. Chirix a’an, naru te’aatinaq chirix junjunq patz’om jo’ a’in: K’a’ut naq jwal aajel ru lix nawom qach’ool chirix laj Tojol qix sa’eb’ li qach’a’ajkilal jo’ li kixnumsi laj Job? Chan ru naq lix nawom qach’ool nokoxtenq’a chi numtaak sa’ xb’eeneb’ lix yalb’al qix? Xb’ichankil malaj rilb’al raatinul junaq li b’ich chirix li Jesukristo, maare “Ninnaw naq yoʼyo inKolonel” (Eb’ li B’ich, 77), naru naxtz’aqob’resi ru li na’leb’ ut naru naxk’am chaq xwankil li Musiq’ej.

Job 38

Li k’a’ru naril li Dios jwal nim wi’chik chiru li k’a’ru naqil laa’o.

• Lix k’ihal lix hu laj Job (ch’ol 3–37) na’aatinak chirix laj Job ut eb’ li ramiiw naq neke’xyal xq’e rik’in li patz’om “K’a’ut naq neke’xk’ul rahilal li chaab’il kristiaan?” Us ta li Qaawa’ ink’a’ naxsume chi tz’aqal li patz’om a’in sa’ lix hu laj Job, naxk’ut jun na’leb’ aajel ru. Re xtenq’ankileb’ li komon chixtawb’al li na’leb’ a’an, patz’ reheb’ naq te’ril k’a’ru kixpatz’ li Qaawa’ re laj Job sa’ Job 38:1–7, 18–24. K’a’ru naqatzol chirixeb’ li patz’om a’in?

• Lix evangelio li Jesukristo li k’ojob’anb’il wi’chik naxk’e li saqen li naru nokoxtenq’a chixtawb’al ru k’a’ut naq naqak’ul rahilal sa’ li ruchich’och’. Eb’ li komon naru neke’xwotz li na’leb’ neke’xnaw sa’ xk’ab’a’ lix k’ojob’ankil wi’chik li evangelio li natenq’ank reheb’ chixtawb’al ru chi us li rahilal. Naru neke’xtaw junjunq reheb’ li na’leb’ a’in sa’ li loq’laj hu ut sa’ “Xkomon chik li k’anjeleb’aal.”

reetalil xkomon chik li k’anjeleb’aal

Xkomon chik li k’anjeleb’aal

Li nawom chirix li rahilal sa’ roso’jikeb’ li kutan.

Eb’ li raqal a’in neke’aatinak chirix rajomeb’ li rahilal.

• 2 Nefi 2:11–14

• Eter 12:27

• Tzol’leb’ ut Sumwank 58:3–5

• Tzolʼlebʼ ut Sumwank 122

• Moises 5:10–12

Laj Spencer W. Kimball kixye:

“Wi naqil li li qayu’am sa’ ruchich’och’ jo’ naq a’an chixjunil li wan, taqil ajwi’ naq li rahilal, li raho’k sa’ ch’oolej, ch’a’ajkilal, t’ane’k ut li kamk chi junpaat jwal xiwxiweb’ raj. A’ut wi naqil li qayu’am jo’ li k’a’ru junelik li naxik toj najt wi’chik chiru b’ar wi’ xoowan chaq ut naxik roq toj sa’ li junelik q’e kutan, chirix a’an taaqak’e li k’a’ru nak’ulman sa’ xna’aj.

“Ma ink’a’ ta b’i’ chaab’il naq li Dios naxk’e xyalb’al qix re toonumtaaq sa’ xb’eeneb’, re taqatz’aqob’resi ru li qateneb’ankil, re taakawuuq li qametz’ew, re taqak’ul rahilal re xyalb’al rix li qaam? Ma ink’a’ ta b’i’ wanko re naq taayale’q qix re rilb’al ma kaw qametz’ew, re naq tooyajerq re xtzolb’al kuyuk, re naq tookamq ut taa’elq xwankil li kamk sa’ qab’een ut taqak’ul ajwi’ li loq’alil? …

“Wi ta taaq’ajkamuuq sa’ junpaat li sahil ch’oolejil ut li tuqtuukilal re li ani naxb’aanu li us, maak’a’ raj li maak—junes li us raj taqab’aanu, a’b’an moko xb’aan ta naq tiik raj qach’ool. Ink’a’ raj taayale’q rix li qametz’ew, chi moko toochaab’iloq raj, chi moko taanimanq raj qawankil, maak’a’aq raj li xtaql ch’oolej” (Enseñanzas de los Presidentes de la Iglesia: Spencer W. Kimball [2006], 16–17).

Xkawresinkil qib’ jo’ aj k’utunel

Taaqe li Musiq’ej. Moko taanaw ta tz’aqal k’a’ru taab’aanumanq sa’ li tzoleb’aal, a’b’an li Musiq’ej tatxb’eresi. Moko taanaw ta tz’aqal k’a’ru taab’aanumanq sa’ li tzoleb’aal, a’b’an li Musiq’ej tatxb’eresi. (Chi’ilmanq Li k’utuk jo’ li Kolonel, 10.)