Xkolb’al li k’a’ru sachb’il, xb’aan laj Michael T. Malm

15–21 agosto

Salmos 49–51; 61–66; 69–72; 77–78; 85–86

Tinch’olob’ jo’nimal kixb’aanu li Qaawa’ choq’ re li waam

K’oxla li raatin li Elder David A. Bednar naq nakakawresi li tzolok: “Ka’ajwi’ li aatinak ut li seraq’ink moko a’an ta k’utuk. Xjultikankil li evangelio jo’ naraj li Qaawa’ naraj ru li ilok, ab’ink, ut tz’ilok-ix” (“Llegar a ser un misionero según Predicad mi Evangelio,” Liahona octubre 2013, 50).

Tz’iib’a li nakak’oxla

Xkanab’ankileb’ chi wotzok

Re xtenq’ankileb’ li komon chixwotzb’al li xe’ril sa’ li loq’laj hu chiru li xamaan a’in, naru taatz’iib’a chiru li pizarron “K’a’jo’ xsahil li waam naq tinyaab’a” malaj “Li ru’uj waq’ tixseraq’i laa tiikilal” (Salmos 71:23, 24). Eb’ li komon naru te’xwotz li na’leb’ xe’xtaw li natenq’ank reheb’ chi “saho’k sa’ li raam” malaj “chixseraq’inkil lix tiikilal” li Qaawa’.

Xk’utb’al li tzolʼlebʼ

Salmos 51; 85–86

“Q’axal chaab’ilat, at Qaawa’, ut aj kuyulat maak.”

• Li aatin sa’ Salmos 51 naxch’olob’ li neke’reek’a naab’al naq neke’xjal xk’a’uxl ut neke’xsik’ lix kuyb’aleb’ lix maak. Re xtenq’ankileb’ li komon chixtawb’al ru li jalb’a-k’a’uxlej ut chirajb’al xjalb’aleb’ xk’a’uxl chi kok’ aj xsa’, naru taaye reheb’ naq te’ril Salmos 51 rik’in li patz’om a’in sa’ xch’ooleb’: K’a’ru naraj naxye li jalb’a-k’a’uxlej? Kanab’eb’ chixwotzb’al xsumenkil. (Sa’ “Xkomon chik li k’anjeleb’aal” wan li na’leb’ re eetenq’ankil.) K’a’ut naq wan naq ink’a’ naqaj xjalb’al qak’a’uxl? K’a’ru naqataw sa’ li salmo a’in li natenq’an re naq jwal sahaq li jalb’a-k’a’uxlej?

• Chan raj ru taqach’olob’ li naqeek’a naq kuyb’il qamaak sa’ xk’ab’a’ lix wankilal li Jesukristo re xtojb’al qix? Patz’ reheb’ li komon naq te’xwotz xna’leb’eb’, ut ye reheb’ naq te’xtaw li raqal sa’ Salmos 51; 85–86 li neke’xch’olob’ k’a’ru nak’ulman sa’ qayu’am sa’ xk’ab’a’ naq nokosaqob’resiik naq nakuye’ qamaak xb’aan a’an (chi’ilmanq Salmos 51:1–2, 7–12; 85:2–9). Naru taak’uteb’ li jalam-uuch malaj k’a’aq re ru li te’xtenq’aheb’ li komon chixtawb’aleb’ ru li raqal a’in. Toja’ naq eb’ li komon naru te’xwotz li neke’reek’a chirix li Kolonel Jesukristo ut li rajom chixtojb’al rix li qamaak re naq te’kuye’q li qamaak. Naru teeb’icha jun li b’ich chirix lix tojb’al rix li maak xb’aan li Kolonel, maare “Sachso ninkana” (Eb’ li B’ich, 118).

• Re xjalb’al qak’a’uxl, tento taqapaab’ naq li Jesukristo naru tooxsaqob’resi ut naq jo’kan tixb’aanu. Eb’ li komon maare ak xe’xtaw li na’leb’ sa’ Salmos 51; 85–86 chiru li xamaan a’in li xkawob’resi xpaab’aaleb’ chirix li rajom li Qaawa’ chixkuyb’al qamaak. Kanab’eb’ chixwotzb’al li k’a’ru xe’xtaw. Naru ajwi’ taaye reheb’ naq te’ril Salmos 86:5, 13, 15, ut taapatz’ k’a’ru neke’xk’ut li raqal a’in chirix li Qaawa’. K’a’ru naraj naxye naq “numtajenaq lix rahom ut lix tiikilal xch’ool”? (raqal 15). K’a’ut naq nim xwankil li na’leb’ a’in choq’ qe?

Salmos 66:5–20

Lix nawom qach’ool chirix li Jesukristo naru tixtenq’aheb’ li qas qiitz’in chi chalk rik’in.

• Jun reheb’ li ninqi osob’tesink naqak’ul sa’ li Dominkil Tzoleb’aal, a’an xk’ulb’al qametz’ew ut qapaab’aal rik’in xnawomeb’ xch’ool li qech aj taaqehom re li Jesukristo. Re naq taa’uxq a’an choq’ reheb’ li komon sa’ laa tzoleb’aal, naru taapatz’ reheb’ naq te’ril Salmos 66:16 ut te’xk’oxla li patz’om a’in: Wi ta “taaseraq’i jo’ nimal kixb’aanu aawe li Qaawa’,” k’a’ raj ru taaye? Naq yookeb’ chi k’oxlak, naru te’rileb’ li raqal 5–20 re xtawb’aleb’ xna’leb’. Kanab’eb’ chixtz’iib’ankil lix sumenkileb’. Chirix a’an, ye reheb’ naq “te’xseraq’i” chirib’ileb’ rib’—maare sa’ kok’ ch’uut—k’a’ru xb’aanuhom li Jesukristo choq’ reheb’.

  

  Naru naqawotz xnawom qach’ool rik’ineb’ li qas qiitz’in chirix li xb’aanuhom li Qaawa’ choq’ qe.

Xkomon chik li k’anjeleb’aal

Li jalb’a-k’a’uxlej, a’an naraj naxye jalaak.

Li Awa’b’ej Russell M. Nelson kixye a’in chirix li jalb’a-k’a’uxlej:

“Naq li Jesus naxye eere malaj we laa’in naq “taqajal qak’a’uxl,” yoo chiqab’oqb’al chixjalb’al li qak’a’uxl, li qanawom, li qamusiq’—ut toj reetal chan ru nokomusiq’ak. Yoo chixpatz’b’al naq taqajal chan ru nokorahok, nokok’oxlak, nokok’anjelak, naqanumsi li qahoonal, chan ru nokowan rik’ineb’ li qixaqil, chan ru naqatzoleb’ li qakok’al, ut chan ru ajwi’ naqil li qatib’el.

“Maak’a’ wan li q’axal na’ach’ab’ank, nachaab’ilob’resink, ut li q’axal aajel ru choq’ re li qab’eenik chi uub’ej, chiru xk’anjelankil rajlal, wulaj wulaj, li jalb’a-k’a’uxlej. Li jalb’a-k’a’uxlej maawa’ jun na’leb’ li nak’ulman, a’an jun k’anjel nab’aanuman. A’an xlaawil li sahil ch’oolejil ut li k’ojk’ookil ch’oolej. Chi junajinb’il rik’in li paab’aal, li jalb’a-k’a’uxlej naxte chiwu lix wankil lix tojb’al rix li maak xb’aan li Jesukristo. …

“Naq naqasik’ ru xjalb’al qak’a’uxl, naqasik’ ru jalaak. Naqakanab’ li Kolonel chiqajalb’al re naq laa’aqo li q’axal chaab’il li naru chiqu. Naqasik’ ru nimank sa’ musiq’ej ut xk’ulb’al li sahil ch’oolejil—li sahil ch’oolejil re toje’k qix xb’aan a’an. Naq naqasik’ ru xjalb’al qak’a’uxl, naqasik’ ru wank jo’ chanru li Jesukristo!” (“Naru taqab’aanu li chaab’il wi’chik ut toowanq chi chaab’il wi’chik,” Jolomil ch’utub’aj-ib’ re abril 2019.

Xkawresinkil qib’ jo’ aj k’utunel

Yeheb’ li patz’om li neke’xtoch’ li ch’oolej ut li k’a’uxlej “Patz’ reheb’ li komon sa’ li tzoleb’aal naq te’xwotz li k’a’ru neke’reek’a chirix jun raqal sa’ li loq’laj hu, k’a’ru ke’reek’a tana’ li ani yeeb’il resil sa’ li loq’laj hu, malaj chan ru neke’k’anjelak sa’ li qayu’am li na’leb’ sa’ li jun raqal a’an” (Li k’utuk jo’ li Kolonel, 31).