Na’ilok we Jehova, xb’aan laj Yongsung Kim, havenlight.com

8–14 agosto

Salmos 1–2; 8; 19–33; 40; 46

“Li Qaawa’ a’an laj k’aak’alehom we”

Sik’ xyaalal chan ru naq eb’ li komon te’xwotz li musiq’anb’il na’leb’ texk’ul naq yooqeb’ chirilb’al li hu Salmos.

Tz’iib’a li nakak’oxla

Xkanab’ankileb’ chi wotzok

Re naq li komon te’xwotz li neke’xtaw sa’eb’ li Salmo, patz’ reheb’: K’a’ru xk’ut cheru li Musiq’ej naq yookex chirilb’aleb’ li Salmo chiru li xamaan a’in? B’arwan reheb’ li salmo xe’xtenq’a chi nach’ok rik’in li Qaawa’?

Xk’utb’al li tzolʼlebʼ

Salmos 1; 23; 26–28; 46

Eb’ li Salmo neke’xk’ut chiqu xkanab’ankil qach’ool rik’in li Qaawa’.

• Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naxye naq us raj rilb’al Salmos 1; 23; 26–28; 46 ut xsik’b’al li na’leb’ a’in:

  • B’oqok re xkanab’ankil qach’ool rik’in li Qaawa’

  • Aatin li nayehok ani li Qaawa’

  • Aatin li nayehok k’a’ru li tuqtuukilal, li kawilal, ut jalan chik chi osob’tesink li naxyeechi’ a’an

  • Aatin li nayehok aniheb’ wankeb’ xch’ool rik’in

  Naru taatz’iib’aheb’ li ch’ol aatin a’in chiru li pizarron, ut taapatz’ reheb’ li komon naq te’xtz’iib’a chixk’atq k’a’ru xe’xtaw sa’ Salmos 1; 23; 26–28; malaj 46. Wi neke’raj xtenq’, naru taak’uteb’ li raqal a’in: Salmos 1:1–4; 23:1–6; 26:1, 6–8, 12; 27:1, 3, 8, 14; 28:1, 7; 46:1–3, 10. Eb’ li komon naru neke’xwotz k’a’ru xe’reek’a chirix li Kolonel naq xe’rileb’ li salmo a’in.

• Xb’aan naq eb’ li Salmo chanchaneb’ li b’ich choq’ reheb’ laj Israelita, naru taapatz’ reheb’ li komon naq te’xyaab’asi li b’ich li naxjultika sa’ xch’ooleb’ li salmo xe’ril chiru li xamaan a’in. Wi te’raj, naru te’ril “Eb’ li raqal sa’eb’ li loq’laj hu” sa’ xraqik li b’ichleb’aal (chi’ilmanq ajwi’ li aatin sa’ “Xkomon chik li k’anjeleb’aal”). Sa’ komonil naru neke’xb’icha junqaq reheb’ li b’ich a’an, ut te’xye k’a’ru li na’leb’ li neke’xtaw arin ut sa’eb’ li salmo. K’a’ru na’leb’ re tuqtuukilal ut paab’aal chirix li Jesukristo naqataw sa’eb’ a’an?

Salmos 2; 22; 31:5

Eb’ li Salmo neke’xk’am qach’ool sa’ lix yu’am ut lix k’anjel li Jesukristo.

• Rilb’aleb’ li salmo—b’ar wi’ na’aatinak chirix xyu’am li Kolonel—naru nokoxtenq’a chixnimob’resinkil qapaab’aal chirix li Jesukristo. Naru taak’eheb’ li komon sa’ kok’ ch’uut malaj sa’ ka’kab’il, ut jek’i re li junjunq ch’uut jun sumal reheb’ li raqal a’in: Salmos 2:1–3 ut Hechos 4:24–28; Salmos 2:7 ut Hechos 13:30–33; Salmos 22:1 ut Mateo 27:45–46; Salmos 22:7–8 ut Mateo 27:39–43; Salmos 22:16 ut Lukas 23:32–33; Salmos 22:18 ut Mateo 27:35; Salmos 31:5 ut Lukas 23:46. Patz’ reheb’ naq te’xsik’ xyaalal chan ru naq li profeetil aatin sa’ Salmos kitz’aqob’resiik ru sa’ xyu’am li Kolonel, ut naq te’xye chan ru li raqal a’an naxkawob’resi lix paab’aaleb’ chirix li Kolonel.

  Malaj naru taatz’iib’a chiru pizarron junqaq li raqal ut taakanab’eb’ re te’xjuntaq’eeta li raqal sa’ Salmos rik’in li nak’ulman sa’ li Ak’ Chaq’rab’.

  Naru ajwi’ taapatz’ reheb’ li komon naq te’xwotz jalan chik na’leb’ xe’xtaw chirix li Kolonel naq xe’rileb’ li Salmo (maare Salmos 34:20; 41:9; chi’ilmanq ajwi’ Lukas 24:44).

  Chirix naq ak xe’aatinak chirixeb’ li raqal a’in, naru te’xye k’a’ut naq maare nim xwankileb’ li Salmo a’an choq’ reheb’ laj Judio li ke’xnaw ru li Kolonel. K’a’ut naq nim xwankil choq’ qe?

Salmos 23

“Li Qaawa’ a’an laj k’aak’alehom we”

• Re xtenq’ankileb’ li komon chi aatinak chirixeb’ li eetalil sa’ Salmos 23, naru taak’uteb’ li jalam-uuch chirix li na’leb’ sa’ li salmo, jo’eb’ li wankeb’ sa’ Kim, Taaqehin—Choq’ reheb’ li komon ut li junkab’al. Chirix a’an naru taapatz’ reheb’ naq te’xsik’ li aatin nawulak chiruheb’ sa’ li salmo ut te’aatinaq chirix. K’a’ru nachal sa’ qak’a’uxl naq naqab’i li aatin “nikinxk’e chi hilank sa’ raxil pach’aya’,” malaj “li tuqtuukil ru ha’ ”? K’a’ru neke’reetali li “b’aar” ut li “xuq’ ” li neke’k’ojob’ank ch’oolej? K’a’ru naraj naxye naq natz’iptz’otk li “qasek’ ”? K’a’ru neke’xk’ut li eetalil a’in chiqu chirix li Jesukristo? Naru taaye reheb’ li komon naq te’ril wi’chik li salmo, ut ruuchileb’ li eetalil a’in, te’xye b’an li k’a’ru neke’reetali.

Xkomon chik li k’anjeleb’aal

Eb’ li b’ich chirixeb’ li Salmo.

• Salmos 8:3–9; 9:1–2. “Jwal nim aawu” (Hymns, 41)

• Salmos 23. “Na’ilok we Jehova,” “Li Qaawaʼ aʼan laj Ilol we” (Eb’ li B’ich,60, 61)

• Salmos 23:6; 150. “Nim li Qaawa’, li qaDios” (Eb’ li B’ich, 39)

• Salmos 26:8. “Laa wochoch, Dios, naqara” (Eb’ li B’ich, 158)

• Salmos 27:1. “Laa’at lin saqen” (Eb’ li B’ich, 47)

• Salmos 33:1–6; 95:1–6. “Xbʼaan xchaqʼal li ru li tzuul” (Eb’ li B’ich, 50)

• Salmos 37:3–9. “Hilan at waam” (Eb’ li B’ich, 71)

• Salmos 148. “Ex xyiib’ahom qaDios ut Rey” (Eb’ li B’ich, 31)

Xkawresinkil qib’ jo’ aj k’utunel

Oksiheb’ li b’ich. Ebʼ li bʼich nekeʼxbʼoq lix Musiqʼ li Qaawaʼ, nekeʼxkʼe chiqeekʼa li oxloqʼink saʼ qachʼool, nokoheʼxtenqʼa chi wank saʼ junajil joʼ komon, ut nokoheʼxkanabʼ chixnimankil ru xkʼabʼaʼ li Qaawaʼ. … Ebʼ li bʼich nokoreekʼasi chixjalbʼal qakʼaʼuxl ut chixbʼaanunkil li us, nekeʼxkawobʼresi lix nawom qachʼool ut li qapaabʼaal, nekeʼxkʼojobʼ xchʼoolebʼ li lubʼluukebʼ, nekeʼxwaklesi xchʼoolebʼ li nekeʼyaabʼak, ut nokoheʼxtenqʼa chi kuyuk toj saʼ rosoʼjik” (chiʼilmanq Ebʼ li Bʼich, ix).