Na’ilok we Jehova, xb’aan laj Yongsung Kim, havenlight.com

8–14 agosto

Salmos 1–2; 8; 19–33; 40; 46

“Li Qaawa’ a’an laj k’aak’alehom we”

Maak’oxla naq tatruuq chixk’utb’al ka’ajwi’ li na’leb’ ut eb’ li Salmo li wankeb’ sa’ li tusleb’ aatin a’in. Kanab’ naq li Musiq’ej tatxb’eresi rik’in li na’leb’ li tatxjilosi rik’in li Qaawa’.

Tz’iib’a li nakak’oxla

Ink’a’ naqanaw chi yaal ani kitz’iib’ank reheb’ li Salmo. Nak’oxlaman naq li rey aj David kixtz’iib’a junjunq reheb’, a’b’an moko nawb’il ta ani kitz’iib’ank re lix k’ihaleb’. A’ut, chirix rilb’aleb’ ru li Salmo, naru naqeek’a naq naqanaw xch’ooleb’ laj Salmista, us ta ink’a’ naqanaw xk’ab’a’eb’. A’ut naqanaw naq ninqeb’ xloq’al li Salmo choq’ reheb’ laj Israelita, ut naqanaw naq li Kolonel kixyaab’asiheb’ k’iila sut. Sa’eb’ li Salmo, naqak’e reetal li raameb’ lix najteril tenamit li Dios. Naqak’e reetal k’a’ru ke’reek’a chirix li Dios, k’a’ru ke’ok wi’ xk’a’uxl, ut chan ru ke’xtaw tuqtuukilal. Jo’ aj paab’anel sa’ li kutan a’in, chiru chixjunil li ruchich’och’, toj naqoksiheb’ li aatin a’in re xloq’oninkil li Dios. Chanchan naq eb’ laj tz’iib’ahom reheb’ li Salmo ke’ilok chi sa’ li qaam ut ke’xtaw chan ru xyaab’asinkil li naqeek’a chirix li Dios, li na’ok wi’ qak’auxl, ut chan ru naqataw tuqtuukilal.

Re xtzolb’al k’a’ru wan sa’ li hu Salmos, chi’ilmanq “Salmos (Saalm)” sa’ li K’utul Raqal reheb’ li Loq’laj Hu.

Li na’leb’ re xtzolb’aleb’ li loq’laj hu aajunes

Salmos 1; 23; 26–28; 46

Eb’ li Salmo neke’xk’ut chiqu naq tento taqapaab’ li Dios.

Nak nakawil li hu Salmos, maare taak’e reetal naq eb’ laj tz’iib’anel ke’xk’ut li xiw, li rahilal, ut xsachik li ch’oolej. Chiqajunil naqeek’a chixjunil a’an, us ta wan li qapaab’aal. A’ut ninqeb’ xwankil li Salmo xb’aan naq neke’xk’ut chan ru toonumtaaq sa’ xb’een a’an, jo’ rik’in xpaab’ankil li Qaawa’ chi anchal qach’ool. K’oxlaheb’ li musiq’ejil na’leb’ a’in naq nakawil Salmos 1; 23; 26–28; 46. K’e reetaleb’ li na’leb’ a’in, ut tz’iib’a li nakataw:

• Li b’oqok chixpaab’ankil li Qaawa’:

• Li aatin li naxch’olob’ ani li Qaawa’:

• Li aatin li naxch’olob’ li tuqtuukilal, li metz’ew, ut xkomon chik li usilal naxk’e:

• Li aatin li naxch’olob’ li ani napaab’ank re li Qaawa’:

Salmos 2; 22

Eb’ li Salmo neke’xjayali li qak’a’uxl rik’in lix yu’am ut lix k’anjel li Jesukristo.

Wankeb’ li Salmo li neke’xye resil lix yu’am li Jesukristo sa’ ruchich’och’. Eb’ laj Kristiano sa’ xq’ehil li Ak’ Chaq’rab’ ke’xk’e ajwi’ reetal li na’leb’ a’an—ke’xk’e reetal naq sa’ Salmos 2 wan reetalil li raqok aatin chirix li Jesus chiru li rey aj Herodes ut laj Poncio Pilato. Naru taawil Salmos 2 ut 22 rochb’een Mateo 27:35–46; Lukas 23:34–35; ut Jwan 19:23–24. Sik’ chan ru naxk’am rib’ li aatin sa’eb’ li Salmo a’in rik’in lix yu’am li Kolonel, ut b’aanu ajwi’ a’in naq yooqat chixtzolb’al li hu Salmos chiruheb’ li xamaan chalkeb’ re.

K’oxla naq katwan raj jo’ laj Judio sa’ xkutankil li Jesus, ut naq kanaweb’ ru li Salmos ut kawil chan ru naxk’am rib’ rik’in xyu’am li Kolonel. Chan ru naq kat-osob’tesiik raj xb’aan li nawom a’an?

Chi’ilmanq ajwi’ Salmos 31:5; 34:20; 41:9; Lukas 24:44; Hebreos 2:9–12.

Salmos 8; 19; 33

“Nujenaq li ruchich’och’ rik’in xrahom li Dios.”

Rilb’al Salmos 8; 19; ut 33 maare tatreek’asi chixk’oxlankil lix k’iila chaab’il yo’ob’tesihom li Qaawa’. K’e reetal li nakak’oxla ut nakaweek’a. Chan ru naq lix yo’ob’tesihom li Qaawa’ “naxye resil xloq’al li Dios”? (Salmos 19:1).

Salmos 19:7–11; 29

Li raatin li Qaawa’ k’a’jo’ xwankil, “k’a’jo’ naq nak’ojob’ank ch’oolej.”

Sa’eb’ li Salmo, li aatin jo’ chaq’rab’, taqlahom, ut ajom neke’reetali li raatin li Qaawa’. Chijultiko’q aawe a’an naq nakawil Salmos 19:7–11. K’a’ru neke’xye li raqal a’in chirix li raatin li Qaawa’? K’a’ru nakatzol chirix lix yaab’ xkux li Qaawa’ sa’ Salmos 29? Sa’ laa yu’am, chan ru naq li raatin malaj lix yaab’ xkux li Qaawa’ chanchan li nach’olob’aman sa’eb’ li raqal a’in?

Tento naq saqaq qu sa’ musiq’ej re ok chiru rilob’aal li Qaawa’.

Salmos 24; 26–27

Re ok chiru rilob’aal li Qaawa’, tento naq saqaq qu.

Li santil ochoch re Jerusalen kikab’laman sa’ xb’een jun li tzuul, jo’kan naq li aatin “sa’ xtzuul li Qaawa’ ” (Salmos 24:3) maare yoo chi aatinak chirix li santil ochoch malaj li rilob’aal li Dios. Chan ru naq li na’leb’ a’in nakatxtenq’a chixatawb’al ru Salmos 24? K’a’ru naraj naxye naq “ch’ajb’ileb’ li quq’ ut saqeb’ ru qach’ool”? (Chi’ilmanq Salmos 24:4).

K’a’ru naxk’ut Salmos 26 ut 27 chawu chirix li rochoch li Qaawa’?

Chi’ilmanq ajwi’ Salmos 15; David A. Bednar, “Limpios de manos y puros de corazón,” Liahona, noviembre 2007, 80–83.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Salmos 22.Naq jun li komon naril li salmo a’in, lix komoneb’ chik naru te’xsik’ xjuntaq’eetankil rik’in Mateo 27:35–46. Toja’ naq teewotz li nekereek’a chirix li Jesukristo ut lix mayej choq’ qe.

Salmos 23.Wankeb’ li qab’ich li musiq’anb’ileb’ xb’aan Salmos 23 , jo’ “Na’ilok we Jehova” ut “Li Qaawaʼ aʼan laj Ilol we” (Eb’ li B’ich, 60, 61). Jo’ junkab’al, naru teeb’icha jun reheb’ li b’ich a’in ut teesik’ li raatinul li b’ich li maare musiq’anb’il xb’aan li salmo. Malaj maare taawulaq cheru xyiib’ankil xjalam-uuch li na’leb’ sa’ li salmo ut li b’ich, ut teeye k’a’ru li na’leb’ li wan sa’ li jalam-uuch. Chan ru naq li Qaawa’ a’an aj ilol qe?

Salmos 24:3–5.Re xjultikankil naq nim xwankil naq chajb’ileb’ li quq’ ut saqeb’ ru qach’ool, naru taawil Salmos 24:3–5 naq laa junkab’al neke’xchaj li ruq’eb’. K’a’ru nareetali li uq’ej? K’a’ru nareetali li ch’oolej? K’a’ru taqab’aanu re xchajb’aleb’ li quq’ ut xsaqob’resinkileb’ ru qach’ool?

Salmos 30:5, 11.Sa’ Salmos 30:6 yeechi’inb’il naq “ewu taawanq yaab’ak, a’b’an eq’la a’ chik li sahil ch’oolej.” Chan ru naq li Qaawa’ naxk’e xsahil qach’ool ruuchil xrahil? Maare taawulaq chiru laa junkab’al xk’utb’esinkil li na’leb’ sa’ li raqal 11.

Salmos 33.K’e reetal naq k’iilasutinb’il li aatin chixjunil sa’ li salmo a’in. K’a’ru naqatzol chirix li Qaawa’ rik’in chan ru k’iilasutinb’il li aatin a’in, jo’ sa’eb’ li raqal 13–15?

Salmos 46:10.Naru teeb’aanu jun ch’ina k’anjel jo’ junkab’al li tento xb’aanunkil sa’ “ch’anch’ookilal.” Chan ru naq li wank chi ch’anch’o tooxtenq’a chixnawb’al ru li Dios? Jo’q’e naru toowanq chi ch’anch’o ut chixnawb’al ru li Dios?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Na’ilok we Jehova,” Eb’ li B’ich, 60.

Xkawresinkil aawib’ chi tzolok

Yiib’ank. Eb’ li loq’laj hu jo’ li hu Salmos rajlal nokohe’xmusiq’a chixnimankil ru li Qaawa’ chi jar paay ru. Wi eek’asinb’ilat chixk’utb’al laa paab’aal rik’in li b’ich, li utz’u’ujinb’il aatin, li jalam-uuch, malaj chi jalan chik, b’aanu a’an! Naru taawotz li nakab’aanu rik’ineb’ laa was aawiitz’in re xkawob’resinkil lix paab’aaleb’ chirix li qaChoxahil Yuwa’ ut li Jesukristo.

Li chaab’il aj Ilol Karneer, xb’aan laj Ken Spencer