li Jesus rik’in li xam

Xkolb’al li k’a’ru sachb’il, xb’aan laj Michael T. Malm

15–21 agosto

Salmos 49–51; 61–66; 69–72; 77–78; 85–86

Tinch’olob’ jo’nimal kixb’aanu li Qaawa’ choq’ re li waam

Li tusleb’ aatin a’in naxk’ut junjunq reheb’ li tzol’leb’ neke’tawman sa’eb’ li salmo a’in. Naq yookat chi tzolok, te’wanq li aatin ut na’leb’ li te’xtoch’ aach’ool. K’a’ru nakak’oxla naq li Qaawa’ naraj xk’utb’al chawu?

Tz’iib’a li nakak’oxla

Eb’ laj Salmista ke’xtz’iib’a li reek’ahom xch’ooleb’ sa’ lix utz’u’ujinb’il aatin. Ke’tz’iib’ak chirix li wiib’ank ch’oolej, li xuwak, ut li xutaanak. Wan naq ke’reek’a naq kanab’anb’ileb’ xjuneseb’ xb’aan li Dios, ut wankeb’ li salmo li nujenaqeb’ rik’in rahilal ut xmaak’a’il li yo’onihom. Wi wan naq nakaweek’a a’in sa’ laa yu’am, rilb’al ru li hu Salmos naxch’olob’ naq moko aajunes ta wankat. A’b’an, taawileb’ ajwi’ li salmo li neke’xwaklesi aach’ool naq ra wankat, xb’aan naq eb’ laj Salmista ke’xnima ajwi’ ru li Qaawa’ xb’aan lix chaab’ilal, ke’xsach xch’ool xb’aan lix wankilal, ut ke’saho’ xch’ool xb’aan li ruxtaan. Ke’xnaw naq li ruchich’och’ nujenaq rik’in li maa’usilal ut li maak, a’b’an ke’xnaw awji’ naq “q’axal chaab’il” ut “aj kuyul maak” li Qaawa’ (Salmos 86:5). Ke’xtaw ru naq li paab’aal chirix li Qaawa’ ink’a’ naraj naxye naq maak’a’aq li rahilal, li maak, malaj li xiw. Naraj b’an naxye naq nakanaw ani taasik’ sa’ laa ch’a’ajkilal.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Salmos 49; 62:5–12

Li tojb’al-ix nachal ka’ajwi’ sa’ xk’ab’a’ li Jesukristo.

Wan li aatin sa’ Salmos 49 choq’ re “li maak’a’ xwankil ut li q’axal wank xloq’al, jo’ b’ihom jo’ neb’a’ ” (raqal 3). K’a’ru li aatin a’an? K’a’ chik ru nakawil sa’ Salmos 62:5–12 li naxk’am rib’?

Rilb’aleb’ ru li salmo maare tatxmusiq’a chixk’oxlankil chan ru naq li kristiaan neke’xkanab’ rib’ chiru jalan chik li k’a’aq re ru ruuchil li Dios re te’xsik’ xkolb’al (chi’ilmanq Salmos 49:7–8). Sa’ laa yu’am, k’a’ut naq nim xwankilal laa nawom naq “li Dios tixkol laa waam chiru xwankil li kamk”? (raqal 16).

Chi’ilmanq ajwi’ Salmos 28:6; Alma 34:8–17.

Salmos 51; 85–86

Sa’ xk’ab’a’ li ruxtaan li Kolonel, naru te’kuye’q lin maak.

K’oxlanb’il naq a’an lix tz’aam li rey aj David sa’ Salmos 51, xb’aan naq a’an kimuxuk sumsu ut kikamsink (chi’ilmanq 2 Samuel 11). Us ta kok’eb’ li qamaak, naqataw ru naq tento xtz’aamankil li uxtaan jo’ sa’ li salmo a’in. Naqataw ajwi’ qana’leb’ chirix li jalb’a-k’a’uxlej. K’a’ru naxk’ut li aatin sa’ Salmos 51 chawu chirix li na’leb’ naqaj ru re taqajal qak’a’uxl chi yaal? K’a’ru nakatzol chirix lix wankilal lix tojb’al rix li maak xb’aan li Kolonel sa’ laa yu’am?

Naru ajwi’ taak’oxlaheb’ li patz’om a’in naq nakawil Salmos 85–86. Naru ajwi’ taasik’eb’ li aatin li neke’xch’olob’ ani li Qaawa’. Chan ru naq li aatin a’an naxkawob’resi laa paab’aal naq a’an tixkuy laa maak? (chi’ilmanq Salmos 86:5, 13, 15).

Chi’ilmanq ajwi’ Alma 36; Russell M. Nelson, “Naru taqab’aanu li chaab’il wi’chik ut toowanq chi chaab’il wi’chik,” Jolomil ch’utub’aj-ib’ re abril 2019; Carole M. Stephens, “Li taqenaqil aj b’anonel,” Jolomil ch’utub’aj-ib’ re octubre 2016.

Salmos 51:13–16; 66:16–17; 71:15–24

Lix nawom inch’ool chirix li Jesukristo naru tixtenq’aheb’ li was wiitz’in chi chalk rik’in a’an.

K’oxla chan ru xak’ul xnawom aach’ool chirix li Jesukristo ut lix wankilal re xtojb’al rix laa maak. Naq yookat chirilb’al Salmos 51:13–16; 66:16–17; 71:15–24, k’oxla chan ru taab’oqeb’ laa was aawiitz’in re “te’chalq chirilb’al lix b’aanuhom li Dios” (Salmos 66:5). K’a’ru naraj naxye choq’ aawe “xseraq’inkil lix tiikilal chi junelik”? (Salmos 71:24). Chan ru taaye reheb’ laa was aawiitz’in “jo’nimal kixb’aanu choq’ re laa waam”? (Salmos 66:16).

Chi’ilmanq ajwi’ Mosiah 28:1–4; Alma 26.

neke’aatinak wiib’ li saaj winq

Naru taqawotz xnawom qach’ool chirix lix b’aanuhom li Qaawa’ choq’ qe.

Salmos 63; 69; 77–78

Li Qaawa’ tinixtenq’a sa’ inch’a’ajkilal.

Wankeb’ li salmo li neke’xch’olob’ rik’in utz’u’ujinb’il aatin k’a’ru naqeek’a naq najt wanko rik’in li Dios ut naq naqaj ru xtenq’. Naru taasik’ li na’leb’ a’an sa’ Salmos 63:1, 8; 69:1–8, 18–21; 77:1–9. K’a’ru nakataw sa’ Salmos 63; 69; 77–78 li kixk’ojob’ xch’ooleb’ laj Salmista?

Naq naraho’ aach’ool, chan ru tenq’anb’ilat naq “najultiko’ aawe li xninqal ru xb’aanuhom li Qaawa’ ” ut “li sachb’a-ch’oolej kixb’aanu junxil”? (Salmos 77:12). Ch’olob’anb’ileb’ junjunq reheb’ li sachb’a-ch’oolej a’an sa’ Salmos 78. Naq nakawileb’ resil, k’oxla k’a’ru nakatxtenq’a chixk’eeb’al aayo’onihom rik’in li Dios (chi’ilmanq li raqal 7). Ma wan xnumsihom jun laa xe’ aatoon li naxtoch’ aach’ool?

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Salmos 51:17.K’oxla chan ru taak’ut chiru laa junkab’al k’a’ru jun li yot’b’il ch’oolej. Maare jo’ junkab’al naru teejor junaq k’a’aq re ru kaw li rix, jo’ jun li mol malaj jun li map. Chan ru naq li qach’ool chanchan li kawil k’a’aq re ru a’an? Chan ru taqakanab’ chi teeto li qach’ool chiru li Qaawa’? Rilb’al Salmos 51 maare tixk’e eena’leb’.

Salmos 61:3–4.Maare taawulaq chiru laa junkab’al xyiib’ankil xjalam-uucheb’ li eetalil sa’eb’ li raqal a’in ut xyeeb’al chan ru naq li Jesukristo chanchan jun “saqoonak najt xteram,” “jun qamuheb’aal,” ut “jun kab’l li q’axal kaw rib’.”

Salmos 71:17; 78:5–7.K’a’ru naraj li Qaawa’ naq “taak’ut … chiruheb’ laa walal aak’ajol”? (Salmos 78:5). Chejunilex naru teewotz jun na’leb’ chirix “lix sachb’a-ch’oolej” li Qaawa’, maare jun seraq’ sa’ li loq’laj hu, jun numsihom, malaj jun xnawom ch’oolej, li nekexxtenq’a chixk’eeb’al eeyo’onihom rik’in li Dios (chi’ilmanq Salmos 71:17; 78:7).

Salmos 72.Kitz’iib’aak Salmos 72 xb’aan laj David chirix laj Salomon, li ralal, a’b’an xk’ihal li aatin naxch’olob’ ajwi’ li Jesukristo. Naq nekeril li salmo a’in jo’ junkab’al, naru teetaqsi xjalam-uuch li Kolonel rajlal sut naq nekeril jun raqal li naxjultika li Jesukristo eere. Chan ru taqak’e chi uxk li ajom naq “chinujaq taxaq chixjunil li ruchich’och’ rik’in xloq’al”? (Salmos 72:19; chi’ilmanq ajwi’ Tzol’leb’ ut Sumwank 65:2).

Salmos 85:12.Li raqal a’in naru texxtenq’a chi aatinak chirix lix k’ojob’ankil wi’chik li evangelio—chan ru naq lix Hu laj Mormon a’an li yaal li “elenaq chaq sa’ li ch’och’,” ut chan ru naq eb’ laj choxahil taql “ke’kub’e chaq sa’ choxa” (chi’ilmanq ajwi’ Moises 7:62). Neke’k’utman junjunq reheb’ li na’leb’ a’in sa’ li video “La preparación de José Smith: Instruido de lo alto” (ChurchofJesusChrist.org).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Rajlal nawaj aawu,” Eb’ li B’ich, 53.

Xkawresinkil qib’ jo’ aj k’utunel

Jal chan ru nakatk’utuk. “Sik’ chan ru naru taab’aanu chi jo’kan sa’ xk’utb’al li evangelio. Xb’aanunkil a’an tixke’ xchaab’ilal ut xchaq’alil ru li tzolok. … K’oxla chan ru naq eb’ li b’ich, seraq’, jalam-uuch, ut xkomoneb’ chik li chaq’al ru k’anjel naru te’xb’oq li Musiq’ej” (Li k’utuk jo’ li Kolonel, 22).

jun winq wiq’wo chiru roq li Jesus

Miwiib’an aach’ool, at Tomas, xb’aan laj J. Kirk Richards