oxib’ li winq neke’aatinak rik’in jun chik li winq yokyo

Lix yalb’al rix laj Job, xb’aan laj Joseph Brickey

1–7 agosto

Job 1–3; 12–14; 19; 21–24; 38–40; 42

Toj tinkanab’ wib’ chiru

Naq nakawil resil laj Job, li Musiq’ej tatxb’eresi rik’in li na’leb’ aajel ru choq’ aawe. Tz’iib’a li na’leb’ nakatzol, ut k’oxla k’a’ru aj-e sa’ laa yu’am.

Tz’iib’a li nakak’oxla

Ak re xpatz’b’al k’a’ut naq li ani chaab’il xch’ool naxk’ul li rahilal—malaj k’a’ut naq li ani maa’us naxk’ul li chaab’ilal. K’a’ut naq li Dios, li tiik xna’leb’, tixk’ulub’a a’an? Neke’tz’ilman rix li patz’om a’in sa’ li seraq’ chirix laj Job, jun winq chaab’il xch’ool li kixk’ul naab’al li rahilal. Xmaak lix k’iila ch’a’ajkilal laj Job, eb’ li ramiiw ke’xpatz’ ma yaal naq chaab’il xch’ool. Laj Job kixye naq tiik xch’ool ut kixpatz’ ma yaal naq tiik xna’leb’ li Dios. A’b’anan, us ta lix ch’a’ajkilal ut xk’a’uxl, laj Job kikana chi tiik chixpaab’ankil li Jesukristo. Sa’ lix hu laj Job, li paab’aal tz’ilb’il ut yalb’il rix, a’b’an maajun wa kanab’anb’il. A’ut a’in ink’a’ naraj naxye naq ke’sumeek chixjunileb’ li patz’om. Lix hu laj Job naxk’ut naq toj reetal naq te’sumeeq, naru neke’wan xkab’ichal li patz’om ut li paab’aal, ut maak’a’ naxye k’a’ru nak’ulman, toj naru taqaye chirix li Qaawa’, “Toj tinpaab’ a’an” (chi’ilmanq Job 13:15).

Re xtzolb’al k’a’ru wan sa’ lix hu laj Job, chi’ilmanq “Job” sa’ li K’utul Raqal reheb’ li Loq’laj Hu.

Learn More image

reetalil li tzolok aajunes

Li na’leb’ re xtzolb’aleb’ li loq’laj hu aajunes

Job 1–3; 12–13

Lin paab’aal chirix li qaChoxahil Yuwa’ ut li Jesukristo naru tinixtenq’a chi kanaak chi tiik inch’ool sa’ chixjunil hoonal.

Lix tiklajik lix hu laj Job ink’a’ naxyal xch’olob’ankil chi yaal chan ru naq neke’raatina rib’ li Dios ut laj Satanas; naxyal b’an xch’olob’ankil naq xik’ nokoril ut nokoxjit laj Satanas. Naq nakawil lix jitom laj Satanas chirix laj Job (chi’ilmanq Job 1:9–11; 2:4–5), k’oxla ma naru nayeeman a’an chawix ajwi’ laa’at. Maare taapatz’ aawib’, k’a’ut naq nawaj kanaak chi tiik chixpaab’ankil li Dios? K’oxla lix yalb’al rix laj Job ut li k’a’ru kixb’aanu xb’aan (chi’ilmanq Job 1:20–22; 2:9–10). K’a’ru nakatzol rik’in a’an li maare tatxtenq’a chixk’ulb’al lix yalb’al aawix?

Us ta naxyal xq’e chi paab’ank laj Job, ke’k’ihan lix yalb’al rix ut lix rahilal (k’e reetal xrahilal xch’ool sa’ li ch’ol 3). K’a’jo’ xnimal lix rahilal, jo’kan naq eb’ li ramiiw ke’xye naq a’an li Dios nak’ehok li tojb’a-maak a’an sa’ xb’een (chi’ilmanq Job 4–5; 8; 11). Naq nakawil ru lix sumehom laj Job sa’eb’ li ch’ol 12–13, k’oxla k’a’ru kixnaw laj Job chirix li Dios li kixtenq’a chixpaab’ankil, us ta lix rahilal ut lix patz’om moko sumenb’ileb’ ta. K’a’ru nakanaw laa’at chirix li Dios li nakatxtenq’a chixk’ulb’al lix yalb’al aawix? Chan ru xanaweb’ li na’leb’ a’an, ut chan ru naq neke’xkawob’resi laa paab’aal?

Job 19

Li Jesukristo, a’an aj Tojol wix.

Wan naq li na’leb’ q’axal nim ru nak’utb’esiman chiqu sa’ xyi xnimal li qarahilal. K’oxla lix yalb’al rix laj Job sa’ Job 19:1–22 ut li na’leb’ li kixye sa’ Job 19:23–27. Chirix a’an, k’oxla chan ru nakanaw naq yo’yo laj Tojol aawix. Chan ru naq li nawom a’in nakatxtenq’a sa’ laa ch’a’ajkilal?

Chi’ilmanq ajwi’ Tzol’leb’ ut Sumwank 121:1–12; 122.

jun winq na’ilok taqe’k

Laj Job, xb’aan laj Gary L. Kapp

Job 21–24

“Naq tixyal wix, tinkanaaq jo’ tz’aqal li chaab’il oor.”

Naq nakawil xkomon chik li raatin laj Job ut eb’ li ramiiw chirix lix rahilal laj Job, naru taak’oxla chan ru naq taasume lix patz’omeb’: K’a’ut naq wan naq li ani chaab’il xch’ool naxk’ul li rahilal ut li ani maa’us ink’a’ naxk’ul xtojb’a-maak? K’oxla a’in naq nakawil Job 21–24. K’a’ru nakanaw chirix li qaChoxahil Yuwa’ ut lix k’uub’anb’il na’leb’ li tixk’e xsumenkil li patz’om a’an? Chi’ilmanq, 2 Nefi 2:11–13; Mosiah 23:21–23; 24:10–16; Abraham 3:22–26; Dallin H. Oaks, “Taawanq chixka’pak’alil chixjunil li k’a’aq re ru,” Jolomil ch’utub’aj-ib’ re abril 2016.

Chi’ilmanq ajwi’ L. Todd Budge, “Li kanab’ank-ib’ rajlal ut rik’in kawilal,” Jolomil ch’utub’aj-ib’ re octubre 2019.

Job 38; 40; 42

Nim wi’chik lix nawom li Dios chiru lin nawom.

Laj Job kititz’ chi jite’k xb’aaneb’ li ramiiw (chi’ilmanq Job 16:1–5; 19:1–3), ut kixpatz’ k’iila sut re li Dios k’a’ru aj-e lix rahilal (chi’ilmanq Job 19:6–7; 23:1–9; 31). Li Elder Neal A. Maxwell kixye naq “wi maak’a’ qakuyum rik’in xhoonal li nimajwal Dios,” jo’ laj Job, “yooko chixyeeb’al naq nim li qanawom chiru xnawom a’an.” Wan naq laa’o, li yal naqak’am li reloj chiru qatel naqasik’ xk’eeb’al xna’leb’ li ani nataqlank sa’ xb’een chixjunil li reloj ut li hoonal re choxa ch’och’ ” (“La esperanza por medio de la expiación de Cristo,” Liahona, enero 1999, 72). K’oxla li aatin a’in naq nakawil lix sumehom li Dios choq’ re laj Job sa’eb’ li ch’ol 38 ut 40. K’a’ru li na’leb’ li kixk’ut chiru laj Job? K’a’ut naq nim xwankil li na’leb’ a’in choq’ qe naq wan li qach’a’ajkilal ut li qapatz’om sa’ li qayu’am? K’a’ru nawulak chawu chirix lix sumehom laj Job sa’ Job 42:1–6?

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Job 1:20–22.Re xtawb’al ru li maare kireek’a laj Job, jo’ naxye sa’eb’ li raqal a’in, naru teeril jo’ junkab’al “Job” sa’ Relatos del Antiguo Testamento malaj teek’utb’esi li kik’ulman sa’ Job 1:13–22. K’a’ru naru taqatzol rik’in laj Job?

Job 14:14.Chan raj ru taqasume xpatz’om laj Job sa’ li raqal a’in? K’a’ru wan sa’ Alma 11:42–44 li tooxtenq’a chixsumenkil? (Chi’ilmanq ajwi’ li video “Él vive — Celebra la Pascua gracias a que Jesucristo vive,” ChurchofJesusChrist.org.)

Job 16:1–5.Ma wan naq chanchano eb’ li ramiiw laj Job li ke’jitok re ut ke’xwech’ rix laj Job naq kiraj ru xk’ojob’ankil xch’ool? (chi’ilmanq Job 16:1–4; chi’ilmanq ajwi’ Jwan 7:24). Chan ru naq li qaatin naru tixk’e xkawilaleb’ li qas qiitz’in naq raheb’ xch’ool? (chi’ilmanq Job 16:5).

Job 19:23–27.Chirix rilb’aleb’ ru li raqal a’in jo’ junkab’al, naru teewotz xnawom eech’ool chirix laj Tojol qix. Naru ajwi’ teek’e lix nawom eech’ool (malaj xjalam-uuch li Kolonel yiib’anb’il xb’aaneb’ li kok’al) sa’ jun tasal hu, maare jun diario re lee junkab’al (chi’ilmanq raqal 23). Naru ajwi’ teeb’icha jun li b’ich chirix li Kolonel, maare “Ninnaw naq yo’yo inKolonel” (Eb’ li B’ich, 77), ut teeye li aatin li naxkawob’resi lee paab’aal chirix.

Job 23:8–11.K’a’ru naraj naxye naq “tookanaaq jo’ tz’aqal li chaab’il oor” chirixeb’ lix yalb’al qix? Ma wan ani naqanaw ru li ak xb’aanu a’in? Maare taawulaq chiruheb’ li kok’al xyiib’ankil jun k’a’aq re ru rik’in li aatin sa’ li raqal 10 tz’iib’anb’il chiru. Naru ajwi’ tex’aatinaq chirix li Jesukristo naq kinumta sa’ xb’eeneb’ lix yalb’al rix (chi’ilmanq Lukas 22:41–44; Tzol’leb’ ut Sumwank 19:16–19).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Laj Kolol we yoʼyo,” Eb’ li B’ich, 76.

Xkawresinkil aawib’ chi tzolok

K’oxlan. Naqak’ul li chaab’il na’leb’ naq naqayal qilb’al qib’ sa’eb’ li loq’laj hu. Xk’oxlankil naq katwan raj sa’ xna’aj laj Job maare tatxtenq’a chixk’oxlankil laa wanjik rik’in li qaChoxahil Yuwa’ ut li Jesukristo.

eb’ li winq neke’aatinak rik’in jun chik li winq yokyo

Laj Job ut eb’ li ramiiw, xb’aan laj Ilya Repin