li Kristo tiqto chi kaq ut sutinb’il rix xb’aaneb’ li tenamit wiq’wookeb’

Li junjunq xb’een aqej taab’asmanq, xb’aan laj J. Kirk Richards

22–28 agosto

Salmos 102–103; 110; 116–119; 127–128; 135–139; 146–150

“Chixjunil li wank xyu’am chixnimaaq xk’ab’a’ li Qaawa’”

B’ar wan reheb’ lix k’utum li Salmos nakaweek’a naq q’axal chaab’ileb’ choq’ reheb’ li komon? Naq nakattzolok chiru li xamaan, tz’il rix chan ru taatenq’aheb’ li komon chixtawb’al k’a’ru naraj naxye li aatin sa’eb’ li salmo.

Tz’iib’a li nakak’oxla

reetalil li wotzok

Xkanab’ankileb’ chi wotzok

K’eheb’ xhoonal li komon re naq te’ril wi’chik eb’ li salmo xe’ril chiru li xamaan, ut patz’ reheb’ junjunq naq te’xwotz li raqal xwulak chiruheb’. Waklesi xch’ooleb’ chixwotzb’al k’a’ru xk’ut li Musiq’ej chiruheb’. Chan ru naq Salmos nokohe’xtenq’a chixloq’oninkil chi us li Qaawa’?

reetalil li k’utuk

Xk’utb’al li tzolʼlebʼ

Salmos 102–3; 116

Li Qaawa’ naru naxk’ojob’ qach’ool sa’ li qarahilal.

• Ma reek’ahomeb’ li komon li k’a’ru kireek’a laj tz’iib’ahom re Salmos 102? Chan ru taqasik’ li Qaawa’ naq nach’ana malaj nalub’ qach’ool? Naq eb’ li komon xe’xtzol Salmos 102, 103, ut 116 sa’ kab’l chiru li xamaan a’in, maare xe’xtaw junjunq ch’ol aatin li natenq’ank reheb’ chixsik’b’al li Qaawa’ sa’eb’ lix yalb’al rix. Waklesi xch’ooleb’ chixwotzb’al k’a’ru xe’xtaw, malaj sik’omaq sa’ komonil junjunq li chaab’il ch’ol aatin. Eb’ li komon naru ajwi’ neke’xye chan ru naq neke’tenq’aak xb’aan li Qaawa’ sa’eb’ lix ch’a’ajkilal.

• Maare te’wulaq raj chiru xtz’iib’ankileb’ lix salmo a’an chirix naq neke’tenq’aak xb’aan li Qaawa’ sa’eb’ lix yalb’al rix. Moko tento ta naq nim malaj ch’a’aj li salmo te’xtz’iib’a—kok’ ut ink’a’ ch’a’aj b’an li te’xch’olob’ xpaab’aaleb’, xb’antioxihomeb’ ut xloq’onihomeb’. Naru nakak’eheb’ sa’ ka’kab’il malaj chi junjunqal re te’ril Salmos 102, 103, ut 116 re’ te’xtaw xna’leb’eb’. Patz’ reheb’ junjunq naq te’xwotz li salmo xe’xtz’iib’a, wi neke’raj. Naru ajwi’ nekeb’icha jun li b’ich li naxye chan ru li Qaawa’ naxk’ojob’ qach’ool, maare “Bʼar wan xhiilal li waam?” (Eb’ li B’ich, 67).

  li Jesus nak’irtesin

  K’irtesink, xb’aan laj J. Kirk Richards

Salmos 119

Li raatin li Dios tixk’am qab’e junelik.

• Re xtikib’ankil aatinak chirix Salmos 119, patz’ reheb’ li komon naq te’aatinaq chirix junaq hoonal b’ar wi’ xe’xtaaqe jun li b’e re te’wulaq sa’ junaq na’ajej (maare taawaatina junaq reheb’ li komon re naq tixkawresi rib’ re aatinak chirix a’in). K’a’ru li ch’a’ajkilal xtaw sa’ li b’e? K’a’ru xtenq’ank re chi kanaak sa’ li b’e? Chirix a’an, maare taayiib’ jun li b’e chiru li pizarron ut taapatz’ reheb’ li komon naq te’xtz’iib’a junjunq ch’ol aatin re Salmos 119 li naxye k’a’ru naxb’aanu li Qaawa’ re qatenq’ankil chi kanaak sa’ xb’ehil li sumwank. Naru taawotz li raatin li Awa’b’ej Russell M. Nelson, li wan sa’ “Xkomon chik li k’anjeleb’aal” jo’ xtz’aqob’ li aatinak.

• Maare us raj choq’ reheb’ li komon xjuntaq’eetankil li naxk’ut Salmos 119 chirix li kanaak sa’ lix b’e li Qaawa’ rik’ineb’ jalaneb’ chik raqal sa’eb’ li loq’laj hu. Naru taak’eheb’ li komon sa’ kok’ ch’uut ut taapatz’ reheb’ naq te’ril junjunq reheb’ li raqal a’in: Salmos 119:33–40, 105; Proverbios 4:11–19; 1 Nefi 8:20–28; 11:25; 2 Nefi 31:17–21; Alma 7:9, 19–20. Patz’ reheb’ li junjunq chi ch’uut naq te’xye k’a’ru xe’xtzol. K’eheb’ xhoonal li komon chixk’oxlankil k’a’ru neke’reek’a naq tento te’xb’aanu xb’aan li k’a’ru xe’xtzol.

Salmos 139

Li Qaawa’ naxnaw ru li qaam.

• Xtawb’al ru naq li Qaawa’ naxnaw qu—naxnaw k’a’ru naqak’oxla ut k’a’ru naqab’aanu, ma kaw malaj q’un qametz’ew—ut naq nokoxra, naru nokoxtenq’a chixsik’b’al ru li us. Naru nakapatz’ reheb’ li komon naq te’xsik’ ch’ol aatin sa’ Salmos 139 li neke’xk’ut li yaal a’in. Chan ru naq najala li qayu’am naq naqanaw ru li yaal a’in? Eb’ li komon naru ajwi’ neke’xye chan ru naru naqab’oq li Qaawa’ “chixk’eeb’al reetal jo’ch’inal jo’ nimal li ninb’aanu” (raqal 23).

reetalil xkomon chik li k’anjeleb’aal

Xkomon chik li k’anjeleb’aal

Li b’e laatz’ ut ka’ch’in ru.

Li Awa’b’ej Russell M. Nelson kixye:

“Re naq too’elq chi uub’ej sa’ li qayu’am, tento naq taqataaqe li choxahil b’eresihom. Li Qaawa’ kixye, “Chex’iloq wankin wi’ sa’ li junjunq eek’oxlahom; miwiib’an eech’ool; mexxuwak” [Tzol’leb’ ut Sumwank 6:36]. Ut laj Salmista kixtz’iib’a, “Lochlookil xam laa waatin choq’ we laa’in, a’an nakutanob’resink re lin b’e” [Salmos 119:105]. …

“Sa’ laa yu’am, nakataw k’iila ramleb’ ut nakak’ul junjunq li sachk. Li loq’laj hu nakatxtenq’a chixk’eeb’al reetaleb’ a’an ut xjalb’al li k’a’ru aajel ru xjalb’al. Nakakanab’ b’eek sa’ li b’e ink’a’ us. Nakatzol chi ch’olch’o ru li reetalil li b’e sa’ li loq’laj hu. Chirix a’an nakajal aak’a’uxl ut nakatuqub’ li tuqub’aak naraj re ok sa’ li “laatz’ ut ka’ch’in ruhil b’e a’in li nak’amok sa’ li junelik yu’am” [2 Nefi 31:18]” (“El vivir mediante la guía de las Escrituras,” Liahona, enero 2001, 20).

Xkawresinkil qib’ jo’ aj k’utunel

Tenq’aheb’ li wankeb’ xch’a’ajkilal. Wan naq eb’ li komon wankeb’ xch’a’ajkilal ka’ajwi’ neke’raj ru naq te’k’ehe’q chi tz’aqonk re naq te’reek’a naq raab’ileb’. K’oxla xk’eeb’al xk’anjeleb’ sa’ junaq li tzolok chal re malaj k’e reetal naq wan ani taak’amoq chaq reheb’ sa’ iglees. Maakanab’ xyalb’al aaq’e wi sa’ xtiklajik ink’a’ nakate’xk’ulub’a. (Chi’ilmanq Li k’utuk jo’ li Kolonel, 8–9.)