jun winq natzolok sa’ li loq’laj hu

29 agosto–4 septiembre

Proverbios 1–4; 15–16; 22; 31; Eklesiastes 1–3; 11–12

“Li roxloq’inkil li Qaawa’ a’an xtiklajik li chaab’il k’a’uxl”

Chan ru naru li esil natawman sa’ Proverbios ut Eklesiastes taarosob’tesi xyu’ameb’ li komon nakatzoleb’? Ab’i ut b’aanu li musiq’anb’il na’leb’ nakak’ul naq yookat chi tzolok ut chixkawresinkil aawib’ re k’utuk.

Tz’iib’a li nakak’oxla

reetalil li wotzok

Xkanab’ankileb’ chi wotzok

Sa’ Proverbios ut Eklesiastes natawman naab’al li esil jwal ch’ina-us ut wan xwankil. Naq maji’ nekex’aatinak chirixeb’ li raqal neke’tawman sa’ li hu a’in, b’oqeb’ li komon chixwotzb’al junaq li raqal xwulak chiruheb’ naq xe’tzolok chiru li xamaan a’in xjuneseb’ malaj jo’ junkab’al.

reetalil li k’utuk

Xk’utb’al li tzolʼlebʼ

Proverbios 1–4; 15–16; Eklesiastes 1–3; 11–12

“Rab’inkil li choxahil na’leb’.”

• Sa’ chixjunil li hu Proverbios nak’eeman naab’al sut li b’oqom re xtawb’al li chaab’il na’leb’ ut nawom. Chan ru taatenq’aheb’ li komon chixwotzb’al li xe’xtzol chirix li chaab’il na’leb’? Naru taatz’iib’a li aatin chaab’il na’leb’ sa’ li pizarron ut taab’oqeb’ chixtz’iib’ankil li raqal malaj aatin natawman sa’ Proverbios malaj Eklesiastes li natenq’an xtawb’al ru li chaab’il na’leb’. (Wi nakak’oxla naq us, b’oqeb’ chixtzolb’al Proverbios 1–4; 15–16; Eklesiastes 1–3; 11–12.) K’a’ru naqatzol chirix li chaab’il na’leb’ sa’eb’ li raqal a’in? Chan ru naq noko’osob’tesiik naq naqasik’ li chaab’il na’leb’ rik’in li Dios?

Proverbios 1:7; 2:5; 3:7; 8:13; 15:33; 16:6; 31:30; Eklesiastes 12:13

“Maaye aawib’ naq k’a’jo’ aana’leb’; chawoxloq’i li Qaawa’.”

• Jun chik li na’leb’ natawman sa’ Proverbios ut Eklesiastes, a’an “roxloq’inkil li Qaawa’ ” (Proverbios 1:7; chi’ilmanq ajwi’ Proverbios 2:5; 3:7; 8:13; 15:33; 16:6; 31:30; Eklesiastes 12:13). Eb’ li komon naru neke’ril junjunqaq reheb’ li raqal a’in ut te’xtz’il rix li naraj naxye roxloq’inkil li Qaawa’. K’a’ru xjalanil xxuwankil li Qaawa’ rik’in xxuwankil jalan chik k’a’aq re ru? Naru nakawotz b’ayaq chirix li kixye li Elder David A. Bednar li natawman sa’ “Xkomon chik li k’anjeleb’aal.”

jun ixq rik’in li utz’u’uj

Xtzolb’al xpaab’ankil li Qaawa’, xb’aan li xKathleen Peterson

Proverbios 3:5–7

“K’ojk’ooq aach’ool rik’in li Dios chi junelik.”

• Eb’ li komon maare te’xyal xsahil jun li k’utum li tixtenq’aheb’ chixtawb’al ru li naraj naxye “k’ojk’ooq aach’ool rik’in li Dios chi junelik” ut “maawa’ rik’in laa k’a’uxl laa na’leb’ ” (Proverbios 3:5). Naru taaye re jun komon naq tixchap rib’ rik’in junaq li k’a’aq re ru kaw wan, maare junaq li tz’ak. Chirix a’an, maare li komon naru naxchap rib’ rik’in junaq li k’a’aq re ru ink’a’ kaw wan, maare junaq li mesleb’. Chan ru naq li k’anjel a’in nokoxtenq’a chixtawb’al ru Proverbios 3:5? K’a’ru naxk’ut chiqu Proverbios 3:5–7 chirix xpaab’ankil li Qaawa’? K’a’ut naq ink’a’ us xk’ojob’ankil qach’ool qajunes qib’? Chan ru naqak’e reetal naq li Qaawa’ nokoxb’eresi sa’ li qab’e naq naqapaab’ a’an?

Proverbios 15:1–2, 4, 18,28; 16:24–32

“Li nasumenk rik’in q’unil aatin, naxkotz li josq’il.”

• Re xtenq’ankileb’ li komon chixtz’ilb’al rix chan ru naru te’wanq xtuqtuukilal ut ink’a’ mas li wech’ok-ib’ sa’eb’ lix yu’am, naru nakab’oqeb’ chirilb’al Proverbios 15:1–2,18; 16:32. Chirix a’an naru neke’xwotz lix k’ulumeb’ jo’ nayeeman sa’eb’ li raqal a’in. Jo’q’e xk’eeman jun “q’unil sumenk” li xtenq’a “chixkotzb’al li josq’il”? (Proverbios 15:1). Malaj, te’xk’oxla jarub’ sut li Kolonel kixb’aanu li yeeb’il sa’eb’ li raqal a’in (chi’ilmanq Jwan 8:1–11; 18:1–11). Chan ru naru taqab’aanu li kixb’aanu a’an naq naqaatinaheb’ li qas qiitz’in?

• Us ta li ke’tz’iib’ank re Proverbios ink’a’ ke’xnaw chirix chixjunil li neke’numsiman wi’ li esil anajwan, li na’leb’ natawman sa’ Proverbios 15 ut 16 naru na’oksiman a’ yaal chan ru nanumsiman li esil. Re xtenq’ankileb’ li komon, naru nakab’oqeb’ chixsik’b’al ru jun reheb’ li raqal a’in ut te’ril ru: Proverbios 15:1–2, 4, 18,28; 16:24, 27–30. Chirix a’an, naru neke’xwotz li raqal xe’xsik’ ru re xtenq’ankileb’ chixnawb’al chan ru te’aatinaq rik’ineb’ li kristiaan sa’ li ulul ch’iich’, li celular, malaj sa’ internet. Wan xkomon chik li na’leb’ sa’ “Li aatinak” sa’ Choq’ re Xkawilaleb’ li Saaj (2011), 20–21.

reetalil xkomon chik li k’anjeleb’aal

Xkomon chik li k’anjeleb’aal

“Li Diosil xiw, a’an xraab’al A’an ut xk’eeb’al qib’ chiru.”

Li Elder David A. Bednar kixye:

“Li diosil xiw natikla rik’in xtawb’al ru chi yaal lix diosilal ut lix k’anjel li Qaawa’ Jesukristo, rik’in wank qach’ool chixq’axtesinkil li qajom chiru rajom a’an, ut rik’in xnawb’al naq li junjunq winq ut ixq te’xsume rix lix maak sa’ xkutankil li raqb’a-aatin. …

“Li Diosil xiw, a’an xraab’al A’an ut xk’eeb’al qib’ chiru.” Naq naqaxuwa ru li Dios chi tz’aqal, k’a’jo’ wi’chik naq naqara. Ut “li tz’aqal rahok narisi chixjunil li xiw” (Moroni 8:16). Ninch’olob naq li saqen kutan re li diosil xiw taarisi chaq xq’ojyinal li ruchich’och’il xiw (chi’ilmanq Tzol’leb’ ut Sumwank 50:25) naq noko’ilok wan wi’ li Kolonel, nokokab’lak sa’ xb’een a’an jo’ li qak’ojleb’aal, ut naqatiikisi qib’ chi uub’ej sa’ xb’ehil lix sumwank chi q’axtesinb’il li qach’ool” (“Jo’kan naq ke’xch’anab’ lix xiweb’,” Jolomil ch’utub’aj-ib’ re abril 2015).

Xkawresinkil qib’ jo’ aj k’utunel

Jayali aak’a’uxl rik’in li Jesukristo. Moko naru ta naqatenq’aheb’ li komon chi wank xpaab’aal wi li qak’utum ink’a’ jayalinb’il rik’in li Kolonel. Rik’in laa k’utum, b’oqeb’ li komon chi kab’lak “saʼ xbʼeen lix saqoonaq laj Tojol qix, aʼan li Kristo, li Ralal li Dios” (Helaman 5:12).