Loq’laj k’iche’, xb’aan laj Brent Borup

12–18 septiembre

Isaias 13–14; 24–30; 35

“Jun li sachb’a-ch’oolejil k’anjel ut jun li eetalil”

Rubʼelaj naq nakatenqʼahebʼ laa was aawiitzʼin chixtawbʼal li naʼlebʼ saʼ lix hu laj Isaias, tento naq taataw aajunes ebʼ li naʼlebʼ aʼan. Naq yooqat chi tzolok chiru li xamaan a’in, sik’ ru li yaal li nakaweek’a naq tento taawotz rik’ineb’.

Tz’iib’a li nakak’oxla

Xkanab’ankileb’ chi wotzok

Re xwaklesinkileb’ xch’ool li komon re te’xwotz li yookeb’ chixtzolb’al sa’ Isaias, naru nakapatz’ reheb’ chan raj ru te’xsume’ junaq li tixye, “Jwal ch’a’aj xtawb’al ru lix hu laj Isaias.” K’a’ru natenq’ank qe chixtawb’al ru lix k’utum laj Isaias? K’a’ru raqalil reheb’ li loq’laj hu xtoch’ qach’ool?

Xk’utb’al li tzolʼlebʼ

Isaias 24:21–23; 25:6–8; 26:19; 28:16

Lix tz’iib’ahom laj Isaias nokoxk’am rik’in li Kristo.

• Jo’ laj Nefi, eb’ li komon maare xe’xyal xsahil lix nawom laj Isaias chirix li Jesukristo (chi’ilmanq 2 Nefi 11:2). Naru nakapatz’ reheb’ naq te’xwotz junaq li raqal li xe’xtaw chiru li xamaan a’in ut k’a’ru li xk’ut chiruheb’ chirix li Kolonel. Malaj, naru nakab’oqeb’ naq te’xwotz li neke’xtzol chirix li Jesukristo sa’ Isaias 24:21–23; 25:6–8; 26:19; 28:16 malaj sa’ jalan chik raqal li xataw naq xattzolok laa’at. K’a’ut naq nim xwankil li na’leb’ a’in choq’ qe?

  

  Nachal wi’chik re awa’b’ejink, xb’aan li xMary R. Sauer

Isaias 24:1–5; 28:1–8; 29:7–10; 30:8–14

Li q’etok paab’ank naraj naxye xtz’eqtaanankil li Qaawa’ ut eb’ lix profeet.

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al napatz’man naq taa’uxq li k’oxlak chirix li na’leb’ kiroksi laj Isaias re xch’olob’ankil k’a’ru nak’ulman naq naqatz’eqtaana li Qaawa’ ut eb’ lix profeet. Kanab’eb’ li komon chixwotzb’al li k’a’ru xe’xtzol. Malaj, naru nakab’oqeb’ chirilb’al wi’chik ru junaq reheb’ li raqal a’in: Isaias 24:1–5; 28:7–8; 29:7–10; 30:8–14. Rik’in li te’ril ru, naru neke’xtz’aqob’resi ru li raqal a’in: “Wi naqatz’eqtaana li Qaawa’, laa’aqo jo’…” K’a’ru naru naqab’aanu re toowanq chi tiik chiru li Qaawa’ ut ink’a’ toot’ane’q sa’ li q’etok paab’ank? (Chi’ilmanq xkomon chik sa’ “Xkomon chik li k’anjeleb’aal”). Chan ru naq li Qaawa’ narosob’tesiheb’ li neke’xpaab’ a’an?

• Re aatinak chirix li na’leb’ naru nak’amok qe sa’ li q’etok paab’ank, naru nakab’oqeb’ li komon chirilb’al Isaias 24:1–5; 28:1–8; 29:7–10; 30:8–14. Ye reheb’ naq tento te’xsik k’a’ru ke’xk’oxla ut ke’xb’aanu chaq li kristiaan sa’ xkutankil laj Isaias. Yiib’ junaq li eetalil sa’ li pizarron li naxye: Oyb’eni: Laa b’aanuhom ut laa wanjik naru nakatxk’am sa’ li q’etok paab’ank. Ebʼ li komon naru teʼxtzʼiibʼa sa’ li pizarron li kʼaʼru nekeʼxtaw saʼebʼ li raqal. K’e xhoonaleb’ re te’xwotz k’a’ru neke’xb’aanu a’an ut lix junkab’al re xkolb’aleb’ rib’ chiru li q’etok paab’ank.

Isaias 29:13–24; 30:18–26; 35

Li Qaawa’ naru taarak’ob’resi li k’a’ru sachb’il malaj jorb’il.

• Naru nakatz’iib’a chiru li pizarron jun li patz’om re te’k’oxlaq chirix Isaias 29: K’a’ru xjuntaq’eetil lix tz’iib’ahom laj Isaias rik’in lix k’ojlajik wi’chik li evangelio sa’ li qakutankil? Waklesi xch’ooleb’ re te’k’oxlaq chirix li patz’om naq yooqeb’ chirilb’al ru Isaias 29:13–24. Wi neke’raj xtenq’, naru neke’ril: 2 Nefi 27:6–26; Jose Smith—Resilal 1:17–19, 63–65. Naq te’aatinaq chirix li patz’om li wan sa’ li pizarron, naru te’xk’oxla k’a’ut naq li aatin “chaq’al ru” ut “eetalil” (Isaias 29:14) wan tz’aqal re xch’olob’ankil lix k’ojlajik wi’chik li evangelio. K’a’ru naqatzol chirix li k’ojob’ank wi’chik sa’ “Lix K’ojob’ankil Wi’chik lix Tz’aqalil lix Evangelio li Jesukristo: Jun jek’inb’il aatin re wiib’ cient chihab’ choq’ re li ruchich’och’ ”? (ChurchofJesusChrist.org).

• Sa’eb’ li ch’ol 30 ut 35 re Isaias natawman naab’al li raqal li naru natenq’an re xkawresinkil qapaab’aal naq li Qaawa’ naru narosob’tesiheb’ li ani neke’chal rik’in a’an. Re xtenq’ankileb’ li komon chixtawb’aleb’ li raqal, naru nakab’oqeb’ chixtzolb’al Isaias 30:18–26 malaj Isaias 35. B’oqeb’ chixwotzb’al li aatin malaj raqal li xe’xtaw ut li taatenq’anq re junaq chi nach’ok rik’in li Qaawa’ re tixk’ul lix rahom.

Xkomon chik li k’anjeleb’aal

Li kanaak chi tiik rik’in li Qaawa’ ut rik’in lix Iglees.

Li Awa’b’ej M. Russell Ballard kixk’e jun li na’leb’ re qatenq’ankil chixyalb’al qaq’e chi wank chi tiik chiru li Qaawa’ ut sa’ lix Iglees.

“Tento taqak’iresi li qapaab’aal chirix li Jesukristo ut li qatiikilal sa’ lix evangelio chiru chixjunil li qayu’am re rilb’al jun li jale’k rajlal—moko jun sut ta ajwi’, kok’ aj xsa’ b’an” [chi’ilmanq Alma 5:26]. …

“…Li raatin li Qaawa’ natawman sa’eb’ li loq’laj hu, ut lix k’utumeb’ li apostol ut li profeet. A’aneb’ neke’xk’e qana’leb’ ut xk’amb’al li qab’e li, wi naqataaqe, taak’anjelaq jo’ li t’ikr re numxik sa’ musiq’ej ut tooxtenq’a xnawb’al chan ru naq taqachap qib’ rik’in xkab’ichal li quq’. …

“Chirix xyalb’al qaq’e chirilb’al ru li loq’laj hu, tento ajwi’ tootijoq ut tookuyuk jo’eb’ li ralal laj Mosiah [Alma 17:3]” (“Wankex sa’ li jukub’ ut chapomaq eerib’!” Jolomil ch’utub’aj-ib’ re octubre 2014).

Xkawresinkil qib’ jo’ aj k’utunel

Jultika reheb’ li tzolonel lix seeb’aleb’ nakawil. Maare wankeb’ junjunq li komon sa’ laa tzoleb’aal li neke’reek’a naq moko kaweb’ ta xch’ool re xtzolb’al li evangelio. Ch’olob’ chiruheb’ naq wi neke’xyal xq’e chi tzolok, li Santil Musiq’ej tixk’eheb’ xna’leb’. (Chi’ilmanq Li k’utuk jo’ li Kolonel, 29–30.)