li Jesus naxk’irtesi jun winq mutz’

Xk’irtesinkil li winq mutz’, xb’aan laj Carl Heinrich Bloch

19–25 septiembre

Isaias 40–49

“K’ojob’omaq xch’ool lin tenamit”

Wan li kristiaan neke’ok xk’a’uxl chirix xwotzb’al li k’a’ru neke’xnaw xb’aan naq neke’xk’oxla naq moko neke’xnaw ta chi us li loq’laj hu. Chan ru taatenq’aheb’ li komon re naq te’reek’a naq k’ulb’ileb’ lix musiq’anb’il na’leb’?

Tz’iib’a li nakak’oxla

reetalil li wotzok

Xkanab’ankileb’ chi wotzok

Naru taatz’iib’a sa’ li pizarron jun li patz’om jo’ a’in: K’a’ru xk’ut cheru li Santil Musiq’ej naq xextzolok Isaias 40–49? Eb’ li komon naru neke’k’oxlak chirix li patz’om ut te’xtz’iib’a lix sumenkil, ut naru te’xwotz xna’leb’ chirix a’an.

reetalil li k’utuk

Xk’utb’al li tzolʼlebʼ

Isaias 40–49

Li Jesus naru naxk’ojob’ qach’ool ut naxk’e qoyb’enihom.

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naru nasik’man esil chirix li k’ojob’ank ch’oolej ut oyb’enink sa’ Isaias 40–49 ut tusb’il junjunqaq li raqal re xtikib’ankil. Naru taapatz’ reheb’ li komon naq te’xwotz junaq na’leb’ xe’xtaw. Waklesi xch’ooleb’ chixch’olob’ankil chan ru naq li esil a’in xtenq’aheb’ raj laj Judio li wankeb’ sa’ ch’a’ajkilal ut chan raj ru tooxtenq’a sa’ li kutankil a’in. Naru ajwi’ nakawotzeb’ li raqal xataw naq xattzolok aajunes. K’a’ru naraj li Qaawa’ naq taqanaw chirix a’an? Chan ru naq a’an naxk’ojob’ li qach’ool? Naru nakajultika reheb’ li komon naq li “Qaawa’ ” re li Najter Chaq’rab’ a’an li Jehova, ut a’an ajwi’ li Jesukristo.

• Li b’ich “Kawil k’ojleb’aal” (Eb’ li B’ich, 45) a’an li raatin laj Isaias li natawman sa’ Isaias 41:10; 43:2–5; 46:4. Chirix rilb’aleb’ li raqal sa’ li loq’laj hu ut xb’ichankil junjunq raqal re li b’ich, eb’ li komon naru te’xseraq’i junaq hoonal b’ar wi’ xe’reek’a naq li Kolonel kiwan rik’ineb’ ut chan ru naq xe’tenq’aak xb’aan xnumsihomeb’ re naq “ink’a’ te’xuwaq.”

li Jesus chunchu sa’ li ch’och’ ut naxtzoleb’ li kristiaan

“Jo’ junaq aj ilol ketomq, naxb’eresiheb’ lix karneer” (Isaias 40:11).

Isaias 40:1–3, 9–11; 43:8–13; 48:20–21; 49:1–9

“Laa’ex lin testiiw.”

• K’a’ru naraj naxye aj yehol nawom chirix li Qaawa’? Eb’ li komon naru neke’k’oxlak chirix li patz’om naq yooqeb’ chirilb’al jun malaj wiib’ oxib’ reheb’ li raqal a’in: Isaias 40:1–3, 9–11; 48:20–21; 49:1–9. Li aatin sa’ “Xkomon chik li k’anjeleb’aal” naru tixk’e junjunqaq xsumenkil li patz’om a’an. B’ar wankeb’ li “chaab’il esil” li naqawotz jo’ aj yehol nawom chirix li Jesukristo? B’ar wan reheb’ li raqal a’in nokoxtenq’a re naq “ink’a’ tooxuwaq” naq naqawotz li qanawom? (Isaias 40:9). Eb’ li komon naru neke’aatinak chirix xyeeb’al xnawomeb’ chirix li Qaawa’ ut chan ru naq lix nawomeb’ naru narosob’tesiheb’ li ras riitz’in.

• Re xtenq’ankileb’ li komon chixk’anjelankil li na’leb’ wan sa’ Isaias 43:8–13, patz’ reheb’ naq te’xk’oxla naq xe’b’oqe’ jo’ aj yehol nawom sa’ jun raqb’a-aatin. Sa’ li raqb’a-aatin a’an, kixaqab’aak li Jesukristo re taa’aatinaq chirix li na’leb’ natawman sa’ Isaias 43:11. Wi ta b’oqb’ilo jo’ aj yehol nawom re xtenq’ankil li raatin li Jesus (chi’ilmanq li raqal 10), k’a’ raj ru li qanawom taqak’e? B’ar raj xcha’al li qayu’am taqak’ut jo’ eetalil?

Isaias 48:10; 49:13–16

Li Qaawa’ naru nokoxkawresi rik’ineb’ li qarahilal.

• Eb’ li komon naru neke’xk’oxla chan ru naq li raatin li Elder Quentin L. Cook nokoxtenq’a chixtawb’al ru Isaias 48:10: “Li chaab’il kawresiik ut tiikilal nak’ulman sa’ xk’atleb’aal li tawasiik nokoxtiikob’resi ut nokoxsaqob’resi” (“Las canciones que no pudieron cantar,” Liahona, noviembre 2011, 106). Jo’kan ajwi’ naru te’aatinaq chirixeb’ “xk’atleb’aal li tawasiik” b’ar wi’ xe’k’i sa’ musiq’ej. Chan ru nokoxtenq’a Isaias 49:13–16 sa’ xhoonalil li tawasiik? Chi’ilmanq ajwi’ li video “El Fuego Purificador” (ChurchofJesusChrist.org).

reetalil xkomon chik li k’anjeleb’aal

Xkomon chik li k’anjeleb’aal

Li xaqliik jo’ aj yehol nawom.

Li Awa’b’ej Margaret D. Nadauld kixch’olob’ k’a’ru naraj naxye “xaqliik jo’ aj yehol nawom chirix li Dios sa’ chixjunil li hoonal, ut sa’ chixjunil li k’a’aq re ru ut sa’ chixjunil li na’ajej” (Mosiah 18:9):

“Naq nokoxaqli jo’ aj yehol nawom sa’ chixjunil li hoonal, naqasume xraab’al ut roxloq’inkil li Qaawa’ sa’ chixjunil li hoonal—chi kutan ut chi q’eq, sa’ li saq’ehil ut hab’alq’e, sa’ li chaab’il hoonal ut li ink’a’—xraab’al li Qaawa’ ut xk’utb’al li qarahom rik’in li qawanjik. …

“Xaqliik jo’ aj yehol nawom sa’ chixjunil li k’a’aq re ru naraj naxye: chixjunil li k’a’aq re ru—k’a’aq re ru jwal aajel ru, k’a’aq re ru ink’a’, sa’ chixjunil li aatinak ut sa’ chixjunil li se’ek, sa’ li b’atz’unk, sa’ li hu na’ilman ut sa’ li b’ich na’ab’iman, sa’ li tenq’ank, sa’ li aq’ej na’oksiman, ut rik’ineb’ li qamiiw. …

“Ut sa’ xraqik naqasume xaqliik jo’ aj yehol nawom sa’ chixjunil li na’ajej wanqo wi’. A’an naraj naxye naq ink’a’ ka’ajwi’ b’ar wi’ toohe’ril, jo’kan b’an ajwi’ naq wanqo qajunes, sa’ muqmu, sa’ q’ojyin malaj saqen; sa’ li iglees, li tzoleb’aal, li ochoch, malaj li b’eleb’aal ch’iich’; sa’ li tzuul malaj palaw; sa’ li b’e malaj sa’ tenamit. …

“Naq naqak’e reetal xnimal li maatan xk’e choq’ qe [li Kolonel], k’a’ru naru naqab’aanu us ta jwal ka’ch’in, choq’ re a’an ut choq’ re li qaChoxahil Yuwa’ li xtaqlank chaq re? Naru nokoxaqli jo’ aj yehol nawom chirix lix rahomeb’ a’an ut lix k’utumeb’ sa’ chixjunil li hoonal, sa’ chixjunil li k’a’aq re ru ut sa’ chixjunil li na’ajej” (“Sé testigo,” Liahona, mayo 2000).

Xkawresinkil qib’ jo’ aj k’utunel

Bʼoqebʼ re teʼxyal xqʼe chi tzolok. “A’aneb’ li komon li tento sa’ xb’eeneb’ tzolok. K’oxla chan ru naru taatenq’aheb’ li komon chixk’ulb’al ut chixtz’aqob’resinkil li teneb’ahom a’in” (Li k’utuk jo’ li Kolonel, 29).