Xk’irtesinkil li winq mutz’, xb’aan laj Carl Heinrich Bloch

19–25 septiembre

Isaias 40–49

“K’ojob’omaq xch’ool lin tenamit”

Laj Isaias kiroksi naab’al li jaljookil ru aatin. K’e reetal li nakak’oxla ut nakaweek’a naq nakawil li jaljookil ru aatin kixye. A’in naru tatxtenq’a chixtawb’al ru li k’a’ru kixk’ut.

Tz’iib’a li nakak’oxla

Li xb’een aatin re Isaias 40, a’an “K’ojob’omaq xch’ool.” A’an naxtikib’ jun ak’ na’leb’ kiraj xk’utb’al li profeet. Sa’ lix tz’iib’ahom rub’elaj a’in, laj Isaias naxtij Israel ut Juda chirix li sachok ut li preexil li taachalq xb’aaneb’ lix maak, a’b’an chirix a’in na’ok chixk’ojob’ankil xch’ooleb’ laj Judio li te’wanq xyu’am 150 chihab’ chirix a’an—chirix naq taasache’q li tenamit Jerusalen, taamuxe’q li santil ochoch, ut te’k’ame’q chi preexil li tenamit toj sa’ Babilonia. A’b’an li profeetil aatin a’in moko taawanq ta xwankil ka’ajwi’ choq’ reheb’ laj Israelita sa’ rahilal ut preexil. Wan xwankil choq’ qe laa’o, li naqeek’a ajwi’ chi jo’q’ehaq li rahilal, xmaak’a’il li yo’onihom, ut li sachk.

Li raatin laj Isaias choq’ reheb’ ut choq’ qe saqen ru: “Matxiwaq” (Isaias 43:1). Moko sachenaq ta chixjunil. Moko sachenaqat ta sa’ xch’ool li Qaawa’, ut a’an wan xwankil sa’ xb’een chixjunil li choqink sa’ laa yu’am. Ma maawa’ tab’i’ li Qaawa’ “li kiyo’ob’tesink ut kihelok re li choxa, li kik’uub’ank re li ruchich’och’, … li kik’ehok xyu’ameb’ li poyanam”? (Isaias 42:5). Ma ink’a’ tab’i’ nim xwankil wi’chik chiru Babilonia, chiru li maak, chiru yalaq k’a’ru nachapok aawe? “Sutq’in chaq wik’in,” chan, “xb’aan naq laa’in xinkolok aawe” (Isaias 44:22). A’an naru chixk’irtesinkil, chirak’ob’resinkil, chixkawob’resinkil, chixkuyb’al, ut chixk’ojob’ankil—yalaq k’a’ru ajb’il ru aab’aan re naq taatoje’q aawix.

Re xtzolb’al chan ru naq laj Nefi ut laj Jakob ke’xjuntaq’eeta Isaias 48–49 rik’ineb’ lix tenamit, chi’ilmanq 1 Nefi 22 ut 2 Nefi 6.

Li na’leb’ re xtzolb’aleb’ li loq’laj hu aajunes

Isaias 40–49

Li Jesukristo naru tixk’ojob’ inch’ool ut tixk’e inyo’onihom.

Maare jwal ke’ka’ch’ino’ ut ke’raho’ xch’ool laj Israelita naq ke’ok chi preexil aran Babilonia. Ke’wan li maare ke’xpatz’ ma sachenaq chi junelik lix na’ajeb’ jo’ li tenamit re sumwank sik’b’il ru xb’aan li Dios. Naq nakawil Isaias 40–49, k’e reetaleb’ li raqal li ke’xk’e raj xk’ojob’ankileb’ xch’ool ut xyo’onihomeb’. Rik’in li junjunq raqal nakataw, k’oxla ut tz’iib’a li maare naxye li Qaawa’ aawe sa’eb’ li raqal a’in. A’an a’in junjunq li raqal naru taawil:

• 40:11, 29–31:

• 41:10–13, 17–18:

• 42:6–7:

• 43:1–7, 25:

• 44:1–4, 21–24:

• 46:3–4:

• 49:7–16:

K’a’ru naru taab’aanu re xwotzb’al li aatin a’in rik’in li ani naraj ru xk’ojob’ankil xch’ool malaj xyo’onihom? (chi’ilmanq Isaias 40:1–2).

Chi’ilmanq ajwi’ Jeffrey R. Holland, “Tz’aqal xlemtz’unkil li yo’onink,” Jolomil ch’utub’aj-ib’ re abril 2020.

Naq naqapaab’ li Qaawa’, naru taawanq qatuqtuukilal chanchan jun nima’ (chi’ilmanq Isaias 48:18).

Isaias 40:3–8, 15–23; 42:15–16; 47:7–11

Lix wankilal li Dios nim wi’chik chiru wankilal sa’ ruchich’och’.

Laj Isaias kilajxjultika chiru li tenamit naq maak’a’ xjuntaq’eetankil lix wankilal li Dios, q’axal nim wi’chik chiru li ninqi ruchich’och’il wankilal li wankeb’ chixsutameb’. K’e reetal li na’leb’ a’in naq nakawil Isaias 40:3–8, 15–23; 42:15–16; ut 47:7–11 (chijultiko’q aawe naq li ch’ol 47 yeeb’il re Babilonia, aj chapol reheb’ laj Israelita) K’a’ru neke’xk’ut li raqal a’in chawu chirix li k’a’aq re ru re ruchich’och’? K’a’ru neke’xk’ut chawu chirix li Dios? K’oxla k’a’ut naq nim xloq’al li aatin a’in choq’ reheb’ laj Judio li ke’wan chi preexil. K’a’ut naq nim xloq’al choq’ aawe?

Chi’ilmanq ajwi’ “Chatwanq wikʼin,” Eb’ li B’ich, 99.

Isaias 41:8–13; 42:1–7; 43:9–12; 44:21–28; 45:1–4; 48:10; 49:1–9

“Laa’at laj k’anjel chiwu.”

Sa’ Isaias 40–49 li Qaawa’ na’aatinak chirix “laj k’anjel chiru” ut lix “testiiw.” Wankeb’ li raqal b’ar wi’ a’in nareetali li Jesukristo (chi’ilmanq Isaias 42:1–7), wankeb’ chik b’ar wi’ nareetali lix junkab’al Israel (chil’ilmanq Isaias 45:4), ut wankeb’ chik b’ar wi’ nareetali li rey aj Siro, li kixkanab’eb’ laj Judio chi q’ajk Jerusalen ut chixyiib’ankil chi ak’il li santil ochoch(chi’ilmanq 44:26–45:4). Sa’ chixjunileb’ li raqal, naru taapatz’ k’a’ru aj-e li aatin a’an sa’ laa yu’am jo’ aj k’anjel chiru ut aj yehol nawom chirix li Qaawa’. Naru taak’oxlaheb’ li patz’om a’in:

Isaias 41:8–13; 42:6; 44:21. K’a’ru naraj li Qaawa’ naq taab’aanu? K’oxla laa b’oqb’al sa’ li Iglees jo’ ajwi’ li k’anjel teneb’anb’il sa’ aab’een xb’aaneb’ laa sumwank. Chan ru naq li Qaawa’ nakatxtenq’a ut “nakatxch’ilo chawuq’ ” (Isaias 42:6) naq yookat chi k’anjelak chiru? Chan ru naq “xatxk’uub’ ” re wank choq’ xmoos? (chi’ilmanq ajwi’ Isaias 48:10).

Isaias 43:9–12. Chan ru naq laa’at aj yehol nawom chirix li Jesukristo? K’a’ru xak’ul sa’ laa yu’am li naxk’ut chawu naq a’an li Kolonel?

Isaias 49:1–9. K’a’ru nakataw sa’eb’ li raqal a’in li naru tatxtenq’a naq chanchan naq “maak’a’ aj-e ut maak’a’ rajb’al” (raqal 4) lix yalb’al aaq’e ut laa k’anjel?

Chi’ilmanq ajwi’ Mosiah 18:9; Henry B. Eyring, “Hijos y discípulos,” Liahona, mayo 2003, 29–32.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Isaias 40:3–4.Re xtz’ilb’al rix li naraj naxye li aatin “Tuqub’omaq ru junaq b’e choq’ re li Qaawa’,” laa junkab’al naru tixtiikob’resi k’a’ru li yokotz ru, tixch’ajob’resi k’a’ru li tz’aj ru, malaj tixpa jun b’e chiru pek ruhil ch’och’. Naru ajwi’ taak’ut xjalam-uuch laj Jwan aj Kub’sihom Ha’ ut laj Jose Smith (chi’ilmanq Hu reheb’ li Jalam-uuch re li Evangelio, 35, 87). Chan ru naq eb’ a’an ke’xtuqub’ xb’e lix k’ulunik li Qaawa’? (chi’ilmanq Lukas 3:2–18; Tzol’leb’ ut Sumwank 135:3). Chan ru naq tootenq’anq chixtuqub’ankil xb’e? (chi’ilmanq Tzol’leb’ ut Sumwank 33:10).

Isaias 40:28; 43:14–15; 44:6.K’a’ruheb’ lix k’ab’a’ li Jesukristo li naqataw sa’eb’ li raqal a’in? K’a’ru naxk’ut li junjunq chirix?

Isaias 41:10; 43:2–5; 46:4.Eb’ li raqal a’in ke’xmusiq’a li raatinul li b’ich “Kawil k’ojleb’aal” (Eb’ li Bich, 85). Maare taawulaq chiru laa junkab’al xb’ichankil li b’ich ut xtawb’al li aatin li chanchan li raatinuleb’ li raqal a’in. K’a’ru neke’xk’ut chiqu li aatin a’an chirix li Jesukristo?

Isaias 44:3–4; 45:8.Chirix rilb’aleb’ li raqal a’in, jo’ junkab’al naru teek’e xha’ jun li iyaj naq nekex’aatinak chirix li osob’tesiik naxhoy li Qaawa’ sa’ eeb’een. K’a’ru na’ux rik’in li iyaj naq naqak’e xha’? K’a’ru naraj li Qaawa’ naq taqab’aanu naq nokorusila?

Isaias 48:17–18.Naru taak’ut li nima’ malaj li palaw sa’ jalam-uuch malaj video. Chan ru naq li tuqtuukilal chanchan raj li nima’? Chan ru naq li tiikilal chanchan raj xb’oolam li palaw?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Kawil k’ojleb’aal,” Eb’ li Bich, 45.

Xkawresinkil aawib’ chi tzolok

Sik’ k’a’ru naraj naxye li aatin. Sik’ k’a’ru naraj naxye li aatin sa’ li loq’laj hu li ink’a’ nakataw ru—jo’ ajwi’ li aatin nakak’oxla naq maare nakataw ru. A’in naru tatxtenq’a chixtawb’al li ak’ na’leb’ sa’ li raqal ut chixk’ulb’al li musiq’ejil na’leb’.

“Li Qaawaʼ xkʼojobʼ xchʼool lix tenamit, ut taaruxtaanahebʼ ru li ani re li tawasinbʼilebʼ ” (Isaias 49:13).B’an re Galahad, xb’aan li xAnne Adele Henrie