Li profeet aj Isaias naxye resil lix yo’lajik li Kristo chi rub’elaj, xb’aan laj Harry Anderson

5–11 septiembre

Isaias 1–12

“Li Dios aʼan lin kolbʼal”

Sik’ aab’eresinkil xb’aan li Musiq’ej naq nakattzolok. Naqataw ru li raatin laj Isaias chi chaab’il wi’chik naq nujenaqo “rik’in li musiq’ej re profeetil aatin,” jo’ kixye laj Nefi (2 Nefi 25:4).

Tz’iib’a li nakak’oxla

Us ta a’in li xb’een sut nakawil ru lix hu laj Isaias, maare taawileb’ li raqal li chanchan naq ak awab’ihom. Nak’ulman a’an xb’aan naq, sa’ xyanq chixjunileb’ li profeet sa’ li Najter Chaq’rab’, a’an li raatin laj Isaias li jwal wi’chik oksinb’il sa’ jalaneb’ chik li loq’laj hu, ut xb’aan ajwi’ li Kolonel. Li raatin laj Isaias nak’utun sa’ li b’ichleb’aal ut xkomoneb’ chik li loq’laj b’ich. K’a’ut naq na’oksiman li raatin laj Isaias chi kok’ aj xsa’?

Maare xb’aan naq kiwan xmaatan laj Isaias chixyeeb’al li raatin li Dios rik’in utz’u’ujinb’il aatin jwal ch’ina-us. A’b’an wan xkomon chik. Neke’musiq’aak li profeet xb’aan laj Isaias chiru k’iila chihab’ xb’aan naq li yaal li kixk’ut, yaal sa’ yalaq kutankil, ink’a’ ka’ajwi’ sa’ xkutankil a’an—rik’ineb’ laj Israelita li ke’wan 740 toj 701 chihab’ ma nayo’la li Kristo. A’an kixte li qu re rilb’al lix nimla k’anjel li Dios re qakolb’al, li nim wi’chik chiru yal jun tenamit ut yal jun kutankil. Rik’in laj Isaias, laj Nefi kixtzol naq a’an ut lix tenamit, us ta najt wankeb’ rik’in lix komoneb’ aj Israel, ke’wan sa’ ajl jo’ xtenamit li Dios re sumwank. Sa’ xhu laj Isaias, eb’ laj tz’iib’ahom re li Ak’ Chaq’rab’ ke’xtaw li profeetil aatin chirix li Mesias li yoo chi tz’aqlok ru sa’ xkutankileb’ a’an. Ut sa’ xhu laj Isaias, laj Jose Smith kixtaw xna’leb’ chirix li k’anjel re xch’utub’ankil Israel ut xkab’lankil Sion sa’ roso’jikeb’ li kutan. Naq nakawil ru xhu laj Isaias, k’a’ru taataw laa’at?

Re xtzolb’al xkomon chik chirix laj Isaias ut lix tz’iib’ahom, chi’ilmanq “Isaias” sa’ li K’utul Raqal reheb’ li Loq’laj Hu. Re xtzolb’al xkomon chik chirix lix kutankil laj Isaias, chi’ilmanq 2 Reyes 15–20 ut 2 Kronikas 26–32.

Li na’leb’ re xtzolb’aleb’ li loq’laj hu aajunes

Isaias 1–12

Chan ru naru tintaweb’ ru chi mas wi’chik lix k’utum laj Isaias?

Li Kolonel kixye a’in chirix lix tz’iib’ahom laj Isaias: “Teetz’il rix li k’a’aq re ru a’in chi yalb’il eeq’e, xb’aan naq nim ru li raatin laj Isaias” (chi’ilmanq 3 Nefi 23:1–3). A’b’an choq’ re naab’al, jwal ch’a’aj li raatin laj Isaias. A’in junjunq li na’leb’ re aatenq’ankil chixtawb’al aana’leb’ rik’in li raatin laj Isaias:

• K’oxlaheb’ li eetalil naroksi laj Isaias. Patz’ aawib’ k’a’ru kiraj laj Isaias xyeeb’al naq kitz’iib’ak chirix li awimq (chi’ilmanq Isaias 5:1–7), li ha’ Siloe (chi’ilmanq Isaias 8:5–10), li eetalil (chi’ilmanq Isaias 5:26), ut jun taqsinb’il eetalil (chi’ilmanq Isaias 11:10, 12).

• Sa’ li junjunq ch’ol nakawil, patz’ aawib’, “K’a’ru yookin chixtzolb’al chirix li Jesukristo?” (chi’ilmanq 1 Nefi 19:23).

• Sik’ li na’leb’ li wan xyaalal sa’ li qakutankil, maare lix yu’am ut lix k’anjel li Jesukristo, lix jek’inkil ut lix ch’utub’ankil Israel, roso’jikeb’ li kutan, ut li jun mil chihab’. Naru ajwi’ taatz’iib’a rajlileb’ li raqal re xhu laj Isaias b’ar wi’ neke’k’utman li na’leb’ a’in.

• Oksiheb’ li tenq’ re tzolok, maare jun tusleb’aal aatin, li ch’olob’anel aatin sa’ li Santil Hu, ut li K’utul Raqal reheb’ li Loq’laj Hu.

Chi’ilmanq ajwi’ 2 Nefi 25:1–8.

Isaias 1; 3; 5

“Kanab’omaq xb’aanunkil li ink’a’ us.”

Laj Isaias rajlal kixtij li awa’b’ejihom re Juda chirix xwanjikeb’ sa’ musiq’ej. Chirix naq nakawil Isaias 1, 3, ut 5, chan raj ru taach’olob’ chan ru neke’wan li kristiaan sa’ musiq’ej? Ma wan li tijom nakataw choq’ re li qakutankil?

Rochb’eeneb’ li tijom, maare taak’e ajwi’ reetal li aatin re yo’onink choq’ reheb’ li maa’us aj Israel (chi’ilmanq Isaias 1:16–20, 25–27; 3:10). K’a’ru nakatzol chirix li Qaawa’ sa’ li aatin a’an?

Isaias 2; 4; 11–12

Li Dios tixb’aanu jun xnimal ru k’anjel sa’ roso’jikeb’ li kutan.

Naab’aleb’ lix tz’iib’ahom laj Isaias wankeb’ xyaalal jo’ profeetil aatin tz’aqal choq’ re li qakutankil. B’arwan reheb’ lix ch’olob’ahom laj Isaias chirix roso’jikeb’ li kutan sa’ li ch’ol 2; 4; 11–12 li naxtoch’ aach’ool? (Tzol’leb’ ut Sumwank 113:1–6 naxk’ut li chaab’il na’leb’ chirix Isaias 11.) K’a’ru nakatzol chirix lix ch’utub’ankil Israel ut lix kolb’al Sion? K’a’ru eek’asinb’ilat chixb’aanunkil chirix naq xawileb’ ru li ch’ol a’in?

Chi’ilmanq ajwi’ Isaias 5:26; 10:20.

Isaias 6

B’oqb’il jun li profeet xb’aan li Dios.

Sa’ li ch’ol 6, laj Isaias kixye resil lix b’oqb’al choq’ profeet. Naq nakawil li ch’ol a’in, k’a’ru naxtoch’ aach’ool chirix li kixk’ul laj Isaias? Chan ru naxjal li ch’ol a’in li nakak’oxla chirix li Qaawa’, eb’ lix profeet, ut li k’anjel b’oqb’ileb’ chixb’aanunkil?

“Xbʼaan naq yoʼlajenaq choqʼ qe jun li kʼuulaʼal, kʼeebʼil chaq qe jun li alalbʼej” (Isaias 9:6).

Isaias 7–9

Laj Isaias ki’aatinak jo’ profeet chirix li Jesukristo.

Sa’ xtiklajik lix k’anjel laj Isaias, li Awa’b’ejihom re Israel (a’an ajwi’ Efrain xk’ab’a’) ki’ok sa’ aatin rik’ineb’ aj Siria re te’xkol rib’ chiruheb’ aj Asiria. Israel ut Siria ke’raj xminb’al ru laj Ajas, li rey re Juda, chi ok sa’ aatin rik’ineb’. A’b’an laj Isaias kixye jo’ profeet naq taasachq li sum aatin a’in, ut kixye re laj Ajas naq tixpaab’ li Qaawa’ (chi’ilmanq Isaias 7–9, jo’ ajwi’ Isaias 7:7–9; 8:12–13).

Naq laj Isaias yoo chixk’eeb’al xna’leb’ laj Ajas, a’an kixye wiib’ oxib’ li profeetil aatin jwal nawb’ileb’ ru, li wankeb’ sa’ Isaias 7:14; 8:13–14; 9:2, 6–7. Us ta ink’a’ naqanaw k’a’ru xyaalalileb’ li profeetil aatin a’in sa’ xkutankil laj Ajas, yaal naq neke’aatinak chirix li Jesukristo (chi’ilmanq Mateo 1:21–23; 4:16; 21:44; Lukas 1:31–33). K’a’ru nakatzol chirix li Kolonel sa’eb’ li raqal a’in?

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Isaias 1:16–18.Re xtenq’ankil laa junkab’al chixtawb’al ruheb’ li raqal a’in, naru taawil li tasal “Wankeb’ sa’ qayanq li neke’reek’a naq maajo’q’e tz’aqalaq xchaab’ilaleb’,” sa’ li raatin li Hermana Sharon Eubank, “Li Kristo: Li saqen li nalemtz’un sa’ q’ojyin” (Jolomil ch’utub’aj-ib’ re abril 2019). Malaj naru taak’utb’esi chan ru na’isiman li tz’aj chiru li t’ikr. Chan ru naq jalan li raatin li Qaawa’ sa’eb’ li raqal a’in rik’in li aatin naraj laj Satanas naq taqapaab’?

Isaias 2:1–5.Laa junkab’al naru tixsik’ jun reheb’ li raqal a’in ut teeyiib’ xjalam-uuch li naxye. K’a’ru naxk’ut li santil ochoch chiqu chirix lix b’e li Qaawa’? Chan ru naq osob’tesinb’ilo naq “nokob’eek sa’ xkutan saqenk li Qaawa’ Dios”? (Isaias 2:5).

Isaias 4:5–6.K’a’ru naxyeechi’i li Qaawa’ qe sa’eb’ li raqal a’in? K’a’ru xyaalalileb’ li yeechi’ihom a’in? Chan ru naq a’an yoo chixtz’aqob’resinkileb’ ru? (Chi’ilmanq ajwi’ Exodo 13:21–22.)

Isaias 7:14; 9:1–7.Rik’ineb’ li jalam-uuch sa’ jun xhuhil li Iglees, naru teeyiib’ jun nimla hu rik’in wiib’ oxib’ li jalam-uuch, li naxk’ut k’a’ru naqatzol chirix li Jesukristo sa’eb’ li raqal a’in.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Taqe’q sa’ xb’een li tzuul,” Eb’ li B’ich, 4.

Xkawresinkil aawib’ chi tzolok

Patz’ aatenq’ankil rik’in li Qaawa’. Re xtawb’al ru li loq’laj hu, naqaj ru li k’utb’esinb’il na’leb’. Li Qaawa’ kixye, “Chextz’aamanq ut k’eek’ooq eere; chexsik’oq ut teetaw; chexb’oqoq chire kab’l ut tehe’q cheru” (Mateo 7:7).

Laj Isaias kixk’ut naq li loq’laj muheb’aal taawanq re “xkolb’aleb’ chiru xtiqwal li saq’e” ut “xmuheelaqeb’ chiru li hab’ ” (Isaias 4:6).Li santil ochoch re Idaho Falls Idaho