Loq’laj k’iche’, xb’aan laj Brent Borup

12–18 septiembre

Isaias 13–14; 24–30;35

“Jun li sachb’a-ch’oolejil k’anjel ut jun li eetalil”

Li Awa’b’ej Bonnie H. Cordon kixye, “Eb’ li loq’laj hu neke’xkutanob’resi li qak’a’uxl, neke’xch’olani li qamusiq’, neke’xsume li qapatz’om, neke’xnimob’resi xkanab’ankil qib’ chiru li Qaawa’, ut nokohe’xtenq’a chixjayalinkil li qayu’am rik’in a’an” (“Kanab’ aawib’ chiru li Qaawa’ ut maawanab’ aawib’,” Jolomil ch’utub’aj-ib’ re abril 2017).

Tz’iib’a li nakak’oxla

Li Qaawa’ naxpatz’ reheb’ li profeet naq toohe’xtij chirix li nachal rik’in li maakob’k. Choq’ reheb’ li profeet sa’ li Najter Chaq’rab’, ki’ajman naq te’xye reheb’ li ninqi awa’b’ej re ninqi tenamit naq te’xjal xk’a’uxl malaj ut te’sache’q. Xiwxiw a’an, a’b’an moko kixuwak ta laj Isaias, ut jwal kaweb’ lix tijom choq’ reheb’ li awa’b’ejihom sa’ xkutankil—a’aneb’ Israel, Juda, ut xkomoneb’ chik (chi’ilmanq Isaias 13–23).

A’b’an, laj Isaias kixye ajwi’ li aatin re yo’onink. Us ta ke’sachman li awa’b’ejihom jo’ kixye, laj Isaias kiril naq sa’ junaq kutan te’ruuq chi k’ojob’aak ut chi ak’ob’resiik wi’chik. Li Qaawa’ tixb’oq lix tenamit chi q’ajk wi’chik rik’in. A’an tixk’e naq “li chaqi ch’och’ taakanaaq jo’ li saab’ ru, ut li pojtz’ ch’och’ taasutq’iiq choq’ yo’leb’aal ha’ ” (Isaias 35:7). A’an tixb’aanu “jun li sachb’a-ch’oolejil k’anjel ut jun li eetalil” (Isaias 29:14), naq tixk’e wi’chik re laj Israel li osob’tesiik ak yeechi’inb’il chaq reheb’. Chi moko laj Isaias chi moko yalaq chik ani sa’ xkutankil te’ril li sachb’a-ch’oolejil k’anjel. A’b’an laa’o yooko chirilb’al chi tz’aqob’resiik ru sa’ li kutan a’in. Wanko sa’ li k’anjel a’an!

Li na’leb’ re xtzolb’aleb’ li loq’laj hu aajunes

Isaias 13:1–11, 19–22; 14:1–20

Te’tane’q li maa’us aj awa’b’ejihom re li ruchich’och’ jo’eb’ ajwi’ li neke’jolomin reheb’.

Nayeeman naq Isaias 13–14, a’an “li rahilal tixk’ul” (jun profeetil aatin chirix) li tenamit Babilonia (Isaias 13:1). Junxil, kaw xmetz’ew li tenamit Babilonia ut lix awa’b’ej, a’b’an anajwan maak’a’ nakana. Chi jo’kan, k’a’ut naq toj nim xwankil li aatin chirix Babilonia choq’ qe? Sa’ li loq’laj hu, Babilonia nareetali li q’etq’etil, li ruchich’och’il na’leb’, ut li maak, ut anajwan sutsuuko xb’aan chixjunil a’an. K’oxla li eetalil a’an naq nakawil Isaias 13:1–11, 19–22; 14:1–20. Maare taapatz’ ajwi’ a’in:

• Chan ru naq lix tijom laj Isaias choq’ re Babilonia chanchan li profeetil aatin chirix li ruchich’och’ rub’elaj li xkab’ xk’ulunik li Kolonel? (chi’ilmanq Isaias 13:1–11; Tzol’leb’ ut Sumwank 45:26–42).

• K’a’ru nakawil sa’ xq’etq’etil Babilonia li nakawil ajwi’ sa’ xq’etq’etil laj Satanas? (chi’ilmanq Isaias 14:4–20; Moises 4:1–4). K’a’ru li na’leb’ nakataw choq’ aawe laa’at sa’eb’ li raqal a’in?

• Chan ru naq li Kolonel toorisi “sa’ li rahilal ut sa’ li kawil k’anjel nokotawasiik wi’ ”? (Isaias 14:3).

Nachal wi’chik re awa’b’ejink, xb’aan li xMary R. Sauer

Isaias 24:21–23; 25:6–8; 26:19; 28:16

Lix tz’iib’ahom laj Isaias nikinixjayali rik’in li Kristo.

Laj Isaias ki’aatinak chirix lix k’anjel li Kolonel, lix mayej re xtojb’al qix, li wakliik chi yo’yo, ut li xkab’ xk’ulunik. K’a’ru nachal sa’ aak’a’uxl chirix lix k’anjel naq yookat chirilb’aleb’ li raqal a’in: Isaias 24:21–23; 25:6–8; 26:19; 28:16? Ma wankeb’ chik li raqal nakataw li neke’xjultika li Kolonel aawe?

Chi’ilmanq ajwi’ Isaias 22:22–25.

Isaias 24:1–12; 28:7–8; 29:7–10; 30:8–14

Li q’etok paab’aal naraj naxye xtz’eqtaanankil li Qaawa’ ut eb’ lix profeet.

Naq ki’aatinak chirix li nachal naq naqatz’eqtaana li Qaawa’ ut eb’ lix profeet, laj Isaias kiroksi k’iila jaljookil ru aatin. Ki’aatinak chirix xsachik li ruchich’och’ (Isaias 24:1–12), li kalaak (Isaias 28:7–8), li tz’okaak ut li chaqi-eel (Isaias 29:7–10), ut li jorol tz’ak malaj sek’ (Isaias 30:8–14). Jo’ nakawil sa’eb’ li raqal a’in, k’a’ut naq aajel ru xpaab’ankileb’ li qasumwank? K’a’ru yookat chixb’aanunkil re xpaab’ankil li Qaawa’ ut eb’ lix moos?

Chi’ilmanq ajwi’ M. Russell Ballard, “Kanaaqex sa’ li jukub’ ut chapomaq eerib’!” Jolomil ch’utub’aj-ib’ re octubre 2014; Temas del Evangelio, “Apostasía,” topics.ChurchofJesusChrist.org.

Isaias 29; 30:18–26; 35

Li Qaawa’ naru taarak’ob’resi li k’a’ru sachb’il malaj jorb’il.

Naq jun krisitiaan malaj tenamit naxkanab’ li Qaawa’, laj Satanas naraj naq taqak’oxla naq maajo’q’e chik tooruuq chi q’ajk. A’b’anan, laj Isaias kixye k’a’ruheb’ li sachb’a-ch’oolej tixb’aanu li Qaawa’ naq junaq naxjal xk’a’uxl ut naq’aj rik’in. K’a’ru nakatzol sa’ Isaias 29:13–24; 30:18–26; 35 chirix li Qaawa’, lix rahom, ut lix wankilal?

Li Qaawa’ ak xk’utb’esi lix wankilal sa’ li qakutankil rik’in lix k’ojob’ankil wi’chik lix evangelio. Sa’ Isaias 29 wan wiib’ oxib’ li raqal li neke’xk’am rib’ rik’in li kik’ulman sa’ lix k’ojob’ankil wi’chik li evangelio. A’in junjunq reheb’:

• Juntaq’eeta Isaias 29:11–12 rik’in 2 Nefi 27:6–26 ut Jose Smith—Resilal 1:63–65.

• Juntaq’eeta Isaias 29:13–14 rik’in Tzol’leb’ ut Sumwank 4 ut Jose Smith—Resilal 1:17–19.

• Juntaq’eeta Isaias 29:18–24 rik’in li perel re xjolomil li aatin saʼ lix Hu laj Mormon.

K’a’ru nakak’oxla malaj nakaweek’a chirix lix k’ojob’ankil wi’chik li evangelio naq yookat chirilb’aleb’ li raqal a’in?

Chi’ilmanq ajwi’ “Lix K’ojob’ankil Wi’chik lix Tz’aqalil lix Evangelio li Jesukristo: Jun jek’inb’il aatin re wiib’ cient chihab’ choq’ re li ruchich’och’ ” (ChurchofJesusChrist.org).

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Isaias 25:4–9.Jo’ junkab’al, ma xek’ul jun sutaq eemuheb’aal chiru kaq-sut-iq’ malaj xtikwal li saq’e? (chi’ilmanq raqal 4). Aatinanqex chirix a’in naq nekerileb’ li raqal a’in ut li na’leb’ chirix li Qaawa’ sa’ Isaias 25:4–9. Chan ru naq li Qaawa’ chanchaneb’ li k’a’aq re ru a’in?

Isaias 25:8–9; 26:19.Xk’utb’al xjalam-uuch li Kolonel sa’ Getsemani, chiru li krus, ut chirix lix waklijik chi yo’yo naru tixtenq’a laa junkab’al chixk’eeb’al reetal li Jesukristo sa’eb’ li raqal a’in (chi’ilmanq Hu reheb’ li Jalam-uuch re li Evangelio, 56, 57, 58, 59). Patz’ re laa junkab’al naq te’xye k’a’ut naq “neke’saho’ xch’ool xb’aan naq a’an naxkoleb’ ” (Isaias 25:9).

Isaias 29:11–18.Eb’ li raqal a’in naru te’xtenq’a laa junkab’al chi aatinak chirix li “sachb’a-ch’oolejil k’anjel ut jun li eetalil” (raqal 14) re lix k’ojob’ankil wi’chik li evangelio ut lix k’utunik lix Hu laj Mormon. K’a’ut naq sachb’a-ch’oolejil ut chaq’al ru choq’ qe? Patz’ re laa junkab’al naq te’xtaw li k’a’aq re ru sa’ lee rochoch li nareetali li sachb’a-ch’oolejil maatan re lix k’ojob’ankil wi’chik li evangelio.

Isaias 35.Maare taawulaq chiru laa junkab’al xyiib’ankil xjalam-uuch li na’leb’ sa’ li ch’ol a’in li tixk’ut cheru chan ru naq li Jesukristo yoo chixkab’lankil Sion sa’ li qakutankil. K’a’ru naqatzol sa’eb’ li jalam-uuch a’in? K’a’ru naru taqab’aanu re okenk chixkab’lankil Sion?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Sa’ jun chaq’al ru kutan,” B’ichleb’aal choq’ reheb’ li Kok’al, 57.

Xkawresinkil qib’ jo’ aj k’utunel

Kanab’eb’ li kok’al chi yiib’ank. Naq li kok’al neke’xyiib’ li k’a’aq re ru chirix li evangelio, a’in naxtenq’aheb’ chixtawb’al ru chi chaab’il li k’a’ru xe’xtzol. Kanab’ naq te’yiib’anq, te’xyiib’ jalam-uuch, te’tz’iib’aq, ut te’na’leb’anq. (Chi’ilmanq Li k’utuk jo’ li Kolonel, 25.)

“A’an a’in li qaDios li kaw wi’ qach’ool re qakolb’al. A’an a’in li Qaawa’ li xoo’oyb’enink wi’ ” (Isaias 25:9). James Tissot (French, 1836–1902). At ixq, wa’ran laa yum (Stabat Mater), 1886–1894. Opaque watercolor over graphite on gray wove paper, Image: 11 11/16 x 6 in. (29.7 x 15.2 cm). Brooklyn Museum, Purchased by public subscription, 00.159.300