li Kristo rik’in jun koroon k’ix ut eb’ laj pleet neke’reetz’u

Reetz’unkil li Kristo, xb’aan laj Carl Heinrich Bloch

26 septiembre–2 octubre

Isaias 50–57

“Aʼan xkʼuluk re li qayajel ut xkuy riiqankil li qarahilal”

Li jwal aajel ru xb’aanunkil naq yooqat chixkawresinkil aawib’ re k’utuk, a’an naq taawil ru li loq’laj hu ut tatna’leb’anq chirix. K’a’ru nakaweek’a ut nakatzol naq nakawil Isaias 50–57?

Tz’iib’a li nakak’oxla

reetalil li wotzok

Xkanab’ankileb’ chi wotzok

Re xwaklesinkil xch’ooleb’ li komon re naq te’xwotz li xe’xtaw ru sa’ Isaias 50–57, naru nakatz’iib’a chiru li pizarron jun ch’ol aatin jo’ a’in: Lin paab’aal chirix li Jesukristo xkawu rik’in rilb’al ru… B’oqeb’ chixchoyb’al li raqal aatin a’in.

reetalil li k’utuk

Xk’utb’al li tzolʼlebʼ

Isaias 50–52

Jwal chaab’ilaq li k’a’ru chalel choq’ re lix tenamit li Qaawa’.

• Chiqajunilo naqanumsi hoonal b’ar wi’ naqeek’a naq maak’a’ chik qametz’ew. Re xtenq’ankileb’ li komon naq te’xpaab’ li kawilal naxk’e li Qaawa’, naru nakapatz’ reheb’ naq te’ril junjunq reheb’ li raqal sa’ Isaias 51–52 ut te’xwotz li te’xtaw li taaruuq tixwaklesi xch’ool li q’un xmetz’ew. Naru ajwi’ nakawotz naq li Kolonel li kiwakli chi yo’yo kixwotz naab’al li raatin laj Isaias reheb’ li kristiaan sa’ li ch’och’ America (chi’ilmanq 3 Nefi 20:32–45). K’a’ru naxk’ut chiqu li raatin li Kolonel li natawman sa’ 3 Nefi 20:30–34 chirix jo’q’e te’k’ulmanq li profeetil aatin a’in?

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al napatz’man naq taqatusub’ chixjunil li b’oqom kixk’e li Qaawa’ re lix tenamit sa’ Isaias 50–52. Eb’ li komon naru neke’xwotz li xe’xtaw ut te’xwotz k’a’ru naraj naxye li b’oqom a’an. Maare us naq tex’aatinaq chirixeb’ li b’oqom sa’ Isaias 51:1–2, 6–8; 52:1–3, 9–11. Chan ru naru took’anjelaq rik’ineb’ li b’oqom a’an? Naru nakaye naq sa’ Tzol’leb’ ut Sumwank 113: 7–10 ch’olob’anb’il chi tz’aqal re ru Isaias 52:1–2. K’a’ru naxkanab’ choq’ qe li aatin a’an?

li Kristo naxk’am li krus

Xb’aan xrahom, yiib’anb’il xb’aan li xAngela Johnson

Isaias 52:13–15; 53

Li Jesukristo kixkʼul saʼ xbʼeen li qamaak ut li qarahilal.

• Re naq taawanq li Santil Musiq’ej chixch’olob’ankil li yaal nak’utman sa’ Isaias 52:13–15; 53, naru taapatz’ reheb’ li komon naq te’rileb’ li raqal a’in chi ch’anch’o naq taak’e junaq xyaab’ li b’ich chirix lix tojb’al rix li maak xb’aan li Jesukristo. B’oqeb’ chixsik’b’al aatin malaj ch’ol aatin li neke’xk’oxla naq jwal aajel ru. Chirix a’an patz’ reheb’ naq te’xwotz li xe’xtaw ut naq te’xwotz li neke’reek’a chirix li Kolonel. Naru ajwi nakab’oqeb’ chirilb’al Mosiah 15:10–12, b’ar wi’ laj Abinadi naxch’olob’ k’a’ru naraj naxye “li riyajil.” Chan ru nokoxtenq’a a’an chixtawb’al ru Isaias 53:10?

Isaias 54

Li Jesukristo naraj naq toosutq’iiq rik’in a’an.

• Xtzolb’al Isaias 54 naru naxtoch’ xch’ooleb’ li komon re naq te’raho’q xch’ool xb’aaneb’ lix maak malaj lix q’unil xmetz’eweb’. Laa’at naru nakab’oqeb’ naq te’xsik’ sa’ li ch’ol 54 aatin malaj raqal b’ar wi’ naxk’ut li nareek’a li Kolonel chiqix. K’a’ru naraj a’an naq taqeek’a chirix li qamaak ut xq’unil qametz’ew ak numenaq? K’a’ru naraj naq taqeek’a chirix a’an? Waklesi xch’ooleb’ li komon re naq te’xwotz k’a’ru chik xe’xtzol chirix li Jesukristo sa’ li ch’ol a’in. Li raatin li Awaʼbʼej Dieter F. Uchtdorf sa’ “Xkomon chik li k’anjeleb’aal” naru natenq’an sa’ li aatinak.

reetalil xkomon chik li k’anjeleb’aal

Xkomon chik li k’anjeleb’aal

Rik’in li Jesukristo naru nawan li qoyb’enihom.

Li Awa’b’ej Dieter F. Uchtdorf kixye:

“Maak’a’ naxye jo’ ch’inal jo’ nimal li sachk xqak’ul sa’ qayu’am. Maak’a’ naxye ma kaq ru qamaak, ma nim qajosq’il, ma qajunes wanko, kanab’anb’ilo, malaj ra li qach’ool. Li ani maak’a’ royb’enihom, li ra xyu’am, li ke’xmux xkomon, li ke’xkanab’ xk’ulub’ejil, malaj ke’xkanab’ li Dios, naru ajwi’ te’waklesiiq wi’chik. …

“Li chaab’il esilal re li evangelio naxye: b’antiox re lix junelikil k’uub’anb’il na’leb’ re li sahil ch’oolejil k’oxlanb’il xb’aan li qaYuwa’, ut rik’in lix junelikil mayej li Jesukristo, ink’a’ ka’ajwi’ naru tookole’q sa’ qat’anik ut too’ak’ob’resiiq chi saq qu, a’ut naru ajwi’ taqaq’ax royb’enihom li winq ut taqeechani li junelik yu’am ut tootz’aqonq sa’ xloq’alil li Dios li ink’a’ naru xch’olob’ankil” (“Tatxk’e sa’ xb’een lix tel ut tatxk’am toj sa’ laa wochoch,” Jolomil ch’utub’aj-ib’ re abril 2016).

Xkawresinkil qib’ jo’ aj k’utunel

Chatwanq chi kʼulubʼej re xkʼulbʼal aabʼeresinkil xbʼaan li Musiqʼej. Naq nakayuʼami li evangelio chi tiik, kʼulubʼejat re tat-ochbʼeeniiq xbʼaan li Musiqʼej, aʼan laj kʼutunel li qʼaxal chaabʼil. Naq nakasikʼ xtenqʼ li Santil Musiqʼej, aʼan tixkʼe aanaʼlebʼ ut tatreekʼasi chixnawbʼal chan ru xkʼeebʼal li ajbʼil ru xbʼaanebʼ li tzolbʼilebʼ aabʼaan. (Chi’ilmanq Li k’utuk jo’ li Kolonel, 5.)