li Jesus naxb’eresiheb’ li karneer

Kim, Taaqehin, xb’aan laj Scott Sumner

24–30 octubre

Esekiel 1–3; 33–34; 36–37; 47

“Tink’e eere jun ak’ musiq’ej”

Li Qaawa’ kixkol rix li raatin laj Esekiel choq’ re jun chaab’il k’anjel ut li raatin a’an naru narosob’tesiheb’ li komon. K’oxla a’in naq yooqat chixtzolb’al lix tz’iib’ahom laj Esekiel chiru li xamaan a’in.

Tz’iib’a li nakak’oxla

reetalil li wotzok

Xkanab’ankileb’ chi wotzok

Eb’ li kristiaan li ke’ab’ink re laj Esekiel ke’xk’oxla naq “ch’ina-us” li raatin, a’b’anan “ink’a’ ke’xb’aanu” li kixye (chi’ilmanq Esekiel 33:30–33). Eb’ li komon naru neke’xwotz jun li raqal li xe’xtaw sa’ xhu laj Esekiel li xb’oqok reheb’ chixb’aanunkil junaq k’a’aq re ru.

reetalil li k’utuk

Xk’utb’al li tzolʼlebʼ

Esekiel 34

Li Qaawa’ nokoxb’oq chixch’olaninkileb’ lix karneer.

Re xtenq’ankileb’ li komon re naq te’xtaw ru Esekiel 34, naru nakatz’iib’a chiru li pizarron li maare yookeb’ chixnumsinkil, maare xkawresinkileb’ rib’ re te’xik sa’ li mision, xk’iresinkileb’ lix kok’al, malaj xk’ulb’al jun li taqlahom re ula’anink. Naru neke’xsik’ ru junaq li na’leb’ a’in re te’xk’oxla naq yooqeb’ chirilb’al chi ch’anch’o Esekiel 34:1–10. Patz’ reheb’ naq te’xwotz k’a’ru li na’leb’, jo’ neke’xye li raqal a’an, naru neke’xk’e re junaq kristiaan li wan sa’ li na’leb’ xe’xsik’ ru. K’a’ru naraj naxye xch’olaninkil qib’ chiru xch’olaninkil lix karneer li Qaawa’? Chan ru naru toowulaq jo’ aj ilol karneer jo’ li Kolonel? (che’ilmanq li raqal 11–16).

Maare nakaweek’a naq tento tatpatz’oq re xtenq’ankileb’ li komon chixtz’ilb’al rix li eetalil natawman sa’ Esekiel 34:11–31. K’a’ru neke’reetali li “chaab’il pim” ut li “chaab’il na’ajej” sa’ li raqal 14? B’ar wan xjalanil junaq li karneer “sachenaq” ut jun “li xcha’cha’iik”? (raqal 16). Chan ru naq li Kolonel naxkoleb’ li ka’ paay chi karneer? Eb’ li komon naru te’xwotz jalan chik li eetalil li natawman sa’eb’ li raqal a’an, ut te’aatinaq chirix li neke’k’utuk chirix li Jesukristo.

Esekiel 37

Li Qaawa’ yoo chixch’utub’ankil lix tenamit ut chixk’eeb’al li ak’ yu’am reheb’.

• Rilb’al Esekiel 37 ut k’oxlak chirix lix yeechi’ihom li Qaawa’ naq tixch’utub’ Israel nokoxtenq’a chixtawb’al ru li naraj naxye li ch’utub’ank ut chan raj ru tootz’aqonq laa’o. Re xtenq’ankileb’ li komon chixtawb’al ru li naraj naxye, naru nakatz’iib’a sa’ li pizarron li patz’om K’a’ru naxsik’ li Qaawa’ rik’in xch’utub’ankil Israel? Chan ru naq yoo chixb’aanunkil a’an? Chirix a’an naru nakapatz’ naq xyijach li tzoleb’aal te’ril Esekiel 37:1–14 ut li yijach chik te’ril Esekiel 37:15–28, re te’xsik’ li raqal li te’ruuq chixk’eeb’al xsumenkileb’ li patz’om wankeb’ sa’ li pizarron. Naru natenq’an xcholob’ankil naq li perel che’ re Jose ut re Juda sa’eb’ li raqal 16–19, a’aneb’ lix Hu laj Mormon ut li Santil Hu. Naq eb’ li komon te’xwotz lix sumenkil, waklesiheb’ xch’ool chi aatinak chirix li te’ruuq chixb’aanunkil re xch’utub’ankil Israel sa’ li kutan a’in.

li chaqi ch’och’ ut li Palaw Kamenaq

Laj Esekiel kiril sa’ k’utb’esinb’il matk’ jun li nima’ li ki’el chalen chaq rik’in li santil ochoch ut kixk’irtesi li Palaw Kamenaq.

Esekiel 47:1–12

Li santil ochoch naxk’irtesi li qamusiq’.

• Roksinkileb’ li jalam-uuch naru naxtenq’aheb’ li komon chixtawb’al ru li nak’utman sa’ Esekiel 47:1–12. Naru nakak’ut junaq li jalam-uuch re li santil ochoch, junaq li ha’, jun chaqi ch’och’, ut li Palaw Kamenaq (che’ilmanq li jalam-uuch sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut junkab’al ut li jalam-uuch 3 sa’ Eb’ li jalam-uuch re li Santil Hu, “Yamyookil ch’och’ re Judea”). Maare us xch’olob’ankil naq li Palaw Kamenaq, a’an jwal atz’am ru ut aran ink’a’ naru neke’wan li kar chi moko eb’ li pim. Eb’ li komon naru te’rileb’ li raqal 1–12 ut te’xwotz li k’a’ru xwulak chiruheb’ chirix li ha’ wan sa’ li k’utb’esinb’il matk’ (chi’ilmanq ajwi’ Apokalipsis 22:1 ut li aatin yeeb’il sa’ “Xkomon chik li k’anjeleb’aal”). Naru neke’xyiib’ xjalam-uuch lix k’utb’esinb’il matk’ laj Esekiel. K’a’ raj ru nareetali li ha’? K’a’ru neke’xk’utb’esi li che’ wankeb’ sa’ li raqal 12? Eb’ li komon naru neke’xwotz chan ru naq li santil ochoch ut li rosob’tesihom a’an naxk’am chaq xyu’ameb’ ut xk’irajikeb’ sa’ musiq’ej.

reetalil xkomon chik li k’anjeleb’aal

Xkomon chik li k’anjeleb’aal

Eb’ li rosob’tesihom li santil ochoch naru nokohe’xk’irtesi.

Naq na’aatinak chirix li ha’ na’el chaq sa’ li santil ochoch li kiril laj Esekiel (chi’ilmanq Esekiel 47:1–12), li Elder Dale G. Renlund kixye:

“Wan wiib’ xjalanil li ha’ a’in. Xb’een, us ta li ch’ina roq ha’ moko kaw ta li roq, kik’i toj reetal naq kiwulak jo’ jun li roq’ ha’ jwal kaw li roq, kik’i ut kichamo’ chi us a’ yaal lix k’iijik li roq. Chanchan a’an nak’ulman rik’ineb’ li osob’tesihom li nak’ulman sa’ li santil ochoch naq eb’ li kristiaan neke’tz’ape’ sa’ junajil jo’ junkab’al. Naq eb’ li k’ojob’anb’il k’anjel re li tz’ap’ek sa’ junajil neke’xjunajiheb’ ru li junkab’al, nak’ulman jun li k’iik chi ixb’ej ut chi uub’ej chiruheb’ li tasal tenamit.

“Xkab’, li roq ha’ narak’ob’resi chixjunil li k’a’ru naxch’e’. Jo’kan ajwi’, li osob’tesihom wankeb’ sa’ li santil ochoch wankeb’ lix wankilal re k’irtesink. Eb’ li osob’tesihom wankeb’ sa’ li santil ochoch neke’ru chixk’irtesinkileb’ li aamej, eb’ li yu’amej, ut eb’ li junkab’al” (“Li k’anjel re li santil ochoch ut li resilal li junkab’al: Tz’ape’k sa’ junajil ut k’irtesink”, Jolomil ch’utub’aj-ib’ re abril 2018; chi’ilmanq ajwi’ li video “Y el río aumentará,” ChurchofJesusChrist.org).

Xkawresinkil qib’ jo’ aj k’utunel

Tenq’aheb’ li komon chixk’ulb’al li Musiq’ej. “Wan naq jun aj k’utunel taa’aaleeq chixk’oxlankil naq a’an lix nawom, malaj chan ru nak’utuk, malaj chan ru a’an, li naxmusiq’aheb’ li ani tzolb’ileb’ xb’aan. … “Laa k’anjel jo’ aj k’utunel maawa’ xk’utb’al jun tzolok q’axal chaab’il, a’an b’an xtenq’ankil jalaneb’ chixk’ulb’al xwankil li Santil Musiq’ej” (Li k’utuk jo’ li Kolonel, 10).