jun profeet na’aatinak rik’ineb’ li winq

Laj Jeremias, xb’aan laj Walter Rane

10–16 octubre

Jeremias 1–3; 7; 16–18; 20

“Naq toj maji’ nakatsiyaak chaq rik’in laa na’, laa’in ak xinsik’ chaq aawu”

Naq yooqat chi tzolok, k’oxlaheb’ li komon ut sik’ xtenq’ li Musiq’ej re xnawb’al k’a’ru li esil naru taatenq’anq reheb’.

Tz’iib’a li nakak’oxla

reetalil li wotzok

Xkanab’ankileb’ chi wotzok

Re taawaklesiheb’ xch’ool li komon re naq te’tz’aqonq, naru taaye reheb’ naq te’xtz’iib’a chiru hu jun na’leb’ chirix li evangelio li xe’xtzol naq xe’ril lix hu laj Jeremias chiru li xamaan a’in. Chirix a’an taach’utub’eb’ li hu ut taasik’ ru junaq reheb’ a’an re teetz’il rix sa’ komonil. Chan ru nokoxtenq’a lix tz’iib’ahom laj Jeremias chixtawb’aleb’ ru li na’leb’ a’in?

reetalil li k’utuk

Xk’utb’al li tzolʼlebʼ

Jeremias 1:4–19

Jun profeet b’oqb’il chixyaab’asinkil li raatin li Qaawa’.

• Re xtikib’ankil xtz’ilb’al rix lix b’oqb’al laj Jeremias jo’ profeet, naru nakak’ut junaq xjalam-uuch li yo’yookil profeet ut taapatz’ reheb’ li komon naq te’xye chan ru naq xe’wulak chixnawb’al naq a’an kib’oqe’ xb’aan li Dios. Jo’kan ajwi’ naru nakapatz’ reheb’ naq te’xwotz chan ru xe’ru chixtenq’ankil junaq ras riitz’ineb’ rik’in li na’leb’ a’in. Chan ru naq li nawom a’an narosob’tesi li qayu’am? Chirix a’an, eb’ li komon naru neke’xtz’iib’a chiru li pizarron li neke’xtzol chirixeb’ li profeet sa’ Jeremias 1:4–19. K’a’ru “neke’xmich’ ” malaj “neke’xjuk’ ” li profeet sa’ li qakutankil? K’a’ru “neke’xwaklesi” ut “neke’xxaqab’ ”? (raqal 10).

• Patz’ reheb’ li komon naq te’xye k’a’ru kixtaw ru laj Jeremias chirix lix yu’am a’an sa’ Jeremias 1:5. K’a’ru xjal sa’ lix k’anjel b’oqb’il wi’ xb’aan li nawom a’an? Eb’ li komon naru neke’ril li aatin wan sa’ “Xkomon chik li k’anjeleb’aal” ut eb’ li raqal a’in li neke’aatinak chirix li na’leb’ a’in: Alma 13:1–4; Tzol’leb’ ut Sumwank 138:53–56; Abraham 3:22–23. Chan ru najala li qayu’am xb’aaneb’ li na’leb’ a’in sa’ li qawanjik sa’ li ruchich’och’ a’in?

jun kristiaan sa’ jun najteril kumb’

Eb’ li kristiaan re li najter Israel ke’roskiheb’ li kumb’ re xk’uulankil li ha’.

Jeremias 2; 7

“Xine’xtz’eqtaana laa’in, li yu’am ha’.”

• Re xtikib’ankil jun li tz’ilok-ix chirix Jeremias 2:13, naru nakayiib’ junaq kumb’ (jun nimla jul rub’el ch’och’) ut jun roq ha’ (chanchan jun yo’yookil ha’). Toja’ naq li komon naru te’ril Jeremias 2:13 ut te’xwotz k’a’ut naq jwal aajel ru xtawb’al li ha’ sa’ jun xyo’leb’aal li ha’ sa’ xna’aj xb’ekb’al jun li jul choq’ re li ha’. K’a’ru xjuntaq’eetil li wank sa’ musiq’ej rik’in xyiib’ankil xna’aj li ha’ jorol? Naru nakab’oqeb’ li komon chirilb’al ru li raqal sa’ Jeremias 2 ut 7 , ut te’xye chan ru naq eb’ laj Israelita ke’xtz’eqtaana li “yo’yookil ha’ ” (chi’ilmanq, Jeremias 2:26–28; 7:2–11). K’a’ut naq li “yo’yookil ha’ ” a’an jun chaab’il eetalil chirix li naxyeechi’i qe li Kolonel?

Jeremias 3:14–18; 16:14–15

Li Qaawa’ tixch’utub’ lix tenamit.

• Laj Jeremias kixjuntaq’eeta lix ch’utub’ankil Israel sa’ roso’jikeb’ li kutan rik’in li rach’ab’ankil Israel chiru li preexil aran Egipto xb’aan laj Moises (chi’ilmanq li tusleb’ aatin re li xamaan re 4–10 abril sa’ Kim, Taaqehin—choq’ reheb’ li komon ut li junkab’al). B’oqeb’ li komon chixyeeb’al k’a’ut naq aajel ru li yale’k choq’ reheb’ laj Israelita chiru naab’al chihab’. Toja’ naq li komon naru te’ril Jeremias 16:14–15 ut te’xye chan ru naq lix ch’utub’ankil Israel sa’ roso’jikeb’ li kutan a’anaq jun li k’anjel jwal aajel ru choq’ re lix tenamit li Dios (chi’ilmanq ajwi’ Jeremias 3:14–18). Eb’ li komon li xe’tzolok re “Juventud de Israel” jo’ xcha’al li tzolok xjuneseb’ naru neke’xwotz li xe’xtaw ru chirix lix ch’utub’ankil Israel (chi’ilmanq Russell M. Nelson ut Wendy W. Nelson, “Juventud de Israel” [ch’utam choq’ reheb’ li saaj sa’ chixjunil li ruchich’och’, 3 junio, 2018], aatin sa’ li New Era ut li Ensign, agosto 2018, 2–17, ChurchofJesusChrist.org). Malaj ut, naru nekeril b’ayaq ru li esil a’an sa’ komonil. Chan ru yoo chi ch’utub’aak Israel sa’ li na’ajej b’ar wi’ wanko?

reetalil xkomon chik li k’anjeleb’aal

Xkomon chik li k’anjeleb’aal

Li qaChoxahil Yuwa’ naxnaw eeru.

Li Awa’b’ej Russel M. Nelson kixye:

“Laa musiq’ a’an jun junxaqalil ink’a’ nakam. Li Qaawa’ kixye re lix profeet aj Abraham: “Kisik’man aawu rub’elaj naq katyo’la” [Abraham 3:23]. Li Qaawa’ xye ajwi’ chi jo’kan re laj Jeremias [chi’ilmanq Jeremias 1:5] ut naab’al chik li kristiaan [chi’ilmanq Alma 13:2–3]. Kixye ajwi’ aawe laa’at [chi’ilmanq Tzol’leb’ ut Sumwank 138:55–56].

“Laa Choxahil Yuwa’ naxnaw aawu chalen chaq. Laa’at jo’ ralal xk’ajol, kisik’man aawu xb’aan a’an re tatchalq sa’ ruchich’och’ chiru tz’aqal li hoonal a’in, jo’ aj k’amol b’e sa’ lix k’anjel sa’ xb’een li ruchich’och’. Kisik’man aawu, ink’a’ xb’aan laa junxaqalil, kisik’man b’an aawu xb’aan laa musiq’ejil, jo’ laa seeb’al, lix chaab’ilal laa waam, laa wajom re xsik’b’al li yaal ut li chaab’il na’leb’, ut laa wajom re xtenq’ankileb’ laa was aawiitz’in.

“Xayu’ami chaq naab’al reheb’ li na’leb’ a’in naq toj maji’ nakatyo’la. Naru nakayu’ami xkomon chik arin sa’ ruchich’och’ wi nakayal aaq’e chixsik’b’al” (“Decisiones para la eternidad,” Liahona, noviembre 2013, 107).

Xkawresinkil qib’ jo’ aj k’utunel

Yu’ami li evangelio chi anchal aach’ool. Naq taayal aaq’e sa’ li evangelio ut taayu’ami rajlal kutan, tatruuq chi wulak jo’ jun chaab’il aj k’utunel jo’ li Kristo. Li k’utuk jo’ li Kristo ink’a’ naraj naq tz’aqalaq aawe aawu—naraj b’an naq taayal aaq’e rajlal. Wi nakab’aanu chi anchal aach’ool ut nakasik’ xkuyb’al aamaak rajlal naq nakakanab’ aawib’, naru nakatwulak jo’ jun xmoos li Kristo jo’ li naraj a’an (Chi’ilmanq Li k’utuk jo’ li Kolonel, 13–14.)