lix tz’iib’ahom li profeet aj Jeremias

Lix yaab’ xkux li profeet aj Jeremias, re jun tz’iib’ahom xb’aan li Escuela Nazarena

17–23 octubre

Jeremias 30–33; 36; Lamentaciones; 3

“Tinsutq’isi lix rahilaleb’ choq’ sahilal”

K’oxlan chirix laa week’ahom xak’ul naq xawil aajunes lix hu laj Jeremias ut li hu Lamentaciones. Ma wan li na’leb’ sa’eb’ li hu a’in li tixtenq’aheb’ li komon?

Tz’iib’a li nakak’oxla

reetalil li wotzok

Xkanab’ankileb’ chi wotzok

Re naq li komon te’xwotz li xe’xtzol naq xe’tzolok sa’ junesal, naru nakatz’iib’a sa’ li pizarron Xintzol naq…, Wan lin nawom chirix li…, malaj Xink’ul jun li na’leb’… Eb’ li komon naru neke’xwotz a’ yaal k’a’ru chirix lix hu laj Jeremias malaj li hu re Lamentaciones re te’xchoy xyeeb’al li ch’ol aatin a’in.

reetalil li k’utuk

Xk’utb’al li tzolʼlebʼ

Jeremias 30–31; 33; Lamentaciones 1:1–7; 3:1–5

Li Qaawa’ taarisiheb’ laj Israel sa’ xpreexileb’ ut tixch’utub’eb’.

• Li esil chirix li oyb’enihom li natawman sa’eb’ li profeetil aatin re laj Jeremias naru naxk’e royb’enihomeb’ li komon rik’in li yookeb’ chixnumsinkil. Naru neketz’il rix jo’ tzoleb’aal k’a’ru nak’ulman naq na’oso’ royb’enihom li kristiaan sa’ li kutankil a’in jo’ sa’ xkutankil laj Jeremias (chi’ilmanq Jeremias 30:5; 31:15; Lamentaciones 1:1–7; 3:1–5; ut li raqal natawman sa’ “Xkomon chik li k’anjeleb’aal”). Naru nakak’eheb’ li komon sa’ oxib’ ch’uut ut taaye reheb’ naq te’ril Jeremias 30; 31; ut 33 re te’xsik’ li na’leb’ naru naxk’e royb’enihomeb’ li kristiaan sa’ li kutan a’in. Chan ru naq li oyb’enink rik’in li Qaawa’ nokoxtenq’a chixnumsinkil li ch’a’ajkilal?

Jeremias 31:31–34; 32:37–42

“A’anaqeb’ lin tenamit ut laa’inaq lix Dioseb’.”

• Xnumsinkil jun sutaq chik Jeremias 31:31–34; 32:37–42 naru naxtenq’aheb’ li komon chi k’oxlak chirix li sumwank xe’xb’aanu. Re taawaklesiheb’ xch’ool chi aatinak chirixeb’ li raqal a’in, k’eheb’ b’ayaq xhoonal re te’rileb’ li raqal ut chirix a’an te’xtz’iib’a sa’ jun perel hu junaq na’leb’ li te’raj xpatz’b’al reheb’ li komon chirix li xe’ril. Maare te’raj xtz’ilb’al rix k’a’ru naraj naxye naq taawanq lix chaq’rab’ li Dios chi tz’iib’anb’il chiru li qaam (chi’ilmanq Jeremias 31:33) malaj chan ru naq li sumwank nokoxtenq’a chixnawb’al ru li Qaawa’ (chi’ilmanq Jeremias 31:34). Ch’utub’ ut sik’ ru junjunqaq li patz’om re te’tz’ilmanq rix sa’ komonil. K’a’ru naqatzol sa’eb’ li raqal a’an li naxwaklesi qach’ool re xpaab’ankil li qasumwank?

jun ixqa’al natzolok sa’ li loq’laj hu

Li loq’laj hu naru tooxmusiq’a chixjalb’al qak’a’uxl ut chixsik’b’al li Qaawa’.

Jeremias 36

Li loq’laj hu wan xwankil chiqisinkil chiru li maa’usilal.

• Eb’ li komon maare xe’xtzol xna’leb’ chirix li loq’laj hu naq xe’ril Jeremias 36 sa’ ochoch. Patz’ reheb’ naq te’xwotz k’a’ru xe’xtzol. Jo’kan ajwi’ naru nakak’e reheb’ junaq k’ab’a’ej na’ilman sa’ li ch’ol ut ye reheb’ naq te’ril k’a’ru kixb’aanu li kristiaan a’an rik’in li raatin li Dios. Naru neke’xtzol li raatin ut neke’ril lix b’aanuhom li Qaawa’ (chi’ilmanq li raqal 1–3, 27–31); laj Jeremias (chi’ilmanq li raqal 4–7, 32); laj Baruk (chi’ilmanq li raqal 4, 8–10, 14–18); laj Jehudi ut li rey aj Johakin (chi’ilmanq raqal 20–26); ut laj Elnatan, laj Delaias, ut laj Kemarias (chi’ilmanq li raqal 25). Chan ru nak’utun rik’in li qaatin ut qab’aanuhom li naqeek’a chirixeb’ li loq’laj hu?

reetalil xkomon chik li k’anjeleb’aal

Xkomon chik li k’anjeleb’aal

Junelik naru nawan li oyb’enihom.

Li Awa’b’ej M. Russell Ballard kixk’ut chan ru naq naqatz’eq li oyb’enihom, ut kixk’e li na’leb’ b’ar naru naqataw:

“Wan qe lub’luuko sa’ qayu’am xb’aan li ch’a’ajkilal, li sachok oyb’enihom, ut li rahilal. Naab’aleb’ neke’reek’a naq ink’a’ neke’el chi uub’ej rik’in li ch’a’ajkilal. Ut wan li neke’yaab’ak chirixeb’ lix komon li xe’kelook xb’aan li juk’e’k, xb’aan naq xe’xkanab’ xb’aanunkill ut xpaab’ankil li tiikil na’leb’. … Wan li kristiaan xe’xk’ulub’a naq maak’a’ xjalb’al li maa’usilal ut li kaqal sa’ li ruchich’och’. Ut xe’xtz’eq li oyb’enihom. …

“…Wan qe li maare x’oso’ qoyb’enihom chi junajwa xb’aan li maak ut li q’etok. Junaq komon naru naxkanab’ rib’ sa’ li b’e re ruchich’och’ chi ink’a’ chik naxnaw chan ru li elk ut chi jo’kan naxsach li royb’enihom. Lin tz’aam choq’ eere li xext’ane’ sa’ lix ra’al laj tza, a’an naq meeq’axtesi eerib’! Us ta jwal ch’a’aj lee wanjik malaj jwal taanumtaaq lee ch’a’ajkilal, ninye tz’aqal eere naq junelik wan li oyb’enihom. Junelik” (“El gozo de la esperanza hecha realidad,” Liahona, enero 1993, 36–37).

“Li qoyb’enihom re xtawb’al qatuqtuukilal sa’ musiq’ej sa’eb’ li hoonal jwal ch’a’aj, a’an xsutq’isinkil li qak’a’uxl ut li qach’ool rik’in li Jesukristo. … Li qapaab’aal chirix li Dios ut chirix li Jesukristo, li Ralal, tz’aqal aajel ru re naq tuqtuuq ru li qawanjik sa’eb’ li hoonal re yale’k ut ch’a’ajkilal” (“El gozo de la esperanza hecha realidad,” 36).

Xkawresinkil qib’ jo’ aj k’utunel

Taaqe li Musiq’ej. Moko taanaw ta tz’aqal k’a’ru taab’aanumanq sa’ li tzoleb’aal, a’b’an naq taawab’i li naxye li Musiq’ej, a’an tatxb’eresi. Naq kawresinb’ilat sa’ musiq’ej, li Qaawa’ tixk’e aawe “sa’ tz’aqal ajwi’ li jun k’amok a’an, li k’a’ru taaye” (Tzol’leb’ ut Sumwank 100:6; chi’ilmanq ajwi’ Li k’utuk jo’ li Kolonel, 10).