Li Jesus sa’ li ch’utleb’aal kab’l aran Nazaret, xb’aan laj Greg K. Olsen

3–9 octubre

Isaias 58–66

“Sa’ li tzuul Sion taachalq jun aj Kolonel”

Naq yooqat chirilb’al li tzol’leb’ li natawman sa’eb’ li ch’ol, b’oq li Musiq’ej chixk’utb’al chawu b’ar wan li esil jwal aajel ru choq’ reheb’ li komon.

Tz’iib’a li nakak’oxla

Xkanab’ankileb’ chi wotzok

Naru nakapatz’ reheb’ li komon naq te’xtz’iib’a sa’ li pizarron li raqal li xwulak chiruheb’ naq xe’ril li loq’laj hu chiru li xamaan a’in. Chirix a’an, naru nekesik’ li yaal wankeb’ sa’ li raqal a’an. Eb’ li na’leb’ a’an naru texxtenq’a chi aatinak chirix jun malaj naab’al reheb’ li na’leb’ li neke’tusman arin.

Xk’utb’al li tzolʼlebʼ

Isaias 58:3–12

Li kuyuk sa’ naxk’am chaq li osob’tesiik.

• Re xtenq’ankileb’ li komon chixtz’ilb’al rix k’a’ut naq li Qaawa’ kixk’e qe li chaq’rab’ re kuyuk sa’ ut chan ru taqab’aanu, naru taayiib’ wiib’ raqal li kaaxukuut rik’ineb’ li aatin “Meekuy’ eesa’ chik jo’ anajwan” ut “Li kuyuk sa’ nawaj laa’in.” Chirix a’an li komon naru te’ril Isaias 58:3–7 re te’xnujob’resi li xb’een raqal rik’in chan ru naq eb’ laj Israelita ke’xkuy xsa’ ut te’xnujob’resi li xkab’ rik’in chan ru naroyb’eni li Qaawa’ naq taqakuy qasa’. Chan ru naq najala laa na’leb’ chirix jo’ chanru naqil li kuyuk sa’? Eb’ li komon naru te’xye chan ru naq li kuyuk sa’ nokoxk’am sa’ li osob’tesiik li naxyeechi’i li Qaawa’ sa’eb’ li raqal 8–12.

• Maare junjunq reheb’ li komon ak xe’xch’olob’ chiruheb’ jalan k’a’ut naq naqakuy qasa’. Kanab’eb’ chixwotzb’al li k’a’ru xe’xch’olob’ a’an. Naru ajwi’ taab’oq junaq li komon re li obispil re tixch’olob’ chan ru naq na’oksiman li mayej re kuyuk sa’. Naru ajwi’ taawotz li na’leb’ kixk’e li Awa’b’ej Henry B. Eyring sa’ “Ma ink’a’ ta a’in li kuyuk sa’ sik’b’il ru inb’aan?” (Jolomil ch’utub’aj-ib’ re abril 2015). Chan ru naq li kuyuk sa’ ut xtojb’al li mayej re li kuyuk sa’ natenq’an re “xk’ixb’al lix k’aamal li rahob’tesiik” wan qe malaj re li qas qiitz’in? (Isaias 58:6).

Isaias 61:1–3; 63:7–9

Li Jesukristo a’an aj Kolol qe ut aj Tojol qix.

• Naq li Jesukristo kixye reheb’ li tenamit naq a’an li Mesias, kiroksi Isaias 61:1–3 (chi’ilmanq Lukas 4:16–21; chi’ilmanq ajwi’ li video “Jesús declara que Él es el Mesías,” ChurchofJesusChrist.org). Eb’ li komon naru te’ril Isaias 61:1–3 ut te’xch’olob’ k’a’ut naq eb’ li raqal a’in a’aneb’ chaab’il reetalil lix b’aanuhom li Kolonel. Naru nakatz’iib’a sa’ li pizarron k’a’ru aj-e naq kiyule’ li Kolonel ut teetz’il rix k’a’ru naraj naxye li junjunq. Chan ru naq li Kolonel kixb’aanu lix k’anjel sa’ lix yu’am arin sa’ li ruchich’och’? Chan ru naxb’aanu li k’anjel a’an sa’ li qayu’am?

• Eb’ li komon naru ajwi’ te’ril Isaias 63:7–9 ut te’xwotz chan ru naq neke’osob’tesiik chi jo’kan xb’aan li Jesukristo.

• Sa’ Isaias 61:1–3 na’ilman li ch’ina-usil ut utz’u’ujinb’il aatin re xch’olob’ankil lix wankil li Jesukristo re xtojb’al rix li k’a’ru chanchan naq maak’a’ xyiib’ankil. Re xk’utb’esinkileb’ li raqal a’in, wotz junaq seraq’ chirix junaq k’a’aq re ru sachb’il malaj li po’b’il, a’b’an li xru xyiib’ankil chi jwal ch’ina-us wi’chik. Naru rilb’al li video “Templo del Centro de la Ciudad de Provo” (ChurchofJesusChrist.org); chi’ilmanq ajwi’ “Xkomon chik li k’anjeleb’aal”) malaj li seraq’ wan sa’ xtiklajik li raatin li Awa’b’ej Dieter F. Uchtdorf, “Tatxk’e sa’ xb’een lix tel ut tatxk’am toj sa’ laa wochoch” (Jolomil ch’utub’aj-ib’ re abril 2016). Li komon naru te’xye chan ru rilomeb’ li Qaawa’ chixk’eeb’al junaq k’a’aq re ru ch’ina-us reheb’ li kristiaan naq neke’xk’oxla naq po’b’ileb’ lix yu’am.

Isaias 65:17–25

Sa’ li xkab’ xk’ulunik, li Qaawa’ “tixyiib’ jun ak’ choxa ut jun ak’ ruchich’och.”

• Sa’ Isaias 65:17–25 tz’iib’anb’il li taak’ulmanq sa’ ruchich’och’ sa’ li xkab’ xk’ulunik li Kolonel. Keheb’ li komon chiril li raqal a’an re te’xsik’ xsumenkil li patz’om jo’ a’in: K’a’ruhaq xjalanil li yu’am sa’ li “ak’ ruchich’och’ ” rik’in li yu’am anajwan? K’a’ru neketaw sa’eb’ li raqal a’in li naxk’e xsahil eech’ool?

Xkomon chik li k’anjeleb’aal

Li Qaawa’ “moko nokoxkanab’ ta sa’ li cha.”

Chirix naq ak kixwotz chan ru naq jun li nimla xam ka’ch’in chik ma kixjuk’ li Tabernaculo re Provo, li kiru wi’ xyiib’ankil wi’chik jo’ li santil ochoch re Provo Centro, li Hermana Linda S. Reeves kixye: “Li Qaawa’ nokoxkanab’ re yale’k, wan naq chi nim tz’aqal. Qilom xyu’ameb’ li raarookeb’ qab’aan—ut maare ajwi’ li qayu’am laa’o—chi k’ate’k chaq, sa’ jaljookil ru aatin, ut naqapatz’ qib’ k’a’ut naq jun Choxahil Yuwa’b’ej aj rahonel ut aj ilonel naxkanab’ naq te’k’ulmanq li k’a’aq re ru a’an. A’b’an a’an moko nokoxkanab’ ta sa’ li cha; a’an xaqxo chi ye’b’ileb’ xtel ut nokoxb’oq chi chalk rik’in a’an. A’an yoo chiqakawresinkil re naq laa’aqo jun santil ochoch b’ar wi’ lix Musiq’ naru nawan chi junelik” (“Reclamen las bendiciones de sus convenios,” Liahona, noviembre 2013, 119).

Xkawresinkil qib’ jo’ aj k’utunel

Naweb’ ru li tzolb’ileb’ aab’aan. Eb’ li tzolb’ileb’ aab’aan jalan jalanq li chalenaqeb’ wi’ chaq, li k’a’ru neke’xk’oxla, ut lix seeb’aleb’. Naq yooqeb’ chi tzolok sa’ junjunqal, jultikaq aawe naq wankeb’ lix jalanil. (Chi’ilmanq Li k’utuk jo’ li Kolonel, 7.)