Laj Daniel naxtaw xyaalal lix matk’ laj Nabukodonosor, xb’aan laj Grant Romney Clawson

31 octubre–6 noviembre

Daniel 1–6

“Maak’a’ chik junaq Dios taaruhanq chi kolok”

Naab’aleb’ li komon wanqeb’ xnawom chirixeb’ li seraq’ sa’ xhu laj Daniel. Naq yooqat chi tzolok ut chixkawresinkil aawib’, sik’ xna’leb’ li Musiq’ej chirix xtenq’ankileb’ li komon chixtawb’al xyaalaleb’ li raqal a’in.

Tz’iib’a li nakak’oxla

Xkanab’ankileb’ chi wotzok

Maare us raj wi nakapatz’ reheb’ li komon naq te’xwotz chan ru neke’xtzol li loq’laj hu xjuneseb’ ut jo’ junkab’al. Naq te’xwotz li na’leb’ li xk’ut li Musiq’ej chiruheb’ chiru li xamaan a’in, patz’ reheb’ k’a’ru yookeb’ chixb’aanunkil naq xe’xk’ul li na’leb’ a’an.

Xk’utb’al li tzolʼlebʼ

Daniel 1; 3; 6

Naru naqapaab’ li Qaawa’ naq yalb’il rix li qapaab’aal.

• Re xtz’ilb’al rix chan ru naq laj Daniel, laj Sidrak, laj Misak, ut laj Abednago ke’xk’ut lix paab’aaleb’ chirix li Qaawa’, naru nakapatz’ reheb’ li komon naq te’xtz’iib’a chi kosb’il ru li ya’le’k ke’xk’ul li winq a’in, li na’ilman sa’ Daniel 1, 3, ut 6. K’a’ut raj naq jwal ch’a’aj wank chi tiik rik’in li yoo chi k’ulmank? K’a’ru naqak’ul laa’o li naxyal rix qapaab’aal? Eb’ li komon naru neke’ril Daniel 1:10–13; 3:15–18; 6:10 re xnawb’al chan ru xe’xsume li kaahib’ chi winq eb’ li yalb’a-ix. Chan ru nokoxtenq’a li eetalil a’an re’ naq tiikaqo jo’ xtzolom li Jesukristo?

• Naab’al qe laa’o, jo’ laj Daniel ut eb’ li ramiiw, naqeek’a naq nokomine’ chixjalb’al li qapaab’ahom. Choq’ qe laa’o, b’ar nachal li mine’k a’an? Re xtenq’ankileb’ li komon chixtawb’al xna’leb’ chirix li kixk’ut laj Daniel ut eb’ li ramiiw, k’eheb’ sa’ oxib’ ch’uut re te’ril Daniel 1, 3, malaj 6. Chan ru kirosob’tesi li Qaawa’ laj Daniel, laj Sidrak, laj Misak, ut laj Abednago naq ke’xsik’ ru wank chi tiik chiru li ch’a’ajkilal yookeb’ chixk’ulb’al? Li junjunq ch’uut te’ruuq chixwotzb’al rik’in li tzoleb’aal li k’a’ru xe’xtaw. Chirix a’an, eb’ li komon naru te’xye chan ru tooruuq chi wank chi tiik us ta wankeb’ li neke’raj xminb’al qu. Naru ajwi’ te’aatinaq chirix xsik’b’aleb’ li chaab’il amiiw li toohe’xtenq’a rik’in li qawanjik.

Daniel 2

Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, a’an li rawa’b’ejihom li Dios sa’ ruchich’och’.

• Xtz’ilb’al rix Daniel 2 naru naxtenq’aheb’ li komon re te’xnaw chan ru naq Lix Iglees li Jesukristo reheb’ laj Santil Paab’anel sa’ Roso’jikeb’ li Kutan yoo chixtz’aqob’resinkil ru naq a’an li pek “li k’okb’il chaq sa’ li tzuul” sa’ li profeetil aatin (raqal 45). Re xtikib’ankil, ilomaq lix tz’iib’ahom ut li naraj xyeeb’al laj Daniel chirix lix matk’ laj Nabukodonosor, li natawman sa’ Daniel 2:31–45. Chirix a’an naru nakak’ut xjalam-uuch jun li pek (malaj yiib’ junaq sa’ li pizarron). Kanab’eb’ li komon chixwotzb’al li neke’xtzol chirix li rawa’b’ejihom li Dios rik’in xjuntaq’eetankil rik’in li tz’iib’anb’il chirix li pek sa’ Daniel 2:34–35, 44–45. Eb’ li komon maare neke’xnaw junaq seraq’ chirix li Iglees sa’ lee na’aj li naru neke’xwotz. Chan ru qilom chi tz’aqlok ru lix profeetil aatin laj Daniel sa’ li qayu’am?

Daniel 2:1–30

Re xk’ulb’al li k’utb’esinb’il na’leb’, na’ajman li kawresink-ib’ sa’ musiq’ej.

• Eb’ li komon naru neke’tenq’aak xb’aan xnawb’al chan ru naq laj Daniel kixkawresi rib’ re xk’ulb’al li k’utb’esinb’il na’leb’ re xch’olob’ankil k’a’ru naraj naxye xmatk’ laj Nabukodonosor. Re xtikib’ankil, patz’ reheb’ li komon naq te’ril Daniel 2:1–15, toja’ naq te’xye k’a’ raj ru xe’reek’a wi ta wankeb’ sa’ xna’aj laj Daniel. Ye reheb’ naq te’ril Daniel 2:16–18 ut te’xsik’ li kixb’aanu laj Daniel. K’a’ru naqatzol sa’ Daniel 1:17 chirix li kixb’aanu li Dios re xkawresinkil laj Daniel? K’a’ru kixb’aanu laj Daniel li taak’anjelaq qe re xk’ulb’al li k’utb’esinb’il na’leb’? K’a’ru naqatzol rik’in li raatin ut xb’aanuhom laj Daniel chirix naq kitenq’aak xb’aan li Qaawa’? (chi’ilmanq Daniel 2:20–30).

Xjalam-uuch laj Daniel ut eb’ li ramiiw naq ke’xtz’eqtaana xtzakemq li rey, xb’aan laj Brian Call

Daniel 3

Us ta ink’a’ naqanaw k’a’ru taak’ulmanq, toj naru taqasik’ ru paab’ank.

• Li ke’xk’ul laj Sidrak, laj Misak, ut laj Abednago sa’ Daniel 3 naru naxtenq’aheb’ li komon re te’xtaw ru chi us k’a’ru naraj naxye li paab’aal chirix li Jesukristo. K’eheb’ li komon chixtz’iib’a chi k’osb’il li yale’k ke’xk’ul laj Sidrak, laj Misak, ut laj Abednago (chi’ilmanq Daniel 3:1–12), ut chirix a’an tz’ilomaq rix k’a’ru ke’xb’aanu (chi’ilmanq Daniel 3:13–18). K’a’ru naqatzol chirix li paab’aal rik’in xb’aanuhomeb’? Naru nakatz’iib’a sa’ li pizarron Li qaDios naru… ut A’b’anan wi ink’a’… li wan sa’ li raqal 17–18. Eb’ li komon naru neke’xnujtesi sa’ li yamyookil na’ajej li ch’a’ajkilal naru neke’xk’ul. Maare te’xye “Li qaDios naru naxsume lin patz’om” ut “A’b’anan wi ink’a’, tinkanab’ lin ch’ool rik’in a’an rik’in woyb’enihom.” Naq eb’ li komon yooqeb’ chixk’eeb’al li eetalil, waklesiheb’ xch’ool re te’xye chan ru naq li Kolonel nokoxtenq’a ut naxkawob’resi qach’ool, us ta ink’a’ naqanaw chan ru taa’elq li k’a’aq re ru.

Xkawresinkil qib’ jo’ aj k’utunel

Oksiheb’ jalam-uuch. “Eb’ li jalam-uuch, li kaxlan mu, ut li dramatizacion neke’ru chixchapb’aleb’ xk’a’uxl li komon sa’ li tzoleb’aal—jo’eb’ li neke’tzolok rik’in li ilok—ut chi jo’kan moko ch’a’aj ta xjultikankileb’ li seraq’ sa’eb’ li loq’laj hu” (Li k’utuk jo’ li Kolonel, 22).