jun winq chire li palaw ut jun nimla kar chirix

Laj Jonas chire li palaw aran Nineve, xb’aan laj Daniel A. Lewis

21–27 noviembre

Jonas; Mikeas

“Naxra li uxtaanank”

Re taa’uxq li jalok ch’oolej, moko tz’aqal ta jun chaab’il tzolok sa’ li Dominkil Tzoleb’aal rajlal wiib’ xamaan. Waklesiheb’ xch’ool li komon sa’ li tzoleb’aal re te’xsik’ li musiq’ejil na’leb’ chiru chixjunil li yu’am.

Tz’iib’a li nakak’oxla

reetalil li wotzok

Xkanab’ankileb’ chi wotzok

Naru nakatz’iib’a chiru li pizarron raqal jo’eb’ a’in: Jun li yaal xnaq sa’ inch’ool, Lin ak’ nawom, ut Junaq li na’leb’ jwal nawaj xtzolb’al. K’e xhoonaleb’ li komon re naq te’xjultika li xe’xtzol sa’ xhu laj Jonas ut laj Mikeas, li na’aatinak chirix junaq reheb’ li ch’ol aatin wan chiru li pizarron.

reetalil li k’utuk

Xk’utb’al li tzolʼlebʼ

Jonas 1–4; Mikeas 7:18–19

Li Qaawa’ naruxtaanaheb’ li neke’sik’ok re.

Xjultikankil reheb’ li komon li ruxtaan li Qaawa’ naru naxtenq’aheb’ chireek’ankil lix rahom ut rajomeb’ chixjalb’al xk’a’uxl. Naru nakab’oqeb’ chirilb’al Mikeas 7:18–19 ut te’xtz’iib’a chiru li pizarron junjunqaq reheb’ li k’utb’esihom natawman sa’ Jonas 1–4 li naxk’ut naq li Qaawa’ nasaho’ xch’ool rik’in li uxtaan. K’a’ chik ru li numsihom naru naqawotz chirix li ruxtaan li Dios—sa’ li loq’ laj hu ut sa’ li qayu’am?

Reek’ankil li ruxtaan li Qaawa’ nokoxtenq’a re taawanq quxtaan. A’in jun li na’leb’ li naru natenq’ank reheb’ li komon chi tzolok chirix li uxtaan sa’ lix hu laj Jonas. Naru nakatz’iib’a chiru li pizarron jun li patz’om jo’ a’in: Jo’ nak’utman sa’ Jonas 1–4, k’a’ru naxk’ut chiwu li ruxtaan li Dios chirix chan ru tin’uxtaananq? Eb’ li komon naru neke’xsik’ ru jun li ch’ol re te’xtzol ut te’xsik’ xsumenkil li patz’om. K’e xhoonaleb’ re te’xk’oxla hoonal naq te’xjal li k’a’ru ink’a’ us neke’xb’aanu rik’in li uxtaanank choq’ reheb’ ajwi’ a’an ut choq’ reheb’ li ras riitz’in.

wiib’ li kristiaan neke’aatinak chire li nima’

Naru taqawotz li evangelio rik’ineb’ li ralal xk’ajol li Dios.

Jonas 1; 3–4

Chixjunileb’ li ralal xk’ajol li Dios tento te’rab’i li evangelio.

• Jun na’leb’ re risinkil li k’utum sa’ lix hu laj Jonas a’an xjuntaq’eetankil rik’in xyu’ameb’ li misioneer re lix Hu laj Mormon. Naru nakak’e wiib ch’uut chiru li pizarron rik’in lix jolomil aatin Jonas ut Alma ut eb’ li ralal laj Mosiah. Ye reheb’ li komon naq te’xjuntaq’eeta lix b’aanuhom laj Jonas naq kib’oqe’ chixtzolb’aleb’ li tenamit Ninive (chi’ilmanq Jonas 1; 3–4) rik’in lix na’leb’eb’ li ralal laj Mosiah chirix xtzolb’aleb’ laj Lamanita (chi’ilmanq Mosiah 28:1–5; Alma 17:23–25). K’a’ru naqatzol rik’in li na’leb’ a’in chirix xwotzb’al li evangelio rik’ineb’ li ralal xk’ajol li Dios?

• Jo’ laj Jonas, maare naab’al qe laa’o nokoxuwak chixb’oqb’aleb’ li qas qiitz’in chi sutq’iik rik’in li Qaawa’. K’a’ru kixxuwa laj Jonas naq kixkanab’ lix b’oqb’al re xik chixtzolb’aleb’ li kristiaan sa’ Ninive? K’a’ut naq wan hoonal ink’a’ naqaj xwotzb’al li evangelio? Eb’ li komon naru neke’xwotz chan ru naq neke’tenq’aak xb’aan li Qaawa’ chixkanab’ankil li xiw a’an. Li raatin li Awa’b’ej Henry B. Eyring sa’ “Xkomon chik li k’anjeleb’aal” naru naxtenq’aheb’ chixsik’b’al raqal li tooxtenq’a chixwotzb’al li evangelio.

Mikeas 6:6–8

K’a’ru naxtaqla li Qaawa’ naq taab’aanu?

• Sa’ Mikeas 6:6–7 natawman naab’al reetalil li ke’xb’aanu chaq laj Judio junxil. A’b’anan, choq’ re li Dios wan chik k’a’ru aajel ru chiruheb’ li na’leb’ a’an. Ye reheb’ li komon naq te’xtaw li k’a’aq re ru a’an sa’ li raqal 8. Eb’ li komon naru neke’xsik’ ch’ol aatin aajeleb’ ru sa’ li raqal ut te’aatinaq chirix li junjunq. Chirix a’an, naru neke’xsik’eb’ ch’ol aatin nawulak chiruheb’, te’xsik’ ajwi’ raqal li na’aatinak chirix a’an sa’ li K’utul Raqal reheb’ li Loq’laj Hu malaj sa’ junaq li b’ich sa’ Eb’ li B’ich ut te’xwotz li te’xtzol. K’a’ut naq eb’ li raqal a’in jwal aajeleb’ ru choq’ re li Qaawa’?

reetalil xkomon chik li k’anjeleb’aal

Xkomon chik li k’anjeleb’aal

Li rahok, li eetalil, ut li xnawom ch’oolej.

Chirix xtz’ilb’al rix li tijom laj Jonas choq’ re li tenamit Ninive, li Awa’b’ej Henry B. Eyring kixseraq’i jun xtijom lix na’ choq’ re:

“Toj nanaq sa’ lin ch’ool lin na’ chiwaatinankil chi q’un xyaab’ xkux jun sabado eewu naq, laa’in chaq jun ch’ina al, xinpatz’ inliceens re xb’aanunkil jun lin k’a’uxl li kink’oxla naq a’an jun chaab’il na’leb’, a’b’anan a’an naxnaw naq a’an xiwxiw. Toj anajwan sachso ninkana xb’aan li wankilal kixk’ul, nink’oxla naq kixk’ul a’an rik’in li Qaawa’, re xjalb’al ink’a’uxl rik’in yal wiib’ oxib’ chi aatin. Jo’ nanaq sa’ inch’ool, a’an kixye: “Nink’oxla naq tatruuq chixb’aanunkil. A’b’anan laa’at tatsik’oq re xb’aanunkil.” Kinixtij yal rik’in chan ru kixyaab’asi li aatin tatruuq ut tatsik’oq. A’b’anan a’an tz’aqal choq’ we.

“Lix wankilal re intijb’al rik’in yal wiib’ oxib’ aatin kichal chaq sa’ xk’ab’a’ oxib’ li na’leb’ ninnaw chirix a’an. Xb’een, ninnaw naq nikinixra. Xkab’, ninnaw naq ak kixb’aanu li kiraj tinb’aanu laa’in, ut ki’osob’tesiik xb’aan a’an. Ut rox, a’an kixwotz wik’in lix nawom chirix xsik’b’al ru xb’aanunkil li jwal aajel ru, ut naq li Qaawa’ taayehoq we li tento tinb’aanu wi tinpatz’ re. Li rahok, li eetalil, ut li xnawom ch’oolej: a’aneb’ li laaw ke’jalok re lin kutan sa’ li hoonal a’an” (chi’ilmanq “Una voz de amonestación,” Liahona, enero 2009, 3).

Xkawresinkil qib’ jo’ aj k’utunel

Kawresi aawib’. Lix k’utb’al li evangelio rik’in wankilal natikla rik’in lix kawresinkil aawib’. Rub’elaj naq taakawresi li tzolok, sik’ naq laa waam taanujaq rik’in li Santil Musiq’ej rik’in li tzolok ut li tijok. (Chi’ilmanq Li k’utuk jo’ li Kolonel, 12.)