jun sumal sa’ xsutam li santil ochoch

7–13 noviembre

Oseas 1–6; 10–14; Joel

“Q’axal tinra chi anchal inch’ool”

Naq yooqat chi tzolok chiru li xamaan a’in, k’e reetal b’ar wan reheb’ li ch’ina-usil esil li natawman sa’ lix hu laj Oseas ut Joel naru neke’tenq’ank reheb’ li komon nakatzoleb’.

Tz’iib’a li nakak’oxla

reetalil li wotzok

Xkanab’ankileb’ chi wotzok

Re xwaklesinkileb’ xch’ool li komon re naq te’xwotz li xe’xtzol chiru li xamaan a’in, naru taaye reheb’ naq te’xtz’iib’a chiru li pizarron jun aatin malaj ch’ol aatin li xwulak chiruheb’. Chirix a’an naru te’xch’olob’ k’a’ut naq li aatin malaj li ch’ol aatin a’an xwulak chiruheb’. Eb’ li aatin ut li ch’ol aatin te’xtz’iib’a naru neke’k’anjelak choq’ re li tz’ilok-ix.

reetalil li k’utuk

Xk’utb’al li tzolʼlebʼ

Oseas 1–3 14

Li Qaawa’ junelik nokoxb’oq chi sutq’iik rik’in a’an.

• Re xtikib’ankil aatinak chirix Oseas 1–3 naru nakatz’iib’a li aatin sumlaak sa’ li pizarron, ut taapatz’ reheb’ li komon naq te’xye aatin li neke’xk’ul rib’ rik’in li sumlaak. Chan ru naq li ok sa’ sumwank rik’in li Qaawa’ chanchan li sumlaak? Chan ru naq xtz’eqtaanankil li sumwank a’an chanchan xmuxb’al li sumlajik? (chi’ilmanq Oseas 2:5–7, 13). Chirix a’an, li komon naru te’xye chan ru naq lix wanjik laj Oseas ut xGomer naxk’ut lix wanjik li Qaawa’ rik’in lix tenamit. K’a’ru nakatzol sa’ Oseas 2:14–23 ut Oseas 14 chirix lix rahom ut li ruxtaan li Qaawa’? Chan ru naqak’ut chiru li Qaawa’ li qarahom ut qatiikilal?

• Sa’ Oseas 14 natawman reetalil naab’al lix yeechi’ihom li Qaawa’ re laj Israel wi neke’sutq’i chaq rik’in. Eb’ li komon naru te’xtz’il rix li ch’ol a’an ut te’xsik’eb’ li yeechi’ihom a’an. K’a’ru kixye li Qaawa’ naq tixb’aanu? K’a’ raj ru naraj naxye li ch’ol aatin “q’axal tinra chi anchal inch’ool” (raqal 4). K’a’ru naxk’ut chiqu li jaljookil ru aatin re li pim sa’eb’ li raqal 5–8 chirixeb’ li osob’tesink kawresinb’il xb’aan li Qaawa’ choq’ qe, jo’kan ajwi’ li osob’tesink re li jalb’a-k’a’uxlej?

  jun winq naxk’e li ruq’ sa’ xb’een xjolom jun ixq

  Kimaakob’k li xGomer, li nareetali Israel, a’b’an li Qaawa’ kixyeechi’i xkolb’al rix. Jalam-uuch xb’aan li xDeb Minnard, k’eeb’il xliceens xb’aan goodsalt.com

Oseas 6:4–7; Joel 2:12–13

Li qaloq’onihom choq’ re li Dios tento naq yo’yooq sa’ li qach’ool, ink’a’ yal taak’utunq sa’ li qab’aanuhom.

• Sa’ Oseas 6:6 ut Joel 2:12–13 wan li na’leb’ chirix lix mayejankil li xul ut xpejb’al li aq’ej jo’ reetalil li xutaan. Us ta li na’leb’ a’an ink’a’ chik na’no ru anajwan, eb’ li raqal a’in naru nokoxtenq’a chixtz’ilb’al rix li k’a’ru jwal aajel ru choq’ re li Qaawa’. Naru nekeril ru Oseas 6:6 ut teewotz lee na’leb’ chirix li raqal a’an. B’oqeb’ junjunqaq li komon chirilb’al Mateo 9:10–13 ut jun siir chik chirilb’al Mateo 12:1–8. Chirix a’an, naru neke’xwotz chirib’ileb’ rib’ chan ru naq lix b’aanuhom li Qaawa’ nokoxtenq’a chixtawb’al ru li raqal nak’utman sa’ Oseas 6:6. Chan ru naq nokoru chixb’aanunkil a’in sa’ li qajunkab’al?

  Naru ajwi’ nekeril Joel 2:12–13 ut teetz’il rix xpejb’al li qaam ut ink’a’ ka’ajwi li qaq’. K’a’ru naqatzol sa’eb’ li raqal a’an chirix li wank jo’ tz’aqal xtzolom li Jesukristo?

Joel 2

“Tinhoy lin musiq’ sa’ xb’eeneb’ chixjunil.”

• Re xtikib’ankil xtz’ilb’al rix Joel 2, naru nakawotz rik’ineb’ li komon li kixye laj Moroni chirix li k’utb’esinb’il na’leb’ a’in naq kirula’ani laj Jose Smith sa’ 1823 (chi’ilmanq Jose Smith—Resilal 1:41). Eb’ li komon naru neke’xwotz chan ru naq li profeetil aatin sa’ Joel 2:28–32 yoo chi tz’aqlok ru anajwan. Naru ajwi’ neketz’il rix li raatin li Elder David A. Bednar sa’ “Xkomon chik li k’anjeleb’aal” naxtaw rib’ rik’in li profeetil aatin kixye laj Joel. Eb’ li komon naru neke’xwotz li neke’xtaw ru chirix reek’ankil li Santil Musiq’ej sa’ lix yu’ameb’ wulaj wulaj. K’a’ru naru naqab’aanu wi ink’a’ naqeek’a li Santil Musiq’ej? Chan ru taqatenq’aheb’ li “qalal ut li qarab’in” chireek’ankil li Musiq’ej? (raqal 28).

reetalil xkomon chik li k’anjeleb’aal

Xkomon chik li k’anjeleb’aal

“Naru naqaye naq li santil Musiq’ej yoo chiqab’eresinkil.”

Li Elder David A. Bednar kixye:

“Wan hoonal naq laa’o naqaram li qak’utb’esinb’il na’leb’. Li nawaj xyeeb’al rik’in a’in, yeechi’inb’il naq sa’ roxloq’inkil li qasumwank, naru nawan li Santil Musiq’ej qik’in jo’ li qochb’een rajlal. A’b’anan noko’aatinak chirix ut naqaye naq rab’inkil xyaab’ xkux li Qaawa’ rik’in li Musiq’ej chanchan ta wi’ naq yal jo’q’ehaq nak’ulman. … [Li Musiq’ej] tento taawanq qik’in rajlal hoonal. Ink’a’ rajlal kok’ hoonal, a’b’anan wi jun li kristiaan yoo chixyalb’al xq’e —ink’a’ tento tz’aqalaq re ru—a’ut wi laa’ex ut laa’in yooko chixyalb’al qaq’e, ut ink’a’ naqab’aanu ninqi maak, jo’kan b’i’ naru naqeek’a naq li Santil Musiq’ej yoo chiqab’eresinkil. …

“…Wan naq naqak’oxla naq eb’ lix k’utb’esihom li Santil Musiq’ej jwal ninqeb’ ut neke’k’ulman sa’ junpaat, a’b’anan chi yaal a’aneb’ q’uneb’, ut neke’k’i chiru li hoonal. Ink’a’ tento nakak’e reetal naq yookat chixk’ulb’al li k’utb’esinb’il na’leb’ tz’aqal sa’ xhoonalil” (“Análisis por el élder David A. Bednar” [una velada con una Autoridad General, 7 febrero, 2020], broadcasts.ChurchofJesusChrist.org).

Xkawresinkil qib’ jo’ aj k’utunel

Chatwanq chi chaab’il. Eb’ li komon tento te’xnaw naq laa’at nakatk’oxlak chirixeb’ ut nakak’oxla lix k’iijikeb’ sa’ musiq’ej. Re xk’utb’al a’an, naru nakak’uleb’ chi sa laa ch’ool naq yooqeb’ chi wulak. (Chi’ilmanq Li k’utuk jo’ li Kolonel, 15.)