li ru li Jesus kutanob’resinb’il xb’aan li kandeel

Li Yu’am Wa, xb’aan laj Chris Young

14–20 noviembre

Amos; Abdias

“Sik’omaq li Qaawa’ ut taawanq eeyu’am”

Naq yooqat chixtzolb’al xhu laj Amos ut laj Abdias, chiwanq aach’ool re xk’ulb’al aana’leb’ chirix li taak’ut chiruheb’ li komon. Tz’iib’a li na’leb’ ut sik’ li hoonal re taawotz a’an sa’ li domingo.

Tz’iib’a li nakak’oxla

reetalil li wotzok

Xkanab’ankileb’ chi wotzok

Jo’ laj Amos ut laj Abdias ke’aatinak re li tenamit chirix li xiwxiw, eb’ li raatin a’an ajwi’ jun li tijleb’ choq’ qe sa’ li kutan a’in. Kanab’eb’ li komon chixwotzb’al lix k’utum laj Amos ut laj Abdias choq’ qe.

reetalil li k’utuk

Xk’utb’al li tzolʼlebʼ

Amos 3:7–8; 7:10–15

Li Qaawa’ naxk’utb’esi li yaal rik’in xtz’uumaleb’ reheb’ lix profeet.

• Patz’ reheb’ li komon naq te’xwotz li na’leb’ xe’xtaw chirixeb’ li profeet sa’ li tzolok sa’ junesal ut jo’ junkab’al sa’ Amos 3 ut Amos 7. Naru nakatz’iib’a sa’ li pazarron li te’xsume. K’a’ chik ru naqanaw chirixeb’ li profeet? (Re rilb’al xkomon chik li na’leb’, chi’ilmanq “Profetas” [topics.ChurchofJesusChrist.org].) Waklesi xch’ooleb’ li komon re naq te’xwotz chan ru ke’xtaw lix nawom naq jwal aajel ru lix k’anjeleb’ li profeet sa’ lix k’uub’anb’il na’leb’ li Dios.

• Chan raj ru taqawotz rik’in junaq qamiiw k’a’ut naq jwal aajel ru junaq li profeet sa’ li qakutankil? Tz’iib’a sa’ li pizarron junjunq li patz’om chirixeb’ li profeet li tixpatz’ raj junaq kristiaan maawa’ komon sa’ li Iglees. Chan ru taqasume junqaq reheb’ a’an rik’in roksinkil Amos 3:7–8 ut 7:10–15?

• Jo’ xcha’al li aatinak chirixeb’ li profeet, naru nakak’ut li video: “Necesitamos profetas vivientes” (ChurchofJesusChrist.org). Chan ru nokohe’xtenq’a li profeet sa’ roso’jikeb’ li kutan chi nach’ok rik’in li Qaawa’?

Amos 5; 8:11–12

Li q’etok paab’aal a’an jun tz’okajik re rab’inkil raatin li Qaawa’.

• Re xtikib’ankil aatinak chirix li tz’okaak ki’aatinak wi’ laj Amos sa’ Amos 8:11–12, maare naru nekeril chan ru lix wanjikeb’ li kristiaan kixtzoleb’ laj Amos. Chan ru naq ke’najto’ laj Israelita rik’in li Qaawa’? (chi’ilmanq, Amos 2:6–8; 5:11–12). K’a’ut naq aajel ru xnawb’al chirix lix t’anik? Chirix a’an, eb’ li komon naru te’ril Amos 8:11–12 ut te’aatinaq chirix k’a’ut naq li aatin “tz’okaak” ut “chaqi-eel” neke’xch’olob’ chi us lix wanjikeb’ li neke’najto’ rik’in li Qaawa’. Naru ajwi’ neke’xtz’il rix Amos 5 ut te’xsik’ li raqal nokoxtenq’a re naq ink’a’ toot’ane’q sa’ li q’etok paab’ank sa’ li qayu’am (che’ilmanq li raqal 4, 11–12, 14–15, 25–26).

• Xtawb’al ru li tz’okaak sa’ musiq’ej li narochb’eeni li q’etok paab’ank nokoxtenq’a chixtawb’al ru li musiq’ejil ninq’e li naqeek’a b’antiox re lix k’ojlajik wi’chik li evangelio. Naru nakatz’iib’a sa’ li pizarron junjunq patz’om chirix li q’etok paab’ank ut li k’ojob’ank wi’chik, jo’ K’a’ut naq kiwan jun li q’etok paab’ank? K’a’ru xjal li q’etok paab’ank rik’ineb’ li ralal li Dios? K’a’ru xjal lix k’ojob’ank wi’chik li evangelio? Waklesi xch’ooleb’ li komon re te’xsik’ xsumenkil a’in ut jalan chik patz’om sa’eb’ li hu jo’: “El mensaje de la restauración del evangelio de Jesucristo” sa’ li ch’ol 3 re Predicad Mi Evangelio, (2018, 33–46); li raqal “Apostasía” sa’ Temas del Evangelio (topics.ChurchofJesusChrist.org); li video “La Gran Apostasía” (ChurchofJesusChrist.org) ut li esil li natawman sa’ “Xkomon chik li k’anjeleb’aal.” Kanab’eb chixwotzb’al li na’leb’ xe’k’ojob’aak wi’chik sa’ li qakutankil li jwal aajel ru choq reheb’.

eb’ li saaj chirix li santil ochoch

Noko’ok choq’ aj kolonel sa’ xb’een li Tzuul Sion naq naqab’aanu li k’anjel re li santil ochoch ut li resilal li junkab’al.

Abdias 1:21

“Te’taqe’q aj kolonel sa’ li tzuul Sion.”

• K’a’ut naq li aatin “aj kolonel sa’ li tzuul Sion” (chi’ilmanq Abdias 1:21) nokoxch’olob’ chi us naq naqab’aanu li k’anjel sa’ li santil ochoch? Chan ru naq li k’anjel naqab’aanu ruuchileb’ li qaxe’ qatoon nokoxtenq’a chireek’ankil naq nach’ wanko rik’in li qaKolonel Jesukristo? Eb’ li komon naru neke’xwotz k’a’ru xe’reek’a naq xe’xb’aanu li k’anjel re li santil ochoch ut li junkab’al.

reetalil xkomon chik li k’anjeleb’aal

Xkomon chik li k’anjeleb’aal

Li kik’ulman najter.

Li Awa’b’ej M. Russell Ballard kixye:

“Sa’ li ka’ch’in ruhil hoonal nayeeman resil sa li Ak’ Chaq’rab’, … li tenamit ke’xtz’eqtaana li Kristo ut eb’ lix apostol. Lix t’anikeb’ jwal nim ut naqanaw ru a’an jo’ li nimla q’etok paab’ank, li xk’amok chaq naab’al chihab’ li t’ilk sa’ musiq’ej li xk’ab’a’in lix chihab’il li aak’ab’.

“…Li qaChoxahil Yuwa’ naxraheb’ chixjunil li ralal xk’ajol ut a’an naraj naq chixjunileb’ texk’ul li osob’tesink re li evangelio. Li musiq’ejil saqen ink’a’ nasach yal xmaak naq li Qaawa’ ink’a’ narab’iheb’ li ralal xk’ajol. Nak’ulman b’an li musiq’ejil aak’ab’ xb’an naq eb’ li ralal xk’ajol ink’a’ neke’rab’i a’an. Jo’kan naq naxk’am chaq li tojb’a-maak naq eb’ li kristiaan neke’xsik’ ru xb’aanunkil li ink’a’ us, sa’ junesal, sa’ k’aleb’aal, ut sa’ xninqal ru tenamit. Li b’aanuhom a’in na’ilman naab’al sut rik’in xnumik li hoonal. Jun reetalil li nimla k’utum chirix li wanjik, a’an naq li naqasik’ ru xb’aanunkil, qajunesal ut sa’ komonil, naxk’am chaq li tojb’a-maak sa’ musiq’ej choq’ qe ut choq’ reheb’ li toj te’wanq” (“Aprendamos las lecciones del pasado”, Liahona, mayo 2009, 32).

Xkawresinkil qib’ jo’ aj k’utunel

Tenq’aheb’ li komon chixk’eeb’al reetal li Santil Musiq’ej. “Jo’ musiq’anb’il xb’aan li Santil Musiq’ej, patz’ reheb’ li komon sa’ li tzoleb’aal li k’a’ru neke’reek’a ut li neke’musiq’aak chixb’aanunkil. Tenq’aheb’ chixk’eeb’al reetal naq juntaq’eet li musiq’ejil reek’ahom rik’in lix wankil li Santil Musiq’ej” (Li k’utuk jo’ li Kolonel, 11).