“Lix b’e wan chi junelik” (Habakuk 3:6). Sa’ xtiklajik ak wan chaq li Aatin, xb’aan li xEva Timothy

28 noviembre–4 diciembre

Nahum; Habakuk; Sofonias

“Lix b’e wan chi junelik”

Laa b’aanuhom jo’ aj tzolol re li evangelio naru narosob’tesiheb’ li komon nakatzoleb’. Ye reheb’ chan ru naq li Santil Musiq’ej nakatxtenq’a chixtawb’al ru li loq’laj hu ut ye reheb’ naq naru ajwi’ neke’tenq’aak xb’aan a’an.

Tz’iib’a li nakak’oxla

Xkanab’ankileb’ chi wotzok

Re xk’eeb’al xhoonaleb’ li komon re te’xwotz li xe’xtaw naq xe’ril ru li loq’laj hu, naru nakatz’iib’a chiru li pizarron Nahum, Habakuk ut Sofonias jo’ xjolomil li na’leb’. Chirix a’an, li komon naru neke’xtz’iib’a rub’el li junjunq jolomil na’leb’ jun aatin malaj ch’ol aatin li xwulak chiruheb’ ut li ch’ol ut raqal b’ar natawman. K’e xhoonaleb’ re te’xch’olob’ k’a’ut naq li aatin malaj li ch’ol aatin a’an xwulak chiruheb’ ut k’a’ru xk’ut li Santil Musiq’ej chiruheb’.

Xkʼutbʼal li tzolʼlebʼ

Nahum 1

K’a’jo’ xnimal lix wankilal ut li ruxtaan li Qaawa’.

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut junkab’al napatz’man xtzolb’al Nahum 1 re xsik’b’al lix seeb’al li Qaawa’. Patz’ reheb’ li komon k’a’ru xe’xtzol chirix li Qaawa’ naq xe’tzolok xjuneseb’. K’a’ru naqatzol chirix li Qaawa’ sa’eb’ li raqal 1–9? Naru nakak’ut naq laj Nahum kik’utuk chirix lix raqb’a-aatin li Qaawa’ chirix li tenamit Ninive, li jolomil tenamit re Asiria, ut naq Asiria ak kixnat’eb’ laj Israelita chiru k’iila chihab’. K’a’ut naq jwal aajel ru choq’ reheb’ laj Israelita rab’inkil li esil kixk’am laj Nahum chirix li Dios? Kʼaʼut naq aajel ru choqʼ qe anajwan?

  

  “Li Qaawa’ a’an q’axal chaab’il, a’an li kawilal sa’ xhoonalil li rahil ch’oolej” (Nahum 1:7).

Habakuk 1:1–4; 2:1–4; 3

Naru naqapaab’ li rajom ut xb’aanuhom li Qaawa’.

• Jwal chaab’il raj wi’chik wi eb’ li komon te’xnaw naq, jo’ naab’al qe laa’o, laj Habakuk kiwan xk’a’uxl chirix li yoo chi k’ulmank sa’ xsutam. Eb’ li komon naru neke’ril Habakuk 1:1–4 ut te’xtz’iib’a chi k’osb’il ru k’a’ru lix k’a’uxl laj Habakuk. Naru neke’xjuntaq’eeta lix patz’om laj Habakuk rik’ineb’ jalan chik li neke’tawman sa’ li loq’ laj hu, jo’eb’ li wankeb’ sa’ Markos 4:37–38 ut Tzol’leb’ ut Sumwank 121:1–6. K’a’ru xjuntaq’eetil li patz’om rik’ineb’ li neke’xb’aanu li kristiaan anajwan? K’a’ru li na’leb’ kixk’e li Qaawa’ sa’ Habakuk 2:1–4 li nakatxtenq’a chixkanab’ankil aawib’ rub’el xwankil li rajom ut lix b’aanuhom? (chi’ilmanq ajwi’ Markos 4:39–40; Tzol’leb’ ut Sumwank 121:7–8). Sa’ “Xkomon chik li k’anjeleb’aal” natawman naab’al chik li na’leb’ li naru natenq’ank reheb’ li komon. Naru ajwi’ neke’xwotz chan ru naq neke’tenq’aak xb’aan li Kolonel chi wank “rik’ineb’ xpaab’aal” naq wankeb’ lix patz’om ink’a’ sumenb’il.

• Re xtikib’ankil xtz’ilb’al rix Habakuk 3, patz’ reheb’ li komon naq te’ril li ch’ol ut te’xwotz li aatin re loq’onink ut paab’aal te’xtaw. Re xtenq’ankileb’ chixyu’aminkil, naru nakab’oqeb’ chixtz’iib’ankil chixjunil li osob’tesink ke’xk’ul rik’in li Dios. B’oqeb’ chixk’oxlankil li taak’ulmanq wi te’xtz’eq junaq reheb’ li rosob’tesinkil. Ilomaq Habakuk 3:17–19, ut tz’ilomaq rix k’a’ut naq taach’a’ajko’q raj “taasaho’q qach’ool rik’in li Qaawa’ ” (raqal 18) sa’ xhoonalil li yale’k jo’ li na’ilman sa’ li raqal 17. Chan ru taaruuq chi wulak li qapaab’aal jo’ lix paab’aal laj Habakuk?

Sofonias 3:14–20

Li Qaawa’ taasaho’q xch’ool rik’in lix tenamit aran Sion.

• Re xtenq’ankileb’ li komon chi wank li royb’enihomeb’ sa’ Sofonias 3:14–20, naru nakatz’iib’a chiru li pizarron “Saho’qat chi x’anchalil laa waam” xb’aan naq… Chirix a’an, li komon naru neke’xtz’il rix li raqal a’an re xsik’b’al li osob’tesink li nayeechi’iman re li chalel kutan ut li taatenq’anq qe chi saho’k qach’ool anajwan. Chan ru nokohe’xtenq’a li yeechi’ihom a’an sa’eb’ li ch’a’ajkil hoonal?

Xkomon chik li k’anjeleb’aal

Li paab’aal a’an xkanab’ankil qach’ool sa’ lix chaab’il na’leb’, li ruxtaan, ut li rajom li Dios.

Li Elder Jeffrey R. Holland kixye:

“Toj jo’q’e taaraqe’q li qach’a’ajkilal? Jo’q’e taaraqe’q li qach’a’ajkilal jo’ naqoyb’eni, us ta chanchan naq maajo’q’e taaraqe’q? K’a’ut naq nab’ay a’an us ta chanchan naq ink’a’ naru naqakuy li qiiq? …

“…A’ut us ta yalb’il qaq’e sa’ musiq’ej ut chi tijok chi anchal qach’ool, wan naq ink’a’ toonumtaaq sa’ xb’een li ch’a’ajkilal naqaj xtuqub’ankil. Chi jo’kan, naq toj yooko chixyalb’al qaq’e ut chiroyb’eninkil xsumenkil li qatij, jo’ apostol ninye eere naq ab’inb’ilaqeb’ ut sumenb’ilaqeb’ li qatij, a’ut maare ink’a’ jo’q’e malaj jo’ chanru naqaj. A’b’anan, junelik sumenb’ilaqeb’ sa’ xhoonalil ut jo’ chanru naraj li nimajwal yuwa’b’ej aj uxtaan li taasumenq reheb’. …

“…Li paab’aal, a’an xtaaqenkil li Dios sa’ sahil kutan jo’ ajwi’ sa’ rahil kutan, us ta rahob’tesinb’ilaqo toj reetal naq taak’utb’esimanq lix tel choq’ qe” (“Royb’eninkil li Qaawa’,” Jolomil ch’utub’aj-ib’ re octubre 2020).

Xkawresinkil qib’ jo’ aj k’utunel

Chatpatz’oq. Naq tatpatz’oq reheb’ li komon chirix li neke’xk’ul rik’ineb’ li loq’laj hu, “k’eheb’ chixnawb’al naq ink’a’ yookat chixsik’b’al jun ajwi’ li sumehom, a’b’anan naq taawaj chi yaal xnawb’al li k’a’ru yookeb’ chixtzolb’al” (Li k’utuk jo’ li Kolonel, 29). Re rilb’al junjunqeb’ li chaab’il patz’om, chi’ilmanq Li k’utuk jo’ li Kolonel, 31–32.