li santil ochoch re Laie Hawai

Li santil ochoch re Laie Hawai

5–11 diciembre

Hageo; Sakarias 1–3; 7–14

“Santilal re li Qaawa’ ”

Naq nakatzol lix hu laj Hageo ut laj Sakarias, k’oxla chan ru taatenq’aheb’ li komon chixtawb’al xyaalal li profeetil aatin a’in.

Tz’iib’a li nakak’oxla

reetalil li wotzok

Xkanab’ankileb’ chi wotzok

Eb’ li komon naru neke’xwotz raqal re Hageo ut Sakarias li xe’xtz’il rix malaj li xe’aatinak wi’ rik’in jalan chik kristiaan chiru li xamaan a’in, ut neke’xye chan ru naq xe’tenq’aak xb’aaneb’ li raqal a’an chi nach’ok rik’in li Kolonel.

reetalil li k’utuk

Xk’utb’al li tzolʼlebʼ

Hageo 1; 2:1–9

“Teek’oxla chi us k’a’ru yookex chixb’aanunkil.”

• Li na’leb’ sa’ Hageo 1 naru naxtenq’aheb’ li komon re te’xk’oxla k’a’ru li jwal aajel ru choq’ reheb’. Naru taapatz’ reheb’ naq te’ril Hageo 1:1–7 ut te’xk’e reetal chan ru naq eb’ laj Jerusalen ink’a’ yookeb’ chixb’aanunkil li kiraj li Qaawa’ naq te’xb’aanu. B’ar wan junjunq reheb’ li k’a’aq re ru naxpatz’ qe li Qaawa’ naq taqab’aanu sa’ li qayu’am? K’a’ru naru najalb’ehink qe rik’in li qaChoxahil Yuwa’ ut li Kolonel ut li rajomeb’ a’an? Eb’ li komon naru neke’xwotz k’a’ru natenq’ank reheb’ “chixk’oxlankil chi us k’a’ru yookeb’ chixb’aanunkil” ut li k’a’ru jwal aajel ru choq’ reheb’.

• Re xtenq’ankileb’ chixk’oxlankil chan ru te’xk’e xch’ool chixb’aanunkil lix k’anjel li Qaawa’, naru taapatz’ reheb’ naq te’ril Hageo 2:1–9. K’a’ru li na’leb’ kixk’e li Qaawa’ li tooxtenq’a chixb’aanunkil lix k’anjel? Li komon naru neke’xwotz k’a’ru neke’xb’aanu re xk’eeb’al sa’ xb’een na’aj lix k’anjel li Qaawa’, us ta wan naab’al chik li k’a’aq re ru tento te’xb’aanu. K’a’ru naqatzol sa’ Hageo 2:1–9 chirix chan ru nokorosob’tesi li Qaawa’ naq naqak’e a’an sa’ xb’eenil sa’ li qayu’am? (chi’ilmanq ajwi’ “Xkomon chik li k’anjeleb’aal”). K’e xhoonaleb’ li komon chixk’oxlankil li k’a’ru musiq’anb’ileb’ chixb’aanunkil xb’aan li aatinak a’in.

Sakarias 1–3; 7–8; 14

Li Qaawa’ naru nokoxsantob’resi.

• Re aatinak chirix li santilal, naru nekeril Sakarias 14:20–21. Eb’ li komon naru neke’xye k’a’ru naraj naxye “Santilal re li Qaawa’ ” choq’ reheb’. K’a’ raj ru tixjal sa’ xyu’ameb’ li kristiaan li aatin “Santilal re li Qaawa’ ” wi ta tz’iib’anb’il chiru li k’a’aq re ru na’oksiman rajlal kutan? K’a’ru naxjal sa’ li qayu’am anajwan naq naqil sa’eb’ li santil ochoch? Li komon naru neke’ril Sakarias 1:1–6; 3:1–7; 7:8–10; 8:16–17 ut chirix a’an te’xye k’a’ru neke’xtzol chirix li santilal. K’a’ut naq jwal aajel ru choq’ re li Qaawa’ li qasantilal sa’ junesal? Chan ru naq a’an nokoxtenq’a chi wank chi santob’resinb’il?

• Eb’ li komon naru neke’ril Sakarias 2:10–11; 8:1–8; 14:9–11, 20–21 ut te’xye chan raj ru li wank rik’in li Kolonel chi santob’resinb’il. Chan ru nokoxkawresi li Qaawa’ re wulak chi wank jo’ kixye laj Sakarias? Chan ru tooruuq chiroksinkil lix wankil re wulak chi jwal santob’resinb’il?

li Jesus na’ok sa’ Jerusalen

“Xb’aan naq we’ chaq laa rey, tiik xch’ool ut aj q’axol u, tuulan ut wan chaq chirix jun ch’ina b’uur” (Sakarias 9:9). Li rokik li Kristo sa’ Jerusalen, xb’aan laj Harry Anderson

Sakarias 9:9–11; 11:12–13; 12:10; 13:6–7

Li Jesukristo a’an li Mesias li yeeb’il chaq resil najter.

• Re te’xk’e reetal lix juntaq’eetil li raatin laj Sakarias ut lix yu’am li Kolonel, jo’ ke’xb’aanu li kristiaan sa’ xkutankil li Jesus, k’eheb’ li komon sa’ wiib’ ch’uut. K’e junjunq li raqal a’in reheb’ xb’een li ch’uut: Sakarias 9:9–11; 11:12–13; 12:10; 13:6–7. K’e junjunq li raqal a’in reheb’ xkab’ li ch’uut: Mateo 21:1–11; 26:14–16; 26:31; Jwan 19:37. Chirix a’an, chi junjunqal naru neke’xsik’ sa’ li jalan chik ch’uut ani aj-ik’in wan lix sum li xe’ril. K’a’ru naqatzol chirix li Kolonel sa’eb’ li raqal a’an?

• Re xtenq’ankileb’ chixtz’ilb’al rix Sakarias 9:9–11, k’ut chiruheb’ lix jalam-uuch li rokeb’aal li Kolonel sa’ Jerusalen (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Malaj, k’ut li video “La entrada triunfal del Señor en Jerusalén” (ChurchofJesusChrist.org). Eb’ li komon naru neke’aatinak chirix chan raj ru xe’reek’a rib’ wi ta wankeb’ sa’ xyanqeb’ li xe’k’uluk re li Jesus sa’ li tenamit. Chan ru naqak’ul a’an sa’ li qayu’am, sa’ li qajunkab’al, ut sa’ li qasutam?

reetalil xkomon chik li k’anjeleb’aal

Xkomon chik li k’anjeleb’aal

“Teek’oxla chi us k’a’ru yookex chixb’aanunkil.”

Chirix rilb’al Hageo 1:4–7, li Elder Terence M. Vinson kixye:

“Naru naqeek’a li sahil ch’oolejil li nakana junelik naq li qaKolonel ut lix evangelio neke’wan jo’ li roqechal xsutam li qayu’am. A’b’anan, moko ch’a’aj ta naq li oqechal a’an naru nawulak, jo’eb’ li k’a’ru re li ruchich’och’, b’ar wi’ li evangelio nakanaak yal jo’ jun na’leb’, malaj jo’ ka’ajwi’ li xik sa’ li iglees chiru wiib’ hoor sa’ li domingo. Wi jo’kan a’an, chanchan ajwi’ naq yooko chixk’eeb’al li qatojb’al sa’ jun “q’ichil koxtal.”

“Laj Hageo naxye qe naq k’eek’ooq raj qach’ool. …

“Moko wan ta li b’ihomal, lix numsinkil qahoonal, li xnimal qu chiruheb’ li komon, li b’atz’unk sa’ li internet, li jalan jalanq b’atz’unk, malaj xnawb’al ru anihaq jwal nawb’il ru, ut maak’a’ sa’ xb’een li ruchich’och’ jwal nim chik xloq’al chiru li junelik yu’am. Jo’kan naq li na’leb’ naxk’e li Qaawa’ re li junjunq chi kristiaan a’an a’in: “tz’ilomaq rix chi us b’ar yookex chi xik” ” (“Tz’aqal xtzolomeb’ li Kolonel,” Jolomil ch’utub’aj-ib’ re octubre 2019).

Xkawresinkil qib’ jo’ aj k’utunel

Abʼin. Li ab’ink naxk’utb’esi li rahok. Jun reetalil li tz’aqal ab’ink a’an rilb’al li kristiaan yoo chi aatinak. A’an nokoxtenq’a chirilb’al li ink’a’ nayeeman. (Chi’ilmanq Li k’utuk jo’ li Kolonel, 34.)