li k’uula’al Jesus b’atb’o sa’ saqi t’ikr ut yokyo sa’ li ichaj

Xb’aan naq yo’lajenaq choq’ qe jun li k’uula’al, xb’aan laj Simon Dewey

19–25 diciembre

Li Ralankil

A’an a’in li xoo’oyb’enink wi’, ut a’an tooxkol

Naq yooqat chi tzolok ut chixkawresinkil aawib’ re k’utuk, k’oxla chan ru taatenq’aheb’ li komon chireek’ankil lix sahilal xyo’lajik li Kolonel. Sik’ li Musiq’ej re tixch’olob’ xyaalal lix rahom li Jesukristo li nakolok.

Tz’iib’a li nakak’oxla

reetalil li wotzok

Xkanab’ankileb’ chi wotzok

Lix kutankil li Ralankil a’an jun chaab’il hoonal re taab’oqeb’ li komon chixwotzb’al chan ru naq xtzolb’al li Najter Chaq’rab’ naxtenq’aheb’ chixkawob’resinkil lix paab’aal chirix li Jesukristo.

reetalil li k’utuk

Xk’utb’al li tzolʼlebʼ

Nasaho’ qach’ool rik’in laj Tojol-ix.

• Us ta nano naq li Ralankil a’an jun hoonal re sahil ch’oolej, wankeb’ naab’al li kristiaan, xb’aan lix wanjikeb’, neke’ch’a’ajko’ chiru xtawb’al xsahil xch’ool, jo’kan ajwi’ chiruheb’ li kutan a’in. Jun esil jwal aajel ru sa’ li Ralankil, a’an naq li Kolonel naru naxseeb’ob’resi li qiiq ut tooxtenq’a chixtawb’al tuqtuukilal ut sahil ch’oolejil. Re xwotzb’al li esil a’an naru nakatz’iib’a chiru li pizarron eb’ li raqal a’in: Salmos 35:9; Isaias 25:8–9; 44:21–24; 51:11; Sofonias 3:14–20; Moises 5:5–11. Chirix a’an naru nakatz’iib’a chiru li pizarron jun li patz’om re naq eb’ li komon te’xtz’il rix naq yooqeb’ chirilb’al ru li raqal, maare K’a’ru naqataw sa’eb’ li raqal a’in re naq taasaho’q qach’ool? Patz’ reheb’ naq te’xye k’a’ru neke’xtaw aran. Maare naru nakak’e xhoonaleb’ re te’xtz’iib’a chan ru neke’saho’ xch’ool rik’in li Kolonel. Naru nakataw xkomon li na’leb’ sa’ li raatin li Awa’b’ej Russell M. Nelson li natawman sa’ “Xkomon chik li k’anjeleb’aal.”

• Li Ralankil naxyeechi’i qahoonal re xwotzb’al lix sahil xch’ool li Kristo naq naqatenq’aheb’ li qas qiitz’in. Rub’elaj li tzolok naru nakapatz’ re junaq komon naq taaril li raatin li Elder Ulisses Soares, “Jun teep chi anjel sa’ li kutankil a’in” (Xch’utam li Xb’eenil Awa’b’ejil re li Ralankil, 8 diciembre, 2019, broadcasts.ChurchofJesusChrist.org), ut naq tixkawresi chaq rib’ re xch’olob’ankil chan ru naq jun tenq’ank kitenq’ank re li Elder Soares ut lix junkab’al chireek’ankil lix sahil li Ralankil. Jo’kan ajwi’, naru nakawotz xcha’al li esil sa’ laa tzoleb’aal. Eb’ li komon naru neke’xwotz lix k’ulumeb’ naq xe’xb’aanu malaj xe’xk’ul li tenq’aak sa’ xkutankil li Ralankil. Chan ru tento toowanq jo’ “reetalil li rahok ut usilal choq’ reheb’ li winq” jo’ naxye li Elder Soares?

Eb’ li eetalil nokoxtenq’a chixjultikankil li Jesukristo.

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut junkab’al natawman naab’al eetalil sa’ li Najter Chaq’rab’ li neke’k’utuk chirix li Jesukristo. Eb’ li komon naru neke’xwotz li xe’xtzol chirix li Kolonel rik’ineb’ li eetalil xe’xtaw naq xe’tzolok. K’a’ru xqatzol chirix xtawb’al li Kolonel sa’eb’ li loq’laj hu? K’a’ru numsihom neke’xk’ut chiqu naq “chixjunil li k’a’aq re ru yo’ob’tesinb’il ut yiib’anb’il re xch’olob’ankil xyaalal a’an”? (Moises 6:63).

Li Dios kixk’e li Ralal choq’ maatan.

• Sa’ naab’al li na’ajej, li k’ehok maatan a’an xcha’al li Ralankil. Naru nekex’aatinak chirixeb’ li maatan qak’ulum rik’in li Dios, jo’ lix maataninkil li Ralal, a’ li Jesukristo. Re xb’aanunkil a’an, naru nakak’ut li video “Él es la dádiva” (ChurchofJesusChrist.org) ut taapatz’ reheb’ li komon naq te’xwotz k’a’ru naraj naxye xmaataninkil li Kolonel. Chan ru naqak’ut li qab’antioxihom chiru li qaChoxahil Yuwa’ xb’aan li maatan a’an?

Isaias 7:14; 9:6

“Ut tixk’ab’a’in: Xnimal ru aj k’ehol na’leb’.”

• Li profeet aj Isaias ki’aatinak rik’in k’iila paay chi k’ab’a’ej chirix li Mesias, li taayo’laaq aran Belen (chi’ilmanq Isaias 7:14; 9:6). Naru naq eb’ li komon te’xyal xsahil xnawb’al mas chirix li Kolonel ut lix k’anjel naq te’xsik’ xna’leb’ chirixeb’ li k’ab’a’ej a’an. Naru neke’xsik’ ru junaq li k’ab’a’ej ut te’xsik’ jalan chik li raqal li taatenq’anq reheb’ chixtawb’al ru li naraj naxye. Naru neke’xtaw xkomon xna’leb’eb’ chirix li k’ab’a’ej “Xnimal ru aj k’ehol tuqtuukil usilal” (Isaias 9:6) sa’ rilb’al Salmos 85:8; Isaias 52:7; Lukas 2:14; malaj Jwan 16:33. Re te’xtaw jalaneb’ chik raqal, naru neke’xsik’ sa’ li K’utul Raqal reheb’ li Loq’laj Hu. K’a’ru neke’xk’ut chiqu li k’ab’a’ej chirix li Kolonel ut li naxb’aanu a’an choq’ qe?

reetalil xkomon chik li k’anjeleb’aal

Xkomon chik li k’anjeleb’aal

Li Jesukristo naxyeechi’i tuqtuukilal ut sahil ch’oolejil.

Li Awa’b’ej Russel M. Nelson kixye:

“Naq naqajayali li qayu’am rik’in lix k’uub’anb’il na’leb’ re li kolb’a-ib’ re li Dios … jo’ ajwi’ li Jesukristo ut lix evangelio, naru naqeek’a xsahil qach’ool a’ yaal k’a’ru li nak’ulman—malaj li ink’a’ nak’ulman—sa’ li qayu’am. Li sahil ch’oolejil nachal rik’in ut b’antiox re a’an. A’an lix yo’leb’aal chixjunil li sahil ch’oolejil. Naqeek’a sa’ li Ralankil naq naqab’icha, “Sahaq eech’ool, li Qaawa’ xchal” [Eb’ li B’ich, 201]. Naru naqeek’a chiru chixjunil li chihab’. Choq’ reheb’ laj Santil Paab’anel sa’ Roso’jikeb’ li Kutan, li Jesukristo a’an li sahil ch’oolejil! …

“Jo’ chanru naq li Kolonel naxyeechi’i qe li tuqtuukilal li “naxq’ax ru chixjunil li na’leb’ ” [Filipenses 4:7], jo’kan ajwi’ naxyeechi’i qe jun xkawil ru, jun xchamal ru ut jun xk’ihal ru li sahil ch’oolejil li naxq’ax ru lix k’a’uxleb’aal ut lix tawom ru li winqilal. (“Li sahil ch’oolejil ut kole’k sa’ musiq’ejil,” Jolomil ch’utub’aj-ib’ re octubre 2016).

Xkawresinkil qib’ jo’ aj k’utunel

Kawresi aawib’ rik’in xk’oxlankilebʼ li kristiaan. “Naq yookat chixkawresinkil aawib’, k’uub’ aana’leb’ a’ yaal jo’ li nakataw ru chirixeb’ li ani tzolb’ileb’ aab’aan. … Eb’ laj k’utunel li neke’k’utuk jo’ li Kristo moko ka’aj ta wi’ neke’xk’oxla chan ru te’k’utuq; k’eek’ookeb’ b’an xch’ool chixtenq’ankileb’ li komon chixkab’lankil lix paab’aal chirix li Jesukristo” (Li kʼutuk joʼ li Kolonel, 7).