Xb’aan naq yo’lajenaq choq’ qe jun li k’uula’al, xb’aan laj Simon Dewey

19–25 diciembre

Li Ralankil

A’an a’in li xoo’oyb’enink wi’, ut a’an tooxkol

Sa’ li Ralankil a’in, k’oxla chan ru naq li Najter Chaq’rab’ xkawob’resi laa paab’aal chirix li Jesukristo chiru li chihab’ a’in.

Tz’iib’a li nakak’oxla

Wan sa’ li Najter Chaq’rab’ jun musiq’ej re yo’onink. A’an chanchan li Ralankil. Chalen chaq laj Adan ut li xEva, eb’ li najter yuwa’b’ej, profeet, aj tz’iib’anel, ut komon sa’ li Najter Chaq’rab’ ke’ilok chi uub’ej chixyo’oninkileb’ li kutan q’axal chaab’ileb’ ut lix kolb’aleb’ xb’aan li Mesias. Ut eb’ laj Israelita k’a’jo’ naq ke’raj ru li yo’onink a’an—naq ke’wan chi preexil aran Egipto ut Babilonia, malaj chi preexil xb’aan xmaakeb’ ut xpo’jikeb’ xch’ool. Ut sa’ chixjunil, eb’ li profeet ke’xjultika reheb’ naq li Mesias, jun aj Kolol reheb’, taachalq re “xpuktesinkil resil li kolb’a-ib’ reheb’ li wankeb’ sa’ tz’alam” (Isaias 61:1).

Kixtz’aqob’resi rib’ lix yo’onihomeb’ naq kiyo’la li Jesukristo sa’ Belen. Li nimla aj Kolol re Israel kiyo’la sa’ xna’ajeb’ li xul ut kiyokob’aak sa’ xwaleb’aal li xul (chi’ilmanq Lukas 2:7). A’ut, moko k’a’aj ta wi’ tixkoleb’ laj Israelita re najter kutan. Kichal chakolb’al—kiriiqani lix rahil aach’ool, kixk’am xrahil laa waam, kitene’ sa’ xkab’a’ laa maa’usilal, re naq rik’in li rapleek kixk’ul a’an, tatk’irtesiiq (chi’ilmanq Isaias 53:4–5). Xb’aan a’in naq nujenaq li Ralankil rik’in sahil yo’onink sa’ ajwi’ li kutan a’in. Li Mesis kichal numenaq 2000 chihab’ chaq, a’ut toj nachal sa’ li qayu’am naq naqasik’ ru.

Li na’leb’ re xtzolb’aleb’ li loq’laj hu aajunes

Nasaho’ inch’ool chirix laj Tojol wix.

Li Ralankil a’an xq’ehil li sahil ch’oolejil b’antiox re li sahil ch’oolejil kixk’e li Jesukristo re li ruchich’och’. Eb’ li ink’a’ neke’xpaab’ li Jesus jo’ li Ralal li Dios toj neke’reek’a ajwi’ li sahil ch’oolejil sa’ Ralankil. K’oxla li sahil ch’oolejil nakaweek’a sa’ xk’ab’a’ naq li qaChoxahil Yuwa’ kixtaqla li Ralal.

K’iila cient chihab’ ma nayo’la li Kolonel, eb’ li profeet sa’ li Najter Chaq’rab’ ke’saho’ ajwi’ xch’ool naq ke’aatinak chirix li Mesias li taachalq. Il wiib’ oxib’ reheb’ li raqal a’in, ut k’oxla k’a’ut naq aajel raj ruheb’ reheb’ li ke’ilok chi uub’ej toj sa’ xk’anjel li Kolonel: Salmos 35:9; Isaias 25:8–9; 44:21–24; 51:11; Sofonias 3:14–20; Moises 5:5–11. K’a’ut naq ninqeb’ xwankil li raqal a’in choq’ aawe?

Chi’ilmanq ajwi’ Russell M. Nelson, “Li sahil ch’oolejil ut kole’k sa’ musiq’ejil,” Jolomil ch’utub’aj-ib’ re octubre 2016.

Eb’ li eetalil nikine’xtenq’a chixk’oxlankil li Jesukristo.

Naab’al li nab’aanuman sa’ li Ralankil naru taawanq jo’ reetalil li Kristo. Eb’ li ch’ina chahim re utz’u’ujink neke’reetali li chahim li kilemtz’un sa’ li q’ojyin kiyo’la wi’ li Jesus (chi’ilmanq Mateo 2:2). Eb’ laj b’ichanel neke’xk’e chi jultiko’k qe li anjel li ke’xk’ut rib’ chiruheb’ laj ilol karneer (chi’ilmanq Lukas 2:13–14). Naq xawil li Najter Chaq’rab’ chiru li chihab’ a’in, maare xak’e reetal k’iila reetalil li Kolonel. Tz’iib’anb’il wiib’ oxib’ reheb’ arin. Maare taawileb’ a’in ut taatz’iib’a li neke’xk’ut chawu chirix li Kolonel.

• Karneer (Genesis 22:8; Exodo 12:5; 1 Pedro 1:18–20).

• Mana (Exodo 16:4, 12–21, 31; Deuteronomio 8:3; Jwan 6:30–40).

• Ha’ (Exodo 17:1–6; Jeremias 2:13; Esekiel 47:1–12; Jwan 4:7–14).

• K’anti’ re q’an ch’iich’ (Numeros 21:4–9; Jwan 3:14–15).

• Pek (1 Samuel 2:2; 2 Samuel 22:2–3; Salmos 118:22–23; Isaias 28:16; Efesios 2:20).

• Ruq’ li che’ (Isaias 11:1–2; Jeremias 23:5; 33:15).

• Saqen (Salmos 27:1; Isaias 9:2; 60:19; Mikeas 7:8; Jwan 8:12).

K’a’ chik li eetalil, raqal, ut seraq’ xataw sa’ li loq’laj hu li neke’xch’olob’ xyaalal li Jesukristo?

Chi’ilmanq ajwi’ 2 Nefi 11:4; Mosiah 3:14–15; Moises 6:63; “Eb’ li eetalil malaj li jaljookil ru aatin chirix li Kristo,” sa’ li K’utul Raqal reheb’ li Loq’laj Hu, “Jesukristo,” scriptures.ChurchofJesusChrist.org.

“Ut tixk’ab’a’in: Xnimal ru aj k’ehol na’leb’.”

K’iheb’ lix k’ab’a’ li Jesukristo. K’a’ruheb’ li k’ab’a’ej nakataw sa’eb’ li raqal a’in? Salmos 23:1; 83:18; Isaias 7:14; 9:6; 12:2; 63:16; Amos 4:13; Sakarias 14:16; Moises 7:53. Ma wan xkomoneb’ chik li k’ab’a’ej nakanaw? Maare taawulaq chawu xtz’iib’ankil xk’ab’a’eb’ li Jesukristo li nakataw sa’eb’ li b’ich chirix li Ralankil. Chan ru naq li junjunq xk’ab’a’ naxk’e laa na’leb’ chirix a’an?

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Li nab’aanuman sa’ li Ralankil naru taareetali li Jesukristo.Ke’wan li k’anjel ke’xb’aanu laj Israelita, jo’ li Paswa ut xkomon chik li ninq’e, li ke’xjayali xch’ooleb’ ut xk’a’uxleb’ rik’in li Qaawa’ (chi’ilmanq Exodo 12). K’a’ru nekeb’aanu sa’ li Ralankil li nekexxtenq’a chixk’oxlankil li Jesukristo? K’a’ru ke’xb’aanu lee xe’toonil? Naru tex’aatinaq jo’ junkab’al chirix li teeraj xb’aanunkil sa’eb’ li Ralankil chalel. Maare texk’anjelaq chiru li ani wan sa’ rajb’al ru (re xtawb’al eena’leb’, chi’ilmanq ComeuntoChrist.org/light-the-world), teeb’oq lee ramiiw chirilb’al lix ch’utam li Xb’eenil Awa’b’ejil re li Ralankil (broadcasts.ChurchofJesusChrist.org), teetz’iib’a jun ak’ b’ich chirix li Ralankil, malaj teek’uub’ chan ru xwotzb’al chi chaab’il li resil lix yo’lajik li Kristo.

“El Niño Jesús: La historia de la Natividad”Chan ru taatenq’a laa junkab’al chireek’ankil li oxloq’ ut li sahil ch’oolejil chirix lix yo’lajik li Kristo? Naru teeril li video “El Niño Jesús: La historia de la Natividad” (ChurchofJesusChrist.org) malaj teeril Mateo 1:18–25; 2:1–12; Lukas 1:26–38; 2:1–20. Li junjunq eere naru tixsik’ ru jun kristiaan sa’ li video malaj li seraq’, ut teeye k’a’ru kireek’a chirix li Kolonel. Naru ajwi’ teeye k’a’ru nekereek’a laa’ex chirix.

Xtawb’al li Kolonel sa’ li Najter Chaq’rab’.Naq nakakawresi aawib’ chi tzolok chirix lix yu’am li Jesukristo sa’ li Ak’ Chaq’rab’ sa’ li chihab’ chal re, k’oxla aatinak rik’in laa junkab’al chirix li xetzol chirix li Kolonel sa’ li Najter Chaq’rab’ chiru li chihab’ a’in. Naru taawileb’ li tusleb’ aatin sa’ li hu a’in ut li xatz’iib’a re taajultiko’q aawe li xatzol. Eb’ li kok’al maare taawulaq chiruheb’ rilb’al li hu Relatos del Antiguo Testamento malaj eb’ li jalam-uuch sa’ li hu a’in. Ma wan li profeetil aatin malaj seraq’ li xtoch’ qach’ool? K’a’ru xqatzol chirix li Kolonel?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “At chʼina tenamit Belen,” Eb’ li B’ich, 130.

Xkawresinkil qib’ jo’ aj k’utunel

Ab’i li naxye laa junkab’al. “Li abʼink naxk’utb’esi li rahok. Aajel ru naq jwal naqak’oxla li k’a’ru wan sa’ xch’ool jalan chiru li k’a’ru naqaj xk’utb’al malaj li k’a’ru wan sa’ li qatzol’leb’. … Naq taak’e aach’ool chirab’inkil laa junkab’al, li te’xye ut li ink’a’ te’xye, q’axal wi’chik tat-ok chixtawb’al ru li rajomeb’ ru, lix patz’omeb’, ut li rajomeb’ xch’ool. Li Musiq’ej tatxtenq’a chixtzolb’aleb’ ” (Li k’utuk jo’ li Kolonel, 34).

Li Ralankil, xb’aan laj N.C. Wyeth