“Lix b’e wan chi junelik” (Habakuk 3:6). Sa’ xtiklajik ak wan chaq li Aatin, xb’aan li xEva Timothy

28 noviembre–4 diciembre

Nahum; Habakuk; Sofonias

“Lix b’e wan chi junelik”

Us ta nakatzoleb’ li loq’laj hu chiru chixjunil laa yu’am, toj naru taataw li ak’ na’leb’. Maak’oxla naq tento taataw ru chixjunil anajwan. Tz’aama sa’ tij naq taak’ehe’q aawe li na’leb’ aajel ru sa’ laa yu’am anajwan.

Tz’iib’a li nakak’oxla

Naq naqil ru li Najter Chaq’rab’, naqil ru k’iila profeetil aatin chirix li nimla sachok. Li Qaawa’ kixb’oqeb’ chi kok’ aj xsa’ li profeet re te’xtijeb’ laj maak chirix lix raqb’a-aatin li taat’ane’q sa’ xb’eeneb’. A’in li kik’ulman rik’in laj Nahum, laj Habakuk, ut laj Sofonias. Rik’in kawil aatin, eb’ li profeet a’in ke’aatinak chirix xsachlijikeb’ li tenamit li, sa’ lix kutankileb’ a’an, toj kaweb’ rib’ ut ninqeb’ xmetz’ew—Nineva, Babilonia, ut Jerusalen. A’b’an, k’iila mil chihab’ chaq naq kik’ulman a’an. K’a’ut naq toj wan xwankil li profeetil aatin a’an sa’ li kutan a’in?

Us ta ke’sachman li maa’usil tenamit aj q’etq’et, toj wan li q’etq’etil ut li maa’usilal. Sa’ li kutankil a’in, wan naq naqeek’a naq sutb’il qix xb’aan li maa’usilal li ke’aatinak wi’ li najter profeet. Maare naqak’e ajwi’ reetal b’ayaq li maa’usilal sa’ li qach’ool. Li profeetil aatin sa’ li Najter Chaq’rab’ naxk’utb’esi chan ru nareek’a li Qaawa’ chirix li q’etq’etil ut li maa’usilal, ut naxk’ut naq naru taqatz’eqtaana li maa’usilal a’in. Xb’aan a’in naq toj wan li najter profeetil aatin qik’in anajwan. Laj Nahum, laj Habakuk, laj Sofonias, ut xkomoneb’ chik ink’a’ ke’aatinak jo’ profeet ka’ajwji’ chirix li rahilal—ke’aatinak aj b’an wi’ chirix li kole’k. Us ta ke’xch’olob’ li sachk li taachalq, ke’xb’oqeb’ ajwi’ li tenamit chi chalk rik’in li Kristo ut chixk’ulb’al li ruxtaan: “Sik’omaq li Qaawa’ …; k’anjelahomaq li tiikilal ut li q’unil ch’oolej” (Sofonias 2:3). A’an chaq xna’leb’ li Qaawa’ junxil, ut a’an ajwi’ xna’leb’ sa’ li qakutankil. “Lix b’e li Qaawa’ wank chi junelik” (Habakuk 3:6).

Re xtzolb’al k’a’ru wan sa’eb’ li hu a’in, chi’ilmanq “Nahum,” “Habakuk,” ut “Sofonias” sa’ li K’utul Raqal reheb’ li Loq’laj Hu.

Li na’leb’ re xtzolb’aleb’ li loq’laj hu aajunes

Nahum 1

K’a’jo’ xnimal lix wankilal ut li ruxtaan li Qaawa’.

Kib’oq’e laj Nahum re xyeeb’al resil lix sachlijik li tenamit Nineva—li jolomil tenamit re li awa’b’ejihom re Asiria, li kixjek’i Israel ut kixsachle Juda. Laj Nahum kixtikib’ a’an rik’in xch’olob’ankil lix josq’il li Dios ut lix wankilal maak’a’ xjuntaq’eetil, a’b’an kixch’olob’ ajwi’ li ruxtaan ut lix chaab’ilal li Dios. Naru taak’e reetaleb’ li raqal sa’ li ch’ol 1 li nakate’xtenq’a chixtawb’al ru li na’leb’ a’in—ut xkomoneb’ chik li na’leb’ li nakataw chirix li Dios. K’a’ut naq nim xwankil xnawb’al li k’a’aq re ru a’in chirix li Qaawa’?

Maare ch’a’aj xtawb’al ru, jo’ naxye sa’ li loq’laj hu, chan ta wi’ ru naq “li Qaawa’ a’an q’axal chaab’il” (Nahum 1:7) a’ut naq a’an ajwi’ “na’eeqajunk ut k’a’jo’ lix josq’il” (Nahum 1:2). Sa’ lix Hu laj Mormon, laj Korianton, li ralal laj Alma, kiwan ajwi’ xk’a’uxl “chirix xtiikal ru lix na’leb’ li Dios rik’in xk’eeb’al laj maak chixtojb’al lix maak” (Alma 42:1). Re xtzolb’al xkomon chik chirix li ruxtaan li Dios ut chan ru naq nak’anjelak rik’in lix tiikilal, il ru li kixye laj Alma re laj Korianton sa’ Alma 42.

“Li Qaawa’ a’an q’axal chaab’il, a’an li kawilal sa’ xhoonalil li rahil ch’oolej” (Nahum 1:7).

Laj Habakuk

Naru taawanq inpaab’aal chirix li rajom ut lix hoonal li Qaawa’.

Wan naq wankeb’ xpatz’om li profeet chirix lix na’leb’ li Qaawa’. Laj Habakuk, li kik’anjelak sa’ xq’ehil li nimla maa’usilal sa’ Juda, kixtikib’ li resil rik’in jun patz’om choq’ re li Qaawa’ (chi’ilmanq Habakuk 1:1–4). Chan ru taach’olob’ lix k’a’uxl laj Habakuk? Ma aaweek’ahom ajwi’ a’an?

Li Qaawa’ kixsume lix patz’om laj Habakuk rik’in xyeeb’al naq tixtaqlaheb’ aj Kaldeo (eb’ aj Babilonia) re xch’iilankil Juda (chi’ilmanq Habakuk 1:5–11). A’ut toj kiwan xk’a’uxl laj Habakuk, xb’aan naq chanchan naq moko tiik ta naq li Qaawa’ maak’a’ tixb’aanu naq eb’ “li neke’rahob’tesink [Babilonia] yookeb’ chixsachb’al ruheb’ li jwal chaab’ileb’ chiruheb’ a’an [Juda]” (che’ilmanq li raqal 12–17). K’a’ru nakataw sa’ Habakuk 2:1–4 li nakatxtenq’a chixpaab’ankil li Qaawa’ us ta moko sumenb’ileb’ ta laa patz’om?

Li ch’ol 3 re Habakuk, a’an jun tij re xloq’oninkil li Dios ut re xk’utb’al li paab’aal chirix. K’a’ru nawulak chawu chirix li raatin laj Habakuk sa’eb’ li raqal 17–19? Chan ru naq jalaneb’ li raqal a’in rik’in Habakuk 1:1–4? K’oxla chan ru naru taanimob’resi laa paab’aal chirix li Dios, us ta ch’a’aj li yu’am.

Chi’ilmanq ajwi’ Hebreos 10:32–39; 11; Tzol’leb’ ut Sumwank 121:1–6; Robert D. Hales, “Esperamos en el Señor: Hágase tu voluntad,” Liahona, noviembre 2011.

Laj Sofonias

“Sik’omaq li Qaawa’ chejunilex li kub’enaq eewankil sa’ li ruchich’och’ a’in.”

Laj Sofonias kixye naq eb’ laj Juda te’sache’q xb’aaneb’ aj Babilonia xmaak lix maa’usilaleb’. “Jo’ka’in xye li Qaawa’: Ok we chixsachb’al chi junajwa chixjunil li wank sa’ ruchich’och’ ” (Sofonias 1:2). A’ut laj Sofonias kixye ajwi’ naq jun rela’ laj Israel taakole’q (chi’ilmanq Sofonias 3:13). Naq nakawileb’ li profeetil aatin a’in, k’e reetaleb’ li na’leb’ ut li b’aanuhom li ke’xk’e chi sachmank Juda ut xkomoneb’ chik li tenamit—chi’ilmanq Sofonias 1:4–6, 12; 2:8, 10, 15; 3:1–4. Chirix a’an, k’e reetal xna’leb’eb’ ut xb’aanuhomeb’ li tenamit li ke’kole’ xb’aan li Dios—chi’ilmanq Sofonias 2:1–3; 3:12–13, 18–19. K’a’ru li na’leb’ nakak’oxla naq li Qaawa’ yoo chixyeeb’al aawe sa’eb’ li raqal a’in?

Nach’olob’aman sa’ Sofonias 3:14–20 lix sahileb’ xch’ool li tiikeb’ chi paab’ank chirix naq li Qaawa’ “naraanilasiheb’ li xik’ neke’ilok reheb’ ” (raqal 15). K’a’ruheb’ li osob’tesiik li neke’xtoch’ aach’ool sa’eb’ li raqal a’in? K’a’ut naq nim xwankil choq’ aawe li osob’tesiik a’in? Naru taajuntaq’eetaheb’ li raqal a’in rik’in li kik’ulman sa’ 3 Nefi 17, ut taak’oxla k’a’ru nareek’a li Jesukristo chirix lix tenamit—ut chawix laa’at.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Nahum 1:7.Chan ru naq li Qaawa’ a’an jun kawil na’ajej? Jo’ junkab’al, naru teeyiib’ jun ch’ina kawil na’ajej sa’ lee rochoch, ut tex’aatinaq chirix Nahum 1:7 naq wankex chi sa’. Chan ru naq li qakutankil, a’an “xhoonalil li rahil ch’oolej”? Chan ru naq li Jesukristo ut lix evangelio nokohe’xkawob’resi? Chan ru naqak’ut naq naqapaab’ a’an?

Habakuk 2:14.Chan ru tootenq’anq chixtz’aqob’resinkil ru li profeetil aatin sa’ li raqal a’in?

Habakuk 3:17–19.K’a’ru naqatzol rik’in laj Habakuk sa’eb’ li raqal a’in?

Sofonias 2:3.Naru teeb’aanu jun b’atz’unk, b’ar wi’ li junjunq sa’ li junkab’al tixyal xtawb’aleb’ li aatin “tiikilal” ut “tuulanil” sa’ xyanqeb’ k’iila aatin sa’ jun li perel. Toja’ naq tex’aatinaq chirix li tiikilal ut li tuulanil nekeril sa’ lee junkab’al. K’a’ru naraj naxye xsik’b’al li tiikilal ut li tuulanil?

Sofonias 3:14–20.K’a’ru naqataw sa’ Sofonias 3:14–20 li nokoxk’e chi “b’ichank, … xb’aan xsahil qach’ool”? Jo’ junkab’al, naru teeb’ichaheb’ li b’ich li neke’chal sa’ eek’a’uxl naq yookex chirilb’aleb’ li raqal a’in.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Tinsik’ li Qaawa’ sa’ lin ka’ch’inal,” B’ichleb’aal choq’ reheb’ li Kok’al, 67.

Xkawresinkil aawib’ chi tzolok

Aj kuyunelaqat. Wan naq naqaj naq te’sumeeq li qapatz’om sa’ junpaat, a’b’an li musiq’ejil na’leb’ hoonal naraj ut ink’a’ naru xseeb’ankil. Jo’ kixye li Qaawa’ re laj Habakuk, “Oyb’eni laa’at; xb’aan naq relik chi yaal naq taatz’aqloq ru chixjunil” (Habakuk 2:3).

“Li Qaawa’ laa Dios wank aawik’in: A’an q’axal nim xwankil” (Sofonias 3:17). Nachal wi’chik chi awa’b’ejink, xb’aan li xMary R. Sauer