12–18 diciembre

Malakias

“Laa’in jwal nekexinra”, chan li Qaawa’ ”

Junjunqeb’ li na’leb’ sa’ xhu laj Malakias maare aajel ru naq te’xtzol li komon. Naq yooqat chi tzolok, tijon re xnawb’al b’ar wankeb’ li na’leb’ a’an. A’an ajwi’ tatxtenq’a chixtawb’al ru lix rahom li Qaawa’ choq’ reheb’ li nakatzoleb’.

Tz’iib’a li nakak’oxla

Xkanab’ankileb’ chi wotzok

Naru taatz’iib’a sa’ li pizarron li aatin Esil re xtz’ilb’al rix lix hu laj Malakias. Waklesi xch’ooleb’ li komon re naq te’xwotz li na’leb’ jwal aajel ru xe’xtaw sa’ li junjunq chi ch’ol sa’ xhu laj Malakias. Re xtenq’ankileb’ chixjultikankil ut chixtz’ilb’al rix li nawotzman, naru taatz’iib’a sa’ li pizarron li k’a’ru te’xwotz.

Xk’utb’al li tzolʼlebʼ

Malakias 1:6–14

Li Qaawa’ naxpatz’ jun “mayej li ink’a’ muxb’il ru.”

• Re xtenq’ankileb’ li komon chixwotzb’al li xe’xtzol chirix li mayejak sa’ Malakias 1:6–14, naru neke’ril wi’chik li raqal a’an chi ch’anch’o ut naru te’xtz’il rix rik’in jalan chik li komon k’a’ru li ink’a’ ke’xtaw ru laj tij aj Israelita chirix li mayej. K’a’ut naq li Qaawa’ naxpatz’ qe li k’a’ru tz’aqal chaab’il? Eb’ li komon naru neke’xtz’iib’a li mayej, malaj li mayejak naqab’aanu choq’ re li Qaawa’ anajwan. Te’aatinaq chirix li junjunq, re te’xtaw xyaalal k’a’ru nab’aanunk re naq a’an jun li mayej “muxb’il ru” malaj “ink’a’ muxb’il ru” (Malakias 1:7, 11).

Malakias 3–4

Lix profeetil aatin laj Malakias yoo chi tz’aqlok ru sa’ li kutankil a’in.

• Re xtz’ilb’al rix Malakias 3–4, naru nakak’ut naq laj Moroni kixwotz li raqal a’in naq kirula’ani laj Jose Smith (chi’ilmanq Jose Smith—Resilal 1:36–39). K’aruheb’ li na’leb’ neke’xk’oxla li komon naq jwal aajeleb’ ru naq tixnaw laj Jose—ut laa’o—sa’eb’ li raqal a’in? Naru neke’ok sa’ kok’ ch’uut ut te’xye a’ yaal jarub’ li na’leb’ te’xtaw. Waklesi xch’ooleb’ re te’xwotz li xe’xtaw ut te’xye k’a’ut naq jwal aajel ru li na’leb’ a’an sa’ roso’jikeb’ li kutan.

Malakias 3:8–12

Li Qaawa’ naxte rilob’aal li choxa naq naqatoj li qalajetqil.

• Re xwaklesinkil xch’ooleb’ li komon re te’xwotz xnawom xch’ool chirix li chaq’rab’ re li lajetqil, maare te’xsik’ junjunq na’leb’ re li evangelio sa’ Malakias 3:8–12 ut te’xwotz chan ru neke’xnaw naq tz’aqal yaal li na’leb’ a’an. Naru neke’xwotz chan ru neke’osob’tesiik xb’aan li Qaawa’—sa’ tib’elej ut sa’ musiq’ej—xb’aan xtojb’al li lajetqil. Naru ajwi’ neke’xtz’il rix li k’utum chirix li lajetqil kixwotz li Elder David A. Bednar sa’ “Las ventanas de los cielos” (Liahona, noviembre 2013, 17–20) ut te’aatinaq chirix k’a’ru xe’xtzol sa’ xyalb’aleb’ xq’e chixyu’aminkil li chaq’rab’ a’in.

• Patz’ reheb’ li komon naq te’ril Malakias 3:8–12 chi ch’anch’o ut te’xk’oxla chan raj ru te’xk’ut chiru junaq kristiaan k’a’ut naq li Qaawa’ naxpatz’ naq taqatoj li lajetqil. Naru ajwi’ te’ril lix k’utum li Awa’b’ej Gordon B. Hinckley li natawman sa’ “Xkomon chik li k’anjeleb’aal.” K’a’ru raj nawulak chiqu naq te’xtaw ru li qas qiitz’in chirix li lajetqil? K’a’ru naraj naxye xtojb’al li lajetqil? Kʼaʼut naq li Qaawaʼ naraj naq taqab’aanu? Chan ru naq “natehe’ li choxa” (raqal 10) naq naqatoj li lajetqil? K’a’ raj ru li maare tixpatz’ junaq kristiaan chirix xtojb’al li lajetqil ut k’a’ raj ru taqaye chirix a’an? Patz’ reheb’ li komon naq te’xwotz chan ru naq xpaab’ankil li taqlahom a’in naxkawob’resi lix paab’aaleb’ chirix li qaChoxahil Yuwa’ ut li Jesukristo.

Xjalam-uuch laj Elias naq kixk’utb’esi rib’ chiru laj Jose Smith ut laj Oliver Cowdery sa’ li santil ochoch re Kirtland, xb’aan laj Robert T. Barrett

Malakias 4:5–6

“Tintaqla laj Elias li profeet.”

• Li komon naru neke’wan lix chaab’il k’a’uxl chirix Malakias 4:5–6 naq te’xjuntaq’eeta li raqal a’in rik’in li raqal chi yeeb’il xb’aan laj Moroni re laj Jose Smith sa’ Jose Smith—Resilal 1:38–39. (Naru nak’anjelak naq te’xtz’iib’a sa’ li pizarron li junjunq xjalanil). K’a’ru naxk’ut chiqu li raatin laj Moroni jo’ xtz’aqob’ li naqataw ru sa’eb’ li raqal re Malakias? Naru ajwi’ neketz’il rix li patz’om jo’ a’in: Aniheb’ li “na’b’ej yuwa’b’ej”? (chi’ilmanq Deuteronomio 29:13). Chan ru naqasutq’isi qach’ool rik’ineb’ li qana’ qayuwa’ ut chan ru neke’xsutq’isi lix ch’ooleb’ a’an qik’in? Re xtenq’ankileb’ li komon chixk’eeb’al reetal chan ru naq yoo chi tz’aqlok ru lix profeetil aatin laj Malakias, naru nakawil resil naq laj Elias li profeet kixq’axtesi re laj Jose Smith eb’ li laaw (chi’ilmanq Tzol’leb’ ut Sumwank 110:13–16). K’a’ut naq eb’ li komon neke’xb’antioxi naq kik’ojob’aman wi’chik li laaw a’in?

• Malakias 4:5–6 natenq’an re aatinak chirix li k’anjel re li santil ochoch ut li resilal li junkab’al. Eb’ li komon naru neke’xwotz lix numsihomeb’ naq neke’xb’aanu li k’anjel a’an ut chan ru neke’tenq’aak xb’aaneb’ li numsihom a’an chixsutq’isinkil lix ch’ooleb’ rik’ineb’ lix na’ xyuwa’. K’a’ru naru taqab’aanu re naq eb’ li toj te’chalq te’xsutq’isi xch’ooleb’ qik’in?

Xkomon chik li k’anjeleb’aal

Xtojb’al li lajetqil nab’aanuman rik’in paab’aal.

Li Awa’b’ej Gordon B. Hinckley kixye: “Naru naqatoj li qalajetqil. Ink’a’ yal rik’in tumin, rik’in b’an paab’aal. Maji’ innawom ru junaq aj tiikil tojol lajetqil li ink’a’ ta raj tixch’olob’ xyaalal, naq xteeli li choxa chiru ut xchaq’al ru li osob’tesink xk’ehe’ re (chi’ilmanq “Let Us Move This Work Forward,” Ensign, noviembre 1985, 85).

Xkawresinkil qib’ jo’ aj k’utunel

Aatinan chirix laa majelal ut laa paab’aal. Wan naq eb’ li kristiaan neke’yale’ rix neke’reek’a naq xjuneseb’ wankeb’. Us raj naq jo’q’ehatq taawotz jun aanumsihom jwal ch’a’aj choq’ aawe ut chan ru naq xatxtenq’a li Kolonel.