Li profeet aj Isaias naxye resil lix yo’lajik li Kristo chi rub’elaj, xb’aan laj Harry Anderson

5–11 septiembre

Isaias 1–12

“Li Dios aʼan lin kolbʼal”

Sik’ chan ru taawaklesiheb’ xch’ool li komon re te’xwotz’ li musiq’anb’il eek’ahom li xe’xk’ul ut li xe’xtaw ru naq xe’tzolok sa’ junesal ut jo’ junkab’al.

Tz’iib’a li nakak’oxla

Xkanab’ankileb’ chi wotzok

Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al nak’eeman li na’leb’ re xtawb’al ru lix tz’iib’ahom laj Isaias. Naru nakab’oqeb’ li komon chixwotzb’al chan ru xe’tenq’aak xb’aaneb’ li na’leb’ a’in re xtawb’al ru Isaias 1–12.

Xk’utb’al li tzolʼlebʼ

Isaias 1–12

Taatz’aqloq ru li raatin laj Isaias.

• Naq na’aatinak chirix laj Isaias, li Kolonel kixye naq “chixjunil li k’a’aq re ru li kixye, kiwan ut toj taawanq, jo’ chanru ajwi’ li aatin li kixye” (3 Nefi 23:3). Re xtikib’ankil xtz’ilb’al rix lix hu laj Isaias, naru nakawotz li raqal a’in ut li ch’olob’ank natawman sa’ “Xkomon chik li k’anjeleb’aal.” Chirix a’an naru nakatz’iib’a sa’ li pizarron Sa’ xkutankil laj Isaias, lix k’anjel li Kolonel sa’ ruchich’och’ ut Sa’ roso’jikeb’ li kutan. Eb’ li komon naru neke’xsik’ li raqal sa’ Isaias 1–12 li neke’xch’olob’ rix li eetalil wan sa’ li pizarron (maare, Isaias 2:1–5; 7:1–7; 7:10–14; 9:2–7; 10:20; 11:10; 12:1). K’a’ut naq a’an jun osob’tesihom naq wankeb’ li profeetil aatin sa’ li kutan a’in choq’ qe?

Isaias 1; 3; 5

“Kanab’omaq xb’aanunkil li ink’a’ us.”

• Naru nakapatz’ reheb’ li komon naq te’xwotz li xe’xtzol sa’ junesal ut jo’ junkab’al sa’ Isaias 1, 3, 5 chirix lix wanjik sa’ musiq’ejil li Awa’b’ejihom re Juda sa’ xkutankil laj Isaias. Maare naru te’xnumsi rilb’aleb’ li ch’ol ut te’xtz’iib’a li raqal b’ar wi’ neke’xye chan ru xwanjik li Awa’b’ejihom re Juda. K’a’ru na’leb’ chirix oyb’enihom natawman sa’eb’ li ch’ol a’an? (Wi us, ye reheb’ li komon naq te’ril Isaias 1:16–20, 25–27; 3:10.) Wi ta laj Juda li kiwan junxil tixk’e junaq esil choq’ qe, k’a’ raj ru a’an?

• Eb’ li komon naru neke’xk’oxla naq wankeb’ aran Jerusalen sa’ li kutankil naq laj Isaias ki’aatinak jo’ profeet. Naru nakapatz’ reheb’, k’a’ru kixye laj Isaias ut k’a’ru neke’xk’oxla chirix a’an? Naru ajwi’ nakapatz’ reheb’ naq te’aatinaq chirix li raatin laj Isaias li natawman sa’ Isaias 1:16–20; 3:16–26; 5:20–23. K’a’ru kixye laj Isaias li naxwaklesi qach’ool chixjalb’al qak’a’uxl?

Isaias 2; 4; 11–12

Li Dios tixb’aanu jun xnimal ru k’anjel sa’ roso’jikeb’ li kutan.

• Re xtenq’ankileb’ li komon chixk’oxlankil chan ru naq yoo chi tz’aqlok ru lix profeetil aatin laj Isaias chirix roso’jikeb’ li kutan, sik’ ruheb’ li raqal sa’ Isaias 2; 4; 11–12 (jo’eb’ ajwi’ Isaias 2:2–3; 4:5–6). Chirix a’an ye reheb’ naq te’xsik’ li aatin wankeb’ sa’ chalel (jo’ “taqsinb’ilaq xloq’al” malaj “te’chalq”). Ye reheb’ naq te’xtz’iib’a li aatin naq yoo chi k’ulmank (jo’ “yoo chi taqsiik xloq’al” malaj “yookeb’ chi chalk”). Chan ru yookeb’ chi tz’aqlok ru li profeetil aatin a’an sa’ li qayu’am? K’a’ut naq aajel ru xnawb’al li profeetil aatin a’an?

• Naru nakawotz naq laj Moroni kirula’ani laj Jose Smith sa’ 1823, kixwotz Isaias 11, ut kixye naq ok re chi k’ulmank (chi’ilmanq Jose Smith—Resilal 1:40; chi’ilmanq ajwi’ Tzol’leb’ ut Sumwank 113:1–6). Eb’ li komon naru neke’xwotz jarub’aq li raqal re Isaias 11 (jo’eb’ li raqal 6–12) ut te’xtz’iib’a chi k’osb’il ru li kiril laj Isaias. B’ar wan li qak’anjel re xtz’aqob’resinkil ru li profeetil aatin a’an?

“Xbʼaan naq yoʼlajenaq choqʼ qe jun li kʼuulaʼal, kʼeebʼil chaq qe jun li alalbʼej” (Isaias 9:6).

Isaias 7–9

Laj Isaias ki’aatinak jo’ profeet chirix li Jesukristo.

• Naru nakapatz’ reheb’ li komon k’a’ru neke’xtzol chirix li Jesukristo sa’ Isaias 7:14; 8:13–14; 9:2, 6–7. K’a’ut naq Emanuel a’an jun chaab’il k’ab’a’ej choq’ re li Kolonel? (chi’ilmanq Mateo 1:23). Chan ru naq li Jesukristo a’an jun aj “tenq’ ” malaj jun “aj k’ehol tuqtuukilal” choq’ qe? Eb’ li komon naru neke’xwotz jalan chik li raqal li te’xtaw sa’ Isaias 1–12 li neke’xtenq’aheb’ chixk’oxlankil li Jesukristo. K’a’ru neke’xk’ut li raqal chirix a’an?

• Rub’elaj li tzolok, naru nakapatz’ reheb’ naq te’xk’am jun lix jalam-uuch li Kristo li neke’xk’oxla naq natawman reetalil sa’ Isaias 7–9. K’e xhoonaleb’ re te’xk’ut li jalam-uuch xe’xk’am ut te’xch’olob’ chan ru naxjuntaq’eeta rib’ rik’in li raatin laj Isaias.

Xkomon chik li k’anjeleb’aal

Lix profeetil aatin laj Isaias naru nak’ulman chi k’iila paay ru.

Li Awa’b’ej Dallin H. Oaks kixye: “Sa’ lix hu laj Isaias wan naab’al li profeetil aatin ut chanchan naq naab’al reheb’ yoo chi k’ulmank. Jun reheb’ a’an na’aatinak chirixeb’ li kristiaan sa’ xkutankil laj Isaias malaj chirixeb’ li toj te’chalq. Jun chik li eetalil, na’aatinak chirix li kik’ulman sa’ li junxil kutan, naq kisache’ Jerusalen ut li tenamit ke’jek’iman chirix naq li Ralal li Dios kik’ehe’ chiru li krus. Wan ajwi’ jun chik li chanchan naq na’aatinak chirix li xkab’ xk’ulunik li Kolonel. Rik’in xnawb’al naq li profeetil aatin a’an naru nawan naab’al xyaalalil tento naq jwal aajel ru naq taqasik’ li k’utb’esinb’il na’leb’ rik’in li Santil Musiq’ej li tooxtenq’a chixtawb’aleb’ ru” (“Scripture Reading and Revelation,” Ensign, enero 1995, 8).

Xkawresinkil qib’ jo’ aj k’utunel

B’oq li Musiq’ej. “Li loq’laj b’ich, eb’ li loq’laj hu, li raatineb’ li profeet sa’ roso’jikeb’ li kutan, xyeeb’al resil aarahom ut lix nawom aach’ool, ut xhoonalil li k’oxlak sa’ ch’anch’ookilal naru te’xb’oq lix wanjik li Musiq’ej” (Li k’utuk jo’ li Kolonel, 10).