Kamataataan tamnein te ruanimate ae akea kaaina iroun Maryna Kriuchenko

Eberi 11–17

Itita

“E Ongaki Te Mate I Rouna n Aki Toki”

Ngkai ko katauraoi n reirei iaon Tabatin te Itita, iangoia bwa kona kanga ni buokiia kaain te kiraati ni karekea te kakaitau ae nano riki ibukin ao ana koaua n ana karea ni kamaiu Iesu Kristo ao Mangautina.

Korei Am Namakin

Kaunga te Tibwatibwa

Tao ko kona ni kaoia kaain te kiraat bwa a na tibwa tera are karaoia ke aia utu ni kakorakora aia onimaki iroun Iesu Kristo ao n Ana Mwakuri ni Kamaiu n tain te Itita aei.

Reirei te Reirei

Ibukina bwa e a tia n tokanikai te Tia Kamaiu iaon te mate, ngaira naba ti na manga maiu.

• Ngkai te bong aei bon Tabatin te Itita, iangoia n rinanona rongorongon te moan Itita n rongorongon koroboki aika a tabu—Manga Utin Iesu Kristo (taraa Ioane 20:1–17). Ko kona ni kaoia kaain te kiraati bwa a na karakina te karaki ni bon oin ana taeka teuanne ke neienne. You could also show the video “He Is Risen” (ChurchofJesusChrist.org). Kain te kiraati a kona naba ni kukurei n anenei kuna n taromauri ae taekan te Tia Kamaiu ao ni wareki koroboki aika a tabu ake a irekereke (booki a karinanaki i nano ni katoai anene inanon Anene n Taromauri). Kain te kiraati a kona ngkanne n tibwai aia kibu aika a tatangiri man te kuna n taromauri ao aia namakin ibukin te Tia Kamaiu.

• Ni buokiia am kiraati ni kakaitau n aron te O Tetemanti ni kakoaua iroun Iesu Kristo, ko kona ni kaoia bwa a na rinanon koroboki aika a tabu n te taibora n bwaai aika a kakaawaki n te wiiki aei n Nakomai, Iriirai—Ibukiia Aomata n Tatabemaniia ao Utu, n aron naba rongorongo n ana Boki Moomon n te taibora are e airi ma ngaia. Tera ae ti reiakinna iaon te Tia Kamaiu ao Ana mition man kibu aikai? Bukin tera e kakaawaki bwa tina atai taetae ni burabeti aikai?

Ti kona ni karekea te rau ao te kimwareirei rinanon ana Mwakuri ni Kamaiu te Tia Kamaiu.

• Bwaai aika a kakaawaki n te wiiki aei n Nakomai Iriirai—Ibukiia Aomata n Tatabemaniia ao Utu n ikotaki ma rinanin koroboki aika a tabu ake a kabwarabwara te rau ao te kimwareirei are e roko rinanon Iesu Kristo. Ngkana a wareki kibu aikai kaain te kiraati ni mweengaia, kaungaia bwa na tibwai aia iango ao namakin iaoia. Ke ko kona ni wareki tabeua koroboki aika a tabu n te kiraati ao n taetae iaon te rau ao te kimwareirei are ti namakinna ibukin te Tia Kamaiu ao Ana Mwakuri ni Kamaiu. Tina kanga n tibwai kakabwaia aikai ma aomata ake a ininimaki ni kakaea te rau ao te kimwareirei inanon maiuia? Ko kona naba ni kaoia kaain te kiraati bwa a na wareka ana rongorongo Beretitenti Russell M. Nelson “Joy and Spiritual Survival” (Liahona, Nov. 2016, 81–84) inanon waakin te wiiki ao n roko nakon te kiraati n tauraoi n tibwai bwaai ake a reirei iai te rongorongo aei iaon karekean te kimwareirei inanon te Tia Kamaiu.

• Kona bae n namakina te kairaki ni kaira te maroro n aron buokakia tabeman ni karekea te rau ao te kimwareirei inanon Kristo. Ko kona ni kaoia kaain te kiraati bwa a na iangoa temanna ae a kinaa—tao temanna ae a buokia—ae bae ni kainnanoa aia boutoka, ibuobuoki, ke bon ti n ongora aia koaua iroun Kristo ao Ana Mwakuri ni Kamaiu. Kaungaia kaain te kiraati n nakon koroboki aika a tabu (n aroia naake n “Bwaai ni Ibuobuoki riki Tabeua”) ngkai a iangoi ibuobuoki ake a kona n anga ke kakoaua ake a kona n tibwaia ni kakorakoraia naake irarikiia. Kaoia tabeman kaain te kiraati bwa a na tibwai aia iango iaon te ibuobuoki n aron are e karaoia Iesu.

Gray Day Golgotha (Te Bong ni Kananokawaki i Korokota), iroun J. Kirk Richards

Rinanon Ana Mwakuri ni Kamaiu, Iesu Kristo iai mwaakana ni buokiira n tokanikai iaon te bure, mate, kataaki, ao kabwaka.

• Teuana te kawai ni buokiia kaain te kiraati n iangoi kakabwaia ake a roko rinanon Ana Mwakuri ni Kamaiu te Tia Kamaiu e kona n koreaki iaon te burakibooti atuun iango Bure, Mate, Kataaki, ao Kabwaka. Kain te kiraati n tatabemaniia a kona ni wareka teuana man koroboki aika a tabu ake a karinanaki n “Bwaai ni Ibuobuoki riki Tabeua” ao ni iangoia e kanga te Tia Kamaiu ni buokiira n tokanikai iaon bwai ake a koreaki iaon te burakibooti. Kain te kiraati a kona ni korei aia boki ni booki aika tabu iaan teuana ke e raka riki atuu iaon te burakibooti ao n tibwai aia koaua iroun te Tia Kamaiu ao Ana Mwakuri ni Kamaiu.

• Karaki ao kabotau a kona ni buokiira n ota n ana Mwakuri ni Kamaiu Kristo. Te katoto, ko kona ni kaoia kaain te kiraati bwa a na tibwa teuana man te karaki ke kabotau n ana rongorongo Unimwaane Walter F. González “Ana Kamaiu te Tia Kamaiu” (Riaona, Nob. 2019, 90–92) ke ana rongorongo Titita Neill F. Marriott “Mena Inanon te Atua ao Kanua Tamneim” (Riaona, Nobembwa 2017, 10–12). Tera ae e reireiniira karaki ao kabotau n taekan ana Mwakuri ni Kamaiu Kristo? Kaoia kaain te kiraati bwa a na mwakuri ni ikatoatoa n iaongo oin aia karaki ke kabotau.

• Tera ae ti reiakinna man irakin kibu iaon kabooan kamaiuakira iroun Iesu Kristo: Itaia 53:3–5; Motiaea 3:7; Reirei ao Berita aika Tabu 19:16–19? Tera ae e kabooa Tamara are i Karawa? (taraa Ioane 3:16).

Bwaai n Ibuobuoki Riki Tabeua

Koroboki aika a tabu iaon Ana Mwakuri ni Kamaiu Iesu Kristo.

• Itaia 61:1–3

• Etekiera 36:26–28

• Mataio 11:28–30

• Ruka 1:46–55

• I-Rom 8:35–39

• Aramwa 7:10–13

• Aramwa 11:42–45

• Moronaai 10:32–33

• Reirei ao Berita aika Tabu 19:15–19

• Mote 5:9–12

Kanakoraoan Ara Anga reirei

Karabwaia ake ko reireiniia. “Tai rangi n taonakinako ma reirei ake ko a mwaninga ni karabwaia taan reiakinaki ibukin aia tibwatibwa. A riai n ataia bwa ko kakaitau n aia tatauraoi n tibwai aia iango ao aia koaua.” (Teaching in the Savior’s Way, 33).