“11–17 ʻEpeleli. Toetuʻú: ‘Te Ne Fakaʻauha ʻAupito ʻa e Maté ʻi he Mālohi,’” Haʻu, ʻo Muimui ʻIate Au—Maʻá e Lautohi Faka-Sāpaté: Fuakava Motuʻá 2022 (2021)
“11–17 ʻEpeleli. Toetuʻú,” Haʻu, ʻo Muimui ʻIate Au—Maʻá e Lautohi Faka-Sāpaté: 2022
Tā fakatātaaʻi ʻo e ngeʻesi fonualotó ʻe Maryna Kriuchenko
11–17 ʻEpeleli
Toetuʻú
“Te Ne Fakaʻauha ʻAupito ʻa e Maté ʻi he Mālohi”
‘I hoʻo teuteu ke faiako ʻi he Sāpate Toetuʻú, fakakaukau ki he founga te ke lava ai ʻo tokoniʻi e kau mēmipa ʻo e kalasí ke nau houngaʻia lahi ange mo maʻu ha fakamoʻoni ki he feilaulau fakalelei ʻa Sīsū Kalaisí mo e Toetuʻú.
Lekooti Hoʻo Ngaahi Ongó
Fakaafeʻi e Feʻinasiʻakí
Mahalo te ke lava ʻo fakaafeʻi e kau mēmipa ʻo e kalasí ke vahevahe e meʻa naʻa nau fai pe ko honau fāmilí ke fakamālohia ʻenau tui kia Sīsū Kalaisi mo ʻEne Fakaleleí lolotonga e faʻahitaʻu Toetuʻu ko ʻení.
Akoʻi e Tokāteliné
Koeʻuhí ko hono ikunaʻi ʻe he Fakamoʻuí ʻa e maté, te tau toe moʻui foki.
-
Koeʻuhí ko e Sāpate Toetuʻú eni, fakakaukau ke toe vakaiʻi e talanoa fakafolofola ʻo e ʻuluaki Toetuʻú—ʻa e Toetuʻu ʻa Sīsū Kalaisí (vakai, Sione 20:1–17). Te ke lava ʻo fakaafeʻi ha mēmipa ʻo e kalasí ke ne toe fai e talanoá ʻi he lea pē ʻaʻana. Mahalo ʻe fiefia e kau mēmipa ʻo e kalasí ʻi hono hiva e ngaahi himi fekauʻaki mo e Fakamoʻuí mo lau e ngaahi potufolofola fekauʻaki mo iá (ʻoku lisi atu e ngaahi folofola fakafekauʻakí ʻi lalo ʻi he foʻi hiva takitaha ʻi he Ngaahi Himí). Hili iá, ʻe lava ke vahevahe ʻe he kau mēmipa ʻo e kalasí ʻenau ngaahi kupuʻi lea manako mei he himí mo ʻenau ngaahi ongo kau ki he Fakamoʻuí.
-
Ke tokoni ki he kalasí ke nau houngaʻia ʻi he founga ʻoku fakamoʻoni ai e Fuakava Motuʻá kia Sīsū Kalaisí, te ke lava ʻo fakaafeʻi kinautolu ke nau toe vakaiʻi e ngaahi folofola ʻi he tēpile he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, kae pehē ki he ngaahi potufolofola ʻi he Tohi ʻa Molomoná ʻoku ʻoatu fakataha mo e tēpilé. Ko e hā ʻoku tau ako mei he ngaahi potufolofola ko ʻení fekauʻaki mo e Fakamoʻuí mo Hono misioná? Ko e hā ʻoku mahuʻinga ai ke ʻilo ʻo kau ki he ngaahi kikite ko ʻení?
ʻE lava ke tau maʻu e melinó mo e fiefiá ʻi he Fakalelei ʻa e Fakamoʻuí.
-
ʻOku kau ʻi he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ha lisi ʻo e ngaahi folofola ʻoku nau fakamatalaʻi e melino mo e fiefia ʻoku fakafou mai ʻia Sīsū Kalaisí. Kapau ‘oku lau ʻe he kau mēmipa ʻo e kalasí e ngaahi folofola ko ʻení ʻi ʻapi, poupouʻi kinautolu ke vahevahe ʻenau ngaahi fakakaukau mo e ongo fekauʻaki mo kinautolú. Pe te ke lava ‘o lau fakakalasi ha ngaahi potufolofola pea talanoa fekauʻaki mo e melino mo e fiefia ʻoku tau ongoʻi koeʻuhi ko e Fakamoʻuí mo ʻEne Fakaleleí. ‘E founga fēfē haʻatau vahevahe e ngaahi tāpuaki ko ʻení mo e kakai ʻoku nau ala faingataʻaʻia ke maʻu e melinó mo e fiefiá ʻi heʻenau moʻuí? ʻE lava foki ke ke fakaafeʻi ha mēmipa ʻo e kalasí ke ne lau e pōpoaki ʻa Palesiteni Lāsolo M. Nalesoní, “Fiefiá mo e Moʻui Fakalaumālié” (Liahona, Nōvema 2016, 81–84) ʻi he lolotonga e uiké kimuʻa pea fakahoko e kalasí, ke teuteu ke vahevahe e meʻa ʻoku akoʻi ʻe he pōpoaki ko ʻení fekauʻaki mo hono maʻu ʻo e fiefiá ʻi he Fakamoʻuí.
-
Mahalo naʻa ueʻi fakalaumālie koe ke tataki ha fealeaʻaki fekauʻaki mo e founga ke tokoniʻi e niʻihi kehé ke maʻu e melinó mo e fiefiá ʻia Kalaisí. Te ke lava ʻo fakaafeʻi e kau mēmipa ʻo e kalasí ke nau fakakaukau fekauʻaki mo ha taha ʻoku nau ʻiloʻi—mahalo ko ha taha ʻoku nau ngāue fakaetauhi ki ai—te ne ala fie maʻu ʻenau poupoú, tokoní, pe ko ha fanongo pē ki heʻenau fakamoʻoni kau kia Kalaisi mo ʻEne Fakaleleí. Poupouʻi e kau mēmipa ʻo e kalasí ke nau vakai ki he ngaahi folofolá (hangē ko ia ʻi he “Ngaahi Maʻuʻanga Tokoni Kehé”) ʻi heʻenau fakakaukau ki he ngāue tokoni te nau lava ʻo faí pe ko e ngaahi fakamoʻoni te nau lava ʻo vahevahe ke fakamālohia ʻa kinautolu ʻoku nau feohí. Fakaafe‘i ha kau mēmipa ʻe niʻihi ʻo e kalasí ke vahevahe ʻenau ngaahi fakakaukau fekauʻaki mo e ngāue tokoni ʻo hangē ko ia naʻe fai ʻe Sīsuú.
Grey Day Gologotha (ʻAho Fakamamahi ʻi Kolokota), tā ʻe J. Kirk Richards
ʻOku maʻu ʻe Sīsū Kalaisi ʻa e mālohi ke tokoniʻi kitautolu ke ikunaʻi e angahalá, maté, ngaahi faingataʻá, mo e ngaahi vaivaí.
-
Ko e founga ʻe taha ke tokoni ai ke fakalaulauloto e kau mēmipa ʻo e kalasí ki he ngaahi tāpuaki ʻoku maʻu mei he Fakalelei ʻa e Fakamoʻuí, ko hano tohi ʻi he palakipoé ʻa e ngaahi ʻuluʻi tohiAngahalá, Maté, Ngaahi Faingataʻá mo e Ngaahi Vaivaí. ʻE lava ke lau ʻe he kau mēmipa takitaha ʻo e kalasí ha taha ʻo e ngaahi folofola ʻoku lisi ʻi he “Ngaahi Maʻuʻanga Tokoni Kehé” pea fakalaulauloto ki he founga ʻoku tokoniʻi ai kitautolu ʻe he Fakamoʻuí ke ikunaʻi e ngaahi meʻa ʻoku hiki ʻi he palakipoé. ʻE lava ke tohi ʻe he kau mēmipa ʻo e kalasí e ngaahi folofola fakafekauʻakí ʻi lalo ʻi ha ʻuluʻi tohi ʻe taha pe lahi ange ʻi he palakipoé, pea vahevahe ʻenau ngaahi fakamoʻoni ki he Fakamoʻuí mo ʻEne Fakaleleí.
-
ʻE lava ke tokoni e ngaahi talanoá mo e ngaahi fakafehoanakí ke mahino kiate kitautolu e Fakalelei ʻa Sīsū Kalaisí. Hangē ko ʻení, ʻe lava ke ke fakaafeʻi ha mēmipa ʻo e kalasí ke ne vahevahe ha taha ʻo e ongo talanoá pe fakafehoanaki ʻi he pōpoaki ʻa ʻEletā Uolotā F. Konisālesí, “Ko e Ala Mai ʻa e Fakamoʻuí” (Liahona, Nōvema 2019, 90–92) pe pōpoaki ʻa Sisitā Nila F. Meliotí “Nofo Maʻu ʻi he ʻOtuá pea Fakaleleiʻi ʻa e Maumaú” (Liahona, Nōvema 2017, 10–12). Ko e hā ʻoku akoʻi mai ʻe he ongo talanoa mo e fakafehoanaki ko ʻení fekauʻaki mo e Fakalelei ʻa Kalaisí? Fakaafeʻi e kau mēmipa ʻo e kalasí ke nau ngāue tauhoa pea fakakaukau ki haʻanau ngaahi talanoa pe fakafehoanaki pē ʻanautolu.
-
Ko e hā ʻoku tau ako mei he ngaahi veesi ko ʻení fekauʻaki mo e mahuʻinga hono totongi ʻe Sīsū Kalaisi hotau fakamoʻuí: ʻĪsaia 53:3–5; Mōsaia 3:7; Tokāteline mo e Ngaahi Fuakavá 19:16–19? Ko e hā hono lahi e mahuʻinga ne totongi ʻe heʻetau Tamai Hēvaní? (vakai, Sione 3:16).
Ngaahi Maʻuʻanga Tokoni Kehé
Ngaahi folofola fekauʻaki mo e Fakalelei ʻa Sīsū Kalaisí
Ko Hono Fakatupulaki ʻEtau Founga Akoʻí
Fakamālō ki hoʻo kau akó. “ʻOua te ke fuʻu femoʻuekina ʻi hoʻo lēsoní pea ngalo ai ke ke fakamālō ki he kau akó ʻi heʻenau tokoní. ʻOku fie maʻu ke nau ʻilo ʻokú ke houngaʻia ʻi heʻenau loto fiemālie ke vahevahe ʻenau ʻiló mo e fakamoʻoní” (Ko e Faiako ʻi he Founga ‘a e Fakamoʻuí, 33).