Tā ’oe e haere, nā Sandy Freckleton Gagon

6–12 nō Tiunu

Ruta ; 1 Samuela 1–3

« Tē ’oa’oa nei tā’u ’ā’au ia Iehova »

E mea faufa’a ïa ineine nō te ha’api’i, terā rā ’a ha’apāpū ē, i roto i tā ’outou fa’anahora’a, ’ua fa’ata’a ’outou ’ia hōro’a i te mau pīahi i te mau rāve’a nō te fa’a’ite mai i te mau mea tā rātou i ’apo mai.

Pāpa’i i te mau mana’o e tae mai

Tītau i te mana’o

Nō te fa’aitoito i te mau pīahi ’ia fa’a’ite mai i te mau mea tā rātou i ’apo mai i teie hepetoma, e nehenehe ’outou e ani ia rātou ’ia pāpa’i i ni’a i te tāpura ’ere’ere hō’ē ta’o ’aore rā, hō’ē pereota nō roto mai i te Ruta 1–4 ’aore rā 1 Samuela 1–3 tei fa’auru ia rātou i roto i tā rātou tuatāpapara’a nā te ta’ata hō’ē ’aore rā, nā te ’utuāfare. ’A tai’o ha’apūai i te tahi, ma te ani i te mau pīahi ’ia fa’a’ite mai e mea nāhea teie mau ta’o ’e mau pereota i te fa’aurura’a ia rātou.

Ha’api’i i te ha’api’ira’a tumu

Ruta ; 1 Samuela 1–2

E nehenehe te Mesia e huri i te ’ati i roto i te upo’oti’ara’a.

• Noa atu e mau tāmatara’a nō te ta’ata hō’ē tā tā ’outou mau pīahi e fa’aruru nei, tei ta’a ’ē i tō Ruta ’e i tō Hana, e nehenehe rātou e ’apo mai i te mau rāve’a i pāhono ai teie mau vahine ha’apa’o maita’i i te pohe ’e te ’ā’au ’oto. Nō te tauturu ia rātou ’ia rave i te reira, e nehenehe ’outou e vāhi i te piha ha’api’ira’a nā roto i te mau pupu na’ina’i ’e ’ia ani i te pupu tāta’itahi ’ia tai’o i te hō’ē pene i roto i te Ruta 1– 4 ’aore rā 1 Samuela 1. I ni’a i te tāpura ’ere’ere, e nehenehe ’outou e pāpa’i i te mau uira’a mai teie : E aha te mau tāmatara’a tā Ruta ’e Hana i fa’aruru ? Nāhea rāua i te fa’a’itera’a i tō rāua ti’aturi i te Fatu i roto i tō rāua mau tāmatara’a ? E nehenehe te mau pupu e ’imi i te mau pāhonora’a i te hō’ē ’aore rā, hau atu, o te mau uira’a ’e ’ia fa’a’ite mai i te mea tei ’itehia ia rātou. E aha tā tātou e ha’api’i mai i roto i teie mau ’ā’amu nō ni’a i te huru e nehenehe ai te Fatu e tauturu ia tātou i roto i tō tātou mau tāmatara’a ?

  

  Nō teie tamari’i i pure ai au nā Elspeth Young

• Te mau ta’ata ato’a e pure nō te hō’ē tamari’i ’aita ïa e fāri’i hō’ē, ’e ’o rātou ato’a tei pohe te hoa fa’aipoipo ’aita ïa e fa’aipoipo fa’ahou. Terā rā, e nehenehe tō tātou iho mau tāmatara’a, noa atu te huru, e riro ’ei mau rāve’a nō te fāriu atu i ni’a i te Fatu ’e nō te ha’apūai i tō tātou fa’aro’o iāna. E nehenehe ’outou e ani i te mau pīahi ’ia tai’o i te Ruta 2:11–12 ’e te 1 Samuela 1:9–11 ’e ’ia fa’ata’a ē, e aha tā te mau tāmatara’a o Ruta ’e o Hana i fa’atupu i ni’a tō rāua mau autā’atira’a ’e te Fatu. E nehenehe ato’a te mau pīahi e fa’a’ite mai e mea nāhea tō rātou iho fa’aro’o i te ha’apūaihia ’a fāriu ai rātou i ni’a ia Iesu Mesia i roto i te mau taime fifi.

  Nō te pāturu i teie tāu’aparaura’a, e nehenehe ’outou e ani i te hō’ē pīahi; ’aore rā, hau atu, ’ia haere mai ma te ineine nō te fa’a’ite mai i te mau mana’o nō roto mai i te parau poro’i a te tuahine Reyna I. Aburto i muri nei: « Nā roto i te ata ’e te mahana, e pārahi te Fatu i pīha’i iho iā’u ! » (Liahona, Novema 2019, 57–60); te tuha’a tei parauhia « Te ’oa’oa ’ia upo’oti’a nā roto i te Mesia » nō roto mai i te parau poro’i a Elder D. Todd Christofferson « Te ’oa’oa o te feiā mo’a » (Liahona, Novema 2019, 16–17); ’aore rā te mau parau a te peresideni Elaine S. Dalton i roto i « Te tahi atu mau rāve’a tauturu ». ’A ani i te mau pīahi ’ia fa’a’ite mai i te mea tā rātou i ha’api’i mai nō ni’a e nāhea tō tātou mau tāmatara’a e nehenehe ai e riro ’ei mau rāve’a nō te hō’ē fa’aro’o rahi atu ā ia Iesu Mesia.

1 Samuela 2:18–36 ; 3

E ti’a ia tātou ’ia fa’aro’o ’e ’ia ha’apa’o i te reo o te Fatu.

• Tē vai ra paha te mau ta’ata i roto i tā ’outou piha ha’api’ira’a, mai ia Samuela, tei fa’aro’o i te reo o te Fatu, ’aita rā ’oia i ’ite ē, ’o tōna ïa reo. E nehenehe ’outou e ani i te mau pīahi ’ia hi’o fa’ahou i te 1 Samuela 3, ma te ’imi e aha tā Samuela i rave ’o tē nehenehe e tauturu ia tātou i roto i tā tātou mau tūtavara’a ’ia fa’aro’o ’e ’ia ha’apa’o i te reo o te Fatu. E nehenehe ato’a ’outou e ani e piti pīahi ’ia ha’uti fa’ahou i te mau mea i tupu i rotopū ia Samuela ’e ’o Elia.

• I te tahi taime, e ’ite tātou ia tātou iho i roto i te hō’ē tupura’a mai ia Elia— e rāve’a tā tātou nō te tauturu i te hō’ē ta’ata ’ia ’ite i te reo o te Fatu. Penei a’e e nehenehe te mau pīahi e fa’a’ite mai e mea nāhea tō rātou ravera’a i teie nō te mau hoa, te mau melo o te ’utuāfare, ’aore rā, nō vetahi ’ē. E aha te mau pāpa’ira’a mo’a ’aore rā, te mau ’itera’a tā tātou i fa’a’ite nō te tauturu ia vetahi ’ē ’ia hāro’aro’a e mea nāhea te Fatu ’ia paraparau mai ia tātou ? (hi’o, ’ei hi’ora’a, Te Parau Ha’api’ira’a ’e te mau Parau Fafau 6:22–23 ; 8:2–3 ; 9:7–9).

Te tahi atu mau rāve’a tauturu

’Aita tātou i vai ’ōtahi noa.

’Ua ha’api’i mai te peresideni Elaine S. Dalton :

« I te tahi taime, e arata’i te tere o tē orara’a nei ia tātou i ni’a i te mau haere’a mana’o-’ore-hia. Tē vai ra te mau pu’u ’e te mau tīpu’ura’a i ni’a i te purūmu e’ita hō’ē ’o tātou e ’ite atu. Terā rā, i mua i teie mau pu’u ’e te mau tīpu’ura’a, tē vai ato’a ra te rāve’a—e rāve’a nō te mā’iti i tā tātou pāhonora’a ’e tā tātou fa’anahora’a ’ohipa. E nehenehe te mau fifi i roto i te orara’a e riro ’ei mau rāve’a nō te tauturu ia tātou ’ia ha’afātata atu i te Fa’aora ’e ’ia ti’aturi hope a’e iāna. I roto i te ’ohipa nō te orara’a i pīha’i iho iāna i te mahana tāta’itahi, ’e fa’ahotu tātou i te mau huru ’e te mau maita’i o te Mesia. […]

« Mai ia Ruth e ’o Hana, e ’ite tātou pā’āto’a i te ’ati. E’ita paha tātou e māramarama i te mau taime ato’a i te ’ōpuara’a a te Fatu nō tō tātou orara’a, terā rā tē fa’a’ite pāpū atu nei au ē, e’ita tātou e vai ’ōtahi noa. Tei pīha’i iho ’oia ia tātou i te mau taime ato’a, E ’ore roa e ti’a ia ’outou ’ia ’ite nā roto i tō ’outou mata ta’ata noa nei nō teie taime nei, i te ’ōpuara’a nō tō ’outou Atua nō ni’a i terā ra mau mea ’o tē tupu a muri atu ra, ’e te hanahana ho’i ’o tē tae mai i muri a’e i te mau ’ati e rave rahi ra’ [Te Parau Ha’api’ira’a ’e te mau Parau Fafau 58:3] » (« Lessons from Ruth and Hannah Te mau ha’api’ira’a nō roto mai ia Ruta ’e ’o Hana$ », Ensign, ’Ēperēra 2006, 35, 37).

’A hi’o ato’a Ioane 14:18 ; Alama 38:5.

Ha’amaita’ira’a i tā tātou ha’api’ira’a

E mea maita’i ’ia parau ē « ’Aita vau i ’ite ». ’A tāmata ai ’outou i te pāhono maita’i roa i te mau uira’a a tā ’outou mau pīahi, ’aita te Atua e tīa’i nei ’ia ’ite ’outou i te mau mea ato’a. ’Aita ana’e ’outou i ’ite nāhea ’ia pāhono i te hō’ē mea, ’a fāri’i i te reira, ’e ’a fa’a’ite i te ’itera’a pāpū nō te mea tā ’outou i ’ite. (Hi’o 1 Nephi 11:16–17 ; Ha’api’ira’a mai tā te Fa’aora, 24.)