Te ari’i Davida e parahi nei i ni’a i te terono

Te ari’i Davida tei fa’atōronahia, nā Jerry Miles Harston

20–26 nō Tiunu

2 Samuela 5–7 ; 11–12 ; Te mau Ari’i 1 3 ; 8 ; 11

« E tō ’oe ra bāsileia e mau ïa i mua ia ’oe ra »

’A tuatāpapa ai ’outou i te mau pāpa’ira’a mo’a, ’a ’imi nā roto i te pure ’ia ’ite, e aha te mau parau tumu e riro ’ei mea maita’i roa nō te mau melo nō tā ’outou piha ha’api’ira’a, ’ia ti’a ho’i ia ’outou ’ia rōtahi i ni’a i tō rātou mau hina’aro.

Pāpa’i i te mau mana’o e tae mai

ītona fa’a’itera’a

Tītau i te mana’o

Nō te ’ite i te mea tei riro ’ei mea faufa’a nō te mau pīah i roto i tā rātou tuatāpapara’a pāpa’ira’a mo’a, e nehenehe ’outou e ani ia rātou ’ia pāpa’i i te fa’ahorora’a o te hō’ē ’īrava tei fa’auru ia rātou, i ni’a i te mau tuha’a ’api parau, ’e ’ia tu’u i te mau tuha’a ’api parau i roto i te hō’ē fa’ari’i. I muri iho e nehenehe te mau pīahi e mā’iti i te mau tuha’a ’api parau i roto i te fa’ari’i, ’e e nehenehe te piha ha’api’ira’a e tai’o ’e e ’āparau i te mau ’īrava.

ītona ha’api’ira’a

Ha’api’i i te ha’api’ira’a tumu

2 Samuela 6:1–8

E ti’a ia tātou ’ia rave i te ’ohipa a te Atua mai te au i tāna ravera’a.

• E nehenehe ’outou e ani i te mau pīahi ’ia tai’o i te 2 Samuela 6:1–8 ’e ’ia feruri e aha te mau fa’aarara’a a teie ’ā’amu nō tātou i teie mahana. E nehenehe te fa’ahitira’a parau a Brigham Young i roto i « Te tahi atu mau rāve’a tauturu » e tauturu. E aha te tahi mau rāve’a e ti’a ia tātou ’ia tāmata i te rave i te ’ohipa a te Atua nā roto i te tahi ravera’a ta’a ’ē atu i tāna i fa’aue mai ? Nō te aha e mea ataata te reira ? Penei a’e e nehenehe te mau pīahi e fa’a’ite mai i te mau ’itera’a i reira rātou i te ha’api’ira’a mai ’ia ti’aturi i te arata’ira’a tā te Fatu e hōro’a mai nō te rave i tāna ’ohipa.

2 Samuela 11

E ti’a ia tātou ’ia vai ara noa i mua i te hara

• E nehenehe te ha’api’ira’a mai i te mau mā’itira’a fifi a Davida tei pāpa’ihia i roto i te 2 Samuela 11 e tauturu ia tātou ’ia ha’apae i te mau hape mai te reira te huru. Penei a’e e nehenehe te piha ha’api’ira’a e tai’o ’āmui i te 2 Samuela 11:1–17 ’e ’ia ’imi i te mau mā’itira’a tā Davida i rave tei arata’i iāna ’ia rave i te hara. E aha tā Davida e nehenehe e rave ta’a ’ē atu ? E nehenehe ato’a ’outou e ani te mau melo o te piha ha’api’ira’a ’ia pāpa’i i te hō’ē pereota ’o te nehenehe e tauturu i te hō’ē ta’ata ’ia ha’apae i te hara, ma te ha’apa’o i te mea tā rātou i ha’api’i mai i roto i te 2 Samuela 11. ’A ani i te tahi mau pīahi ’ia fa’a’ite mai i tō rātou mau mana’o.

• E nehenehe ’outou e fa’a’ohipa i te 2 Samuela 11 nō te tāu’aparau i te mau fifi o te hōho’a faufau ’e te tahi atu mau hara i te pae ’āpeni. Nō te rave i te reira, e nehenehe te piha ha’api’ira’a e hi’o ’āmui fa’ahou i te tahi mau tuha’a o te parau poro’i a Elder L. Whitney Clayton « ’Ia ha’amaita’ihia te feiā ato’a tei mā te ’ā’au » (Liahona, Novema 2007, 51–53). E aha te parau a’o tā Elder Clayton e hōro’a nei nō ni’a i te mau fifi o te hōho’a faufau ? E nehenehe ato’a ’outou e māta’ita’i i te video « ’Ia hi’o i ni’a » (ChurchofJesusChrist.org). Nāhea e ti’a ai i te Fa’aora ’ia tauturu ia tātou ’ia upo’oti’a i ni’a i teie mau fa’ahemara’a ’aore rā, teie mau huru peu ?

  Penei a’e e nehenehe te mau pīahi e fa’a’ite mai i te mau mana’o tā rātou i feruri, e mea maita’i i roto i tā rātou mau tūtavara’a nō te pāruru i tō rātou ’utuāfare i te hōho’a faufau ’aore rā, nō te upo’oti’a i ni’a i te mau hope’ara’a o te hōho’a faufau. E nehenehe te parau poro’i a te tuahine Linda S. Reeves « Pārurura’a i mua i te hōho’a faufau—te hō’ē ’utuāfare fa’atumuhia i ni’a i te Mesia e tauturu (Liahona, Mē 2014, 15–17 ; hi’o ato’a « Te tahi atu mau rāve’a tauturu »).

Hiero nō Barranquilla, Colombia

Te hiero ’o te fare ïa o te Fatu.

Te mau Ari’i 1 8:22–61

E hōpoi mai te mau hiero i te mau ha’amaita’ira’a.

• Tē fa’a’ite nei Te mau Ari’i 1 8 i te mau ha’amaita’ira’a tā Solomona i ’imi nō tōna mau ta’ata ’a oti ai te hiero. E nehenehe ’outou e vāhi i te mau ’īrava 22–61 nā ni’a i te mau pīahi ’e e ani ia rātou ’ia fa’a’ite mai i te hō’ē mea tā rātou e ’ite nei i roto i tā rātou mau ’īrava ’o tē fa’auru ia rātou i roto i tā rātou ha’amorira’a i te hiero. E nehenehe te mau pīahi e fa’a’ite mai nāhea te ha’amorira’a i roto i te fare o te Fatu i te ha’amaita’i i tō rātou orara’a.

Te mau Ari’i 1 8:61 ; 11:1–11

« ’Aita a’era tāna ’ā’au i au i tāna Atua ia lehova ».

• E aha te aura’a o te parau ra, « e fa’aau ho’i i tō [tātou] ’ā’au i tō tātou Atua ia Iehova » ? (Te mau Ari’i 1 8:61). E mea ta’a ’ē ānei te reira i tā tātou mau ’ohipa ’ia maita’i roa ? Nāhea ? ’A feruri ai te mau pīahi i teie mau uira’a, e nehenehe rātou e tai’o i Te mau Ari’i 1 11:1–11 ’e ’ia hi’o e aha tā te Fatu e parau nei nō ni’a i te ’ā’au o Solomona. Nāhea tātou i te ’ape i te mau hape tāna i rave ?

ītona nō te tahi atu mau rāve’a tauturu

Te tahi atu mau rāve’a tauturu

Tāpe’a i te ’āfata ’eiaha ’ia topa.

’Ua ha’api’i te peresideni Brigham Young ē, « ’Eiaha e ha’uti i te bāsileia, nā te Fatu e tāpe’a i te ’āfata; e mai te mea e ha’uti’uti ’oia, ’e e tītauhia ’ia tāpe’a ’eiaha ’ia topa, mai te mea e mea hahi ri’i te purūmu, ’e e nehenehe e ta’ahuri, ’a ha’apa’o maita’i ’ia fa’atoro ana’e i te rima nō te tāpe’a ’eiaha ’ia ta’ahuri ; ’eiaha e ha’apa’o roa atu i te mau mea e ’ere i tā tātou ; ’a vaiiho noa, nā te Atua teie ’ohipa » (A’ora’a nā Brigham Young, sel. John A. Widtsoe [1954], 66).

Pārurura’a i te mau ’utuāfare i te hōho’a faufau

’Ua ha’api’i mai te tuahine Linda S. Reeves : « Nahea tātou i te pāruru i tā tātou mau tamari’i ’e te feiā ’āpī ? E mau mauha’a maita’i te mau tīti’a, terā rā, te tīti’a rahi a’e i roto i te ao nei, te tīti’a hō’ē roa e ’ohipa maita’i roa, ’o te tīti’a i roto ïa o te ta’ata iho, nō roto mai i te hō’ē ’itera’a pāpū hōhonu ’e te tāmau o te here o tō tātou Metua i te ao ra ’e te tusia tāra’ehara a te Fa’aora nō tātou tāta’itahi » ( Pārurura’a i te hōho’a faufau— hō’ē ’utuāfare fa’atumuhia i ni’a i te Mesia », Liahona, Mē 2014, 16; hi’o ato’a Joy D. Jones, « Addressing Pornography: Protect, Respond, and Heal [Pāto’i i te hōho’a faufau : Pāruru, pāhono, ’e fa’aora] », Ensign, ’Ātopa 2019, 22–27).

Ha’amaita’ira’a i tā tātou ha’api’ira’a

’Ia pāpū ē tē ha’api’i ra ’outou i te ha’api’ira’a tumu mau. « ’A ui tāmau ia ’outou iho, ‘nāhea te mea tā’u e ha’api’i nei i te tauturu i tā’u mau pīahi ’ia patu i te fa’aro’o i te Mesia, ’ia tātarahapa, ’ia rave ’e ’ia ha’apa’o i te mau fafaura’a ’e te Atua, ’e ’ia fāri’i i te Vārua Maita’i ?’ » (Ha’api’ira’a mai tā te Fa’aora, 20).