« 27 nō Tiunu–3 nō Tiurai. Te mau Ari’i 1 17–19 : ‘’O Iehova te Atua ra, ’a pe’e iāna’ », Mai, pe’e mai—nō te Haʼapiʼiraʼa Sābati : Faufa’a Tahito 2022 (2021)

« 27 nō Tiunu–3 nō Tiurai. Te mau Ari’i 1 17–19 », Mai, pe’e mai—nō te Haʼapiʼiraʼa Sābati : 2022

Tē ’aro nei Elia i te mau tahu’a nō Baala nā Jerry Harston

27 nō Tiunu–3 nō Tiurai

Te mau Ari’i 1 17–19

« ’O Iehova te Atua ra, ’a pe’e iāna »

Te fā o te mau pāpa’ira’a mo’a—’e tā tā ’outou piha ha’api’ira’a—’o te patura’a ïa i te fa’aro’o i te Metua i te ao ra ’e ia Iesu Mesia. ’A vaiiho i teie ’ōpuara’a ’ia arata’i i te mau fa’aotira’a tā ’outou e rave nō ni’a i te mau mea e ha’api’i ’e te mau uira’a e ui.

Pāpa’i i te mau mana’o e tae mai

Tītau i te mana’o

Nō te tauturu i te mau melo o te piha ha’api’ira’a ’ia fa’a’ite mai i te mau mana’o nō ni’a i te Te mau Ari’i 1 17–19, e nehenehe ’outou e ani ia rātou ’ia feruri i te hō’ē upo’o parau nō teie mau pene tāta’itahi. E aha te mau ’īrava tei ha’aferuri ia rātou i teie mau upo’o parau ?

Ha’api’i i te ha’api’ira’a tumu

Te mau Ari’i 1 17:8–16 ; 19:19–21

Te hō’ē anira’a ’ia fa’atusia, ’o te hō’ē ïa rāve’a nō te fa’a’ohipa i tō tātou fa’aro’o.

E nehenehe te hi’ora’a o te vahine ’ivi nō Zarephate e fa’auru i te mau pīahi i roto i te mau taime ’a tāmatahia ai tō rātou fa’aro’o. E nehenehe ’outou e ha’amata nā roto i te anira’a ia rātou ’ia tāpura i te mau mā’itira’a e tītau i te fa’aro’o ia Iesu Mesia. I muri iho, e nehenehe rātou e tai’o i te ’ā’amu i roto Te mau Ari’i 1 17:8–16 ’e e paraparau nō ni’a i te mau mea tā teie ’ā’amu e ha’api’i nei ia rātou nō ni’a i te fa’a’ohipara’a i te fa’aro’o. ’A fa’aitoito i te mau pīahi ’ia fa’a’ite mai i tō rātou mau mana’o nō ni’a i te vahine ’ivi, ’e e nāhea tōna hi’ora’a i te fa’auru ia rātou ’ia fa’a’ohipa i tō rātou fa’aro’o. Nāhea tōna fa’aro’o i te ’aifāito i tō Elia tei fa’a’itehia i roto Te mau Ari’i 1 19:19–21? E hina’aro paha te mau pīahi e fa’a’ite mai i te mau tusia tā rātou i rave nō te Fatu, ’e e mea nāhea tōna ha’amaita’ira’a ia rātou.
E nehenehe ato’a te ’ā’amu nō te vahine ’ivi nō Zarephate e ha’api’i mai ia tātou nō ni’a i te mau ha’amaita’ira’a e fāri’ihia nā roto mai i te tusia. E nehenehe ’outou e ani i te mau pīahi ’ia feruri nāhea rātou ’ia pāhono i te mau fa’ahitira’a parau mai teie : « E’ita e mara’a iā’u ’ia ’aufau i te tuha’a ’ahuru » ’aore rā, « e mea rahi roa tā’u ’ohipa nō te fāri’i i te hō’ē ’ohipa aupurura’a ». E aha tā Te mau Ari’i 1 17:8–16 e ha’api’i nei ia tātou ’o tē nehenehe e fa’aau i ni’a i teie mau fa’ahitira’a parau ? Nāhea tō tātou ’itera’a nō ni’a i te Fa’aora e tauturu ai ia tātou ’ia ani-ana’e-hia ia tātou ’ia fa’atusia ? E nehenehe ato’a te mau parau a Elder Lynn G. Robbins i roto « Te tahi atu mau rāve’a tauturu » e tauturu.

Te mau Ari’i 1 18:17–39

« ’O Iehova te Atua ra, ’a pe’e iāna ».

E nehenehe te hō’ē tāu’aparaura’a nō ni’a i te Te mau Ari’i 1 18:17–39 e tauturu i te mau pīahi ’ia fafau rahi atu ā ia rātou ’ia pe’e ia Iesu Mesia ’e ’ia ti’aturi iāna. I muri iho i te hi’opo’ara’a i te ’ā’amu ’e te piha ha’api’ira’a, e nehenehe ’outou e pāpa’i i ni’a i te tāpura ’ere’ere i te uira’a tā Elia i ui atu i te mau ta’ata nō ‘Īserā’ela : « Mai te aha te maoro о tena na fē’a’a-piti-ra’a ? » (’īrava 21). ’A vaiiho i te mau pīahi ’ia fa’a’ite mai i tō rātou mana’o nō ni’a i te aura’a o teie uira’a. E aha te tahi mau tumu e « fē’a’a piti » ai te ta’ata (’oia ho’i e ’ōti’ati’a, e tapitapi, ’aore rā, e tūte’ite’i ai) i roto e pe’e ānei i Fatu ’e e pe’e ānei ’ia Baala ? Nō te aha tātou e pāpū ’ore ai i te tahi taime nō ni’a i te pe’era’a ia Iesu Mesia ? E nehenehe te mau pīahi e fa’a’ite mai i te mau ’itera’a tei tauturu ia rātou ’ia mā’iti ’ia pe’e i te Fa’aora.

Te mau Ari’i 1 19:1–12

Pinepine te Fatu i te paraparau ma te marū ’e te ’ōhie.

E rave rahi ta’ata e ’aro nei nō te ’ite ē, e aha te taime e paraparau mai ai te Fatu ia rātou. Nō te tauturu i te mau pīahi ’ia ’ite maita’i a’e i te reo o te Fatu, e nehenehe ’outou e ani ia rātou ’ia tai’o i te Te mau Ari’i 1 19:1–12 ’e ’ia fa’a’ite mai e aha tā Elia i ha’api’i mai. Penei a’e e nehenehe te mau pīahi e fa’a’ite mai i te mau ’itera’a tei ha’api’i ia rātou i te mau rāve’a rau e nāhea te Fatu i te paraparau ia rātou. E nehenehe ’outou e fa’a’ite i te video « How Can I Feel the Holy Ghost More Often ? [Nāhea vau e ’ite pinepine atu i te Vārua Maita’i ?] » (nō roto mai « Mata ’e mata e te peresideni Eyring ’e ’o Elder Holland » [ha’apūrorora’a nā te feiā ’āpī ’ati ti’a te ao nei, 4 nō Māti 2017], ChurchofJesusChrist.org).
Nō te tauturu i te ’āparaura’a nō ni’a i te pereota « e reo iti ha’iha’i », e nehenehe ’outou e fa’a’ite i te mau tao’a (’aore rā, te mau hōho’a o te mau tao’a) ’o tē nehenehe e tauturu i te mau pīahi ’ia feruri i te pereota. E nehenehe te mau pīahi e fa’a’ite i te tahi atu mau hi’ora’a. Nō te aha te mau ta’o « iti » ’e « ha’iha’i » e riro ai ’ei mau rāve’a maita’i nō te fa’ata’a i te reo o te Vārua ? Nō te tahi atu mau fa’ata’ara’a, e nehenehe te mau pīahi e tai’o i te mau pāpa’ira’a mo’a mai te Helamana 5:30 ; 3 Nephi 11:3–7 ; Te Parau Ha’api’ira’a ’e te mau Parau Fafau 6:22–23 ; 8:2–3 ; 9:8–9 ; 11:12–14 ; 36:2. E nehenehe rātou e fa’a’ite mai i te tahi atu mau pāpa’ira’a mo’a nō ni’a i te ’itera’a i te Vārua. E aha tā teie mau pāpa’ira’a mo’a e parau nei nō ni’a i te mea e tītauhia ia tātou ’ia rave nō te fa’aro’o i te reo o te Fatu ? E nehenehe te mau video « Feeling the Holy Ghost [Te ’itera’a i te Vārua Maita’i] » ’aore rā, « Voice of the Spirit [Te reo o te Vārua] » e riro ’ei mea maita’i (ChurchofJesusChrist.org).

3:17

3:55

Te tahi atu mau rāve’a tauturu

Te vahine ’ivi nō Zarephate.

’Ua parau Elder Lynn G. Robbins : « ’Ua māramarama Elia i te parau ha’api’ira’a ē, e tae mai te mau ha’amaita’ira’a i muri a’e i te tāmatara’a o tō tātou fa’aro’o [hi’o Etera 12:6 ; Te Parau Ha’api’ira’a ’e te mau Parau Fafau 132:5]. E ’ere ’oia i te ta’ata ’ā’au pipiri. ‘Ei tāvini nā te Fatu, tei reira Elia nō te hōro’a, ’eiaha nō te rave [hi’o Te mau Ari’i 1 17:13–16]. […] Hō’ē tumu e fa’ahōho’a ai te Fatu i te mau parau ha’api’ira’a nā roto i te mau huru ta’a ’ē roa, nō te fa’a’ore ïa i te mau ’ōtohera’a. Mai te mea ’ua hina’aro te Fatu ’ia ’aufau ato’a te vahine ’ivi veve roa a’e i tāna lepeta, e aha ïa te vaira’a o te feiā ato’a e mana’o ra ē, e ’ere i te mea tano ’aore rā, i te mea ’ōhie ’ia fa’atusia ? » (« Tuha’a ’ahuru—hō’ē fa’auera’a nō te feiā veve ato’a », Liahona, Mē 2005, 35).

Ha’amaita’ira’a i tā tātou ha’api’ira’a

’Ia riro ’ei mauha’a ha’eha’a nō te Vārua. « Tā ’outou fā ’ei ’orometua ha’api’i e ’ere ïa te hōro’ara’a i te hō’ē ha’api’ira’a fa’ahiahia, ’o tē tauturura’a rā ia vetahi ’ē ’ia fāri’i i te mana o te Vārua Maita’i, ’o ’oia ho’i te ’orometua ha’api’i mau.(Ha’api’ira’a mai tā te Fa’aora, 10).