Te horo-’ē-ra’a te mau mau ’auri, nā James Tissot ’e vetahi ’ē

11–17 nō Tiurai

Te mau Ari’i 2 17–25

« ’Ua ti’aturi ’oia i te Atua o ’Īserā’ela ia Iehova »

’A hi’o i te mau mana’o tā ’outou i pāpa’i i te taime nō tā ’outou tuatāpapara’a a te ta’ata hō’ē nō Te mau Ari’i 2 17–25 i teie hepetoma. I tō ’outou mana’o, e aha te mau tuha’a nō roto mai i teie mau pene e riro ’ei mea faufa’a nō te mau melo o tā ’outou piha ha’api’ira’a ?

Pāpa’i i te mau mana’o e tae mai

Tītau i te mana’o

’Ia fa’a’ite ana’e mai te mau pīahi i te mea tā rātou i ha’api’i mai i te fare i roto i tā rātou tuatāpapara’a pāpa’ira’a mo’a, e nehenehe te tahi atu mau pīahi e fa’auruhia ’ia tuatāpapa i te mau pāpa’ira’a mo’a i te roara’a o te hepetoma. E nehenehe ’outou e ha’amata i te ha’api’ira’a nā roto i te anira’a i te mau pīahi ’ia pāhono i te hō’ē uira’a mai te « E aha tā te Vārua Maita’i i ha’api’i ia ’outou ’a tai’o ai ’outou i te mau pene i fa’ata’ahia nō teie hepetoma ?

Ha’api’i i te ha’api’ira’a tumu

Te mau Ari’i 2 18:28–36 ; 19:1–7, 14–19

E nehenehe tātou e vai ha’apa’o noa i te Fatu ’ia tāmata-ana’e-hia tō tātou fa’aro’o.

• E nehenehe te mau parau mau i roto i te Te mau Ari’i 2 18–19 e tauturu ia tātou ’ia ’ite nāhea ’ia pāhono, mai te mea tē tāmatahia ra tō tātou fa’aro’o. Nāhea ’outou i te tauturu i te mau pīahi ’ia ’ite i teie mau parau mau ? E nehenehe ’outou e ani i te mau pīahi ’ia fa’a’ite mai e rave rahi tumu e ti’aturi ai rātou i te Atua ’e i tāna fa’anahonahora’a. I muri iho, e nehenehe rātou e ’imi i te Te mau Ari’i 2 18:28–35, ma te ’imi i te mau tumu tā te mau Asiria i hōro’a i ta’ata i Ierusalema nō te ’ore e ti’aturi i te Fatu. Nāhea Sātane ’ia tāmata i te tāparu ia tātou ’ia fa’atapitapi i tō tātou fa’aro’o i teie mahana ? I muri iho e nehenehe te mau pīahi e ’imi i te Te mau Ari’i 2 19:1–7, 14–19, e aha tā tātou e ha’api’i mai nā roto mai ia Hezekia nō ni’a e nāhea ’ia pāhono i te taime ’a tāmatahia ai tō tātou fa’aro’o. E mea nāhea te Fatu i te tauturu ia tātou ’ia upo’oti’a i ni’a i te mau tāmatara’a o tō tātou fa’aro’o ? E aha te tahi atu mau mana’o tō te pīahi nō te fa’a’āpī i tō rātou fa’aro’o ’e nō te ti’aturi i te Fatu ?

• E nehenehe ’outou e ani i te mau pīahi ’ia haere mai i te piha ha’api’ira’a ma te ineine nō te fa’a’ite poto mai i te ’āparaura’a i rotopū i te mau Asiria ’e te mau fa’atere o Hezekia i pīha’i iho i te mau papa’i o Ierusalema (hi’o Te mau Ari’i 2 18:17–36). Hou ’a fa’ati’a ai ’oia i te ’ā’amu, ’a ani i te mau pīahi ’ia feruri ē, e mau ta’ata rātou nō Ierusalema e fa’aro’o ra i teie ’āparaura’a. E aha te mau mana’o e tupu mai i roto ia rātou ? E aha tā rātou e nehenehe e rave ? E nehenehe ’outou e hōro’a i te mau pīahi i te tahi mau tuha’a o te parau poro’i a Elder David A. Bednar, « Nō reira, ’ua fa’a’ore rātou i tō rātou mata’u » (Liahona, Mē 2015, 46–49) ’e ’a ani ia rātou ’ia ’imi i te a’ora’a e nehenehe e pāturu ia rātou i roto i te mau taime mata’u ’e te mana’o tapitapi. E mea nāhea tō tātou fa’aro’o ia Iesu Mesia i te pāturura’a ia tātou i roto i te mau taime fifi ?

Te mau Ari’i 2 22:8–20 ;23

E nehenehe te mau pāpa’ira’a mo’a e fa’afāriu i tō tātou ’ā’au i te Fatu.

• Te ’āparaura’a i te mana o te parau a te Atua i roto i te orara’a o te ari’i Iosia ’e tōna mau ta’ata, e nehenehe te reira e fa’auru i te mau pīahi ’ia ’imi ato’a i te reira mana i roto i tō rātou iho orara’a. E nehenehe ’outou e ha’amata i te hō’ē ’āparaura’a nā roto i te anira’a i te mau pīahi ’ia feruri e aha te ta’a-’ē-ra’a e tupu i roto i tō rātou orara’a ’āhiri ē, ’aita i roa’a ia rātou te mau pāpa’ira’a mo’a. I muri iho e nehenehe rātou e ’imi Te mau Ari’i 2 22:8–11 ; 23:1–6, 21, 24 nō te ’ite e mea nāhea Iosia ’e tōna mau ta’ata i te tauira’a, i te taime ’a fa’aro’o ai rātou i te parau a te Atua mai roto mai i te mau pāpa’ira’a mo’a tei ’ite-fa’ahou-hia i roto i te hiero, ’aita i maoro iho nei. E mea nāhea tō te mau pāpa’ira’a mo’a tauturura’a ia tātou ’ia ha’afātata atu i te Metua i te ao ra ’e ia Iesu Mesia ?

• Te mau tauira’a rahi tā te parau a te Atua i fa’atupu i ni’a ia Iosia ’e i te mau ta’ata e rave rahi i roto i tōna bāsileia, e nehenehe te reira e fa’auru i te mau pīahi ’ia tītau ato’a i te reira mau tauira’a i roto i tō rātou orara’a. I muri a’e i te ’āparaura’a i ni’a i teie mau tauira’a (hi’o Te mau Ari’i 2 23:1–6, 21, 24), e nehenehe te mau pīahi e fa’a’ite mai i te mau ’itera’a nō ni’a i te fa’atupura’a te hō’ē pāpa’ira’a ’aore rā, te hō’ē ’ā’amu i te hō’ē ta’a-’ē-ra’a i roto i tō rātou orara’a. Penei a’e e nehenehe rātou e paraparau mai nō ni’a i te tumu i fāri’i maita’i ai rātou i te parau poro’i a taua pāpa’ira’a mo’a ra i taua taime ra i roto i tō rātou orara’a. E nehenehe te fa’ahitira’a parau i roto i « Te tahi atu mau rāve’a tauturu  » e ha’amaita’i atu ā i tā ’outou ’āparaura’a.

  

  E nehenehe te mau pāpa’ira’a mo’a e tauturu ’ia fa’afāriu i tō tātou ’ā’au i te Fatu ra.

Te tahi atu mau rāve’a tauturu

’A ’ite fa’ahou mai i te mau pāpa’ira’a mo’a.

’Ua parau te peresideni Spencer W. Kimball :

« ’Ua ’ite pāpū vau ē, e ti’a ia tātou tāta’itahi, i te tahi taime i roto i tō tātou orara’a, ’ia ’ite fa’ahou mai i te mau pāpa’ira’a mo’a nō tātou iho—’e ’eiaha e ’ite fa’ahou i te reira hō’ē noa taime, e nā ni’a iho rā ’e nā ni’a iho fa’ahou i te ’ite fa’ahou i te reira.

« Tē mana’o pūai nei au ē, e ti’a ia tātou pā’āto’a ’ia ho’i fa’ahou i ni’a i te mau pāpa’ira’a mo’a mai tā te ari’i Iosia i rave ’e ’ia vaiiho i te reira ’ia ’ohipa pūai i roto ia tātou, ma te tura’i ia tātou i roto i te hō’ē hina’aro ’āueue ’ore ’ia tāvini i te Fatu. […]

« ’Ua ’ite au ē, mai te mea e tāu’a ’ore ri’i au i roto i tō’u mau aura’a e te Atua, ’e ’ia feruri ana‘e au ē, ’aita te Atua e fa’aro’o mai ra iā’u, ’e ’aita e paraparau mai iā’u, mai te huru ra tei te ātea ’ē roa vau, mea ātea roa. Mai te mea rā e hopu vau iā’u i roto i te mau pāpa‘ira’a mo’a e iti mai te āteara’a ’e e ho’i mai te vāruara’a. Tē hitimahuta nei au iā’u iho ’ia here pūai atu i te feiā tā’u e ti’a ’ia here ma tō’u ’ā’au ato’a, tō’u vārua ato’a, ’e tō’u pūai ato’a, ’e nā roto i te here-rahi-ra’a ia rātou, tē ’ite nei au e mea ’ōhie a’e nō’u ’ia fa’atura i tā rātou mau parau a’o » (Te mau Ha’api’ira’a a te mau peresideni o te ’Ēkālesia : Spencer W. Kimball [2006], 62–63, 67).

Ha’amaita’ira’a i tā tātou ha’api’ira’a

Fa’a’ohipa i te mau mātēria tauturu nō te tuatāpapara’a pāpa’ira’a mo’a Hō’ē rāve’a nō te tauturu i te mau pīahi ’ia hāro’aro’a i te mau pāpa’ira’a mo’a, ’o te fa’atorora’a ïa ia rātou i ni’a i te mau rāve’a tauturu, mai te arata’i o te mau pāpa’ira’a mo’a, ’e te mau pāpa’ira’a o te mau tumu parau ’evanelia (ChurchofJesusChrist.org). E nehenehe ato’a e ’itehia ia rātou te mau ha’amāramaramara’a i roto i te mau tuha’a « Mau mana’o e tāpe’a noa i roto i te ferurira’a » i roto i te Mai, pee mai—nō te ta’ata hō’ē ’e te ’utuāfare.