Tē fa’a’ite nei Elia i tōna tāvini i te mau pere’o’o auahi

Fa’ahōho’ara’a nō Elia i te fa’a’itera’a i tōna tāvini i te mau pere’o’o auahi, © Review & Herald Publishing/licensed nō roto goodsalt.com

4–10 nō Tiurai

Te mau Ari’i 2 2–7

« E peropheta tei ’Īserā’ela nei »

’A fa’aineine ai ’outou nō te ha’api’i, ’a tai’o i te Te mau Ari’i 2 2–7 ma te ’imi i te fa’aurura’a nō tō ’outou iho orara’a. I muri iho, ’a fa’aro’o i te mau muhumuhu nō ni’a i te mau parau poro’i ’o tē ha’amaita’i i te mau melo o tā ’outou piha ha’api’ira’a.

Pāpa’i i te mau mana’o e tae mai

’ītona fa’a’itera’a

Tītau i te mana’o

I te tahi taime, e hina’aro te mau pīahi i te taime nō te hi’ohi’o poto noa i te mau pene tā rātou i tai’o hou ’a ti’a ai ia rātou ’ia fa’a’ite mai i te mau mana’o nō roto mai i tā rātou iho tuatāpapara’a pāpa’ira’a mo’a. ’A tāmata i te hōro’a i te tahi tau minuti nō teie, i te ha’amatara’a o te ha’api’ira’a; i muri iho, ’a ani i te mau pīahi’ia fa’a’ite mai i te hō’ē mea tā rātou i ha’api’i mai.

ītona ha’api’ira’a

Ha’api’i i te ha’api’ira’a tumu

Te mau Ari’i 2 2–6

E nehenehe te Atua e fa’atupu i te mau temeio i roto i tō tātou orara’a.

• ’A ’āparau ai ’outou i te mau temeio i roto i te Te mau Ari’i 2 2–6, e mea maita’i ’ia ani i te mau pīahi ’ia tātara i te aura’a o te ta’o temeio. E nehenehe ’outou e fa’a’ite i teie hi’ora’a nō te peresideni Howard W. Hunter : « [te mau temeio] ’o te mau fa’a’itera’a ïa o te mana o te [Atua] ’o tē ’ore roa e ti’a ia tātou ’ia fa’ata’a ’aore rā, ’ia hāro’aro’a. […] E mea pāpū a’e teie mau tāpa’o ’e teie mau mea māere i roto i te orara’a ’e i te tau tāvinira’a o Iesu Mesia, te tamaiti mau a te Atua iho. Noa atu rā te māere ’e te fa’ahiahia o te reira, ’ua riro noa te rahira’a temeio a te Mesia ’ei anapara’a nō terā mau mea fa’ahiahia rarahi tā tōna metua i fa’atupu nā mua a’e iāna, ’e tāna e tāmau noa nei i te fa’atupu ’āti a’e ia tātou. E rahi noa te mau temeio i te mau taime ato’a mai te mea ē, e mata tō tātou nō te hi’o ’e e tari’a nō te fa’aro’o » (« The God That Doest Wonders [Te Atua ’o te fa’atupu i te mau mea māere] », Ensign, Mē 1989, 15–16). Nāhea teie mau mana’o i te tauturu ia tātou ’ia ’ite i te rima o te Atua i roto i tō tātou orara’a ?

• E nehenehe e ani i te mau pīahi ’ia tāpura i te tahi mau temeio tei fa’ata’ahia mai i roto i Te mau Ari’i 2 2–6. E aha tā tātou i ha’api’i mai nō ni’a i te Fatu i roto i teie mau temeio ? E hina’aro ato’a paha te mau pīahi e paraparau nō ni’a i te mau temeio—te mea rahi ’aore rā te mea iti—’o tā rātou ’aore rā, tā tō tātou ’utuāfare i fāri’i. Nāhea e ti’a ai ia tātou ’ia ’’ite maita’i a’e i te mau temeio a te Atua i roto i tō tātou orara’a—tae noa atu i terā mau temeio ta’a ’ē atu i tā tātou i ti’aturi ?

• E nehenehe te mau pīahi e ’ite i te fa’aurura’a ’ia fa’aau-ana’e-hia te tahi mau temeio tei ravehia e Elia, i te tahi atu mau temeio tā Iesu Mesia i fa’atupu (hi’o Te mau Ari’i 2 4:8–37 ’e Luka 7:11–16 ; Te mau Ari’i 2 4:42–44 ’e Ioane 6:1–13 ; Te mau Ari’i 2 5:1–15 ’e Luka 17:11–19). E aha tā teie mau temeio e ha’api’i nei ia tātou nō ni’a i te Fa’aora ’e tāna mau peropheta ?

Te mau Ari’i 2 5:1–19

Mai te mea e mea ha’eha’a ’e te ha’apa’o tātou, e nehenehe Iesu Mesia e fa’aora ia tātou.

• Hō’ē ha’api’ira’a tā tātou e nehenehe e ’apo mai i roto i te fa’aorara’a o te lepera o Naamana, ’oia ho’i, te faufa’a nō te ha’eha’a. Nō te ha’amata i te hō’ē ’āparaura’a, e nehenehe ’outou e pāpa’i i ni’a i te tāpura ’ere’ere Te te’ote’o o Naamana ’e Te ha’eha’a o Naamana. E nehenehe te mau pīahi e ’imi i Te mau Ari’i 2 5:1–19 ’e ’ia pāpa’i i ni’a i te tāpura ’ere’ere i te mau pereota ’o te fa’ahōho’a i te te’ote’o ’aore rā, i te ha’eha’a o Naamana. Nāhea tātou i te riro mai ia Naamana te huru i te tahi taime ? Nāhea tātou i te riro mai tōna mau tāvini te huru i te tahi taime ? Nāhea tātou i te ’itera’a i te mea tā Naamana i ’ite ?

• Te tahi atu ha’api’ira’a tā tātou e nehenehe e ’apo mai i roto i teie ’ā’amu, ’o te faufa’a ïa i te ha’apa’ora’a i te parau a te Atua i roto i te mau mea ha’iha’i. E nehenehe ’outou e ha’amata nā roto i te tai’ora’a i te Te mau Ari’i 2 5:9–12 ’e te anira’a i te mau mana’o o te mau pīahi nō ni’a i te tumu i « haere ’ē ai Naamana ma te riri » (’īrava 12). Nō te aha tātou e au a’e ai i te tahi taime ’ia rave « i te mau ’ohipa rahi » tā te Atua e ani mai ia tātou, ’eiaha rā te mau ’ohipa ri’i ’ōhie ? (’īrava 13). E aha te faufa’a o te ravera’a i teie mau ’ohipa ’ōhie ?

Te mau Ari’i 2 6:8–23

« ’Eiaha e mata’u, e rahi tō tātou e iti tō rātou ».

• Tē fāri’i nei tātou pā’āto’a i te mau taime ’a tupu ai te mana’o vai ’ōtahi ’aore rā, te ri’ari’a i roto ia tātou. ’A feruri e nāhea te ’āparaura’a i te ’ā’amu i roto i Te mau Ari’i 2 6:8–23 i te tauturu i te mau melo o te piha ha’api’ira’a ’ia fāri’i i teie huru. E nehenehe ’outou e ha’amata nā roto noa i te anira’a i te mau pīahi e aha te mea tei ha’aputapū ia rātou nō ni’a i teie mau ’īrava. E nehenehe ato’a rātou e fa’a’ite mai i te mau ’itera’a i te taime « ’a fa’a’ara’ara ai te Fatu i tō [rātou] mata » ’īrava 17) ’e ’a tauturu ai ia rātou ’ia ’ite ē, ’aita rātou i vai ’ōtahi noa (hi’o ato’a « Te tahi atu mau rāve’a tauturu »). Nāhea e ti’a ai ia tātou ’ia tauturu te tahi i te tahi ia « ’ore e mata’u » ?’īrava 16).

ītona nō te tahi atu mau rāve’a tauturu

Te tahi atu mau rāve’a tauturu

« ’Ara’ara i tō tātou mata pae vārua ».

Ma te fa’ahiti i te ’ā’amu i roto i te Te mau Ari’i 2 6:8–23, ’ua parau Elder Ronald A. Rasband :

« E tonohia mai paha te mau pere’o’o auahi ’aore rā, ’aita, nō te tāmarū i tō tātou mau mata’u ’e nō te upo’oti’a i ni’a i tō tātou mau demoni, terā rā, e mea māramarama roa te ha’api’ira’a. Tei pīha’i iho te Fatu ia tātou, tē ha’apa’o mai nei ia tātou ’e tē ha’amaita’i mai nei ia tātou nā roto i te mau rāve’a tāna ana’e e nehenehe e rave. E nehenehe te pure e ti’aoro atu ’ia ha’ama’irihia mai te pūai ’e te heheura’a tā tātou e hina’aro nō te fa’atumu i tō tātou mau mana’o i ni’a ia Iesu Mesia ’e i tāna tusia tāra’ehara. ’Ua ’ite te Fatu ē, e mata’u tātou i te tahi taime. ’Ua fārerei au i te reira ’e ’o ’outou ato’a. I roto i teie ’Ēkālesia, e mea iti paha tō tātou nūmera ’ia au i te tai’ora’a a te ao nei, terā rā, ’ia ’ara’ara ana’e tātou i tō tātou mata pae vārua, ’e rahi tō tātou, e iti tō rātou’ [Te mau Ari’i 2 6:16] » (« ’Eiaha e mata’u », Liahona, Novema 2018, 18.

Ha’amaita’ira’a i tā tātou ha’api’ira’a

’A arata’i i te mau pīahi i ni’a i te mau pāpa’ira’a mo’a. I te mau taime ato’a e nehenehe ia ’outou, ’a fa’aitoito i te mau pīahi ’ia fāriu i ni’a i te mau pāpa’ira’a mo’a ’e i te mau parau a te mau peropheta ora nō te arata’ira’a, te mau pāhonora’a i te mau uira’a, ’e te pāturura’a. Te parau a te Atua ’o te puna rahi a’e ïa o te parau mau. (Hi’o Ha’api’ira’a mai tā te Fa’aora, 21).