Droini kei Ilaisa ni vakaraitaka tiko vua nona dauveiqaravi na qiqi bukawaqa, © Review & Herald Publishing/licensed mai na goodsalt.com

4–10 ni Jiulai

2 Tui 2–7

“Sa tiko e dua na Parofita e Isireli”

Ni o vakavakarau mo veivakavulici, wilika na 2 Tui 2–7 ka vakasaqara na veivakauqeti me baleta na nomu bula. Qai vakarogoca na veivakauqeti me baleta na itukutuku ka na vakalougatataki ira na lewe ni nomu kalasi.

Vola na Veika o Vakauqeti Kina

Sureta na Veiwasei

Ena so na gauna era gadreva na lewe ni kalasi mera railesuva vakalekaleka na iwase era sa wilika ni bera ni ra wasea na veivakararamataki mai na nodra vuli ivolanikalou vakayadua. Tovolea mo vakarautaka e vica na miniti ena itekivu ni kalasi; mo qai sureti ira na lewe ni kalasi mera wasea e dua na ka era sa vulica.

Vakavulica na iVunau

2 Tui 2–6

E rawa ni cakava na cakamana na Kalou ena noda bula.

• Ni o veivosakitaka na cakamana ena 2 Tui 2–6, ena rawa ni veivuke me ra kerei me vakamacalataka na lewe ni kalasi na vosa na cakamana. E rawa ni o wasea na ivakamacala oqo mai vei Peresitedi Howard W. Hunter: “[Cakamana] sa ivakaraitaki ni nona kaukauwa na Kalou ka da sega ni rawa ni vakamacalataka se meda kila vakavinaka sara. … Na ivakatakilakila kei na kena wananavu e vakadinadinataki vakalevu ena bula kei na veiqaravi nei Jisu Karisito, na luve ni Kalou. Ia, ni sa veivakurabuitaki kei na kena totoka me vaka koya, e vuqa na cakamana i Karisito era ilova lesu walega na kena cecere ka cakava vua na Tamana ka tomana tiko na nona qaravi keda. … Ena dau levu tu na cakamana kevaka e tu vei keda na mata me da raica kei na daliga me da rogoca” (“Na Kalou ka Cakava na ka Veivakurabuitaki,” Ensign, Me 1989, 15–16). E vukei keda vakacava na raiyawa oqo meda raica kina na liga ni Kalou ena noda bula?

• Sa rawa mo kerei ira na lewe ni kalasi mera vola eso na cakamana e vakamacalataki tiko ena 2 Tui 2–6. Na cava eda vulica baleta na Turaga mai na veitikina oqo? Era na gadreva talega na kalasi me ra veivosakitaka na cakamana—levu se lailai—era sa sotava oti se na nodra matavuvale. Eda na kila vakavinaka cake vakacava na cakamana ni Kalou ena noda bula—oka kina o ira era duidui mai na veika eda sa nuitaka tu?

• Era na raica beka na lewe ni kalasi na veika e veivakauqeti me ra vakatauvatana eso na cakamana a vakayacora o Ilaisa vata kei na so a vakayacora o Jisu Karisito (raica na 2 Tui 4:8–37 kei na Luke 7:11–16; 2 Tui 4:42–44 kei na Joni 6:1–13; 2 Tui 5:1–15 kei na Luke 17:11–19). Na cava era vakavulica na cakamana eso oqo baleta na Turaga kei ira na Nona parofita?

2 Tui 5:1–19

Kevaka eda sa yalomalua ka talairawarawa, ena rawa ni vakabulai keda o Jisu Karisito.

• E dua na lesoni eda rawa ni vulica mai na vakabulai ni vukavuka nei Neamani sa ikoya na bibi ni yalomalumalumu. Me tekivuna e dua na veivosaki, e rawa ni o vola ena papa ni volavola na Dokadoka i Neamani kei na Yalomalumalumu i Neamani. Sa rawa mera vaqara na lewe ni kalasi ena 2 Tui 5:1–19 ka vola ena papa ni volavola na malanivosa e vakaraitaka na viavialevu kei na yalomalumalumu nei Neamani. Eda sa vakataki Neamani vakacava ena so na gauna? Eda sa vakataki ira vakacava na nona italai ena so na gauna? Eda sa mai kila vakacava na veika a mai kila o Neamani?

• E dua tale na lesoni eda rawa ni vulica mai na italanoa oqo sai koya na bibi ni talairawarawa vua na Kalou ena veika lalai. E rawa ni o tekivu ena nomu wilika na 2 Tui 5:9–12 ka kerea na nodra nanuma na lewe ni kalasi me baleta na vuna a “lako yani e na yalocudrucudru” o Neamani (tikina e 12). Na cava eda dau vinakata cake kina ena so na gauna “na veika lelevu” e kerea vei keda na Kalou, ka sega ni veika rawarawa? (tikina e 13). Na cava na yaga ni kena caka na veika rawarawa oqo?

2 Tui 6:8–23

“Ni ra sa lewevuqa era sa tiko kei keda, ka lewe lailai era sa tiko kei ira.”

• E dau tiko na veigauna eda dau galili se rere kina. Vakasamataka na kena veivosakitaki na itukutuku ena 2 Tui 6:8–23 e rawa ni vukei ira na lewe ni kalasi era muria sala oqo. E rawa ni o tekivu ena nomu tarogi ira na lewe ni kalasi se cava e vakauqeti ira mai na veitikina oqo. E rawa talega me ra wasea na gauna a “vakayadrata kina na [matadra] na Turaga” (tikina 17) ka vukei ira mera raica ni ra sega ni tiko duadua (raica talega na “iKuri ni Vurevure”). E rawa vakacava me da veivukei me da “kakua ni rere”? (tikina e 16).

iKuri ni iVurevure

“Dolava na matada vakayalo.”

Me baleta na itukutuku ena 2 Tui 6:8–23, a kaya kina o Elder Ronald A. Rasband:

Ena tiko beka se sega na noda qiqi bukawaqa me mai kauta laivi noda rere ka valuta noda tevoro, ia na lesoni e matata. Sa tiko kei keda na Turaga, sa nanumi keda ka vakalougatataki keda ena sala e rawa ga Vua. Na masu ena kaciva mai na kaukauwa kei na ivakatakila eda gadreva me usutu kina ni noda vakasama o Jisu Karisito kei na Nona solibula veisorovaki. Sa kila tu na Turaga ni so na gauna eda na vakila na rere. Au a tiko e kea ka vakakina o iko. … Ena Lotu oqo eda na rairai lewe lailai beka ga ka sa vakayarayarataki kina na vuravura, ia ni da dolava na matada vakayalo, ‘sa lewevuqa era sa tiko kei keda, ka lewe lailai era sa tiko kei ira’ [2 Tui 6:16]” (“Dou Kakua ni Rarawa,” Liaona, Nove. 2018, 18–19).

Vakatorocaketaki ni Noda Veivakavulici

Vagolei ira na vuli ki na ivolanikalou. Ena veigauna e rawa kina, vakayaloqaqataki ira na lewe ni kalasi me ra goleva na ivolanikalou kei na nodra vosa na parofita bula me ra tuberi, sauma na taro, kei na veitokoni. Na vosa ni Kalou sa ivurevure cecere ni ka dina. (Raica na Veivakavulici ena iVakarau ni iVakabula, 21.)