Droini ni Valetabu i Serupepeli, mai vei Sam Lawlor

18–24 ni Jiulai

Esera 1; 3–7; Niemaia 2; 4–6; 8

“Au sa Kitaka Tiko e dua na Cakacaka Cecere”

Ni o sureti ira na lewe ni nomu kalasi me ra wasea na ka e votu levu vei ira ena ivola nei Esera kei Niemaia, wasea talega e dua na veivakauqeti o ciqoma ena nomu vuli.

Vola na Veika o Vakauqeti Kina

Sureta na Veiwasei

Ena so na gauna na kena volai na veivosa bibi se malanivosa ena papa ni volavola e rawa ni vakavotuya vei ira na lewe ni kalasi na veika era vulica mai na ivolanikalou ka vakarawarawataka me ra wasea. Me kena ivakaraitaki, e rawa ni o vola Tara tale, Vakavinakataka, kei na Tauyavutaka tale ena papa ka sureti ira na lewe ni kalasi me ra wasea na veitikina eso mai na nodra wiliwili ka semati ki na dua se sivia na vosa oqo.

Vakavulica na iVunau

Esera 3:8–13; 6:16–22

E rawa ni kauta mai vei keda na reki na valetabu.

• Ni wiliki na reki era vakila na Jiu ni sa mai vakavoutaki na nodra valetabu ena vukei ira na lewe ni kalasi me ra vakavinavinakataka vakalevu cake na valetabu ena noda gauna oqo. Sa rawa mo sureti ira na lewe ni kalasi me ra railesuva na Esera 3:8–13 kei na 6:16–22 ka qai veivosakitaka eso na sala era a marautaka kina na Jiu na kena sa taravou tale kei na vakatabui na valetabu. Na cava e dau vakavuna kina na marau na tara ni dua na valetabu? Sa rawa mo sureti ira na lewe ni kalasi me ra wasea na sala e dau kauta mai kina vei ira na reki na valetabu, kei na cakacaka eda qarava kina. Na itukutuku ena “iKuri ni iVurevure” e rawa ni vakayaloqaqataki ira na lewe ni kalasi mera vakila na reki ni cakacaka ni valetabu.

  

  Na valetabu e rawa me dua na ivurevure ni reki ena noda bula.

Esera 4–5; Niemaia 2; 4; 6

E rawa ni da vukea na toso ni cakacaka ni Kalou ena dela ni veisaqasaqa.

• Na ivola nei Esera kei Niemaia e vakamacalataka na nodra rawata tiko na cakacaka bibi na kawa tamata dina ni ra veisaqasaqa kei na nodra meca. Me tekivuna e dua na veivosaki, e rawa ni o tarogi ira na lewe ni kalasi na cava e rawa ni vakatauvatani ki na noda bula na “cakacaka cecere” i Niemaia (Niemaia 6:3). Na cakacaka bibi cava sa solia vei keda na Kalou meda cakava? Qai rawa mo wilika na Esera 4:4 ka veivosakitaka na sala e tovolea tiko kina o Setani me vakamalumalumutaka na ligada ka vakaleqai keda ena qaravi ni cakacaka ni Kalou. Na cava eda vulica mai vei Niemaia kei ira na nona ilawalawa vakacakacaka ena Niemaia 2:18–20; 4:6–9; kei na 6:1–3? Na cava na kena ibalebale me da “gumatua ena cakacaka” ena veiqaravi vua na iVakabula? (Niemaia 4:6). Okata mo wasea na tiki ni itukutuku nei Peresitedi Dieter F. Uchtdorf “Eda Sa Kitaka Tiko e dua na Cakacaka Cecere sa Dredre me Siro Sobu” (Liaona, Me 2009, 59–62), vakabibi na iotioti ni rua na iwasewase.

• O na vakauqeti beka mo liutaka e dua na veivosaki e vakatauvatanitaki kina na sasaga nei Serupapeli me taravou na valetabu ki na noda sasaga me da curuma na valetabu ka cakava na cakacaka ni veivakabulai. Me kena ivakaraitaki, e rawa ni o vola e rua na ulutaga ena papa: Serupapeli kei Keda. Ena ruku ni Serupapeli, mera vola kina na lewe ni kalasi na ka era cakava na “meca i Juta kei Penijamini” (Esera 4:1) mera tovolea mera tarovi Serupapeli kei ira na Jiu mai na kena taravou tale na valetabu (raica na Esera 4). Ena ruku ni O Keda, mera vola kina na lewe ni kalasi na sala e saga tiko kina na vu-ni-ca me tarova na noda lako ki na valetabu. Sa rawa mera veiwaseitaka na ivakasala vakai ira e na sala eda rawa ni vakasaqara kina na veivuke ni Turaga ena kena vorati na veisaqasaqa oya.

Niemaia 8:1–12

Eda vakalougatataki ni da vulica na ivolanikalou.

• Sa rawa vei ira na lewe ni kalasi mera wilika vata na Niemaia 8:1–12 ka veivosakitaka na veika a vakila o Esera kei ira na nona tamata me baleta na Kalou kei na Nona vosa. Vakayaloqaqataki ira na lewe ni kalasi me ra raica na veitikina eso e vakaraitaka na veika era vakila. Sureti ira na lewe ni kalasi me ra tukuna na nodra nanuma baleta na vosa ni Kalou. Me da toroya cake vakacava na noda sasaga me da vulica na vosa ni Kalou?

iKuri ni iVurevure

Vakila na reki ni valetabu.

A vakatavulica o Peresitedi Russell M. Nelson:

“Eda na rawa ni vakauqeti me dua na siga taucoko ena vuku veika sotavi ni valetabu kei na cakacaka ni tuvakawa nodra na tani. Ia meda cakava e dua na ka meda vakila kina na marau vakaoqo vakai keda. Au via biuta e dua na ibolebole vei keda yadua me rawa ni tomani tikoga na yalo sa marautaka na kena qaravi na cakacaka oqo ka tubu cake. Au sureti kemuni mo ni vakasamataka ena masumasu na solibula cava—ena gadrevi beka na soli ni gauna—e rawa ni o cakava me levu cake kina na tuvakawa kei na cakacaka ni valetabu ena yabaki oqo.

Eda sa vakaitavi tiko ena cakacaka ni Kalou sa Cecere sara. E bula tiko o Koya. Sa Karisito o Jisu. Oqo na Nona Lotu. Eda sa Luvena ni veiyalayalati. E rawa ni nuitaki keda o Koya “(Russell M. Nelson kei Wendy W. Nelson,”Dolavi na Lomalagi ena Cakacaka ni Valetabu kei na Tuvakawa,” Ensign, Okot. 2017, 39).

Vakatorocaketaki ni Noda Veivakavulici

Okati ira na nodra itubutubu na itabagone. Kevaka o vakavulici ira na itabagone, wasea na veika o vakavulica tiko vei ira na nodra itubutubu. E rawa ni ra vukei iko mo kila na nodra gagadre na itabagone kei na sala mera vukei kina. Oqo e rawa talega ni dua na sala vinaka me vakayaloqaqataki kina na veivosaki vakamatavuvale me baleta na veika era vulica tiko na itabagone ena kalasi. (Raica na Veivakavulici ena iVakarau ni iVakabula, 27.)