Nodra Dro na Kaivesu, mai vei James Tissot kei na so tale

11–17 ni Jiulai

2 Tui 17–25

“Sa Nuitaka na Turaga na Kalou ni Isireli”

Railesuva na veivakauqeti o a vola ena gauna o a vulica vakai iko na 2 Tui 17–25 ena macawa oqo. Na itukutuku cava mai na iwase oqo o nanuma ena vakaibalebale vakalevu duadua vei ira na nomu lewe ni kalasi?

Vola na Veika o Vakauqeti Kina

Sureta na Veiwasei

Ni ra wasea na lewe ni kalasi na veika era sa vulica tiko e vale ena nodra vuli ivolanikalou, era na vakauqeti na lewe ni kalasi tale eso mera vulica na ivolanikalou ena loma ni macawa. E rawa ni o tekivuna na kalasi ena nomu sureti ira na lewe ni kalasi me ra sauma e dua na taro vakaoqo “Na cava e sa vakavulica vei iko na Yalo Tabu ena nomu wilika na wase e lesi mai ena macawa oqo?”

Vakavulica na iVunau

2 Tui 18:28–36; 19:1–7, 14–19

E rawa ni da dina tikoga vua na Turaga ni bolei na noda vakabauta.

• Na dina eso ena 2 Tui 18–19 e rawa ni vukei keda meda kila na kena iwali ni bolei na noda vakabauta. O na vukei ira vakacava mera kila na dina oqo na nomu lewe ni kalasi? Sa rawa mo sureti ira na lewe ni kalasi me ra wasea e vica na vuna era vakabauta kina na Kalou kei na Nona ituvatuva. Mera qai vakasaqara ena 2 Tui 18:28–35, ka raica na vuna e solia kina na kai Siria vei ira na tamata e Jerusalemi mera kakua ni vakararavi vua na Turaga. E saga vakacava o Setani me vakauqeti keda meda vakatitiqataka na noda vakabauta ni kua? Sa rawa mera vakasaqara na lewe ni kalasi na 2 Tui 19:1–7, 14–19 na kena vulici mai vei Esekaia na ka meda cakava ena gauna e vakatovolei kina na noda vakabauta. E vukei keda vakacava na Turaga me da uabaleta na veibolei ni noda vakabauta? Na vakatutu cava tale e tu vei ira na lewe ni kalasi ena kena vakavoui na nodra vakabauta kei na vakanuinui vua na Turaga?

• E rawa ni o sureta e dua na lewe ni kalasi me vakavakarau mai ki na kalasi me vakamacalataka vakalekaleka na nodra veitalanoa na kai Siria kei ira na vakailesilesi nei Esekaia volekata na lalaga kei Jerusalemi (raica na 2 Tui 18:17–36). Ni bera ni tukuna o koya na italanoa, sureti ira na lewe ni kalasi mera raitayaloyalotaka ni ra lewe ni koro o Jerusalemi ka ra vakarogoca tu na veivosaki oqo. Na cava era bau vakila se vakanananu kina? Na cava era na cakava? E rawa ni o solia vei ira na lewe ni kalasi eso na tiki ni itukutuku nei Elder David A. Bednar “Ia Era sa Vosota na Nodra Rere” (Liaona, Me 2015, 46–49) ka sureti ira me ra vaqara na ivakasala e rawa ni tokoni ira ena gauna ni rere se vakatitiqa. E tokoni keda vakacava na noda vakabauti Jisu Karisito ena gauna ni dredre?

2 Tui 22:8–20; 23

Na ivolanikalou e rawa ni vagolea na yaloda vua na Turaga.

• Na veivosakitaki ni kaukauwa ni vosa ni Kalou ena nona bula o Josaia na Tui kei ira na nona tamata e rawa ni vakauqeti ira na lewe ni kalasi mera vakasaqara na kaukauwa vata oqori ena nodra dui bula. E rawa ni o tekivuna e dua na veivosaki ena nomu sureti ira na lewe ni kalasi me ra raitayaloyalotaka se na rawa ni duidui vakacava na nodra bula kevaka e sega na nodra ivolanikalou. Mera qai vakasaqara ena 2 Tui 22:8–11; 23:1–6, 21, 24 mera raica na sala a veisau kina o Josaia kei ira na nona tamata ni ra rogoca na vosa ni Kalou mai na ivolanikalou a se qai kunei wale ga ena valetabu. Sa vukei keda vakacava na ivolanikalou meda toro voleka vei Tamada Vakalomalagi kei Jisu Karisito?

• Na veisau levu a vakayacora na vosa ni Kalou vei Josaia kei na vuqa na tamata ena nona matanitu e rawa ni vakauqeti ira na nomu lewe ni kalasi me ra vakasaqara na veisau vata vakaoqori ena nodra bula. Ni oti na veivosakitaki ni veisau oqo (raica na 2 Tui 23:1–6, 21, 24), e rawa ni ra wasea na lewe ni kalasi na veika era sotava ena dua na tiki ni ivolanikalou se itukutuku e vakavuna na veisau ki na nodra bula. E rawa beka ni ra tukuna na vuna era a ciqoma kina na itukutuku ni ivolanikalou o ya ena gauna o ya ena nodra bula. Na itukutuku ena “iKuri ni iVurevure” ena rawa ni vakuria na nomu veivosaki.

  

  Na ivolanikalou e rawa ni vukea me vagolea na yaloda vua na Turaga.

iKuri ni iVurevure

Kunea vou tale na ivolanikalou.

A kaya o Peresitedi Spencer W. Kimball:

“Au sa vakadeitaka oqo ni o keda yadua, ena so na gauna ena noda bula me da na vakawilika ka vulica na ivolanikalou vakataki keda—me kakua ni vakadua walega, ia me caka vakawasoma. …

“Au vakila ni dodonu me da lesu kece tale ki na ivolanikalou me vaka ga e a cakava o Josaia na Tui ka me na cakacaka vagumatua ena lomada, ka muataki keda ki na dua na sasaga sega ni yavalati rawa me da qarava na Turaga. …

“Au raica rawa ni gauna au vakawalena kina na noqu veiwekani kei na Kalou ka sa vaka me sega ni vakarorogo se vosa mai o lomalagi kau sa tiko yawa sara. Kevaka au tabadromuci au ena ivolanikalou sa qai yaco na veivolekati ka lesu mai na veika vakayalo. Au raica niu sa lomani ira vakalevu cake e dodonu meu lomana ena yaloqu, vakasama kei na kaukauwa taucoko, ka lomani ira vakalevu, sa qai rawarawa meu muria na nodra ivakasala” (Nodra iVakavuvuli na Peresitedi ni Lotu: Spencer W. Kimball [2006], 62–63, 67).

Vakatorocaketaki ni Noda Veivakavulici

Vakayagataka na veivuke ni vulici ni ivolanikalou E dua na sala me ra vukei kina na lewe ni kalasi me kila na ivolanikalou oya me ra dusimaki ki na ivurevure me vaka na iDusidusi ki na iVolanikalou kei na Ulutaga Vakosipeli (ChurchofJesusChrist.org). E rawa talega ni ra kunea na itukutuku veivukei ena “Vakasama me Maroroi” ena Lako Mai, Mo Muri Au—Baleta na Tamata Yadua kei na Matavuvale.