Esiteri, mai vei James Johnson

25–31 ni Jiulai

Esiteri

“Ko sa Lako Mai … ena dua na Gauna Vakaoqo”

O kilai ira vinaka li na nomu lewe ni kalasi? Tovolea mo kilai ira vinaka vakayadua na lewe ni kalasi ena vei macawa. Oqo ena vukei iko mo nanuma tiko na veika era gadreva ena nomu vakavakarau mo veivakavulici (raica na Veivakavulici ena iVakarau ni iVakabula, 7).

Vola na Veika o Vakauqeti Kina

Sureta na Veiwasei

Sa rawa vei ira na lewe ni kalasi mera wasea vua e dua e dabe tikivi koya toka e dua na ka a vakavulica vei ira na Yalotabu, e dua na ka era sa kila vakavinaka cake, se dua na ka era vakatauvatana ki na nodra bula ni ra wilika na iVola i Esiteri. Oti me ratou qai wasea e lewe vica vei ira taucoko na lewe ni kalasi.

Vakavulica na iVunau

Esiteri

Na Turaga ena biuti keda ena vei ituvaki meda na vakalougatataki ira kina na tani.

• Sa rawa vei ira na lewe ni kalasi mera vakasaqara na sala sa cakava na Turaga me rawa kina vei Esiteri me vakabulai ira na Jiu, me vaka e vakaturi tiko ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Sureti ira me ra wasea na veika era raica. Se rawa ni o raica vata e vica na ivakaraitaki (raica na Esiteri 2:21–23; 3:110–14; 4:14–16). Na cava e rawa ni da cakava meda raica vinaka kina na liga ni Kalou ena noda bula? Na itukutuku nei Elder Neil L. Andersen ena “iKuri ni iVurevure” e tiko kina e dua na isau ni taro oqo.

• Me vukei ira na lewe ni nomu kalasi me ra vakasamataka na sala sa vakarautaka kina vei ira na Turaga “ena dua na gauna vakaoqo” (Esiteri 4:14), sureti ira me ra wilika na Esiteri 4:10–17. A vukea vakacava na vosa nei Moatekai kivei Esiteri me digitaka kina o koya na taqomaki ni nona tamata? Me vaka na nona biuti Esiteri na Kalou ena dua na itutu ka rawa ni vakabulai ira kina na Jiu, na cava eso na draki ni bula e dau biuti keda kina o Koya me rawa ni da vakalougatataki ira kina eso? E rawa vakacava me da iyaya ni cakacaka vinaka cake e Ligana? Na wiliki ni itukutuku mai vei Sister Virginia U. Jensen ena “iKuri ni iVurevure” ena rawa ni vakauqeti ira na lewe ni kalasi mera vakasamataka eso na gauna era a vakila ni ra iyaya ni cakacaka vua na Turaga. Kerei ira mera wasea na veika era sa sotava, ena veidusimaki ni Yalotabu.

Esiteri 4

Na lolo e vakaraitaka na noda vakararavi vua na Turaga.

• E rawa ni o vakayagataka na Esiteri 4 me veivosakitaki kina na veivakalougatataki e dau lako mai ena lolo. Ena rawa beka mo lesia e dua na lewe ni kalasi me raica mai na veika a yaco ka vakavuna me ra ia na lolo o Esiteri kei ira eso tale na Jiu. Cava na vuna era digitaka kina mera lolo? Na cava na vuna eda digitaka kina meda lolo? O na vinakata beka mo ni railesuva vata eso tale na ivolanikalou me baleta na lolo, me vaka na Aisea 58:6–12 kei na Maciu 4:1–4; 17:14–21 (raica talega na iDusidusi ki na iVolanikalou, “Lolo, Lolo,” scriptures.ChurchofJesusChrist.org). De na rawa beka ni o wasea se vica na lewe ni kalasi na veika sotava ka vakaraitaka na kena dau basika na kaukauwa ni Turaga ena noda bula ni da lolo.

Esiteri 3:1–11; 4:10–17; 5:1–4

Na kena qaravi na ka e dodonu me gadrevi kina na yaloqaqa cecere.

• Na itukutuku ni nodrau tudei o Moatekai kei Esiteri ena vuku valavala dodonu e rawa ni vakauqeta na lewe ni kalasi mera dau yaloqaqa ka cakava na ka dodonu. Sa rawa mo sureta e dua na veimama ni kalasi mera wilika na veika me baleti Moatekai (raica na Esiteri 3:1–11) ka ra wilika na ikarua ni veimama na veika baleti Esiteri (raica na Esiteri 4:10–17; 5:1–4). Kevaka erau tiko edai, na cava beka e rawa ni rau tukuna o Moatekai kei Esiteri me vakayaloqaqataki keda ni sa dredre meda kitaka na ka dodonu? Sa rawa talega vei ira na lewe ni kalasi mera wasea na gauna era a vakayacora kina e dua na ka ena yaloqaqa. E rawa ni o vakaraitaka na vidio “Yaloqaqa” (ChurchofJesusChrist.org) se sureta na kalasi me ra lagata se wilika na qaqa ni dua na sere me baleta na tutaki ni dina, me vaka na “Dina Tu Ga” (Serenilotu, naba 143). Qai veivosakitaka na veika e vakavulica na vidio se na sere me baleta na yaloqaqa.

  

  Esiteri e matana na Tui, mai vei Minerva K Teichert

iKuri ni iVurevure

Na liga ni Kalou.

A vakatavulica o Elder Neil L. Andersen:

“Ena so na gauna eda rawa ni raica na liga ni Turaga ena nodra bula eso ia eda vakataroga, ‘Meu raica vakavinaka vakacava na Ligana ena noqu bula?’ …

“Ni o talairawarawa ki na ivakaro ka masu ena vakabauta mo raica na liga ni Turaga ena nomu bula, au yalataka vei iko ena dolava vakalevu ko Koya na matamu vakayalo, ka na matata cake na nomu raica ni o sega ni tiko duadua” (“Me Yaco mai na Nomuni Matanitu,” Liaona, Me 2015, 121–22).

“Ena dua na gauna vakaoqo.”

A vakavulica o Sister Virginia U. Jensen: “Au sega ni vakabauta ni o iko kei au daru tiko eke vakacalaka ena gauna duatani oqo. Au vakabauta, me vakataki Esiteri ena gauna e liu, eda sa ‘yaco mai ki na matanitu ena dua na gauna vakaoqo’ [Esiteri 4:14], ni sa rawa meda veivakayarayarataki, noda ivakaraitaki, noda kaukauwa, kei na noda vakabauta me itikotiko tudei ka vorata na tubu ni cakacaka butobuto ka rawa ni tiloma na noda itikotiko, noda matavuvale, kei ira na noda daulomani” (“Buli ni Vanua ni Veitaqomaki,” Ensign, Nove. 1997, 89).

Vakatorocaketaki Noda Veivakavulici

Gole i liu ki na ivolanikalou. Na ivolanikalou e dodonu me ivurevure taumada ni nomu vuli kei na vakavakarau. Kakua ni guilecava ni nodra vosa na parofita edaidai e tokona na ivolayavu ni cakacaka ka sa ivolanikalou talega. (Raica na Veivakavulici ena iVakarau ni iVakabula, 17–18.)