Na Veilewai i Jope, mai vei Joseph Brickey

1–7 ni Okosita

Jope 1–3; 12–14; 19; 21–24; 38–40; 42

“Kau na Vakararavi ga Vua”

Na dina cava soti e vukei iko kina na Yalo Tabu mo vuli ena nomu vulica na ivola i Jope? Na cava o na via wasea ki na nomu kalasi?

Vola na Veika o Vakauqeti Kina

Sureta na Veiwasei

Ira na lewe ni kalasi ka vulici Jope ena macawa oqo sa na rairai dikeva tu na dina eso e a vakaibalebale kivei ira. Me vakauqeta na nodra veiwasei, sa rawa ni o vola ena papa Au sa vulica mai vei Jope … ka taroga na lewe na kalasi na sala cava era na vakacavara kina na yatuvosa oqo.

Vakavulica na iVunau

Jope 1–2; 12–13; 19:23–27

Na noda vakararavi vei Tamada Vakalomalagi kei Jisu Karisito e rawa ni vukei keda me da yalodina tikoga ena ituvaki kecega.

• Na matai ni rua na wase ni Jope, ka vakamacalataki Setani ni vakataroga tiko na vu ni yalodina o Jope, sa rawa ni vukei ira na lewe ni kalasi ni dikeva na nodra dui inaki yalodina kivua na Tamada Vakalomalagi kei Jisu Karisito. Era na rawa ni tekivu vola na lewe ni kalasi eso na vuna e rawa ni digitaka kina e dua na tamata me talairawarawa ki na ivunau ni Kalou. E rawa ni ra qai vakasaqaqara ena Jope 1:6–12; 2:1–6 me kilai kina na ka e tukuna o Setani baleta na yalodina i Jope. Na cava na vuna ena rerevaki kina me da talairawarawa vua na Turaga ena vuku ni inaki vakatabakidua e vakatura tu o Setani? E vakatakilai Jope vakacava na isau ni nona taro ena Jope 1:20–22; 2:9–10 ? Sa rawa mera veivosakitaka na lewe ni kalasi na vuna era digitaka kina mera yalodina tikoga vua na Kalou.

  

  Jope, mai vei Gary L. Kapp

• Ena gauna e sotava tiko kina o Jope na dredre ka vakatitiqa kei na yaluma, a maroroi koya vakaoti na nona vakararavi kivua na Turaga ena nona vakararawataki. Me da vuli mai na ivakaraitaki i Jope, sa rawa ni ra vaqara na lewe ni kalasi eso na tikina oqo me raici eso na sausaumi donu i Jope ki na nona veivakatovolei: Jope 1:21; 2:10; 12:9–10, 16; 13:15–16; 19:23–27. Na cava eda rawa ni vulica mai na sausaumi eso oqo ena rawa ni vukei keda ni tu dei tu vakayalo ni da sotava na veivakatovolei? Cava na vuna e rerevaki kina na noda nanuma ni veivakatovolei sai totogi ni ivalavala ca?

• Na ka a cauraka o Jope ena Jope 19:23–27 sa rawa ni vakauqeta na lewe ni kalasi mera vakasamataka vakatitobu ka wasea na nodra yalayala ni sa bula tiko na Dauveivueti, o Jisu Karisito. Sa rawa ni o tekivu mo sureti ira ni lewe ni kalasi mera vakasamataka lo vakatitobu na vosa i Jope ena veitikina oqo. Sa rawa ni ra qai veivosakitaka na taro eso vakaoqo: Na cava e yaga vakalevu kina na ivakadinadina ni noda Dauveivueti ena gauna ni veivakatovolei vaka na kena a sotava o Jope? Sa vukei keda vakacava na noda ivakadinadina ena noda vakatovolei? Na lagati se wiliki ni qaqa ni dua na serenilotu baleti Jisu Karisito, vaka na “Au sa Kila ni Bula Tu” (Serenilotu, naba 76), sa rawa ni vakuria na raiyawa kei na kaukauwa vakayalo ki na nomu veivosaki.

Jope 38

Na rai ni Kalou e cecere sara mai na noda.

• E levu na ivola i Jope (wase 3–37) e okata na nona vakasamataka dredre tu o Jope kei ira na nona itokani na taro “Cava na vuna e yaco kina na veika ca vei ira na tamata yalododonu?” Ni sega ni sauma vakataucoko tu na Turaga na taro oqo ena ivola i Jope, sa vakarautaka tu o Koya e dua na itukutuku bibi. Sa rawa ni o vukea na lewe ni kalasi mera dikeva na itukutuku oqo ena nodra sureti mera wilika na taro eso a tarogi Jope kina na Turaga ena Jope 38:1–7, 18–24. Na cava eda vulica mai na taro eso oqo?

• Na kosipeli vakalesui mai i Jisu Karisito e sa vakarautaka na ikuri ni rarama e rawa ni vukei keda ni kila vakamatata eso na vu ni sotavi dredre e vuravura. Sa rawa ni ra wasea na lewe ni kalasi na dina eso era sa kila tu baleta na Vakalesui mai ni kosipeli e sa solia vei ira na raiyawa levu cake kei na kila matata me baleta na sotavi dredre. Sa rawa ni ra raica eso na dina oqo ena ivolanikalou kei na itukutuku e kune ena “iKuri ni iVurevure.”

iKuri ni iVurevure

Na rai taudonu ni gauna oqo ena inaki eso ni sotavi dredre.

Na ivolanikalou eso oqo e vakarautaka na rai taudonu eso me baleta na inaki ni sotavi dredre:

• 2 Nifai 2:11–14

• Ica 12:27

• Vunau kei na Veiyalayalati 58:3-5

• Vunau kei na Veiyalayalati 122

• Mosese 5:10–12

A vakavulica o Peresitedi Spencer W. Kimball:

“Kevaka eda raica tu na bula oqo ni sa ivakataucoko ni bula, sa na qai leqa levu sara na mosi, rarawa, druka, kei na bula lekaleka. Ia, kevaka eda raica tu na bula me dua na ka tawamudu e tete yawa tu yani ki na bula taumada eliu ka ki na mate oqo ni veisiga tawamudu ni mataka, sa rawa ni qai biu ena kena itutu donu sara na ka taucoko sa yaco tiko.

E sega li ni tiko na yalomatua ena nona solia vei keda na [Kalou] na veivakatovolei eso me rawa ni da duri siviti ira, na itavi eso meda na rawata, cakacaka me vakaukauwataka na noda masela, na rarawa me vakatovolea na yaloda? Eda sega ni tadolavi keda tu li ki na veitemaki me vakatovolea na noda kaukauwa, tauvimate meda vulica kina na vosota, mate me rawa ni da na tawamate rawa ka vakalagilagi? …

“Kevaka sa soli ena gauna vata ga na reki kei na vakacegu kei na cocovi kivua na dau cakavinaka, ena sega tu na cakaca—eda na caka vinaka taucoko ia sega ni baleta na dodonu tu ni caka vinaka voli. Ena sega tu na vakatovolei ni kaukauwa, sega na vakatorocaketaki ni tovo ni bula, sega na tubu ni qaqa, sega na galala ni digidigi “(Nodra iVakavuvuli na Peresitedi ni Lotu: Spencer W. Kimball [2006],15).

Vakatorocaketaki ni Noda Veivakavulici

Muria na Yalotabu. O sega ni rawa ni vakadeitaka na ituvaki ni lesoni yadua, ia na veivakauqeti ni Yalotabu ena tuberi iko. Ni ko sa vakarau tu vakayalo, na solia vei iko na Turaga “ena gauna sara ga ko ya, na veika mo [na] kaya” (Vunau kei na Veiyalayalati 100:6), na ka saraga ena rairai gadreva tu na lewe ni kalasi mera rogoca. (Raica na Veivakavulici ena iVakarau ni iVakabula, 10.)