Sa Noqu iVakatawa ko Jiova, mai vei Yongsung Kim, havenlight.com

8–14 ni Okosita

Same 1–2; 8; 19–33; 40; 46

“Sa Noqu iVakatawa ko Jiova”

Tuva na sala eso me wasea kina na lewe ni kalasi na veika vakayalo era sa sotava tiko ni ra wilika na Same.

Vola na Veika o Vakauqeti Kina

Sureta na Veiwasei

Nodra sureti na lewe ni kalasi me ra wasea na ka era raica tu ena Same sa rawa ni rawarawa me vaka na vakatataro vakaoqo: Na cava e vakavulica vei iko na Yalotabu ni o wilika na Same ena macawa oqo? Na same cava a vukei iko mo vakila vakavoleka sara na Turaga?

Vakavulica na iVunau

Same 1; 23; 26–28; 46

Sa vakavulici keda na Same me da vakararavi vua na Turaga.

• Naituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale sa vakatura na wiliki ni Same 1; 23; 26–28; 46 ka vakaraica na veika oqo:

  • Veisureti ni vakararavi vua na Turaga

  • Vosa eso e vakamacalataka na Turaga

  • Vosa eso e vakamacalataka na vakacegu, kaukauwa, kei na veivakalougatataki tale eso e vakarautaka o Koya

  • Vosa eso e vakamacalataki ira na vakararavi Vua

  Sa rawa mo vola na veimalanivosa oqo ena papa ka sureta na lewe ni kalasi mera vola, tikiva na malanivosa yadua, e dua na ka era raica ena Same 1; 23; 26–28; se46. Kevaka era gadreva na veivuke, sa rawa ni o dusimaki ira ki na veitikina oqo: Same 1:1–4; 23:1–6; 26:1, 6–8, 12; 27:1, 3, 8, 14; 28:1, 7; 46:1–3, 10. Sa rawa ni wasea na lewe ni kalasi na veika era a vakila me baleta na iVakabula ni ra wilika na same eso oqo.

• Baleta ni a vaka tu na sere ni lotu na Same kivei ira na Isireli, sa rawa ni o sureta na lewe ni kalasi mera vakatura na sere ni lotu eso e vakananumi ira ena same era wilika ena macawa oqo. Sa rawa ni ra raica na ituva ni “iVolanikalou” ena mua ni vola ni serenilotu me baleta na vakasama eso (raica talega na ituvatuva ena “iKuri ni iVurevure”). Sa rawa ni ra lagata na lewe ni kalasi e vica na sere ni lotu oqo ka raica na itoko kilai levu eso ena sere ni lotu kei na same. Na itukutuku cava so ni vakacegu kei na vakabauti Jisu Karisito eda kunea?

Same 2; 22; 31:5

Na Same sa dusimaka na noda vakasama ki na bula kei na ilesilesi i Jisu Karisito.

• Na wiliki ni Same—vakabibi na kena era dusimaka tu na bula ni iVakabula—sa rawa ni dua na sala levu me vaqaqacotaki kina na vakabauti Jisu Karisito. Sa rawa mo wasea na kalasi vakayarua se sivia na ilawalawa ka solia ki na ilawalawa yadua e dua na tiki ni vola veisa oqo: Same 2:1–3 kei na Cakacaka 4:24–28; Same 2:7 kei na Cakacaka 13:30–33; Same 22:1 kei na Maciu 27:45–46; Same 22:7–8 kei na Maciu 27:39–43; Same 22:16 kei na Luke 23:32–33; Same 22:18 kei na Maciu 27:35; Same 31:5 kei na Luke 23:46. Kerea na ilawalawa yadua me raica na sala a vakataucokotaki kina e dua na parofisai ena bula ni iVakabula ka veivosakitaka na sala e vaqaqacotaka kina na nodra ivakadinadina ni iVakabula na ivolanikalou eso oqo.

  Se rawa ni o vola na tiki ni ivolanikalou eso ena papa ka sureta na lewe ni kalasi me ra vakasotara vata e dua na tikina mai na Same ka veidonui kei na ka e yaco ena Veiyalayalati Vou.

  Sa rawa talega mo sureta na lewe ni kalasi mera wasea na tikina tale eso baleta na iVakabula era raica tu ena nodra vulica na Same (vaka na Same 34:20; 41:9; raica talega na Luke 24:44).

  Ni sa veivosakitaka oti na lewe ni kalasi na ivolanikalou eso oqo, sa rawa ni ra veitalanoataka na vuna e rawa ni vakaibalebale tu kina na veisame oqo vei ira na Jiu era kila tu na iVakabula. Cava na vuna era sa vakaibalebale kina vei keda?

Same 23

“Sa noqu ivakatawa ko Jiova.”

• Me vukea na lewe ni kalasi me ra veivosakitaka na raitayaloyalo kei na vakatakarakara ni Same 23, navuca na vakaraitaki ni yaloyalo eso e sema ki na vakasama era tiko ena same, vaka na kena ena Lako Mai, Mo Muri Au—Me Baleta na Tamata Yadua kei na Matavuvale. Sa rawa ni o qai kerea na lewe ni kalasi mera raica na vosa se malanivosa vakaibalebale eso ena same ka veivosakitaka na ka era rawa ni matataka. Me ivakaraitaki, na cava e vakavure vakasama ena malanivosa vaka na “vakadavori au ena vanua veico drokadroka” se “uciwai sa drodro malua”? Na cava e rawa ni vakatakarakarataka na “titoko” kei na “matanakilagi”? Na cava e rawa ni vakaibalebaletaka na noda “bilo” me vuabale tu? Na cava e vakavulica vei keda na ivakatakarakara eso oqo me baleti Jisu Karisito? Sa rawa mo vakatura mera tukuna tale na lewe ni kalasi na same, ni sosomitaki eso na vakatakarakara ki na veika vakaibalebale e rawa sa veivosakitaka na kalasi.

iKuri ni iVurevure

Serenilotu era sema ki na Same.

• Same 8:3–9; 9:1–2. ”“Noqu Kalou, Au Kurabui ka Galu” (Serenilotu, naba 44)

• Same 23. “Noqui Vakatawa,” “The Lord My Pasture Will Prepare” (Serenilotu, naba 60, [109])

• Same 23:6; 150. “Turaga me Dokai, Ni sa Tui” (Serenilotu, naba 37)

• Same 26:8. “We Love Thy House, O God” (Hymns, no. 247)

• Same 27:1. “Noqu Rarama Na Turaga” (Serenilotu, naba 45)

• Same 33:1–6; 95:1–6. “For the Beauty of the Earth” (Hymns, no. 92)

• Same 37:3–9. “Na Yaloqu Mo Vakanomodi” (Serenilotu, naba 68)

• Same 148. “Na iBulibuli ni Kalou” (Serenilotu, naba 33)

Vakatorocaketaki Noda Veivakavulici

Vakayagataka na sere ivakatagi. Na serenilotu e sureta na Yalo ni Turaga, vakavurea na yalo vakarokoroko, vakaduavatataki keda vakalewenilotu, ka vakarautaka na sala me da vakacaucautaka kina na Turaga. … Na sere ni lotu sa torovi keda ki na veivutuni kei na cakacaka vinaka, taracake na vakadinadina kei na vakabauta, vakacegui ira na oca, vakalomavinakataki ira na rarawa, ka vakauqeti keda ni vosota tu me yacova na ivakataotioti” (Serenilotu,ix).