Vakabulai Ni Ka A Yali, mai vei Michael T. Malm

15–21 ni Okosita

Same 49–51; 61–66; 69–72; 77–78; 85–86

“Au na Tukuna na Ka sa Kitaka vei Au”

Nanuma na ivakasala nei Elder David A. Bednar ni o vakavakarau mo veivakavulici: “Na veivosaki kei na kena tukuni duadua e sega ni veivakavulici. [Vakavulica] na kosipeli ena sala ni Turaga e oka kina na vakadigova kei na vakarorogo kei rai vakamatata (“Becoming a Preach My GospelMissionary,” New Era, Oct. 2013, 6).

Vola na Veika o Vakauqeti Kina

Sureta na Veiwasei

Dua na sala me ra sureti kina na lewe ni kalasi me ra wasea e dua na ka era wilika ena macawa oqo oya me ra vola ena papa “Ena reki vakalevu sara na tebenigusuqu” se “Na yamequ ena tukuna tiko na nomuni yalododonu” (Same 71:23, 24). Sa rawa vei ira na lewe ni kalasi mera wasea na veika era sa kunea ka vukei ira mera “marau vakalevu” se “tukuna na nona ivalavala dodonu na Turaga.”

Vakavulica na iVunau

Same 51; 85–86

“O Kemuni na Turaga, ni sa vinaka, ka sa vakarau tu mo ni veivosoti.”

• Same 51 e vakamacalataka na veika eda vakila e vuqa vei keda ena noda vakasaqaara me da veivutuni ka vosoti. Me vukei ira na lewe ni kalasi mera kila vakavinaka cake na veivutuni ka vakauqeti mera dau veivutuni vakawasoma, sa rawa mo vakatura mera vakasaqara ena Same 51 na vakatataro oqo: Na cava na kena ibalebale me da veivutuni? Me ra qai wasea na kena isau. (“EiKuri ni iVurevure” e lewena na vakasama e veivukei.) Ena so na gauna na cava e da dau sega ni vinakata kina me da veivutuni? Na cava eda kunea ena same oqo ka na rawa ni rekitaki kina na veivutuni?

• Eda na vakamacalataka vakacava ni da sa vosoti ena vuku ni ivalavala ca ena kaukauwa ni Veisorovaki i Jisu Karisito? Sureti ira na lewe ni kalasi me ra wasea na nodra nanuma, ka vakayaloqaqataki ira me ra raica na tikina ena Same 51; 85–86 ka vakamacalataka na revurevu ni nona veivosoti ni veivakasavasavataki ena noda bula (me kena ivakaraitaki, raica na Same 51:1–2, 7–12; 85:2–9). Nanuma mo vakaraitaka na iyaloyalo se iyaya me vukei ira na lewe ni kalasi me ra raitayaloyalotaka na veimalanivosa oqo. Sa rawa vei ira na lewe ni kalasi mera wasea na nodra nanuma me baleta na iVakabula o Jisu Karisito kei na Nona yalorawarawa me sorovaka kina na noda ivalavala ca me rawa ni da vosoti. E rawa talega ni o ni lagata vata e dua na serenilotu me baleta na solibula veisorovaki ni iVakabula, me vaka na “Loloma i Jisu” (Serenilotu, naba 110).

• Ena kena gadrevi me da veivutuni, e gadrevi me da vakabauta sega walega ni rawa ni vakasavasavataki keda o Jisu Karisito ia ena vakayacora vakakina o Koya. E rawa ni ra kunea na lewe ni kalasi na malanivosa ena Same 51; 85–86 ena macawa oqo ka vaqaqacotaka na nodra vakabauta ena Nona lomasoli na Turaga me ia na veivosoti. Vakayaloqaqataki ira mera wasea na veika era sa vulica. E rawa talega ni o dusia vei ira na Same 86:5, 13, 15 ka taroga se cava e vakatavulica na veitikina oqo me baleta na Turaga. Na cava e rawa ni kena ibalebale ni o Koya e “sinai ena loloma cecere kei na dina”? (tikina e 15). Na cava e bibi kina vei keda me da kila na ka oqo?

Same 66:5–20

Na noda vakadinadinataki Jisu Karisito e rawa ni vukei ira na tani me ra gole mai Vua.

• E dua na veivakalougatataki cecere ni soqoni vata na Matawilivola ni Sigatabu sa ikoya na madigi me rawati kina na kaukauwa mai na vakabauta kei na nodra ivakadinadina eso tale na daumuri Jisu Karisito. Ni gadrevi me vakarautaki na madigi oqo ki na nomu kalasi, sa rawa mo kerei ira na lewe ni kalasi mera wilika na Same 66:16 ka vakasamataka vakamatua na taro oqo: Kevaka mo “tukuna yani na ka sa cakava [na Turaga] ena vuku [ni] yalomu ,” na cava o na tukuna? Ni ra vakasamataka tiko vakamatua, e rawa ni ra wilika na tikina e 5–20 me baleta na vakasama eso. Me ra vola na nodra isau ni taro. Mo qai sureti ira mera “vakaraitaka” vakai ira—vakailawalawa lalai se kalasi taucoko—na veika sa cakava o Jisu Karisito ena vukudra.

  

  E rawa ni da wasea vei ira tale eso na noda ivakadinadina me baleta na veika sa cakava vei keda na Turaga.

iKuri ni iVurevure

Na veivutuni e kena ibalebale na veisau.

E vakamacalataka vakaoqo na veivutuni o Peresitedi Russell M. Nelson:

“Ni sa tarogi iko kei au o Jisu me daru ‘veivutuni,’ Sa sureti keda tiko meda veisautaka na noda vakasama, noda kila, na yaloda—vakakina noda ivakarau ni cegu. Sa kerei keda tiko meda veisautaka na ivakarau ni noda loloma, vakanananu, veiqaravi, vakayagataki gauna, qarava na watida, vakavulica na luveda, kei na qaravi ni yagoda.

E sega na ka e veisereki cake, vakaturaga cake, se bibi cake ki na noda torocake yadudua me vakataka na raicimatua tiko e veisiga na veivutuni. Na veivutuni e sega ni caka ga vakadua; e tomani tikoga. Sai koya na idola ki na marau kei na vakacegu ni vakasama. Ni ovici vata kei na vakabauta, sa dolava na veivutuni na katuba meda taura na kaukauwa ni Veisorovaki i Jisu Karisito. …

“Ni da sa digitaka meda veivutuni, eda sa digitaka meda veisau! Eda sa vakatara na iVakabula me vakavoutaki keda ki na keda ituvaki vinaka duadua. Eda sa digitaka meda tubu vakayalo ka ciqoma na reki—na reki ni noda vueti mai Vua! Ni da sa digitaka meda veivutuni, eda sa digitaka meda vakataki Jisu Karisito vakalevu cake!”” (“E Rawa Ni Da Caka Vinaka Cake ka Vinaka Cake,” Liaona, Me 2019, 67).

Vakatorocaketaki ni Noda Veivakavulici

Taroga na taro e tara na yalo kei na vakasama. “Sa na rawa ni ko tarogi ira na vuli mera wasea e dua na tikini ivolanikalou e tarai ira, vata kei na veika era vakila o ira na tamata ena ivolanikalou, se semati vakacava na dina ena vei tikina oqo ki na noda bula” (Veivakatavulici ena iVakarau ni iVakabula, 31).