Ena Tekiduru na Duru Kecega, mai vei J. Kirk Richards

22–28 ni Okosita

Same 102–103; 110; 116–119; 127–128; 135–139; 146–150

“Na Ka Bula Kecega Me Vakacaucautaka na Turaga”

Na ivakavuvuli cava ena Same o vakila ni na veivuke sara vakalevu vei ira na lewe ni nomu kalasi? Ni o vuli tiko ena macawa oqo, vakasamataka na sala mo vukei ira kina na lewe ni kalasi mera kunea na ibalebale ni same oqo.

Vola na Veika o Vakauqeti Kina

Sureta na Veiwasei

Solia vei ira na lewe ni kalasi e vica na miniti mera railesuva na same era a wilika ena macawa oqo, ka sureta e vica mera wasea e dua na malanivosa taleitaki. Vakayaloqaqataki ira mera wasea na veika sa vakavulica vei ira na Yalotabu. E sa vakavinakataka cake vakacava na Same na noda sokalou vua na Turaga ?

Vakavulica na iVunau

Same 102–3; 116

E rawa ni vakacegui keda na Turaga ena noda rarawa.

• Era sa vakila beka na lewe ni nomu kalasi na sala e vakilai kina na dauvolaivola ni Same 102 ? Eda na rawa vakacava ni gole vua na Turaga ni da sa yalolailai se rarawa? Ni ra vulica na Same 102, 103, kei na116 e vale ena macawa oqo, era sa kunea na lewe ni kalasi na veimalanivosa e vakauqeti ira mera gole vua na Turaga ena nodra vakatovolei. Vakayaloqaqataki ira mera wasea na veika era sa kunea, se vakaraica vata vakalasi e so na malanivosa veivakauqeti. Sa rawa mera veivosakitaka talega na lewe ni kalasi na sala sa tokoni ira tiko kina na Turaga ena gauna ni dredre.

• E rawa ni ra taleitaka na lewe ni nomu kalasi mera vola na nodra dui same me baleta na nona vukei ira vakacava na Turaga ena gauna ni veivakatovolei. E sega ni gadrevi me balavu se sivia na veimataqali same—na ivakaraitaki rawarawa ga ni vakabauta, vakavinavinaka, kei na veivakacaucautaki. Sa rawa vei ira na lewe ni kalasi mera cakacaka duadua se veisa, ka mera raicalesu na Same 102, 103, kei na116 me baleta na vakasama eso. Sureta e vica me ra wasea na nodra same, ke ra sa tu vakarau. Sa rawa talega mo lagata vata na sere kei na sala e dau vakacegui keda kina na Turaga, me vaka na “Meu Gole Tu Kivei?” (Sere ni Lotu, naba 71).

  

  Veivakabulai, mai vei J. Kirk Richards

Same 119

Na vosa ni Kalou ena maroroi keda ena Nona sala.

• Me tekivu e dua na veivosaki ena Same 119, sa rawa mo sureti ira na lewe ni kalasi me ra veivosakitaka e dua na gauna era a muria kina e dua na sala me yacova e dua na vanua (e rawa ni veivuke me veitaratara kei na dua ka kerei koya me wasea na ka oqo). Na veika cava soti e vakavuna na dredre ni noda tiko ena salatu? Na cava qai vukei ira me ra tiko dei kina? Sa rawa mo qai droinitaka e dua na sala ena papa ka sureti ira na lewe ni kalasi me ra vola na malanivosa mai na Same 119 ka tukuna na veika sa cakava na Turaga me vukei keda me da tikoga ena Salatu ni Veiyalayalati. Sa rawa mo wasea na itukutuku nei Peresitedi Russell M. Nelson ena “iKuri ni iVurevure” me tiki ni veivosaki.

• E rawa ni yaga vei ira na lewe ni kalasi na kena vakatauvatani na Same 119 ka vakavulica na tiko ena sala ni Turaga kei na ivolanikalou tale eso e vakavulica na dina vata oqo. Sa rawa mo wasei ira vakailawalawa na lewe ni kalasi ka kerea na ilawalawa yadua mera railesuva na itukutuku vakaivolanikalou vakaoqo: Same 119:33–40, 105; Na Vosa Vakaibalebale 4:11–19; 1 Nifai 8:20–28; 11:25; 2 Nifai 31:17–21; Alama 7:9, 19–20. Kerea na ilawalawa yadua me wasea na ka era sa vulica. Solia na gauna vei ira na lewe ni kalasi mera vakasamataka vagumatua na veika era sa vakauqeti mera cakava yavutaki ena veika era sa vulica.

Same 139

Sa kila tu na Turaga na yaloda.

• Na noda kila ni sa kilai keda tiko na Turaga—na noda vakasama kei na ivalavala, kaukauwa kei na malumalumu—ka sa lomani keda o Koya ena rawa ni vakatautaki kina na noda digidigi. Sa rawa mo sureta na kalasi mera raica na malanivosa ena Same 139 ka vakavulica na dina bibi oqo. E tarai keda vakacava ena noda kila na dina oqo? Sa rawa talega vei ira na lewe ni kalasi mera veivosakitaka na sala e rawa ni da sureta kina na Turaga me “dikevi au, na noqu Kalou, ka kila na yaloqu” (tikina e 23).

iKuri ni iVurevure

Na sala qiqo ka rabailailai.

A kaya o Peresitedi Russell M. Nelson:

“Kevaka me na qaqa na noda ilakolako ena bula oqo, eda na gadreva me da muria na veidusimaki vakalou. E kaya na Turaga, ‘Drau vakararavi tiko mai vei au ena vakasama kecega, kakua ni vakatitiqa, ka kakua ni rere’ [Vunau kei na Veiyalayalati 6:36]. A sa vola na Daunisame, ‘Na nomu vosa sa cina ki na yavaqu, ka sa rarama ki na noqu sala’ [Same 119:105]. …

“Ena nomu ilakolako ena bula oqo, o na sotava e vuqa na dredre ka cakava eso na cala. Na veituberi vakaivolanikalou e vukei iko mo kila na cala ka cakava na veivakadodonutaki e gadrevi. Mo na kakua ni lako ena sala cala. Mo vulica sara vakavinaka na mape ni gaunisala vakaivolanikalou. Mo qai tomana na veivutuni kei na veivakadodonutaki e gadrevi mo rawata kina na ‘sala qiqo ka rabailailai sa basika ki na bula tawamudu’ [2 Nifai 31:18]” (“Bulataka na iDusidusi Vakaivolanikalou,” Ensign, Nove. 2000, 17).

Vakatoroicaketaki na Noda Veivakavulici

Okati ira era sasaga tiko. Ena so na gauna era na gadreva me ra okati o ira na na lewe ni kalasi era sotava tiko na dredre me rawa ni ra vakila ni ra lomani talega. Nanuma mo kerei ira me ra vakaitavi ena lesoni e tarava, sureti ira ki na kalasi se me vakadeitaki nodra lakolako mai ki valenilotu. Kakua ni yalolailai kera sega ni kauwai taumada mai ki na nomu sasaga. (Raica na Veivakavulici ena iVakarau ni iVakabula, 8–9.)