29 ni Okosita–4 ni Sepiteba

Vosa Vakaibalebale 1–4; 15–16; 22; 31; Na Dauvunau 1–3; 11–12

“A Rerevaki Jiova Na Vu Ni Vuku”

Ena vakalougatataka vakacava na nodra bula o ira o vakavulica tiko na itukutuku ena Vosa Vakaibalebale kei na Na Dauvunau? Muria na veivakauqeti kei na veika o vakila ni o vuli ka vakavakarau mo veivakavulici.

Vola na Veika o Vakauqeti Kina

Sureta na Veiwasei

E vuqa tu na itukutuku totoka ka qaqa ena Vosa Vakaibalebale kei na Na Dauvunau. Ni bera ni veivosakitaki na veitikina yadua, me vaka na kena e vakatututaki e ra, sureti ira na lewe ni kalasi me ra wasea eso na nodra tikina taleitaki mai na nodra vuli ivolanikalou yadua se vakamatavuvale ena macawa oqo.

Vakavulica na iVunau

Vosa Vakaibalebale 1–4; 15–16; Na Dauvunau 1–3; 11–12

“Mo vakatu daligamu kina ki na vuku.”

• Na veisureti me vakasaqarai na vuku kei na kila-ka e tokaruataki ena Vosa Vakaibalebale. O na vukei ira vakacava na lewe ni kalasi mera wasea na veika era sa vulica baleta na vuku ena gauna ni nodra vuli? E dua na sala o ya e rawa ni o vola na vuku ena papa ni volavola ka sureti ira na lewe ni kalasi me ra vakuria na naba ni veitikina se malanivosa mai na Vosa Vakaibalebale se Na Dauvunau ka ra vakila ni solia na rai titobu me baleta na vuku. (Kevaka ena veivuke sara vakalevu, sa rawa mo vakatura mera vakasaqara na lewe ni kalasi na Vosa Vakaibalebale 1–4; 15–16; Na Dauvunau 1–3; 11–12.) Na cava eda sa vulica baleta na vuku mai na veitiki ni ivolanikalou oqo? Eda sa vakalougatataki vakacava ni da vakasaqara na vuku mai vua na Kalou?

Vosa Vakaibalebale 1–7; 2:5; 3:7; 8:13; 15:33; 16:6; 31:30; Na Dauvunau 12:13

“Mo kakua ni nanuma ni ko sa vuku: mo rerevaki Jiova.”

• E dua tale na iulutaga e kunei ena Vosa Vakaibalebale kei na Na Dauvunau na “rerevaki Jiova” (Vosa Vakaibalebale 1:7; raica talega na Vosa Vakaibalebale 2:5; 3:7; 8:13; 15:33; 16:6; 31:30; Na Dauvunau 12:13). Sa rawa mera wilika na lewe ni kalasi eso na tikina oqo ka wasea na veika era nanuma ni ibalebale ni rerevaki Jiova. E duidui vakacava na rerevaki Jiova mai na vei mataqali rere tale eso? E rawa ni o wasea na veivakararamataki mai vei Elder David A. Bednar e tiko ena “iKuri ni iVurevure.”

Vulica mo Vakararavi vua na Turaga, mai vei Kathleen Peterson

Vosa Vakaibalebale 3:5–7

“Mo vakararavi vei Jiova ena vu ni yalomu.”

• Sa rawa vei ira na lewe ni kalasi mera taleitaka e dua na lesoni ivakaraitaki, ka na vukei ira mera kila vakavinaka na ibalebale ni “vakararavi vei Jiova” ka “kakua ni vakararavi ki na [nodra] yalomatua” (Vosa Vakaibalebale 3:5). Me kena ivakaraitaki, sa rawa mo sureta e dua na lewe ni kalasi me ravi ki na dua na ka kaukauwa ka tudei, me vaka e dua na lalaga. Oti me qai tovolea na tamata oqo me ravita e dua na ka e sega ni kaukauwa, me vaka na itataviraki. E vukei keda vakacava na ivakaraitaki oqo meda kila vinaka na Vosa Vakaibalebale 3:5? Na cava e vakavulica na Vosa Vakaibalebale 3:5–7 me baleta na ibalebale ni vakararavi vei Jiova? Na cava e sega ni dodonu kina meda vakararavi ga ki na noda yalomatua? Eda sa vakila vakacava ni dusimaka na Turaga na noda salatu ni da vakararavi Vua?

Vosa Vakaibalebale 15:1–2, 4, 18,28; 16:24–32

“A vosa vakayalovinaka sa ivakamalumu ni cudru.”

• Me vukei ira na lewe ni kalasi me ra veivosakitaka na sala e rawa ni levu kina na nodra vakacegu ka lailai na veisaqasaqa ena nodra bula, sa rawa mo sureti ira mera wilika na Vosa Vakaibalebale 15:1–2,18; 16:32. Mera qai wasea na veika era sa sotava oti ka vakaraitaki kina na dina ena veitikina oqo. Me ivakaraitaki, na gauna cava a veivuke kina na “vosa vakayalovinaka” me “[ivakamalumu] ni cudru”? (Vosa Vakaibalebale 15:1). Se e rawa ni ra vakasamataka eso na gauna a vakaraitaka kina na iVakabula na veika e vakavuvulitaki ena veitikina oqo (raica na Joni 8:1–11; 18:1–11). Ena rawa vakacava meda muria na Nona ivakaraitaki ni da veimaliwai kei ira na tani?

• E dina ni ra sega ni kila na lewe ni Vosa Vakaibalebale me baleta na levu ni sala ni veitaratara e tiko ena noda gauna, na ivakasala ena Vosa Vakaibalebale 15 kei na16 e rawa ni vakayagataki ena veimataqali veitaratara kece sara. Me vukei ira na lewe ni kalasi mera kila deivaki oqo, sa rawa mo sureta na tamata yadua mera digitaka e dua vei ira na ivolanikalou oqo mera wilika: Vosa Vakaibalebale 15:1–2, 4, 18,28; 16:24, 27–30. Sa rawa vei ira na lewe ni kalasi mera vakayagataka na nodra vosa vakaibalebale me vaka e ivakasala me baleta na veimaliwai vata kei ira eso ena tabana ni vakauitukutuku raraba, ena talevoni, se ena initaneti. E rawa ni ra kunea na ikuri ni ivakasala me veivuke ena “iVosavosa” ena Me iSakisaki ni iTabagone (2011), 20–21.

iKuri ni iVurevure

“Na rere vakalou oya na lomani kei na vakabauti Koya.”

O Elder David A. Bednar e vakamacalataka:

“Na rere vakalou e tubu mai na kila matata dodonu me baleta na ituvaki kei na ilesilesi vakalou ni Turaga o Jisu Karisito, e dua na yalorawarawa ni kena soli na lomada ki na Lomana, kei na noda kila ni na tarogi na tamata yadua ena nona ivalavala ca ena Siga ni Veilewai.…

“Na rere vakalou oya na lomani kei na vakabauti Koya. Ni da rerevaka na Kalou vakataucoko sara, eda sa lomani Koya vakavinaka sara. Ka sa ‘kauta tani na rere na loloma levu sara’ (Moronai 8:16). Au yalataka ni na vakasava tani na iyaloyalo buto ni rere vakayago na cina caudre ni rere vakalou (raica na Vunau kei na Veiyalayalati 50:25) ni da rai kivua na iVakabula, taracake Vua me noda yavu, ka toso ki liu ena salatu ni Nona veiyalayalati ena veidinadinati tabu” (“Ia Era sa Vosota na Nodra Rere,” Liaona, Me 2015, 48–49).

Vakatorocaketaki ni Noda Veivakavulici

Raica matua na Karisito. E sega ni dua na sala vinaka cake me vakatubura nodra vakabauta o ira o vakavulica me vaka na nomu vakaliuca na iVakabula ena nomu lesoni. Ena nomu veivakavulici, sureti ira na lewe ni kalasi me ra tara cake ena “uluvatu ni noda iVakabula, sai koya na Karisito, na luve ni Kalou” (Ilamani 5:12).